DALEK TERABA NON JISAS KRAES JON TEULU 18 - Gospels of Mark and John in Apma

Rat wuhu Jisas

¹ Tei limalen goah Jisas te dangro sera, ni, bi non tarutni ra ban rotvi bwele niah rat tehu i Kedron. Leko tetpo iginan bi Jisas ban lelen mini non tarutni.

² Judas, niah tewos i Jisas, ba teililngi ut iginan gonani Jisas tedok nangate nevan iginan mini non tarutni.

³ Judas ban leko nong, tetkae soldia ni bi goah rat sesep le valin God. Tarutni nong ba goah aji salean le valin God bi goah rat wuhu Temwat rat tesro ni. Rat tesku hee, bi datngin ram masku bwat kaba, bi ram apko leut ah rat bwal ini.

⁴ Jisas teililngi sera leut ah bat kap vanokon, bi mu hural ban lemtan goah rat tepma nuhu rama wuhu. Bep mini ni nuhu, “Itan ah kam dongvi?”

⁵ Ra balu ini ra bep nuhu, “Kam dongvi Jisas niah aji at Nasaret.” Jisas balu ini bep nuhu, “Abe nana nahe.” Judas ah tewos ini ba tedi nge bee.

⁶ Entorah Jisas te vep nuhu, “Abe nana nahe,” bi ram suk bamul bi ram maiaiah vatavan.

⁷ Jisas mu uhleli mwetani i ni nuhu, “Ani itan ah kam dongvi?” Ba ra balu ini ra bep nuhu, “Kam dongvi Jisas aji at Nasaret.”

⁸ Jisas bep mini ni nuhu, “Nat vepte mini gimi nuhu, ‘Nana nahe,’ ba tigoah kan dongvi nana ba goni rahe ra van.”

⁹ Te vep tapmak gonani vehuran ah rat vep uru bat rop bwiswis. Niah te vep nuhu, “Tadat, aji rei goah kot teskani mini nana ba teba slal tenga bwaleh.”

¹⁰ Saemon Pita te kavin buan non kuran. Mwe reva vaut bi mwe das behe maun dalingan aji han ah Malkas. Malkas nong ba tei atnan karih non aji kawu nan ut le valin God.

¹¹ Jisas bep mini Pita nuhu, “Ko songin bamula nom bu le tangin! Kon ba vihni tean nuhu nan ba minte sengan illan nga niah Tadat man neskani ba nan min rada naini?”

Rat teli Jisas ban ben Anas

¹² Soldani nan vini ah Rom, mini salena, bi aji nan sesepan non Jiusni rabu bata Jisas bi ra boji bata.

¹³ Bi ram mwatkae bawora ban ben Anas. Anas nong ba tei taslan Kaeapas niah tei ni aji kawu nan ut le valin God le dam nanong.

¹⁴ Tei Kaeapas nanong niah te vep mini Jiusni nuhu tekabis na goah aji bwaleh bat mat u tarutni sera.

Pita teket nuhu tebaililngite Jisas nga

¹⁵ Saemon Pita bi datngin tarut non Jisas ramru ban jukun Jisas. Datngin tarut non Jisas nong ba aji kawu nan ut le valin God rat teililngi luhluhmwi. Aji nong ban jukun Jisas le koron valin aji kawu nan ut le valin God.

¹⁶ Pita tedi nge alwop wan matgali. Datngin tarut non Jisas nong niah aji kawu nan ut le valin God rat teililngi luhluhmwi, ban bi modoptop mini aji dalat niah tedi wan matgali, bi mwatkae Pita mwe sak le koron val nong.

¹⁷ Aji dalat i tedi wan matgali nong bep mini nuhu, “Kik bi kom mu datngin tarut non aji ahe?” Pita balu ini bep nuhu, “Nat baite datngin non tarut nga.”

¹⁸ Malkah tei tedok, bi atnan karih ni, bi goah rat sesep rat vatgahu kaba bi ram di netlah dalji. Pita ban mwi di bee bi mwatlah.

Aji kawu nan ut le valin God telel dopmi Jisas

¹⁹ Aji kawu nan ut le valin God mwe lel dopmi Jisas u non tarutni bi u non sesesrakan.

²⁰ Jisas balu ini bep nuhu, “Nat toptop ras vaut temsa mini tarutni, bi nok sesesrakan ba nat leli le valin tangroan bi le koron valin God, ut ah Jiusni rat tepma ut bwaleh. Tei nat ba vep surakte apma bwaleh nga.

