DALEK TERABA NON JISAS KRAES MAK TEULU 4 - Gospels of Mark and John in Apma

Maun vehuran u aji ah teruwu birika

¹ Jisas mwesesesrak mwetak mwatwen sileng niah Galili. Tarutmumu rat tepma nesasabisi dalji gonong bi utnen go tebulong ah bat toptop mini ni. Mwisip li aga bi mwesadok tavan bi mwega doptop mini ni.

² Tesesra ni i apma halkawu lengleng li maun vehuran. Le non sesesrakan ba tevep nuhu,

³ “Karu rongtak gololo vehuran ahe. Aji tevan neruwu birika.

⁴ Entorah tekabarani mapmapma, ba datngin rateiah mapma dingin hal bi bwihilni ram mapma negani.

⁵ Datngin rat teiah vali ut ah tan tei temnipnip, ba vet tei kawu alvan. Tei vilbwaleh ba ramdip gonani tan temnipnip basla.

⁶ Entorah al tesisin tokol bi mwisina bi ram matgu, gonani koron teba sip tenga tokol le tan.

⁷ Datngin rat teiah vali ut ah tei utnen kawa niah rowon mwidi. Entorah ratmiu tewep ba kawa ramahi, rat leli bi wan rat bambdok nga.

⁸ Datngin rat teiah vali tan tekabis bi ramiu bi wan ramdok. Datngin ba wan tedi tewep, ba datngin ba wan tedi tokol, ba datngin ba wan tedi ah tedi.”

⁹ Jisas bep mini ni nuhu, “Aji ah dalingan tedok ba nerorongtak dihi.”

Jisas tevep seresere nuhu tei u apma ba tedoptop mini ni li maun vehuran

¹⁰ Entorah Jisas tevan manedi nihken, ba datngin tarutni ah rat rongo apma ah tevep, bi mwegai datngin non tarutni ah ni tesangwul vepnan karu. Raban ben Jisas bi ram uhleli rotvi meramnan maun vehuran niah tetwo mini ni.

¹¹ Jisas balu ini mini ni bep nuhu, “U gimi ba God teskani ililnginan apmate ah matpo surak le non ut kokon mini gimi. Ba u datngin ajini, niah ramdi i lenglengan, ba ramali vehuran nante li maun vehuran.

¹² Metan goah bat rop bwiswis naululan niah tevep nuhu, ‘Ran git bi negit ba ran baga git dihi ut nga, Ran rorongtak nerorongtak ba ran baga ililngi nga, Tigoah rabat git dihi ut bi rabukak dini no kapmwaan bi nepma ben God. U goah God bat vihni gabarani no kapmwaan.’ ”

Jisas tevep rotvi meramnan maun vehuran u birika

¹³ Jisas muhleli i ni nuhu, “Nambih nuhu, kat baililngi meramnan maun vehuran nga ahe? Mangai gavak nagoah kaneililngi sera maun vehuran ah tapmak?

¹⁴ Aji ah teruwu birika ba tekeni aji ah bep dalen God.

¹⁵ Lego ba dalekte maiah vadingin hal tekeni birika niah maiah vadingin hal. Mwegeni ajini naah ram rongo dalekte ba Setan mapma nelep gabarani dini ni.

¹⁶ Datngin ajini ba ram geni birika naah rateiah vali tan temnipnip ah vet kawu alvan. Ram mali vehuran vale buju le rongnan nokokte tekabis,

¹⁷ ba teba sip nga tokol le jine, bi tebadi ngaiviuk. Entorah taron illan mapma u dalekte ah rat rongo ba ramaiah vilbwaleh.

¹⁸ Datngin ajini ram geni birika naah rat teiah vali ut ah tei utnen kawa ah woron mwidi. Ajini nananong niah ram rongo dalek non God

¹⁹ ba toninan ut li uruu modok basla noko. Bi remdoni basla meres, vihninan leut at li uruu mapma bi mogodori dalekte niah rat rongo. Mweleli bi wan no masan tebamdok nga.

²⁰ Datngin ajini ba ramgeni birika naah rat teiah vali tan tekabis. Ajini nananong ah ram rongdihi i dalek non God, niah maskak mini ni, bi ramali vale buju bi wan no masan modok. Datngin ba wan mwidi tewep, ba datngin ba wan mwidi tokol, ba datngin ba wan mwidi ah mwidi.”

