DALEK TERABA NON JISAS KRAES JON TEULU 1 - Gospels of Mark and John in Apma

Vehuran non God

¹ Envawonan luhluhmwi, entorah uruu tei tebulong ngama, ba Vehuran non God tedok. Vehuran nanong tedok ben God, bi tei tedapmak God.

² Envanwonan luhluhmwi ba Vehuran nanong tedok ben God.

³ Tei li Vehuran nanong ba God teleli leut sera, apma bwaleh tebulong li uruu niah tebasok tenga masen lelnan.

⁴ Vehuran nanong ba non masan tei tedok, bi masan nanong ba teskani hee mini tarutni.

⁵ Tei hee vale wulmet bi wulmet teba van lilwi tenga.

⁶ God tesro non atan kasoso, aji tei han ah Jon.

⁷ Tepma van top sereserenan hee mini tarutni. Tepma nem bep renren ini mini ni metan goah ni sera rabat rongo vepnan bi nem bihni mwetaknga nan.

⁸ Jon ba tei tebaite ni hee nga, ba tepma nuhu bat seresere hee.

⁹ Vehuran nanong ba tei mamjin hee nananong, niah tesipma li uruu bi bil bahka tarutni.

¹⁰ Vehuran nanong tedok li uruu tei li ni ba God te leli ut li uruu. Tei nan nga ba tarut at li uruu rat leklegini.

¹¹ Te sipma bamulma vali vinnan, ba nan nga ba tarut at li vinnan rat ba lep gogo tenga.

¹² Datngin rat lep gogo bi rat vihni mwetaknga nan, bi teskani woswosan mini ni, nuhu ran gamui ni nujun God.

¹³ Rat wo mwetak. Rat ba wo mwetak tenga nokon aji havin li tonian non aji dalma. Ba God ma niah bibi Tema.

¹⁴ Vehuran nanong tegamu dok i aji mwetak bi tedok sosok masede. Tat kita non meresan, gonani tewewe lip i kabisan bi mwetaknga. Non meresan niah teskak mini, gonani tei ni nante niah tei Teman ah God.

¹⁵ Jon tedoptop renren nokon. Te ngarini nuhu, “Aji naah niah nat toptop nokon entoran nat vep nuhu, ‘Aji ah mapma jukuk ba kawu ngate sasviri nana, u gonani tedok bawo ba nana nam ga bo.’ ”

¹⁶ Tevagabis i kidi i non kabisan niah tei tewewe lip. Bi teskani kabisan halkawu lengleng mini kidi.

¹⁷ God teskani Temwat mini gema li Moses ba kabisan bi mwetaknga ba tepma li Jisas Kraes.

¹⁸ Aji tebado gitate God nga, Nujun nante niah tedapmak God niah mondok ben Teman niah teleli ba tam mwalilngi.

Toptowan non Jon Baptaes

¹⁹ Toptowan nahe niah Jon teskani i walu nan dalen Jius ni niah rat tesro ajinan uman le valin God bi Livae dini ut Jerusalem nuhu ram mapma neuhleli ini nuhu, “Ani kik itan?”

²⁰ Jon tei teba bwe tenga Iin ba tei tevep seresere nuhu, “Nana ba nat baite Kraes nga.”

²¹ Ra bep mini nuhu ba mwe gai kik itan, “Kik Elaeja?” Ba bep nuhu, “Tebaite nana Elaeja nga.” Ram uhleli ini nuhu, “Ba kik itan, kik Ajinan Dalen God?” Ba balu ini bep nuhu, “Tebu.”

²² Rabep mini nuhu, “Ba kik itan? Ko vep mini gema matan goah kaman mul bi ne bamula walunan mini goah rat tesro gema.”

²³ Jon balu ini bep nuhu, “Nana naah niah Aesea, ajinan dalen God, tevep mwate nuhu, ‘Aji man ngaa dobo li vini tebu man bep nuhu, Karu lel bowos i halan Subu.’ ”

²⁴ Ajini nong ba aji nan goah rat wuhu Temwat ni rat tesro ni.

²⁵ Ram uhleli i Jon nuhu, “Tigoah man baite kik Kraes nga, io Elaeja, io Ajinan Dalen God ba mwegai u apma nagoah kom lehvi tarutni?”

²⁶ Jon balu ini bep nuhu, “Nam lehvi gimi nge i sileng, ba aji mwidi rei gimi nanong ah kat baililngi nga.

²⁷ Mapma jukuk, ba nat ba dokoi tenga nuhu nan dukte kaen non sandel.”

²⁸ Leut ni nong tekap dobo li vini ah Betane almaun sileng ah Jodan ut ah Jon telehvi tarutni dobo iginan.

