DALEK TERABA NON JISAS KRAES MAK TEULU 15 - Gospels of Mark and John in Apma

Jisas tedi boswos lemtan Paelet

¹ Tei jubung bwaleh ba saleanni le valin God ram sasabisi mini goah rat wuhu Temwat bi lemtan tarutni bi goah ratei tarutnan toptowan, bi ram leli no hal. Raboji bata Jisas bi ramali ban ben Paelet.

² Paelet muhleli vehuran ini bep nuhu, “Kik ba kobi subunan Jiusni?” Jisas balu ini bep nuhu, “Nana nanong go kobep.”

³ Saleanni le valin God rabep leut ah rat kapma vanokon Jisas.

⁴ Paelet muhleli mwetani ini nuhu, “Apma tebulong ah koma walu vehuranni rahe ini? Kita leut halkawu lengleng ah rabep vanokom ah rat kapma.”

⁵ Tehu ba Jisas teba vepte vehuran mase bwaleh nga. Paelet tetkoh tokol i apma nong.

Paelet teveveik i Jisas nuhu man mat radanae

⁶ Tedok nei le taron kanleutnan Pasova ba Paelet tedok neling gabarani aji dini ut le valin illan niah Jiusni rat uhleli ini.

⁷ Tei le to nanong ba aji tedi le valin illan tei han ah Barabas, mini ajini ah rat bwale dobo mini aji kawunan vini. Bi ratok neih las i ajini.

⁸ Entorah tarutni rat sasabisi utbwaleh bi ram uhleli i Paelet nuhu nemaleli tapmak goah tedok neleli.

⁹ Paelet muhleli i ni nuhu, “Kamdoni nuhu nama ling gabarani subunan Jiusni mini gimi?”

¹⁰ Tevep tapmak gonani tekita goah saleanni le valin God, ba rat telngi Jisas li ngan, tei ninge u gonani rat kitriani Jisas.

¹¹ Saleanni le valin God rabinvine jinen tarutni nuhu ran ba uhlelite Jisas an ba ran uhleli Barabas.

¹² Paelet modoptop bep nuhu, “Kamdoni nuhu namaleli apma mini aji ah kamahu i subu non Jiusni?”

¹³ Ram nga bamul ban mini rabep nuhu, “Kowah bata vanokon kawolwol.”

¹⁴ Ba Paelet muhleli i ni bep nuhu, “Kapmwaan apma ah teleli?” Tehu ba ram ngaa ngate, rabep nuhu, “Kowah bata vanokon kawolwol.”

¹⁵ Paelet mwiling gabarani Barabas nuhu bat leli ba tarutni rabatti ronga. Mweleli ram riji Jisas bi malngi ban mini ni u goah rama wah bata vanokon kawolwol.

Soldiani rat mamaplel i Jisas

¹⁶ Soldiani ramali Jisas mwesak le koron valin Paelet. Tei han ut iginan ah Praetoriam. Bi ramahu riaknan soldiani mapma ut bwaleh.

¹⁷ Rat koro bwelakte tememe vanokon Jisas. Ramali kawa ah rowon tedi bi ramleli tedoki bujun, bi ramabwesani lin.

¹⁸ Rabawo netrani ngaa mini tekeni goah rabat vihni meresnan. Rabep mini nuhu, “Kabihni meresnam subunan Jiusni.”

¹⁹ Ramriji bwelan bujun i nguduka, bi ram gasu vanokon. Ramaiah li bukulsu bi ramdingdu nokon.

²⁰ Entorah rat mamaplel sera ini, bi ram goro bwelakte tememe bahka niah tei tekeni bwelan subu, bi ramgo bamula bwelan vanokon. Bi ram matkae ban ut ah ratwah bata vanokon kawolwol iginan.

Ratwah bata Jisas vanokon kawolwol

²¹ Entorah rat van li hal ba soldiani rabutdihi aji han ah Saemon. Tei ni aji at li vini ah Saerin. Tei teman Aleksanda nuru Rupas. Ramdi jukun nuhu, nemaselkani kawolwol non Jisas.

²² Ramali Jisas ban ut ah rat tehu i Golgota. Meramnan nuhu, “Ut ah tei tekeni sun bujun mete.”

²³ Ramaskak dopmi waen ah rat leli mini apma tekaka nuhu nemamni, ba Jisas tebaleptenga.

