DALEK TERABA NON JISAS KRAES JON TEULU 9 - Gospels of Mark and John in Apma

Jisas te vamwesa aji ah tewo i matbi

¹ Le goah Jisas te hural dobo, ba ban butdihi aji ah tewo i matbi.

² Non tarutni ram uhleli ini nuhu, “Sesesrakan, aji ahe tewo i matbi ba tek kapmwaan non tan, non ma io non teman nuru dajin?”

³ Jisas bep nuhu, “Non matbi ba tebaite ni nga u kapmwaan non teman nuru dajin io non, ba u gonani man gitan na rowok tegol non God nokon.

⁴ Tan lel ras i uman non aji ah tesro nana entorah ut mweren ngama, u gonani ut tebung mapma niah taron goah aji man bamu um nga.

⁵ Le to niah nam dok li uruu ba nam bi heren ut li uruu.”

⁶ Limalen goah te vep tedapmak nong, bi mwe gasu vali tan bi mwe leli lebe bi masrani li birin metan matbi nong.

⁷ Bep mini nuhu, “Ko van bi kom lehvi lemtam le sileng ah Saeloam.” Meramnan ih ah Saeloam nuhu “Ram masro”. Aji nong ban bi mwe lehvi lemtan, tegam mulma ba birin metan mwe gabis.

⁸ Davin ni bi tarut sera ah rat kita goah te sadok dobo mwate. Ram uhleli nuhu, “Tebaite aji nga ahe niah te sadok dobo neukan?”

⁹ Datngin ra bep nuhu, “Ni na ngate,” ba datngin ra bep nuhu, “Tebaite ni nga, ba ratru sabwaleh nge.” Ba aji nong mo doptop bi bep nuhu, “Nana na ngate.”

¹⁰ Ram uhleli ini nuhu, “Birin metam tewo gavak?”

¹¹ Ba aji nong bep nuhu, “Aji ah han ah Jisas te leli lebe i masrani nokon birin metak, bi bep mini nana nuhu, ‘Ko van nelehvi lemtam le sileng ah Saeloam.’ Bi nam ban nam lehvi lemtak, tei limalen goah nat lehvi bi birin metak mwe gabis bamul.”

¹² Ram uhleli ini nuhu, “Bi aji nong te van ibe nong?” Balu ini bep nuhu, “Nat baililngi nga.”

Aji nan lelnan Temwat rat kihikihi le halan goah goah Jisas te vamwesa matbi

¹³ Ram mwatkae aji ah tei matbi mwate, ban ben aji nan goah rat wuhu Temwat.

¹⁴ Le ren ah Jisas te leli lebe bi masrani nokon birin metan aji nong ba tei Sabat.

¹⁵ Aji nan goah rat wuhu Temwat ram uhleli mwetani i aji nong na halan goah te kit bamula ut. Bep mini ni nuhu, “Te leli lebe bi masrani nokon birin metak, bi nam lehvi bi nanong nam git bamula ut.”

¹⁶ Datngin aji nan goah rat wuhu Temwat ni ra bep nuhu, “Aji nong ba teba sipma tenga ben God, gonani tebatpe temwat nga ah mwi di u ren ah Sabat.” Datngin ra bep nuhu, “Gavak nagoah aji ah bibi aji nan kapmwaan man leli ililnan rowok tedapmak go ahe?” Te gam leli sabwaren le mase.

¹⁷ Ajinan lelnan Temwat ram uhleli mwetani i aji nong nuhu, “Ko bep nuhu te leli ba birin metam mwe gabis. Ba ko bep nuhu mwe gap u aji naong?” Ba bep nuhu, “Ni ajinan dalen God.”

¹⁸ Jiusni rat ba vihnite mwetaknga nan go nga ah aji nong tei matbi mwate. Tei mulngan na ngate ah rat tehu dajin nuru teman.

¹⁹ Ram uhleli i nuru nuhu, “Nujumru ahe? Kamru bep nuhu tewo bi tei matbi? Halan gavak nagoah nanong ba mwi git bamula ut?”

