तितास 3 - आठपहरियाबिस्वासिचिङा नुगा टोॽवा चोक्मा कोन्युक् 1 तितास, बिस्वासिचिङा सासाक्चि हिट्नुङ् ओठेडोङ्चिगा उछिक्ङि वामा हिट्नुङ् हिट्नागा आग्याँकारि हिट्नुङ् सोरोक् नुगा टोॽवाचि चोक्मा टेयार लिमा कोन्युक् पिक्सा मिप्मा मेट्टुचि॥ 2 हिट्नागाँ आरु साक्चा ओचाफेन्लोक् ओलोडुन्चिन्चा, हिट्नुङ् खेमाबुङ्मा टोॽवा ओचोक्निचा हिट्नुङ् टोङ्ना हिट्नुङ् सोब्बेलोक् आड्डिक् मेयोक् उलियाक्॥ 3 ठिक् बेला आनि आप्पे चा डोम्डोम्गा, रिङ् खेम्निम्गा हिट्नुङ् ठागाँ लिसिगा याप्मि लिसिएसिगा॥ आनि जोम् ओचाफेन्ना निङ्ग्वा लोक् ओचाफेन्लोक् मोज्मोज्जाङाना कामारा लिसेइसिगा॥ आनि चोला ख्वाप्पा दुस्टा हिट्नुङ् रेक् काप्मा रिङ्ङा इप्टुएसुना, हिट्नुङ् याप्मिचिङा चिम्मा आफुट्टागा हिट्नुङ् याप्मिचि चिम्मा फुट्टुम्चिम्गा याप्मिचि वासेट्टिगा॥ 4 टरो आनि काहिङ्मेप्बा डाङ्बा माङ्हाङ्ङा ओदाया लोक् माया सोब्बे याप्मिचि लोङ्सा आनिमेट्टे, 5 हिट्नुङ् माङ्हाङ् ओदायाङा आनि आहिङ्मेट्टे टरो आनि आप्पेङा धारमिक् टोॽवा चोगुम्नाँ माखाक्॥ उन्ङा आनि ओछोङ्ग्वाट् चोला आपिडे हिट्नुङ् उन्ङा सेङ्सेङ्ना हाङ्सा आनि आपिडाउङ् आनिगा सोब्बे पापचि टुगुए हिट्नुङ् ओछोङ्ग्वाट् लाम्बोङि लाम्टिमाना बोल् आपिडे॥ 6 आनि काहिङ्मेप्बा डाङ्बा येसु खिरिस्टलाम्मा माङ्हाङ्ङा सेङ्सेङ्ना हाङ्सा आनिङि छेल्बेल लिलोक् हुङ्सुए॥ 7 नाड्डेउङ् उन्ङाना ओदायाङा आनि माङ्हाङ्ङा धारमोति याप्मि आलोडैसे हिट्नुङ् आसा युङ्सुम्ना लाट्निना चोलाङाना हाकदार लिसेइसिए॥ 8 ना छेम्बाना रिङ् ए॥ माङ्हाङ्ङि बिस्वास काचोक्चि टेप्माङा नुना टोॽवा चोक्मा लोङ्सा निङ्ग्वा उपिडु नुङ् खान्ङा नागा रिङ्ङि जोड पिडु नुङ् आङा खान् लोनाँ॥ नाड्डेगा रिङ्चि चोक्मा याप्मिचि लोङ्सा आड्डिक् ओचेट्नुना हिट्नुङ् घुवार आफाना रिङ् ए॥ 9 बिथाँङिगा रिङ्पान्, टुबाठेबाङागा मुन्डुम् हिट्नुङ् धारमाबिधिङाना बारेङि खेमाबुङ्मा हिट्नुङ् चुङ्माना रिङ्पान् चोक्नेनिन्, नागालाम्मा होन्डानिउङ् या युङानि, पोङ्भोने नाड्डेगा रिङ् खेरोक्गा हिट्नुङ् नुगा उलिनिगा॥ 10 कासाम्बा याप्मि ठिक् इप्पोक् खेप् सोम्मा ओछेक्छेक् चोगु, हिट्नुङ् चा टेन्नेट्नि भोने हिट्ना खेम्गेन्चा लाप्टुन्॥ 11 खान्लोङ्सा ठाहा युङ्ग्वा, नाड्डेगा याप्मिचि ठोना नास उलिसागा हिट्नुङ् कायाङ्छाबाचि उलियुक्, हिट्नुङ् हिट्ना दोसि याप्मि नुङ् उन्ङा चोगुना पापलाम्मा डोक् ठाहा लियुक्॥ आखेरि रिङ् 12 आङा आरतिमास नुङ् चा तुखिकास नुङ् चा खान् सोरि पाङ्सुङ्नामे खान्उम्बाक आङा टुब्सिङा निकोपोलिस एलालोक् आबा॥ पोङ्भोने हिट्नि डोक् आङा चुङ्ग्वाना बेला युङ्माना निङ्ग्वा चोगुएसुङ्ङे॥ 13 ओकिल जेनास लोक् आपोल्लोस लोङ्सा उन्चि लाम्बोङि खाट्चिनाँ आहिडुलोक् घुवार फाडुचि॥ हिट्नुङ् उन्चि लोङ्सा चाहाब् लिगा थोक्चि पिडुचि॥ 14 आनि याप्मिचिङा खेरोक् डोक् उन्चि चोला खेरो उटिसुन्॥ आनि याप्मिचि ओचेट्नुना टोॽवा चोक्मा लोङ्सा सिकाँ उलि हिट्नुङ् टुल्फुल केङ्मा उहिडुन्गा उलिनि चा॥ 15 नाहि आङालोक् उलिसागा सोब्बेङा खान् बाबा मालोडाइसे॥ आन्याँ माया काचोक् हिट्नि उलिसागा बिस्वासिचि लाउङ्सा आन्याँना बाबा नुङ् याप्मिलोडाबिडा॥ माङ्हाङ्ङाना दाया खानि सोब्बेलोक् उलियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.