DALEK TERABA NON JISAS KRAES JON TEULU 10 - Gospels of Mark and John in Apma

Maun vehuran u ut le koron sipsip

¹ “Mwetaknga letlet nam bep mini gimi, aji ah teba baim nga al wan matgali, ba mwe gala ut watnede entorah ban le koron sipsip ba aji nanong ba bi aji tekapma, bi ni aji nan lasan.

² Ba aji ah baim al wan matgali, ba aji nanong ba ni aji nan kitan li sipsip.

³ Aji ah mwi git li matgali mwe sangvi hal u aji nanong. Bi sipsip ram rong dihi dalen entorah mahu ni i ha bi mwatkae ni vaut.

⁴ Entorah mwatkae ni vaut bi mudumu i ni bi ram dahkuru gonani ram rong dihi dalen.

⁵ Ran ba dahkuru aji watnende nga ba ran rop selal dini gonani ram rong leklegeni dalen.”

⁶ Jisas tetwo maun vehuran nong mini ni, ba rat baililngite mwatwen nga.

Jisas bi wusun aji nan kitan li sipsip

⁷ Jisas bep mwetani mini nuhu, “Mwetaknga letlet nam bep mini gimi, nana nambi katvin sipsip.

⁸ Goah rat tepma bawo ba mwe gai nana ba rat tei aji tekapmwaan rat tei aji nan lasan, bi sipsip rat ba rongtakte ninga.

⁹ Nana nam dapmak katvin koron sipsip. Aji ah man nepma al ut ah nam di iginan ba nan bamwesa. Man baut, bi mwe sak, man butdihi hinak.

¹⁰ Aji nan lasan mapma nge nuhu nema las bi nema hi sipsip ni bi negodori leut. Ba nana nat tepma nuhu nama skani masan, bi no masan man bwewe lip i leut ah rat kabis.

¹¹ “Nana nambi wusun aji nan kitan li sipsip, aji ah bi wusun aji nan kitan li sipsip ba mamko i non masan nuhu man mat u bilan sipsip.

¹² Aji ah tebaite aji nan kitan nga li sipsip ba mo rop selal entorah mwi gita goah kuli ju mapma. Teba vihnite sipsip nga gonani tebaite bilan nga. Kuli ju nong mapma bi mwisi le sipsip ni nong bi mwe gani datngin, bi datngin ram rop selal.

¹³ Aji ah tebaite aji nan sipsip nga ba morop selal u gonani teba vihnite sipsip ni nga togol. Gonani ram ga gele nge uru.

^14-15 Nana nambi wusun aji nan kitan li sipsip. Nam maililngi bilak sipsip bi ni ram mililngi nana, tapmak goah nana nam maililngi Tadat, bi Tadat maililngi nana. Bi nam mamko i nok masan nuhu nan mat u bilak sipsip.

¹⁶ Bilak sipsip go ram di ngama niah rat bulong na nong, ba go nanong ba nan netkae ni mapma metan goah ran rongo dalek bi ran gum bwaleh. Bi aji nan kitan li ni manei bwaleh.

¹⁷ “Tadat mwe gaji bamte nana, gonani nam mamko u goah man neskani nok masan metan go nan lep bamula nok masan.

¹⁸ Aji tebulong ah man lep gabarani nok masan dini nana. Nam maskani li halan nok tonian. Rowok te dok nuhu nan neskani bi rowok tedok u goah nan lep bamula. Apma nananong niah tadat telngi mini nana noh nan leli.”

¹⁹ Tei mwetak ba sabwaran mwi di le masen Jiusni u dalekte nong.

²⁰ Hal kawu lengleng nan tarutni ah rat vep nuhu, “Loah mwi di lelen bi mwe daltal ini! Kam rontgtani u apma?”

²¹ Ba datngin ra bep nuhu, “Aji ah loah mwi di lelen ba bat ba doptop nga tedapmak ahe. Gavak na goah aji ah loah mwi di lelen bat sangvi metan matbi ni?”

Jisas te vep seresere goah tei ni Nujun God

²² To tepma nanong u goah Jiusni rat leli sasabisian u vihni lenga nan goah rat sangvi valin God Jerusalem. Ento nanong ba tei le davi.

²³ Jisas te hural ban vanrun valin God niah rat tehu i non Solomon.

²⁴ Entorah Jiusni rat tepma nendi dalji bi ram uhleli ini nuhu, “Merap nan man geni apma nagoah kon leli gema i lemta belabelakan? Ko vep luhmwite mini gema tigoah manei kik Kraes na ngate, metan goah kam maililngi.”

²⁵ Jisas balu ini bep nuhu, “Nat vep te mini gimi ba kat ba vihni mwetaknga nak nga. Uman ah nam leli, li rowon Tadat ba mo doptop renren nokon.

²⁶ Ba kan ba vihni mwetaknga nak nga gonani kat baite bilak sipsip nga.

²⁷ Bilak sipsip ram rong dihi dalek bi ram dahkuru nana bi nam maililngi ni.

²⁸ Nan neskani masradaan mini ni bi ran badi tenga nemat te. Bi aji man ba lep gabarani ni nga dini nana.

²⁹ Tadat niah teskani ni mini nana ba ni kawu ngate sasviri ni sera. Bi aji tebulong ah man lep gabarani bahka lengan Tadat.

³⁰ Tadat bi nana ba gemaru bwaleh.”

³¹ Jiusni ram apko vet nuhu rama weha ini.

³² Jisas bep mini ni nuhu, “Nat leli uman hal kawu lengleng niah Tadat te skani mini nana, ba go nimbeh ah ka bep nuhu kama weha nana uru?”

³³ Jiusni ra balu ra bep nuhu, “Kamat ba vep tenga nuhu kama wahte kik u uman tekabis ah kom leli. Ba na u gonani kom git riani God. Kik aji mwetak nge ba kom gam leli nuhu koma i God!”

³⁴ Jisas balu ini bep nuhu, “Kat teulu le nomi Temwat na goah God te vep nuhu, ‘Gimi ba kabi god ni.’

³⁵ Tam maililngi nuhu apma ah matpo le ululan at mwate ba apma nanong ba mwetaknga letlet. Bi God tei tehu goah dalen te skak mini ni i god ni.

³⁶ Ba mini nana ba Tadat te kit ulu nana, bi tesro nana vali uruu. U apma na goah ka bep nuhu nam git riani God, na u goah nam bep nuhu nana ba nambi Nujun God?

³⁷ Ka bam bihni mwetaknga nak an, tigoah nan ba lelte uman nga non Tadat.

³⁸ Ba tigoah nan leli uman non Tadat ba masen ah kat ba vihnite mwetaknga nak nga ba ka bat vihni mwetaknga nan uman ah nam leli metan go ka bat teililngi luhmwi nuhu Tadat modok le nana, bi nam dok le Tadat.”

³⁹ Rat lel dopmi mwetani nuhu rama wuhu, ba mo rop selal dini ni.

⁴⁰ Jisas te van mwetak almaun sileng ah Jodan bi modok dobo iginan, ut ah Jon tedi nelehvi tarutni iginan.

⁴¹ Tarutmumu rat tepma ben bi ra bep nuhu, “Jon teba lelte illilnan rowok tegol ba leut sera ah te vep vanokon ba mwetaknga sera.”

⁴² Bi tarutmumu at iginan rat vihni mwetaknga nan.