²⁴ Rabwah bata vanokon kawolwol, bi rabahtani bwelanni mapma mase. Rabohni dais metan goah rabat wutdihi nuhu itan ah batlepte nokon.

²⁵ Tei le to telapet jubung, entorah ratwah bata Jisas vanokon kawolwol.

²⁶ Ratul bata vehuranni niah rat wutdihi nokon Jisas. Vehuran i rat teulu nong ba tevep nuhu, “Subunan Jiusni ahe.” Ram dakrani vehuran nong nokon kawolwol non Jisas.

²⁷ Ramali ajinan lasan karu, bi rabwah bata nuru nokon kawolwol go maun Jisas. Rat takrani go li maun ah mwiji bi go li maun ah mwii.

²⁸ Tega rop bwiswis nanong nagoah rat vep le ululan at mate niah tevep nuhu, “Tewulkian mini ajinan lasanni.”

²⁹ Tarutni ah rat hural li hal, ramdok nebohni buju bi ram raji bi rabep nuhu, “Aha, kik naah niah kot vep nuhu kon sengsegelani valin God bi kom lel lihi i goah teraba, niah maneli ren kajil nge ba monok?

³⁰ Kosipma dopmi tavan dini kawolwol, bi kobamwesa bamula kik.”

³¹ Saleanni le valin God, bi goah rat wuhu Temwat ramdima nebep mini ni nuhu, “Tevamwesa aji watwatnendeni, u apma ba teba vamwesa bamulani nga?” Ramdi nemanih lelei.

³² “Tekabis nuhu Kraes niah subunan Isrelni nesupmulma dini kawolwol metan goah tan vihni mwetaknganan.” Ajinan lasan nuru niah rat tehi nuru maun Jisas ratru sok masen goah rat raji Jisas.

Jisas temat

³³ Tei loloknan ren ba bwera wulmet morori vini nong, tei aoa kajil ngate.

³⁴ Tei le to kajil ba Jisas mwenga rah bwerakte bep nuhu, “Eloi, Eloi, lema sabaktani?” Meramnan nuhu, “Nok God, nok God, u apma ba komling gabarani nama tapmak ahe?”

³⁵ Datngin tarutni ah rat rongo, rabep nuhu, “Karu rongo mahu Elaeja.”

³⁶ Aji rei ni ban mali koten bi mosongi le waen bi ban maskani nokonwaka vawan bongon Jisas. Bep nuhu, “Asi, tam gita gitasi nuhu Elaeja man sipma nesru vatavan dini kawolwol?”

³⁷ Jisas mwenga rah bwerakte bi mat.

³⁸ Bwera sereul ah tetka goro ut sangbak le valin God mamret loloknan. Tevawora mere bi mamret mwisip tavan.

³⁹ Salenan soldiani tedi sasari kawolwol non Jisas. Bep nuhu, “Mwetaknga letlet nangate nuhu tei Nujun God ahe.”

⁴⁰ Havinni ratti nge nawut negit. Goah rat sok masen havinni nong ba tei Meri niah tei aji havin at Magdala, bi Salome, bi Meri, niah tei dajin Jemes niah tei jihikte, bi Joses.

⁴¹ Ratahkuru Jisas, entorah tedi Galili bi rat tok nebeji. Havinni go halkawu lengleng ratmudi iginan le to nanong, niah rat tepma jukun dini ut Jerusalem.

Rat tipmi Jisas

^42-43 Tevan sasari ut tebwarek ba Josep aji at Aramatia mapmabis. Tei ni datngin ajinan toptowan, niah rat rong mwetani. Bi tewovani ut kokon non God niah batgapma. Ren ah Sabat ba tei tepma sasarite, Josep ban bi muhleli mamjin Jisas i Paelet ah tei tebamtaji tenga.

⁴⁴ Paelet tetkoh tokol i goah terong goah Jisas temat vilbwaleh. Mahu aji le salenan soldiani bi muhleli ini nuhu, “Jisas temate?”

⁴⁵ Tei limalen goah Paelet terongo apma ah salenan soldiani tevep, bi mwegamko i mamjin Jisas mini Josep.

⁴⁶ Josep tekele sereul tedap masi. Ban masru mamjin Jisas dini kawolwol bi mulubwa i sereul nong. Ban malngi le muu niah rat leli le vet. Balihli bwera vet goro wan muu nong.

⁴⁷ Meri niah tei aji havin at Magdala, bi Meri goah tei dajin Joses ratti negita, bi rat kita ut ah rat telngi Jisas iginan.