²¹ U apma ba kom uhleli i nana? Ko uhleli i goah rat rongo nana. Kon uhleli i ni ba ran bep mini kik gonani ram maililngi sera apma ah nat vep.”

²² Entorah Jisas te vep vehuran nong ba aji rei goah rat sesep niah rat sasari mwe reba bi bep nuhu, “Kom doptop gavak tedapmak ahe mini aji kawu nan ut le valin God!”

²³ Jisas balu ini bep nuhu, “Tigoah nan bep apma ah teba woswos nga ba ko vep seresere mini tarutni ahe nuh apma nanong tekapma?”

²⁴ Anas masro Jisas ban ben Kaeapas niah tei aji kawu nan ut le valin God. Tei rat woji rada ngamai Jisas entorah tesro ban.

Pita teket mwetak nuhu tebaililngite Jisas nga

²⁵ Pita tedi rada ngama netlah ba goah rat ti ram uhleli ini nuhu, “Kik kobi datngin tarut non aji ahe?” Ba Pita mwiget bep nuhu, “Nat baite datngin non tarut nga.”

²⁶ Datngin atnan karih non aji kawu nan ut le valin God, tei davin aji ah Pita tedas behe maun dalingan, mapma bi bep nuhu, “Nat gam bep nuhu nat kita kik leko?”

²⁷ Pita bep mwetani nuhu “Tebu” tei vil bwaleh ba mwatete mwedatere.

Jisas tedi boswos lemtan Paelet

²⁸ Ram mwatkae Jisas dini ut le valin Kaeapas bi ram mwatkae ban le val niah tei valin salenan ut iginan. Tei jubung bwaleh Jiusni rat ba sak tenga le val ba rat ti nge wop, rat toni goah nokon mamji bat kabis rada metan goah rabat gagani kinkan sasabisinan Pasova.

²⁹ Paelet ban wop bi bep mini ni nuhu, “Vehuran apma ah kat wutdihi nokon aji ahe?”

³⁰ Rabalu ini rabep nuhu, “Kabat batkae nga mapma bem tigoah bat ba lelte kapmwaan nga, ba te leli kapmwaan.”

³¹ Paelet bep mini ni nuhu, “Karut kae ban bi kabeveik ini li nomi temwat go.” Jiusni ra balu ini ra bep nuhu, “Kamat ba woswos tenga nuhu kama ih bamte te aji.”

³² Tega rop bwiswis nanong na apma ah Jisas te vep entorah te doptop nokon halan mete ah bat mat ini.

³³ Paelet mwesamul le val bi mahu Jisas bi mu uhleli ini nuhu, “Kik bi kobi subu non Jiusni?”

³⁴ Jisas balu ini bep nuhu, “Vehuran i ko bep nong ba kik ma ko bep, io aji watwatnende ni rat vep mini kik?”

³⁵ Paelet balu ini bep nuhu, “Kom gam bep nuhu nana Jiu? Tei tarut nan vinam bi no aji salean ni le valin God niah rat teskani kik mini nana. Tei apma ah nat leli vanokom?”

³⁶ Jisas bep mini nuhu, “Nok ut kokon ba tebaite non ut li uruu nga, tigoah nok ut kokon batei non ut li uruu ba goah ram dahkuru nana ba rabat bwal u nana, metan goah Jiusni rabat ba wuhu nana nga. Nok ut kokon ba tebaite non ut dokah nga.”

³⁷ Paelet mu uhleli ini nuhu, “Bi nanong ba ko bep nuhu kik subu?” Jisas balu ini bep nuhu, “Kik ah ko bep nuhu nana subu. Nana nat sipma nedok li uruu nuhu nan doptop u apma bwaleh, nante ah mwetaknga, bi aji ah bibi non mwetaknga ba mo rongtani nana.”

³⁸ Paelet mu uhleli ini nuhu, “Mwetaknga ah apma?” Paelet ban wop ben Jiusni bi bep mini ni hunu, “Nat ba wutdihi apma nga ah tama hi aji ahe uru.

Paelet telel dopmi Jisas

³⁹ Ba li halan nomi temwat ba nam dok neling gabarani aji dini utnen illan le taron sasabisina Pasova. Kam doni nuhu nama ling gabarani subu nan Jiusni mini gimi?”

⁴⁰ Ram nga rini mini ra bep nuhu, “Kon ba ling gabarakte aji nga ahe, ba kam doni Barabas!” Barabas nong ba tei ni aji nan lasan, bi te bwal las i aji ni.