²⁰ Dajin nuru teman ramru balu ramru bep nuhu, “Kamru ililngi goah nujumaru na ngate, bi kamru ililngi goah tewo ba tei matbi.

²¹ Ba kat baru ililngi nga nuhu itan ah te sangvi birin metan. Bibi aji kawute nanong karu uhleli ini ba nema vep mini gimi.”

²² Teman nuru dajin rat vep tepmak gonani ratrumtani Jiusni gonani Jiusni rat vepbwaleh nuhu, aji ah man bep nuhu Jisas bi ni Kraes na ngate, ba ran bohni dini ut le valin tangroan.

²³ Tei bujun nanong na goah dajin nuru teman ratru vep nuhu, “Bibi kawute nanong karu uhleli ini.”

²⁴ Tei va karuan ba ram uh metani aji i tei matbi nong bi ra bep mini nuhu, “Ko kala God nuhu ko bep mwetaknga! Kam maililngi nuhu, aji ahe ba bi aji nan kapmwaan.”

²⁵ Aji nong balu ini bep nuhu, “Nat baililngi nga nuhu bi ni aji nan kapmwaan io tebaite aji nan kapmwaan nga ba apma bwaleh nge ah nam maililngi nat tei matbi ba nanong ba nam gita ut.”

²⁶ Ra bep mini nuhu, “Tei leli apma mini kik, te sangvi gavak i birin metam?”

²⁷ Aji nong bep nuhu, “Nat vepte mini gimi ba kat ba rorongtak nga. U apma ba kam mamru rong mwetani, nambih nuhu kamu doni nuhu kamai datngin non tarut?”

²⁸ Ram raji aji nong bi ra bep nuhu, “Kik bobi datngin non tarut, ba gema ba kabi tarut non Moses.

²⁹ Kam maililngi nuhu God te dotop mini Moses, ba u aji nong ba kat bililngi nga bi kat bililngi ut nga ah tepma iginan!”

³⁰ Aji nong balu ini bep nuhu, “Halan tebelabelak gonani gimi kat bililngi ut nga ah tepma iginan, ba nan nga ba te sagvi birin metak.

³¹ Tam maililngi goah God teba rongtani aji nan kapmwaan nga. Ba morongtani tarutni ah ram gogogo noko vaben, bi ram leli non tonian.

³² Mulngan ah uruu te vawo ba aji tebado rong tenga nuhu aji nema sangvite birin metan aji ah tewo i matbi.

³³ Tigoah aji ahe bat ba sipma tenga ben God ba bat badi tenga nelelte apma bwaleh.”

³⁴ Ra balu ini ra bep nuhu, “Kot wo bi ko miu dobo le kapmwaan bi ko bep nuhu koma sasra?” Ra bohni aji nong dini ut le valin tangroan.

Rabi matbi le no vihnian

³⁵ Jisas te rongo goah rat wohni aji nong dini ut le valin tangroan. Tehu ba butdihi, bi bep mini nuhu, “Ko bihni mwetaknga nan Nujun Aji?”

³⁶ Aji nong balu ini bep nuhu, “Ko vep aji nanong mini nana, subu, metan goah nan bihni mwetaknga nan!”

³⁷ Jisas bep mini nuhu, “Kot kitate bi ni nai mo modoptop mini kik nong.”

³⁸ Aji nong bep nuhu, “Nam binhni mwetaknga nam, Subu.” Miah vatavan bi mwi dingdu nokon.

³⁹ Jisas bep nuhu, “Nat sipma li uruu nuhu nana sasa metan go, goah ram ut ba ran ba gita ut nga bi goah ra bi matbi ba ran gam gita ut.”

⁴⁰ Datngin aji nan goah rat wuhu Temwat ni niah rat ti ben rat rongo goah tevep bi rabep mini nuhu, “Nambih nuhu kobep tepmak ba kot ba lepte vihnian nga nuhu goi gema bi kamui matbi?”

⁴¹ Jisas balu ini bep nuhu, “Tigoah kabat tei matbi ba aji bat ba vep gimi nga u nomi kapmwaan. Ba ka bep nuhu kat baite matbi nge, bi mwe sesra nuhu kam di rada ngama le kaen nomi kapmwaan.”