DALEK TERABA NON JISAS KRAES JON TEULU 14 - Gospels of Mark and John in Apma

Jisas bibi hal vaben Teman

¹ Jisas bep mini non tarutni nuhu, “Rongnan nokomi nemba kapmaan. Karu vihni mwetaknganan God bi nevihni mwetaknga nak tedapmak.

² Ut halkawu lengleng leiman Tadat, ba namu ban neleli ut u gimi. Nambat ba vep nga mini gimi tigoah bat baite mwetaknga nga.

³ Limalen goah nanlel sera ut u gimi ba nan mulma bi neli gimi ban ut ah namdok iginan. Metan goah ut ah namdok iginan ba gimi kandok naiginan.

⁴ Bi kamaililngi halte nanong u goah kan ban iginan.”

⁵ Tomas bep mini nuhu, “Subu, katbaililngi halan ut iginan nga. Manei gavak nagoah kamaneililngi halan ut iginan?”

⁶ Jisas balu ini bep nuhu, “Nana nante ah nambi hal, bi nambi mwetaknga, bi nambi masan. Aji man ba van nga ben Tadat tigoah man bapma bawo tenga bek.

⁷ Nanong ba kateililngi nana, ba kaneililngi Tadat natedapmak. Bi nanong ba kamaililngi gonani kat kita nana.”

⁸ Pilip bep mini nuhu, “Subu, kosesra Temam mini gema gonante nong niah kamdoni.”

⁹ Jisas balu ini bep nuhu, “Nat tok bemi i viuk lengleng, Pilip, ba nannga ba kom galeklegini nana. Aji ah tekita nana ba tekita Tadat tedapmak. U apma ba kobep nuhu, ‘Kosesra Temam mini gema’?

¹⁰ Ko vihni mwetaknganan, Pilip, nagoah namdok le Tadat bi Tadat modok le nana. Dalekte ah nambep mini gimi ba tebaite dalekt nga ba dalen Tadat niah modok le nana, niah mweleli non uman.

¹¹ Karu vihni mwetaknganan nagoah namdok le Tadat bi Tadat modok le nana. Ba tigoah kan ba vihni mwetaknganan nga ba karu vihni mwetaknganan leutini rah nat leli, bi nevihni mwetaknga nak.

¹² Mwetaknga letlet nambep mini gimi, ajinan ah bihni mwetaknga nak, ba manleli uman ah nam leli. Ba manmu leli uman kawu ngate gonani nam samul bamul ben Tadat.

¹³ Nan leli apma mini gimi ah kan uhleli le hak, metan goah nan sesra meresan non Tadat, niah nambi Nujun.

¹⁴ Apma nannga ah kan uhleli le hak ba nanlel radanaini mini gimi.”

Jisas telngi vehuran u goah Tabite Kokon man sipma

¹⁵ “Tigoah kan mwegololo i nana, ba karumko mini nok dalek telingling.

¹⁶ Nan uhleli i Tadat nuhu manesro karuan Bejimmi niah Tabite Kokon nan mwetanga. Niah mandok bemi mulngan man bulong.

¹⁷ Tarut at li uruu ba ran ba lepgogo nga u gonani rat ba kita nga bi rat baililngi nga. Ba gimi kamaililngi gonani mwidi bemi bi modok le gimi.

¹⁸ “Nan badi tenga neling gabarakte gimi i salsalan, ba nan nepma mwetak radanae bemi.

¹⁹ Manei le ngudu to ba tarut at li uruu ran bam gita gimi nga, ba gimi kan gita nana. Gonani namdok, bi goi gimi bi kandok tedapmak goah namdok.

²⁰ Entorah nan dumre bamul ba gimi kangaililngi nanong nuhu namdok le Tadat bi gimi kamdok le nana. Tekeni goah nana nemdok le gimi.

²¹ “Aji ah mwelep gogo nok dalek telingling bi mamko lin, ba aji nanong mwegololo i nana. Bi Tadat man mwegololo i aji nanong niah mwegololo i nana. Bi nanmu mwegololo i aji nanong, bi nesesra nana mini.”

²² Judas, tebaite Judas Iskariot nga. Muhleli i Jisas nuhu, “Subu, manei gavak nagoah kon sesra kik mini gema niah tarut at li uruu ran baililngi nga?”

²³ Jisas balu ini bep nuhu, “Aji ah mwegololo i nana bi mamko li nok dalek ba Tadat man mwegololo ini. Bi kamanrupma ben aji nanong bi nedok ben.

²⁴ Aji ah teba mwegololo nga i nana ba tebamko nga li nok dalek, gonani vehuran ah kam rongo dini nana ba tebaite nok vehuran nga ba vehuran non Tadat niah tesro nana.

²⁵ “Nat vep vehuranni nong mini gimi entorngama ah namdok bemi.

²⁶ Ba Bejimmi niah Tabite Kokon, niah Tadat manesro le hak ba mansesra gimi i leut seranae. Man leli ba kan vihni lenga mwetani vehuranni niah nat vep mini gimi.

²⁷ “Namalngi gimi nuhu kandok le uterororong. Nana nante niah namaskani uterororong niah kandok lelen. Nat baskak tenga tapmak goah tarut at li uruu ramaskani. Rongnan nokommi man ba kapmaan. Bi kan bamtaji tean.

²⁸ Kat rongo goah natvep mini gimi nuhu, ‘Nanelngi gimi, ba manei limalen ba nan mulma mwetak bemi.’ Tigoah kabat mwegololo i nana ba rongnan nokomi bat kabis gonani namban ben Tadat niah bi ni kawu ngate vali nana.

²⁹ Nambep bawora leutni ahe mini gimi nanong, bawo ba mwegagap. Gonani tigoah mangam ban negap ba ba nomi vihni mwetakngaan tedi masi nokok.

³⁰ Nanbam doptop ngate temrap mini gimi gonani Setan niah salenan ut li uruu ba mapma. Ba nannga ba rowon tebatkol tenga sasviri nana,

³¹ ba namleli nuhu tarut at li uruu ramaililngi nuhu namwegololo i Tadat. Bi bujun nanong nagoah namlel sera leutnae niah telngi mini nana. “Karudumre ba taba dini utahe.”