Kon ba wesak surani hee nga van baket

²¹ Jisas mumu bep mini ni nuhu, “Aji mweleptete heete bi mambwesak surani van baket? Halan gavak, tebali nga bi mambwesani mere li utnen?

²² Metan goah apma ah matpo surak ba bat tetpo utemsa. Bi tigoah apma ah man netpo surak, ba man netpo utemsa bi mwigitan.

²³ Aji ah dalingan manetka ba nerorongtak dihi.”

²⁴ Mumu bep mini ni nuhu, “Kan buh gololo dalekte ah kam rongo dini nana. Gonani apma ah kaneskani mini aji watwatnende ni ba manei apma nananong niah God maneskak bamula mini gimi. God maneskani ngate kawu mini aji nanong.

²⁵ Aji ah teli apmate, ba maneli ngate kawu vali goah telep bawora, ba u aji ah teli apma nge tewep ba manlevan dini apma nan nga ah teli ah tewep.”

Maun vehuran u miuran non birika

²⁶ Tevan bi Jisas bep mwetani mini ni nuhu, “Ut kokon non God ba tekeni aji naah mwegabarani birika lekonan.

²⁷ Bibi bung ba ban mamju, bibi uteren ba ban muhural. Ba birika ah teruwu ramdi nemiu bi rabi bwerabwerakte. Tebaililngi apma nga ah mweleli ba birika ramdip.

²⁸ Bibi tan ah mweleli ba birika ramiu. Mweleli ba ramdip, limalen ba ramabungak. Rabungak sera ba wan ramdi.

²⁹ Entorah wan matraba ba aji ah teruwu mwegapma nanong neum lelen gonani bibi taron nemkuran.”

Maun vehuran u birika niah tekeni birin wale

³⁰ Jisas muhleli i ni nuhu, “Apma go ngama ah tan bep nuhu tekeni ut kokon non God? Manei maun vehuran apma ah tan netwo uru, niah man dokoi?

³¹ Ut kokon non God ba tekeni birin wale nae, niah biri tewepsislang, entorah maiah vali bujuka bi mwidip.

³² Ban ngama ba malngi ran ah kapkawu, metan goah bwihilni ram mapma bi ramalngi wulki le ran.”

³³ Jisas tesesra ras i non dalekte mini ni li maun vehuran ah rat tapmak, niah tei tewoswos u goah rabat rongdihi, bi neililngi.

³⁴ Teba doptop tenga vautemsa mini tarutni, ba tedoptop nante mini ni li maun vehuran. Ba entorah tegamdima nihken mini non tarutni ba tega sesra ni nanong i meramnan maun vehuran niah tedok nembep mini ni.

Jisas tewotani leng leteh

³⁵ Tei utebwarek, ninge leto nanong ba Jisas bep mini non tarutni nuhu, “Taban rotvi teh.”

³⁶ Ramamlu dini tarutmumu ah ratti, non tarutni ram sip li aga niah Jisas tedi masi lin, bi raban. Datngin agani ratmudi iginan leto nanong.

³⁷ Rat van ngama ba bwera leng mamlu, bi tahkin bawo mbut le agaa, teh tewelwelna newewe le agaa.

³⁸ Jisas tedok dobo al wanten aga, tetpo nemju bi teulung li pillo. Non tarutni rabamta, rabep mini nuhu, “Sesesrakan, kot ba vihni gongai bwelwel natamat nong?”

³⁹ Jisas mudumre bi maskani dalekte tetkol mini leng bep nuhu, “Ut kodi ronga,” mumu bep mini teh nuhu, “Kodi ronga.” Leng mut bi ut mwidi ronga, bi teh mwegabis bamul.

⁴⁰ Jisas bep mini ni nuhu, “U apma ba kamamtaji? Nomi vihni mwetakngaan tebulong ngama?”

⁴¹ Rat temtaji bos. Ram gamdima nembep mini aji go nuhu, “Ani nemai aji apma ahe gonani leng bi teh ba ramru rong mwetani dalen entorah botani nuru?”