रोमि 8 - आठपहरियासेङ्सेङ्ना हाङ्सालाम्मा टोगुम्ना चोला 1 हिट्नाडेउङ् हाट्ले खिरिस्ट येसुङि भोरोसा उयुङ्सुगालाउङ्सा माङ्हाङ्ङा फाट्टुर लाबुन्चिन्गा॥ 2 पोङ्भोने आनि खिरिस्ट येसुलोक् एक्केउ लिसिनाँ सेङ्सेङ्ना हाङ्साङा आनि ओछोङ्ग्वाट् चोला आपिडेसे, हिट्नुङ् पाप चोक्मालाम्मा हिट्नुङ् सिमाना रिङ्लाम्मा छुट्कारा आपिडेसे॥ 3 धारमाबिधिङा पापङाना साक्तिलाम्मा आनि छुट्कारा पिमा आहिनेट्नि, पोङ्भोने आनि पाप चाट्लालोक्ना याप्मि लिसिनाँ धारमाबिधि पालान् चोक्मा हिनेट्निम्॥ टरो धारमाबिधिङा चोक्मा हिडुवाट्टुन्ना रिङ् माङ्हाङ्ङा चोगुए॥ हिट्नुङ् उन्ङा आनि याप्मिङाना गाड्डेना येम्ङि उइछा पाङ्सुए, हिट्नुङ् उन्ङा खिरिस्टङाना ओयेम् भोक् पिडुङ् आनि पाप जाखाम् चोगुए॥ 4 हाट्ले धारमाबिधिङा माट्टुगा रिङ् सोब्बे चोक्मा उहिडुम् नुङ् माङ्हाङ्ङा हिट्डे चोगुए, पोङ्भोने हाट्ले आनि आनिना पापि निङ्ग्वा गाड्डे वासिन्गा, टरो सेङ्सेङ्ना हाङ्साङा निङ्ग्वा चोगु गाड्डे वासिटि॥ 5 जुन् याप्मि पापि निङ्ग्वाङा चोगु गाड्डे वायुक् हिट्नागा रिङ्ङि डोक् उनिङ्ग्वा पिडुटु, टरो सेङ्सेङ्ना हाङ्सा गाड्डे वाना याप्मिङा सेङ्सेङ्ना हाङ्साङाना रिङ्ङि डोक् उनिङ्ग्वा पिडुटु॥ 6 जुन् याप्मिङा पाप चोक्माना रिङ्ङि निङ्ग्वा पिडुटु हिट्ना सिइना लाम्बोलेङ् खाट्टुटु, टरो जुन्ङा सेङ्सेङ्ना हाङ्साङि निङ्ग्वा पिडुटु हिट्नाँ लाट्निना चोला हिट्नुङ् हाङ्हाङ् टोगुटु॥ 7 जुन् याप्मि पाप चोक्माना निङ्ग्वाङि वायुक् हिट्ना माङ्हाङ्ङाना बिरोधि लियुक्, पोङ्भोने हिट्नाँ माङ्हाङ्ङाना धारमाबिधि पालान् चोगुन्ना हिट्नुङ् चोक्मा चा हिडुन्ना॥ 8 पापलोक्ना निङ्ग्वाङाना आधिन्ङि ओवागा याप्मिचिङा माङ्हाङ् खुसि चोक्मा उहिडुन्ना॥ 9 छेम्बा डोक्, माङ्हाङ्ङाना सेङ्सेङ्ना ओहाङ्सा खानिलोक् युङ्ग्वा भोने, खानि पापलोक्ना निङ्ग्वाङाना आधिन्ङि आवासिन्गा, टरो खानि माङ्हाङ्ङाना ओहाङ्साङाना आधिन्ङि आवासिटि॥ हिट्नुङ् खोना चा याप्मिलोक् खिरिस्टङाना ओहाङ्सा वाइना भोने, हिट्ना खिरिस्टङाना ओयाप्मि लिमा डोक् लिनिना॥ 10 टरो खिरिस्ट खानिङि लियुक् भोने, ना येम् पापङा चोगुनाँ सिचा सेङ्सेङ्ना हाङ्साङा खानि चोला मापिडिटि, पोङ्भोने माङ्हाङ्ङा खानि धारमोति याप्मि माचोगेसे॥ 11 सेङ्सेङ्ना हाङ्साङा येसु सियानालाम्मा उहिङ्ग्वाट् चोगुए॥ खानि येम् सिचा खानिङि लिसाना सेङ्सेङ्ना हाङ्साङाना ओबोललाम्मा माङ्हाङ्ङा खानि उहिङ्ग्वाट् माचोगिटि॥ 12 हिट्नाडेउङ् आम्बु-आन्झाचि हिट्नुङ् आनो-आन्झाचि, पापलोक्ना निङ्ग्वाङा निङ्ग्वा चोगु गाड्डे चोक्मा डोक् कोन्युक् भोन्नेम्बाक् वाइना॥ 13 पोङ्भोने खानिङा पापलोक्ना निङ्ग्वाङा चोगु गाड्डे आचोगुम्टुम् भोने खानि आसिइटि॥ टरो सेङ्सेङ्ना हाङ्साङाना ओसाक्तिङा पापलोक्ना निङ्ग्वा आसेडुम्टुम् भोने, खानि उहिङ्ग्वाट् आलिसिटि॥ 14 पोङ्भोने माङ्हाङ्ङाना सेङ्सेङ्ना हाङ्साङा निमेट्टुचिगा लाम्बोङि ओलाम्टिगा याप्मिचि डोक्, माङ्हाङ् ओछालेट्चि ए॥ 15 पोङ्भोने माङ्हाङ्ङा उन्ङाना सेङ्सेङ्ना हाङ्सा आनि आपिडैसे, हिट्नुङ् ठिबाङ् चाकार ओडाङ्बालोक् किट्ना गाड्डे आनि फेरि किट्मा कोन्निना, टरो उन्ङा आनि माङ्हाङ्ङा उइछाचि आचोगेसेए॥ हिड्डेउङ् माङ्हाङ्लाउङ्सा “आब्बा, पाबा” नुङ् लोमा हिडुम्टुम्॥ 16 हिट्नुङ् सेङ्सेङ्ना हाङ्सा आप्पेङा आनि माङ्हाङ्ङा ओछालेट्चि नुङ् आनि हाङ्साङि ठाहा आपियुक्॥ 17 पोङ्भोने आनि माङ्हाङ् ओछालेट्चि ए, हिट्नुङ् ओछालेट्चि लाउङ्सा उन्ङा पिमा युङ्सुना आसिक् चा आनि टोगुम्टुम्, हिट्नुङ् हिट्ना आसिक् खिरिस्टलोक् एक्केउ आनि चा टोगुम्टुम्॥ टरो खिरिस्टङा मान् टोगु गाड्डे डोक् आनि चा मान् टोगुम्टुम् भोने, खिरिस्टङा याङ्छामा आङ्डु गाड्डे डोक् आनि चा याङ्छामा आङ्मा कोन्युक्॥ हान्डेङ्ना माहिमा 18 हाट्ले ना चोलाङि आनि आङ्डुम्ना याङ्छामालोक् हान्डेङ् माङ्हाङ्ङा आनि आनिमेट्ना माहिमा टोङ्सुम्नाँ हाट्ले ना याङ्छामा पाक्चा माखाक् नुङ् आङा ठाहा टोगुङ्टुङ्॥ 19 माङ्हाङ्ङा सिरिस्टि चोगुगा ख्वाप्पा थोक्ङा खोना बेला ओछालेट्चि उन्ङा पारकाट् चोगुचिचिगा नुङ् आड्डिक् निङ्ग्वा ओचोगुङ् ओहाङ्सुएट्टु॥ 20-21 पोङ्भोने माङ्हाङ्ङा चोगुना सिरिस्टि डोक् बेकामे लिसेसाना, ना आप्पे उनिङ्ग्वाङा लिसाना माखाक्, टरो सिरिस्टि आप्पे माङ्हाङ् ओछालेट्चिङा ओटोगुना माहिमाङि साहाभागि लिमा हिट्ना जाखाम् आचोक्ना रिङ्लाम्मा छुट्कारा ओटोगुवाक् नुङ् आड्डिक् आसा चोगुएट्टु॥ 22 माङ्हाङ्ङा चोगुगा ख्वाप्पा थोक्ङा पाइलेलाम्मा हाट्ले सोम्मा मेन्झेमाङा छाडाङ्मा बेथा आङ्डु गाड्डे डोक् याङ्छामा आङ्डुएट्टुना रिङ् आनि ठाहा टोगुम्टुम्॥ 