तितास 2 - आठपहरियामाङ्पाङ्ङि हिसिक्मा 1 तितास, खान्ङा हिट्ना रिङ् हिसिक्टुचि जुन् हिट्ना छेम्बाना हिसिक्मालोक् टोङ्युक्॥ 2 पासिङ् याप्मिचि निङ्ग्वा काबुङि कायुङ्बा, इमान इज्जात लिसाना हिट्नुङ् नुलोक् जोम् निङ्ग्वा कारिबा, बिस्वासङि दोरो, माया काचोक्बा हिट्नुङ् सोब्बे रिङ् आङ्मा काहिबा लिसानि पिक्सा हिसिक्टुचि॥ 3 नाड्डेडोक् मासिङ्चि धारमोति चोलाङिना लाम्बोङि ओलाम्टियाक्, आरु खेडोक्बाक् ओचाफेन्गा ओलोडुन्चिन् हिट्नुङ् याप्मा युमालिङ् ठुङ्मा लिनिना पिक्सा हिसिक्टुचि॥ टरो हिट्नागाँ नुना खाबोर एडोक् याप्मिचि उहिसिक्टुचियाक्॥ 4 हिट्नुङ् एरोक् नागा मासिङ् मेन्झेमाचिङा कायेप्मा मेच्छेमाचिलोङ्सा खानि टालिबाङ् हिट्नुङ् छाचि माया चोगानुम्चिम्, 5 हिट्नुङ् जोम् निङ्ग्वा कारिबा, चोखो, नुलोक् पाङ्ठाङ् कापुबा, लुक्मा काटुक्बा हिट्नुङ् खानि टालिबाङ्ङाना काबुङि युङानि पिक्सा हिसिक्मा उहिडुचिचि॥ हिट्डेउङ् साङा चा माङ्हाङ् उरिङ् बारेङि माङ्जोना रिङ् ओचेक्निगा॥ 6 नाड्डेडोक् ठाङ्बेन्चि चा आप्पेलोङ्सा जोम् निङ्ग्वा कारिबा लिमा कोन्युक् पिक्सा नुलोक् लोडुचि॥ 7 सोब्बे थोक्ङि खान्ङा आप्पे डोक् नुना टोॽवा चोगु हिट्नुङ् ठाङ्बेन्चिङा खान्ङाना सिको माचोक्युक्॥ खान्ङा सिकाँ आचोगुचिनाँ ढाँट मिफोक्ङे हिट्नुङ् लुम्भोक् लोना रिङ् हिसिक्टुचि॥ 8 खान्ङा छेम्बाना रिङ् हिसिक्टुचि, हिट्डेउङ् खान् याप्मिचिङा पाक्चा लोमा माहिनिना॥ हिट्डेउङ् आनि एङ्फुट्ङि ओकोब्गा याप्मिचि आनि लोङ्सा ओचाफेन्ना रिङ् लोमाना पाक्चा लिनिउङ् हिट्नागा आप्पे घान्ङि ओठायुक्॥ 9 कामाराचिङा चा उन्चि डाङ्बाङा ओलोडुचिगा रिङ् ओखेम्सुङ् उन्चि डाङ्बालोङ्सा सोब्बे थोक्ङि हारका लिसिना टोॽवा ओचोगुवाक्, हिट्नुङ् हिट्नागा जोबाजोबा ओकाड्नि चा॥ 10 हिट्नागाँ चोर उखुट्टुन् टरो सोरोक् नुना हिट्नुङ् बिस्वासिलो याप्मि उलियाक्॥ हिट्डेउङ् हिट्नागा सोब्बेङा आनि काहिङ्मेप्बा डाङ्बा माङ्हाङ्ङाना खाबोर खेम्माना निङ्ग्वा याप्मिचिगा ओचोगुबिडुचियाक्॥ 11 सोब्बे याप्मिचि मुक्टि पिमाचि लोङ्सा डोक् माङ्हाङ्ङा ओदाया पारकाट् चोगुएसुए॥ 12 ना माङ्हाङ् ओदायाङा आनि आधारमोति चोला लिमालाम्मा हिट्नुङ् नाराङिगा थोक्चिङि एरोक् मेलेक् लिमालाम्मा आनामेट्युक्, हिट्नुङ् ना नाराङि नुलोक् जोम् निङ्ग्वा कारिबा, नुना याप्मि लिमा हिट्नुङ् धारमोति याप्मि लिमा आहिसिक्युक्॥ 13 हिट्नुङ् आसिक्ङाना आसा आनि हाङ्सुएट्टुम्॥ हिट्ना डोक् आनि माङ्ठेना माङ्हाङ् हिट्नुङ् काहिङ्मेप्बा डाङ्बा येसु खिरिस्टङाना माहिमाङि ठेट्युक्॥ 14 येसु खिरिस्टङा आनिगा सोब्बे पारिग्गा पापलाम्मा साम्मा लोङ्सा ओसोक्मा डोक् पिडुए॥ उन्ङा आनि चोख्याँ आचोगाउङ् आप्पे ओयाप्मिचि आचोगे, हिट्नुङ् नुना टोॽवा एरोक् चोक्माना निङ्ग्वा याप्मिचि पिडुचे॥ 15 तितास, खान्ङा नागा रिङ् हिसिक्टुचि, हिट्नुङ् आधिकारलोक् हिट्नागा आरति पिडुचि हिट्नुङ् खेमा लाप्टुचि॥ खान्ङा खोना चा इनामा लोमा मौका पिडुन्चिन्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.