DALEK TERABA NON JISAS KRAES JON TEULU 2 - Gospels of Mark and John in Apma

Leki li vini ah Kena

¹ Ren karu tevan ba ram leli leki li vini ah Kena niah Galili. Bi dajin Jisas tevan nesok masen.

² Rat tehu Jisas mini non tarutni nuhu batsok masen leki nanong.

³ Entorah rat min sera ma waen ba dajin Jisas bep mini nuhu, “Nanong ba mawaen tenok.”

⁴ Jisas bep mini nuhu, “Koba vepansi mini nana gonani nok to tebadopma nga.”

⁵ Dajin Jisas bep mini ajinan uman ni nuhu, “Kan lel radanai apma ah man bep mini gimi.”

⁶ Tangin sileng tesansadok iginan tei telapaleh niah rat leli i tanmalkobo. Tangin sileng ni nong ba goah bwaleh bat wuhu gallan ngawul karu io ngawul kajil, gonai halan lehlehvikan non Jiusni ba tei halkawu lengleng niah rat toni sileng uru.

⁷ Jisas bep mini ajinan umanni nuhu, “Karu dihri sileng vale tangin sileng ni nong.” Ram dihri ah rat wewelip sera.

⁸ Bi bep mini ni nuhu, “Nanong ba karu utvite sileng nong bi kamali ban salenan kanleutan.” Ram utvi bi ram mali ban.

⁹ Tehu mini dopmi ba tegamui waen, tei telekelgini ut ah tepma iginan. Ba aji nan umanni rat teililngi. Mahu aji ah telak

¹⁰ bi bep mini nuhu, “Aji seranae ba ram dihri bawora kabis nan waen mini tarutni limalen ba mwegai sonorin. Ba kik, ba kot wesak gololo kabisnan si!”

¹¹ Jisas teleli vawonan non ililnan rowok tetkol ni nong li vini ah Kena niah Galili. Tei iginan ba tesesra non meresan bi non tarutni rat vihni mwetaknga nan.

¹² Tei limalen ba Jisas bi dajin bi kisani bi non tarutni raban nedok sosok li vini ah Kapaneam.

Jisas tevan le valin God

¹³ Jisas tesak Jerusalem le sasabisian non at Isrelni le kanleut nan Pasova u gonani taron tei tedi bwelwel.

¹⁴ Tehu ban le koron valin God ba butdihi tarutni ah ratti newos i bila buluk bi bila sipsip, bi bila bwihil. Bi goah ratti nehli mane non tarutni.

¹⁵ Mweleli rubu i biribiri kawa. Bi mogoro tarutni mini bila buluk, bi sipsip dini koron valin God. Mwedai buwukani bwelakain no mane bi mwegabarak bwotwot i no mane.

¹⁶ Maskani dalekte mini goah ratti newos i bila bwihil nuhu, “Karu apko bilami bwihil baiang! Kaba lelian ba valin Tadat nema gamui valin nomi wosan.”

¹⁷ Non tarutni ra bihni lenga mwetani vehuran ah mwatpo le ululan at mwate niah tevep nuhu, “Valin God ba nan ba mapmaplelnga ini, tekeni goah nat ba mamaplil nga i kaba.”

¹⁸ Jiusni rabep nuhu, “Uman kawu apma ah kon leli niah kaman gita ililnan nuhu nom woswosan tedok u goah kon leli apma ah tedapmak ahe?”

¹⁹ Jisas balu ini bep nuhu, “Karu sengsegelani valin God ahe ba manei ren kajil nge ba nam lep dumre ini.”

²⁰ Ra balu, rabep nuhu, “Valin God ahe ba tei dam ngawul kavet vepnan telapaleh nagoah telelan. Ba kom gavep nuhu manei ren kajil nge ba kom lel bamula?”

²¹ Ba valin God ah Jisas tedoptop nokon ba tei mamjin.

²² Tei limalen goah tedumre bamul dini mete ba non tarutni ram gabihni lenga mwetani vehuran ah tevep. Rat vihni mwetaknga nan dalekte ah mwatpo le buk sanbak at mwate, bi mwegai dalen Jisas.

Jisas maililngi aji sera

²³ Ajini halkawu lengleng rat vihini mwetaknga nan Jisas u ililnan rowok tegol ah teleli entorah tedi Jerusalem le kanleut nan Pasova.

²⁴ Jisas tei tebaite sasari ni nga tokol gonani teililngi sera jine.

²⁵ Aji batba vep seresere halan no vihnian nga mini gonani teililngi sera apma ah tedi le jine.