23 सिरिस्टि चोक्बालाक् थोक्चि एडोक् माखाक्, टरो जुन् माङ्हाङ्ङा आनिलाउङ्सा चामारसिङा चोगुना पाइलेना ओभागा गाड्डेना सेङ्सेङ्ना हाङ्सा आनि टोगुएसुम्मे, आनि चा याङ्छामाङा केना सोक्मा लेडेट्टुम्मा॥ हिट्डेउङ् आन्याँ चा खोना बेला माङ्हाङ्ङा पुरो हाकवाला उइछाचि आचोक्युक्ना हिट्नुङ् ख्वाप्पा भेन्ना रिङ्लाम्मा आनि येम् छुट्कारा आपियुक्ना नुङ् हाङ्सुएट्टुम्मा॥ 24 हाट्ले आनिलोक् ना छेम्बाना आसा लिसानाँ माङ्हाङ्ङा आनि आहिङेसेए॥ हिट्नुङ् हाट्ले सोम्मा माङ्हाङ्ङा आनिलाउङ्सा चोगुना चामारसिङा ख्वाप्पा टोक्निम्गेट्निम्माना, हिड्डेउङ् आझै हिट्ना रिङ् टोक्माना आसा आन्याँलोक् युङ्ग्वा॥ 25 हिट्नुङ् ना बेला आन्याँ टोक्निम्गेट्निम्गा रिङ् टोक्माउङ्सा धैइरे चोगिङाउङ् हाङ्सुम्टुम्मा॥ 26 हिट्नाडेडोक् सेङ्सेङ्ना हाङ्साङा चा आनि पाक्चा चोक्मा हिनिम्ना बेला घुवार आफायुक्॥ हिट्ना बेला खोड्डे पारिक् बिन्टि चोक्मा कोन्युक्ना, आनि ठाहा टोग्निम्ना, टरो सेङ्सेङ्ना हाङ्सा आप्पेङा माप्मालोक् हिनिम्ना रिङ्ङि आनि निङ्ग्वालाम्मा बिन्टि आठाङ्युबियुक्॥ 27 हिट्नुङ् माङ्हाङ्ङा सोब्बे याप्मिचिगा निङ्ग्वा ठाहा टोगुटु, उन्ङा सेङ्सेङ्ना हाङ्साङा माट्टुना रिङ् पाइना हिट्ना उटुप् चा ठाहा टोगुटु॥ पोङ्भोने माङ्हाङ्ङाना उनिङ्ग्वा गाड्डे सेङ्सेङ्ना हाङ्साङा माङ्हाङ् ओयाप्मिचि लोङ्सा बिन्टि चोगुबिडुचिचि॥ 28 माङ्हाङ् माया काचोक्चिलाउङ्सा उन्ङा सोब्बे रिङ् उन्चि ओचेट्नु लाउङ्सा डोक् चोगुटु नुङ् आनि ठाहा टोगुम्टुम्– हिट्नागा याप्मिचि डोक् माङ्हाङ्ङाना उनिङ्ग्वा गाड्डे छेम्डुचिगा याप्मिचि ए॥ 29 पोङ्भोने सोब्बे थोक् उटुम् लिमा पाइले डोक् माङ्हाङ्ङा उइछाचि लिमा हिट्नागा उन्ङा सेगुचिचि नुङ् निसुचिगा डागा, हिट्नुङ् हिट्नागा आप्पे उइछा गाड्डे डोक् उलियुक् नुङ् उन्ङा निङ्ग्वा चोगुए॥ हिट्डेउङ् खिरिस्टउम्बाक् तुम्सामिङ् छा ए हिट्नुङ् आनि सोब्बेम्बाक् उन्ङाना भुम्भु-झान्झाचि हिट्नुङ् नाना-झान्झाचि ए॥ 30 हिट्नुङ् उन्ङा पाइले डोक् उइछा गाड्डे चोक्मा निङ्ग्वा चोगुचिगालाउङ्सा, उन्ङा छेम्डुचे चा॥ हिट्नुङ् उन्ङा छेम्डुचिगालाउङ्सा उन्ङा ओनाभाक्ङि धारमोति चा चोगुचे, हिट्नुङ् धारमोति चोगुचिगालाउङ्सा उन्ङा मान् चा पिडुचे॥ पाक्ङा चा माङ्हाङ् ओमायालाम्मा आनि लाप्माङ् आचोक्निना 31 हाट्ले माङ्हाङ्ङा चोगुगा नागा रिङ् बारेङि आनि पुयुम्टुम् भोने, आनि पाक् माप्माना टे? माङ्हाङ् डोक् आनिलेङ् केङ्युक् भोने, आनि साङा चा बिरोध चोक्मा आहिनिना॥ 