Malu Sipsip bilan God

²⁹ Tei le ren go ba Jon mwigita goah Jisas mapma ben bi bep nuhu, “Karu gita, Malu Sipsip na bilan God ahe niah man lep gabrani kapmwaan non tarut at li uruu.

³⁰ Aji naah niah nat toptop nokon entorah nat vep nuhu, ‘Aji ah mapma jukuk ba ni aji kawu ngate sasviri nana, gonani tedok bawo ba nana namga bo.’

³¹ Nat leklegini rada ngama ini. Ba nat tepma bi nam lehvi tarutni le sileng metan goah tarut at Isrel rabateililngi.”

³² Toptowan naah niah Jon teskani, tevep nuhu, “Nat kita Tabite Kokon tesipma tavan tekeni mwaki dini ut mere lebini bi mwesadok lin.

³³ Nat leklegini rada ngama ini, ba God niah tesro nana nuhu nan lehvi tarutni le sileng ba tevep mini nana nuhu, ‘Kon gita aji ah Tabite Kokon man sipma nesadok lin ba aji nananong niah man lehvi tarutni i Tabite Kokon.’

³⁴ Nat kita aji nanong bi nabeb mini gimi nuhu, ni nananong niah bi ni Nujun God.”

Vawonan goah rat tahkuru Jisas

³⁵ Tei le ren go ba Jon tedi mwetak iginan mini datngin non tarut nuru karu.

³⁶ Entorah tekita goah Jisas tehural daras ban bi bep nuhu, “Karugita Malu Sipsip na bilan God i ban nong.”

³⁷ Entorah tarut non Jon ah nuru karu ratru rongo goah tevep tedapmak bi ramru ban nedakuru Jisas.

³⁸ Jisas tekit bukak ba mwigita goah ramru ban jukun bi muhleli i nuru nuhu, “Kamuru dongvi apma?” Ba ramru bep mini nuhu, “Komdok ibeh, Rabae?” Meramnan nuhu “Sesesrakan”.

³⁹ Jiasas balu ini bep nuhu, “Ka rupma negita.” Bi ramru ban negita ut ah tedok iginan, bi ramru di dobo bi ut bung. Tei sasari kilok kavet ut tebwarek.

⁴⁰ Karuan aji ah terongo Jon bi mwedahkuru Jisas ba tei Andru niah kisan Saemon Pita.

⁴¹ Tei vilbwaleh ba Andru butdihi kisan ah Saemon, bep mini nuhu, “Kamat wutdihi Mesaea.” Meramnan nuhu “Kraes”.

⁴² Mwatkae Saemon mapma ben Jisas. Jisas tekita bi bep mini nuhu, “Kik Saemon niah nujun Jon. Man gamui ham ah Sipas.” Ih nong ba tekeni Pita nge. Meramnan nuhu “Vetok”.

Jisas tehu Pilip nuru Nataniel

⁴³ Tei le ren go ba Jisas bihni nuhu nema van Galili tevan iginan ba butdihi Pilip. Jisas bep mini nuhu, “Ko dahkuru nana.”

⁴⁴ Pilip nong ba tei vinnan ah Betsaeda ut ah Andru nuru Pita ratru dok iginan.

⁴⁵ Pilip ban butdihi Nataniel, bi bep mini nuhu, “Kamat wutdihi aji te ah Moses teulu toptopnan le buk nan Temwat, bi niah ajinan dalen God rat teulu toptopnan. Ni aji at Nasaret, teman ah Josep, bi han ah Jisas.”

⁴⁶ Nataniel muhleli ini nuhu, “Te apma tekabis mapma tete Nasaret?” Pilip balu ubu bep nuhu, “Kopma negita.”

⁴⁷ Entorah Jisas tekita Nataniel ah tepma ben bi modoptop nokon bep nuhu, “Mamjin at Isrel naahe niah keketan tebulong lelen.”

⁴⁸ Nataniel muhleli ini nuhu, “Kom maililngi gavak i nana?” Ba Jisas balu ini bep nuhu, “Nat kita kik nge entorah kot sadok dobo van bujun fig, bawo ba Pilip mwega hu kik.”

⁴⁹ Nataniel balu ini bep nuhu, “Sesesrakan, kik naah niah kobi Nujun God bi kobi Subu nan Isrelni.”

⁵⁰ Jisas bep mini nuhu, “Ko bihni mwetaknganan nge gonani nambep mini kik nuhu, ‘Nat kita kik nge entorah kot sadok dobo van bujun fig’? Kon gita apma kawu ngate vali goi kot kita nong.”

⁵¹ Jisas bep mini nuhu, “Mwetaknga letlet nam bep mini gimi, kan gita goah ut le bini man nemlang bi enjil non God ran sak bi nesipmadi bek, niah nambi Nujun Aji.”