तितास 1 - आठपहरिया1 आङा पावाल माङ्हाङ्ङाना ओकामारा हिट्नुङ् येसु खिरिस्टङाना मुलिचेलाङा ना चिट्ठि खान्लोङ्सा छेप्टुएट्टुङ्॥ माङ्हाङ्ङा सेगुचिगा ओयाप्मिचि बिस्वासङि घुवार फासिङा हिट्नुङ् माङ्हाङ्ङा निङ्ग्वा टासुना चोला खोड्डे पारिक् हिङ्मा कोन्युक्ना हिट्ना छेम्बाना ठोना हिट्नागाँ ठाहा ओटोगु नुङ् माङ्हाङ्ङा आङा याङ्पाङ्साइसे॥ 2 ना बिस्वास हिट्नुङ् ठोना लाट्निना चोलाङाना आसाङि आडाँ लिसाइसे॥ खोना बेला चा माङ्जो चेक्निना माङ्हाङ्ङा याप्मा बारखा पाइले लाट्निना चोला पिनाँनि नुङ् माङ्हुप् चोगुए, 3 हिट्नुङ् ओबेलाङि डोक् सोब्बे लोङ्सा आन्याँ पारचार चोगुम्माना उन्ङाना खाबोर याप्मिचि सोरि उन्ङा पारकाट् चोगुए॥ ना खाबोर डोक् खेम्मेप्माचि लोङ्सा आनि काहिङ्मेप्बा डाङ्बा माङ्हाङ्ङा आङा आग्याँ हिट्नुङ् जिम्मा याङ्पिडे॥ 4 बिस्वासङि आङाना छेम्बाना आइछा तितास, आङा खान्लोङ्सा ना चिट्ठि छेप्टुएट्टुङ्॥ आनि माङ्हाङ् पाबा हिट्नुङ् आनि काहिङ्मेप्बा डाङ्बा खिरिस्ट येसुङाना लुक्माटुक्मा लोक् हाङ्हाङ् खान्ङि उलियाक्॥ केरेटङि तितासङाना टोॽवा 5 हिट्नुङ् आङा लोना गाड्डे लाट्निगेट्निगा टोॽवाचि लाट्टुचि, हिट्नुङ् सोरोक् खालाङ्गाङि एल्डारचि सेगुचि नुङ् आङा खान् केरेटङि नाने॥ 6 एल्डार साङा चा फाट्टुर ओलाबुन्गेट्टुन्ना, ठिबाङ् एडोक् टालिमाङ् लिसाना, हिट्नुङ् उइछाचि बिस्वासि, आरु साङा चा फाट्टुर ओलाबुन्गेट्टुन्चिन्गा चाट्ला ओचाफेन्गा हिट्नुङ् लोडुम्चिम्गा ओटेन्निगा लिमा लिनिना॥ 7 माङ्पाङ्ङिना ओठेडोङ् माङ्हाङ्ङाना टोॽवा नुलोक् कापुबा लिसानाँ उन् साङा चा फाट्टुर आलाबुन्गेट्टुन्ना याप्मि लिमा कोन्युक्॥ आपुङ्गे चोक्ना, उन् एला ओरेक् काट्ना, आड्डिक् टेडुना, खेमाबुङ्मा काचोक्बा हिट्नुङ् ओफाबाङि टोम्ना याप्मि लिमा लिनिना॥ 8 याप्मिचि ओटानाँ ओरेक् काट्निना, नुगा रिङ्ङि निङ्ग्वा कापिबा, जोम् निङ्ग्वा कारिबा, निङ्ग्वा नुना, धारमोति याप्मि हिट्नुङ् आप्पे लोङ्सा मुठिङि कायुङ्बा याप्मि लिमा कोन्युक्॥ 9 उन्ङा सिकाँ लिसाना ना बिस्वासिलो खाबोर छेम्बाना ए नुङ् बिस्वास काचोक्बा उन् लिमा कोन्युक्, हिट्डेउङ् उन्ङा आरु चा माहामाना हिसिक्मा ए पिक्सा पारचार चोक्मा हिट्नुङ् आँट् पिमा हिडुचिचि, हिट्नुङ् ना छेम्बाना रिङ् इन्कार काचोक्बा याप्मिचि चा खानि माङ्जोगा ए पिक्सा लोमा हिडुचिचि॥ 10 पोङ्भोने जोम् याप्मिचि आरुङाना उछिक्ङि उयुङ्निगा, खेरोक्गा रिङ् कामाप्बा हिट्नुङ् कासुब्बाचि ओवाहेट्॥ आझा खाताना चोक्मा कोन्युक् पिक्सा कापिग्बा याप्मिचि नाड्डेगा डोक् उलिगा॥ 11 नागाँगा यासि छाक्मा डोक् कोन्युक् पोङ्भोने नागाँ हिसिक्मा डोक् लिनिना रिङ्चि उहिसिक्टुचिउङ् ख्वाप्पा याप्मिचिगा बिस्वास डोक् धुरिठोङ् ओचोगुएसुए॥ नागाँ नाड्डेना टोॽवा ओचाफेन्लोक् ओफाबा कामाँ चोक्मा लोङ्सा एडोक् ओचोगुगा॥ 12 केरेटङिना ठिबाङ् खानिगा आप्पे माङ्काटाङा नाड्डे माट्टुएसुए, “केरेटङिगा याप्मिचि सोरोक् माङ्जो ओचेक्गा, राकासा हिट्नुङ् स्वाकायु राक्पाचि उलिगा॥” 13 ना रिङ् छेम्बा डोक्॥ हिट्डेउङ् हिट्नागा माइधा खेमा लाप्टुचि हिट्नुङ् हिट्नागाँ छेम्बाना हिसिक्मा बिस्वास ओचोगुटु॥ 14 हिट्नुङ् याहुदिचिगा छिॽवाट् मुन्डुम् लोक् छेम्बाना हिसिक्मा इन्कार काचोग्बा याप्मिचिङा ओचोगुगा आग्याँ खेम्मा चा खेम्सुन्॥ 15 चोखो याप्मिचि लोङ्सा ख्वाप्पा रिङ्चि चोखो डोक् लियुक्॥ टरो निङ्ग्वा ओचाफेन्गा हिट्नुङ् बिस्वास ओचोगुन्गा लोङ्सा भोने पाक् रिङ् चा सेङ्सेङ् लिनिना पोङ्भोने हिट्नागाँगा मिप्माना बोल् हिट्नुङ् चोखो निङ्ग्वा डोक् चोखो वाइना॥ 16 हिट्नागाँ माङ्हाङ् मिसेन् निसुएसुम्मे पिक्साम्बाक् ओमाट्टुगा, टरो उन्चि टोॽवा लाम्माम्बाक् माङ्हाङ् बिरोध ओचोगुना॥ हिट्नागा चिम्मा फुट्टुम्चिम्गा, रिङ् ओखेम्निगा हिट्नुङ् हिट्नागा खोना चा नुना टोॽवा चोक्मा काहिबा ओवाइगा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.