DALEK TERABA NON JISAS KRAES MAK TEULU 16 - Gospels of Mark and John in Apma

Jisas tedumre bamul dini mete

¹ Limalen goah ren ah Sabat tenok, ba Meri niah tei aji havin at Magdala bi Salome bi Meri, niah tei dajin Jemes, rat kele wura niah bunun tei tekapkabis, nuhu ramavan nelngi li mamjin Jisas.

² Tei jujubung bwaleh le Sande, entorah metakal tegamra dowo, ba raban ut ah rat lelngi mamjin Jisas iginan.

³ Entorah rat van li hal ba ram salesige nuhu, “Itan ah man balihli vet bahka wan muu mini kidi?”

⁴ Rat vep tapmak gonani vet nong ba tei bwerakte. Rat gamgit ban ba ram gita goah aji tevalihli vet tenong baiang.

⁵ Ratgam sak le muu nong ba ram gita aji malgel, tekoro bwelakte tedap. Tesadok li maun ah mwiji. Rat temtaji tokol entorah rat kita.

⁶ Tehu ba bep mini ni nuhu, “Kan bamtaji tean. Kam dongvi Jisas aji at Nasaret niah rat wah bata vanokon kawolwol. Tebulongte dokah, tedumre bamulte dini mete. Karupma negita tei utnen naah niah rat telngi iginan.

⁷ Karu ben nembep mini non tarutni bi kanmu bep mini Pita nuhu, ‘Ban bawote Galili. Kan butdihi naiginan tapmak goah tevep mini gimi.’ ”

⁸ Ramamlu bi ramrop selal dini ut le muu, gonani rat temtaji tokol i apma ah rat kita. Rat bam doptop nga mini aji entorah rat van gonani rat temtaji tokol.

DATNGIN MALI VEHURAN NIAH RAT WUTDIHI NIAH BAT NOK I DALEK TERABA AHE Meri niah aji havin at Magdala tekita Jisas limalen goah tedumre bamul dini mete

⁹ Limalen goah Jisas tedumre bamul dini mete, le Sande jubung bwaleh le vawonan kubungin Sande, ba tepma bawo ben Meri niah aji havin at Magdala. Tei Meri nananong niah tekoro loah telaviru dini mate.

¹⁰ Meri tevan bi bep mini tarut non Jisas. Ratti nedeng, bi rongnan nokok tei tekapma tokol. Ban bep vehuran nong mini ni.

¹¹ Entorah rat rongo goah tevep nuhu Jisas tedumre bamul dini mete, bi Meri tekita, ba rat ba bihnite mwetaknganan vehuran nga nong.

Jisas tepma ben datngin non tarut nuru karu

¹² Tei limalen, ba mamjin Jisas mwilih. Mapma ben datngin non tarut nuru karu entorah ratru hural ban li hal.

¹³ Limalen goah ratru gita, bi ramrupma nembep mini datngin non tarutni. Nannga, ba rat ba vihnite mwetaknganan apma nga ah ratru vep.

Jisas tepma ben non tarutni niah tei ni tesangwul vepnan bwaleh

¹⁴ Temui mwetak limalen, ba Jisas mapma ben non tarutni niah tei ni tesangwul vepnan bwaleh, entorah ratti negana. Mabikat bee gonani rat ba vihnite mwetaknganan nga, bi u gonani buju tetkol basla, u goah rabat vihni mwetaknganan apma ah rat rongo, dini goah rat vep nuhu rat kita limalen goah tedumre bamul dini mete.

¹⁵ Bep mini ni nuhu, “Karuban li uruu seranae bi nebep rorop i nok dalek teraba mini aji seranae.

¹⁶ Ajinan ah man bihni mwetaknga bi mweleleh, ba God man bamwesa. Ajinan ah man ba vihni mwetaknga nga ba aji nanong man mat.

¹⁷ Goah rabihni mwetaknga ba ililnan rowok tegol man ne kak mini ni. Manei le hal ba ran goro loah. Bi raneililngi go ran doptop li dalekte watnende.

¹⁸ Raneililngi go ran buhu teltel niah maililngi go mahi aji entorah aji mambuhu. Tigoah ran nemni apma tekapma ba ran ba mat nga ini. Tigoah ran nelngi ngaa li goah ram ras, ba no rasan manok dini ni.”

Jisas tesamul le bini

¹⁹ Limalen goah Subu Jisas, tedoptop sera mini ni bi God mwelep bamula mwesak mere le bini. Nanong ba mwesadok li maun God ah mwiji.

²⁰ Non tarutni nong raban nedoptop li vini seranae ah iginan. No Subu teum mini ni bi tebeji ni, teleli ba apma ah rat vep ba rowon tei tedok, gonani teskani ililnan rowok tegol mini ni le no uman.

MALI VEHURAN GO NIAH RAT WUTDIHI NIAH BAT NOK I DALEK TERABA AHE

²¹ Havinni nong ram mapma ben Pita bi walun non mweranni bi ramaskani vehuran apma ah rat rongo, niah ajini rat vep mini no.

²² Tei limalen goah leutni nong tekap ba Jisas maskani vehuran mini ni. Vehuran nong ba tei dalen kavavamwas, bi tei sangbak bi masan tedok lelen. Teleli non tarutni nuhu ranesro vehuran nong ban li uruu seranae.