32 हिट्नुङ् उन्ङा आप्पे उइछा धारि जोगाँ चोगुङ् युङ्सुवाट्टुन्, टरो आनि ख्वाप्पा लोङ्सा आपिडे॥ उन्ङा आप्पे उइछा आनि आपिडे भोने, पाक् उन्ङा आनिलाउङ्सा ख्वाप्पा थोक् आपिनिनै टे? 33 माङ्हाङ्ङा सेगुचिगा याप्मिचि साङा फाट्टुर लाब्मा हिडुचिचिगा टे? साङा चा हिडुन्चिन्गा, पोङ्भोने माङ्हाङ् आप्पेङा हिट्नागा धारमोति चोगुएसुचे॥ 34 साङा आनि फाट्टुर लाप्मा आहियुक्ना टे? साङा चा आहिनिना, पोङ्भोने खिरिस्ट येसु आनि लाउङ्सा सिए॥ हिड्डेप्मा एडोक् माखाक्, माङ्हाङ्ङा उन् सियानालाम्मा उहिङ्ग्वाट् चोगुए, हिट्नुङ् हाट्ले माङ्हाङ्ङाना उछुप्टाङ् उमुक्लेङ् युङ्ग्वा, हिट्नुङ् आनि लाउङ्सा माङ्हाङ्ङि बिन्टि आचोक्युबिएट्॥ 35 हाट्ले खोना रिङ्ङा आनि खिरिस्टङाना मायालाम्मा साम्मा आहियुक्ना टे? खोना चा रिङ्ङा आहिनिना, आनि याङ्छामा आङ्मा कोन्युक् होला आथाबा आभोरङि ठामा हिडिटि, याप्मिचिङा खेदो चोक्मा आहियुक्, आनिलोक् चामा-ठुङ्मागा थोक् आथाबा वाप्मागा लोट्लिङ् लिनिना होला, आनि सिमा चा हिडिटि आथाबा कोइङा सेप्मा चा आहियुक्, टरो नागा खोना रिङ्ङा चा आनि खिरिस्टङाना मायालाम्मा साम्मा आहिनिना॥ 36 आनिलाउङ्सा याङ्छामा लियुक् नुङ् धारमाछाप्लाङि नाड्डे चा छेप्टेसे, “आन्याँ खान्ङि बिस्वास चोगुम्मानाँ याप्मिचिङा सोरोक् याप्मिसेप्मा ओकोन्येट्, हिट्नुङ् हिट्नागाँ सेप्मा टेयार ओचोगुचिगा ठुँबाचि गाड्डे डोक् आन्याँ याप्मिओमेट्गा॥” 37 टरो नागा सोब्बे ओभेन्गा रिङ्चि उलि चा आनिलाउङ्सा माया काचोक् खिरिस्टलाम्मा नागा ख्वाप्पा थोक्ङि ठेना बिजाए टोगुम्टुम्॥ 38 पोङ्भोने माङ्हाङ्ङाना ओमायालाम्मा आनि खोना चा रिङ्ङा साम्मा आहिनिना नुङ् आङा ठाहा टोगुएसुङे॥ आनि सिमा कोलेचा आथाबा उहिङ्ग्वाट् लिसि चा, उन्ङा माया ओचोक्युक्॥ हिट्नुङ् माङ्हाङ् रिङ् काउग्बाचि आथाबा ओभेन्गा रिङ्, आथाबा आरुङागा साक्ति, आथाबा हाट्लेसेन् लियेट्गा रिङ् आथाबा हान्डेङ् लिगा रिङ्ङा आनि माङ्हाङ्ङाना ओमायालाम्मा साम्मा आहिनिना॥ 39 हिट्नुङ् टो टाङ्साङिगा आथाबा यो नाराङि उलिसागा साक्तिङा आथाबा हान्डेङ् लिगा खोना चा थोक्चिङा आनि टाङ्बा खिरिस्ट येसुलाम्मा टोगुम्ना माङ्हाङ्ङाना ओमायालाम्मा साम्मा आहिनिना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.