DALEK TERABA NON JISAS KRAES JON TEULU 4 - Gospels of Mark and John in Apma

Jisas nuru aji havin at Sameria

¹ Aji nan goah rat wuhu Temwat rat eongo goah Jisas teli non tarutni ngate hal kawu sasviri Jon bi mwe lehvi.

² Tei tebaite Jisas nga ah te lehvi tarutni ba tei non tarutni.

³ Entorah Jisas terongo apma ah rat vep bi mamlu dini ut Judia bi ban Galili.

⁴ Hal ah tevan lin ba tevan al Sameria.

⁵ Tepma li vini ah Saeka niah Sameria sasari tan ah Jekob teskani mini nujun ah Josep.

⁶ Tei lolok nan ren. Huralan temis nokon Jisas bi ban mwesadok membe wan murun sileng niah Jekob tekili.

⁷ Jisas tesadok ngama ba aji havin at Sameria mapma nuhu nema utvite sileng. Jisas bep mini nuhu, “Ko lepte sileng ba namamni.”

⁸ Non tarutni rat van li vini nuhu rama kelte hinak.

⁹ Aji havin at Sameria nong bep mini Jisas nuhu, “Gavak gonani kik Jiu bi nana aji havin at Sameria. Halan gavak nagoah kom uhleli sileng i nana?” Gonani Jiusni ba rat ba kan nga le ruka bwaleh ni at Sameria.

¹⁰ Jisas balu ini bep nuhu, “Tigoah ko bat teililngi sekakan non God bi nana niah nam uhleli sileng i kik ba ko bat uhleli sileng i nana bi namba teskani selngan masan mini kik.”

¹¹ Aji havin bep mini nuhu, “Subu, nom baket tebulong bi murun sileng ahe tevanang solsol. Ko mali selngan masan nanong ibeh?

¹² Jibima ah Jekob ba tekili murun mama sileng ahe, bi nujunni bi bilan sipsip rat min dobo lelen. Kon ba vep nga nuhu rowon tedok ngate vali Jekob?”

¹³ Jisas balu ini bep nuhu, “goah ram mamni sileng ahe ba ram mamdi mwetaknge limalen.

¹⁴ Ba goah ran nemni sileng ah nan neskani ba bamdi mwetak nga limalen gonani sileng ah nam maskani ba man gam geni sileng sal niah mwaskani masradaan mini ni.”

¹⁵ Aji havin nong bep mini nuhu, “Subu, ko skani sileng nanong mini nana gonani ut ahe nawut lengleng bi metan goah nan bamudi nga nepma metak dokahe. Bi nan bamudi mwetak nga.”

¹⁶ Jisas bep mini nuhu, “Ko van matan hoam bi kamrupma dokah.”

¹⁷ Aji havin nong bep mini nuhu, “Nok subu tebulong.” Jisas balu ini bep nuhu, “Mwetaknga na goah ko bep nuhu nom subu tebulong.

¹⁸ Ba kom lakte i aji kalim. Bi goah kom sadok naben nong ba tebaite majin hoam nga. Ba mwetaknga nangate nagoah ko bep nuhu hoam tebulong.”

¹⁹ Aji havin bep mini nuhu, “Subu, nam gita kik nuhu kobatei ajinan dalen God.

²⁰ Jibimani at Sameria ba rat tangro mini God li rep ahe. Ba gimi ah kabi Jius ba ka bep nuhu utnen tangroan mini God ah Jerusalem.”

²¹ Jisas bep mini nuhu, “Aji havin ko vihni mwetaknga nak, to manepma niah gimi kan bam dangro nga mini Tadat li rep ahe io Jerusalem.

²² Gimi ah at Sameria ba kat baililngi aji nga ah kam dangro nokon. Ba gema ah kabi Jius ba kam maililngi aji ah kam dangro nokon u gonani kavamesanakte ba mapma dahkuru Jiusni.

²³ Ba to manepma bi mwidi nanong niah mamjin tarutni nan tangroan ran dangro le tabite kokon mini Tadat bi le mwetaknga. Tarut nan tangroan nananong niah Tadat modoni nuhu ran dangro nokon.

²⁴ God bibi tabite kokon, bi goah ran dangro nokon ba ran dangro nokon le tabite kokon bi le mwetaknga.”

²⁵ Aji havin nong bep mini nuhu, “Nam maililngi nuhu Mesaea niah Kraes ba man nepma, bi entorah manepma ba man bep sera leutnae mini gima.”

²⁶ Jisas balu ini bep nuhu, “Abe nana naah, ni nam doptop mini kik ahe.”

