रोमि 6 - आठपहरियापापङाना ओसाक्ति जाखाम् लिसे 1 हाट्ले आन्याँ पाक् माट्टुम्माना टे? पाक् माङ्हाङ्ङा ओमायादाया याप्मा टोगुम्टुम् नुङ् पाप चोक्सा युङियाक्टिगि टे? 2 हिट्डे माखाक्॥ हाट्ले नुङ् आनि चोलाङि पापङा आधिन चोगुन्ना, हिट्डेउङ् आनि पाप चोक्मायाक्मा कोन्निना॥ 3 आनि खिरिस्ट येसु रोक् कारिक्बाचिङा चुवाङाना बाप्टिस्मा लाडुम्नाँ उन्लोक् डोक् सिइना रिङ् खानिलाउङ्सा ठाहा युङ्ग्वा टे॥ 4 हिट्नाडेउङ् जब आनि बाप्टिस्मा लाडुमे, आनि सिइए हिट्नुङ् खिरिस्टलोक् डोक् हुमिए॥ हिट्नुङ् माङ्हाङ् पाबाङा उन्ङाना माहिमाङाना ओबोल्ङा खिरिस्ट सियानालाम्मा उहिङ्ग्वाट् चोगु गाड्डे डोक् आनि चा ओछोङ्ग्वाट् चोला टोगुम्मे॥ 5 पोङ्भोने आनि चा खिरिस्ट सिया गाड्डे सिइउङ् उन्लोक् एक्के लिसेसिए भोने, उन् उहिङ्ग्वाट् लिसा गाड्डे आनि चा उहिङ्ग्वाट् लिसिटि॥ 6 आनिना ना चोलालाम्मा पापङाना आधिकार जाखाम् उलियाक्, हिट्नुङ् हाट्लेउङ् पापङाना ओकामारा आनि उलिसिन्चा नुङ् आनिना पाइलेना चोला याप्मिचिङा येसु खाप्चेङि उछुडुनाँ उन्लोक् डोक् खाप्चेङि छुडाना रिङ् आनिलाउङ्सा ठाहा युङ्ग्वा॥ 7 पोङ्भोने कोइ याप्मि सियुक् भोने, हिट्नाँ पापङाना आधिनलाम्मा छुट्कारा टोगुटु॥ 8 हाट्ले आनि खिरिस्टलोक् सिइए भोनेम्टे उन्लोक् उहिङ्ग्वाट् चा लिसिटि नुङ् आनि बिस्वास चोगुम्टुम्॥ 9 पोङ्भोने खिरिस्ट सियानालाम्मा उहिङ्ग्वाट् लिसे हिट्नुङ् उन् फेरि सिनिना नुङ् आनि ठाहा टोगुम्टुम्॥ हिट्नुङ् हाट्लेउङ् पापङाना बोल्ङा उन् आधिन् चोगुन्ना॥ 10 खिरिस्ट सियानाँ उन् पापङाना ओसाक्ति मेट्मा लोङ्सा ठिक्ए खेप् सिए, उन् फेरि काइले चा सिनिना॥ हाट्ले उन् उहिङ्ग्वाट् वाहेट् हिट्नुङ् उन् माङ्हाङ् माहिमा पिमा लाउङ्सा हिङ्युक्॥ 11 हिट्ना पारा डोक्, खोड्डेउङ् सियाना याप्मिङा पाप चोगुन्ना, हिट्नाडेडोक् खानिङा पाप आचोगुमुङ् आसिए, टरो माङ्हाङ् ओचाप् टामा चोक्मा हिङ्मा कोन्युक् नुङ् मिट्टानुम्, पोङ्भोने खानि खिरिस्ट येसुङाना ओयाप्मिचि ए॥ 12 हिट्नाडेउङ् खानिना ना सियुएट्ना येम्ङि पापलाउङ्सा आधिन् चोक्मा पिनेनुम्, हिट्नुङ् खानि येम्ङा चोक्मा कोलुगा ओचाफेन्गा थोक्चि चोक्मा पिनेनुम्॥ 13 खानि येम्ङिना खोना चा आङ्गाचि पाप चोक्मा हिट्नुङ् ओभेन्गा टोॽवा चोक्मा पिनेनुम्॥ टरो खानि आप्पेलाउङ्सा माङ्हाङ्ङि पिडानुम्, पोङ्भोने खानि आसिइगा याप्मिचि गाड्डेगा डोक् आवासेट्टिगा टरो हाट्ले खानिङा ओछोङ्ग्वाट् चोला आटोगुएसुम्मे॥ हिट्डेउङ् खानि आङ्गाचि ओचेट्नुना टोॽवा चोक्माउङ्सा माङ्हाङ् पिडानुम्॥ 14 हिट्नुङ् पापङा खानि उठुङ्ङि आधिन् चोगुन्ना, पोङ्भोने खानि धारमाबिधिङाना ओआधिन्ङि माखाक्, टरो माङ्हाङ्ङाना ओदायामायाङाना आधिन्ङि आवासेट्टि॥ ओचेट्नुना टोॽवा काचोक् चाकारचि 15 हिट्डे भोने हाट्ले पाक् चोगिगा टे? माङ्हाङ्ङा ओमायादायाङा धारमाबिधिलाम्मा आनि छुट्कारा आपिडेसे भोने, पाक् आनि पाप चोगुम्याक्टुम्नि टे? हिट्डे माखाक्॥ 16 खान्ङा जुन्ङाना रिङ् आखेम्सुङ् हिट्नाँ मालोडाना रिङ् गाड्डे आचोगुटु भोने, खान् हिट्नाङाना ओकामारा आलियुक् नुङ् ठाहा आटोगुटु॥ खान् पापङाना आधिन्ङि आलियुङ् हिट्डेडोक् आचोगुटु भोने खान् आसियुक्, टरो खान्ङा माङ्हाङ्ङाना आग्याँ पालान् आचोगुटु भोने माङ्हाङ् ओनाभाक्ङि खान् धारमोति आलियुक्॥ 17 पाइलेम्बाक् खानि पापङाना आधिन्ङि आलिसेसिगा, टरो हाट्लेम्बाक् आलिसिन्गेट्टिन्गा॥ हिट्डेउङ् आङा माङ्हाङ् पोए-पोए ठाङ्सुङ्टुङ्, पोङ्भोने खानिङा आटोगुम्ना छेम्बाना हिसिक्मा पुरो खानि निङ्ग्वाङा डोक् पालान् आचोगुएसुम्मे॥ 18 हाट्ले खानिङा पापलाम्मा छुट्कारा आटोगुएसुम्मे, हिट्नुङ् ओचेट्नुना टोॽवा चोक्मा लाउङ्सा माङ्हाङ् ओकामारा खानि आलिसेसिए॥ 19 आङा खानिङा बुजा चोक्मा आहिडुम्ना रिङ्ङि डोक् डाङ्बा लोक् चाकारङाना बारेङि माट्टुएट्टुङ्॥ पाइले खानिङा खानि येम् ओचाफेन्गा टोॽवा चोक्मा चाकार गाड्डे डोक् ओभेन्गा रिङ् लाउङ्सा आपिडुम्मे॥ हाट्ले खानि चोला माङ्हाङ्ङाना ओनाभाक्ङि ओचेट्नुना टोॽवा चोक्मा चाकार गाड्डे डोक् पिडानुम्, हिड्डेउङ् खानि चोला चा सेङ्सेङ् लियुक्॥ 20 पाइले खानि पापङाना आधिन्ङि आलिसिना बेला खानिङा माङ्हाङ्ङा ओनाभाक्ङि पाक् ओचेट्नुना हिट्ना रिङ् चोक्मा खानिङा निङ्ग्वा आचोक्नेट्निम्॥ 21 खानिङा पाइले आचोगुम्ना टोॽवालाम्मा खानिलाउङ्सा पाक् ओचेट्नुना लिसेना टे, हाट्ले हिट्नागालाम्मा डोक् खानि आमोन्डिसिएट्टि? हिट्नागा रिङ्ङा सिमाना रिङ् एडोक् टाडुटु हिट्नुङ् माङ्हाङ्लोक् खानि मासाम्डिटि॥ 22 टरो हाट्ले खानिङा पापलाम्मा छुट्कारा आटोगुएसुम्मे, हिट्नुङ् माङ्हाङ्ङाना कामारा आलिसेसिए॥ हाट्ले खानि सेङ्सेङ् आलिसिटि हिट्नुङ् खोना बेला चा लाट्निना चोला आटोगुम्टुम्॥ 23 पोङ्भोने पापङाना उनिमेयाक्म्बाक् सिमाना साजाए टोग्मा ए, टरो माङ्हाङ्ङा आपिडाना बाहुमुल्ये बारदानम्बाक् आनि डाङ्बा खिरिस्ट येसुङि लाट्निना चोला टोक्मा ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.