²⁷ Temui vilnge ba tarut non Jisas ram mulma. Rat tetkoh tokol, i goah Jisas te doptop mini aji havin. Ba aji le ni teba ga uhleli nga nuhu, “Kom doni apma? Kom doptop mini aji havin ahe u apma?”

²⁸ Aji havin morop lingi tangin man sileng bi mul bamul li vininan. Ban bep mini tarutni at iginan nuhu,

²⁹ “Karupma negita aji bep harihari leut mini nana niah nat leli. Nambih nuhu nema i Kraes naah?”

³⁰ Ram mamlu dini vinina bi ra ban ben Jisas.

³¹ Tarut non Jisas ram uhleli ini nuhu, “Sesesrakan, ko kante apma sibah!”

³² Jisas balu ini bep nuhu, “Kak hinak tedok niah kat baililngi nga.”

³³ Non tarutni ram di neuhleli i aji go rabep nuhu, “Nambih nuhu aji te skaktete hinakte mini?”

³⁴ Jisas bep mini ni nuhu, “Kak hinak naah nan nemko mini aji ah tesro nana. Bi nan nok i non uman niah te skani mini nana nuhu nan leli.

³⁵ “Dalemi matpo niah ka bep nuhu, ‘Wul kavet ngama ba mwegai taron nemkuran.’ Ba na bep mini gimi nuhu karu git gololo ut leko gonani leut sera ram mwatraba, bi nanong ba bi taron nemkuran.

³⁶ Aji ah mamku ba mwe gelan u gonani mweapko ruwurupan u masradaan. Aji ah mamku bi aji ah muruwurup ba rongnan nokoru mwe gabis tesabwaleh.

³⁷ Vehuran ahe ba mwetaknga nangate, aji go muruwurup ba aji go mwegamumku.

³⁸ Nat tesro gimi ban leko niah tei tebaite leko nami nga, tei leko nan aji watnede metan goah gel nami bat gam dok uru.”

³⁹ Hal kawu lengleng nan at Sameria rat vihni mwetaknga nan Jisas u toptowan non aji havin niah tevep nuhu, “Te dop harihari leut mini nana niah nat leli.”

⁴⁰ Entorah at Sameria rat tepma ben bi ram leli ini nuhu nema dok sosoksi bee. Modok bee tei ren karu.

⁴¹ Tarutni halkawu lengleng ngate ah rat vini mwetaknga nan u non dalekte.

⁴² Ra bep mini aji havin, “Nanong ba ka bihni mwetaknga nan aji ahe ni tenga u dalem. Ba u gonani gema kamat rongo non toptowan bi kam maililngi nuhu ni na ngate ah bi kavamwesa nan tarut at li uruu.”

Jisas tevamwesa nujun aji kawu

⁴³ Limalen goah Jisas tedok iginan ren karu ni mamlu bi ban Galili.

⁴⁴ Jisas ma ah tei tevep nuhu, “Ajinan dalen God ba rong mwetak nan mabulong entorah modoptop bamul ma li vin nan.”

⁴⁵ Entorah te wupngak Galili ba tarutni at iginan rongnan noko tekabis ini u gonani rat kita apma ah te leli entorah rat van le kanleut nan Pasova Jerusalem.

⁴⁶ Jisas mul bamul Kena ah Galili ut ah te wukani sileng vali waen iginan. Aji kawu non kapman te dok iginan ah nujun te ras dobo Kapaneam.

⁴⁷ Entorah te rongo goah Jisas temlu dini ut Judia noh nema van Galili bi ban ben bi mu uhleli ini nuhu nema van Kapaneam ne vamwesa nujun ah tetpo metan mete.

⁴⁸ Jisas bep mini ni nuhu, “Gimi ba kan ba vihni mwetaknga nga, tigoah kan ba gitate ililnan rowok tegol bi samsamrakan nga.”

⁴⁹ Aji kawu nong balu ini bep nuhu, “Subu, kopma vil gonani nujuk ba mat.”

⁵⁰ Jisas bep nuhu, “Ko mul nujun man mas nge.” Aji nong te vihni mwetaknga nan dalen Jisas bi mul.

⁵¹ Te van ngama li hal ba butdihi atnan non karih ni bi ra bep mini nuhu, “Nujum man mas.”

⁵² Muhleli i ni nuhu, “Non rasan te sisirop entorahapma?” Ra bep mini nuhu, “Tei le to bwaleh nanip entorah mahkit te van dini.”

⁵³ Teman bihni lenga goah tei le to nananong ah Jisas te vep mini nuhu, “Nujum man mas.” Ni bi nujun ni sera ra bihni mwetaknga nan Jisas.

⁵⁴ Tei karuan ililnan rowok tegol nananong ah Jisas te leli entorah temlu dini ut Judia bi ban Galili.