रोमि 14 - आठपहरियाआरु न्याए चोक्नेनुम्चिम् 1 बिस्वासङि कामजोर उलिसागा आरु बिस्वासिचिलाउङ्सा मान् चोगानुम्चिम्, हिट्नुङ् हिट्नागाँ उन्चि निङ्ग्वाङि पाक् माहामाना आथाबा माङ्जोना उमिट्टुना रिङ्ङि बादबिबाद चोक्नेनुम्॥ 2 उदाहारान्ङि, कोइ-कोइ बिस्वासिचिङा सोब्बे थोक् चामा लियुक् नुङ् बिस्वास ओचोगुटु, टरो बिस्वासङि कामजोर उलिसागाँम्बाक् सागापाटा एडोक् चामा नुयुक् नुङ् उमिट्टुटु॥ 3 हिट्नुङ् सोब्बे थोक् चोगा याप्मिङा सागापाटा एडोक् चोगा बिस्वासि लोमाजामा लिनिना, हिट्नुङ् सागापाटा एडोक् चोगा बिस्वासिङा सोब्बे थोक् चोगालाउङ्सा फाट्टुर उलाबुन् चा॥ पोङ्भोने हिट्नागाचि इप्पाङ् डोक् माङ्हाङ्ङा लाडुएसुचे॥ 4 आरुङाना चाकारलाउङ्सा फाट्टुर कालाब् खान् साइना? हिट्नाङा नुना टोॽवा चोगुएट्टुनि, ओचाफेन्ना टोॽवा चोगुएट्टुनि ओडाङ्बाङा डोक् फैसाला चोगुटु॥ हिट्नुङ् हिट्नाङा ओडाङ्बा ओचेट्नुलोक् सेवा चोगुटु, पोङ्भोने टाङ्बाङा डोक् हिट्डे चोक्मा हिट्ना घुवार फाडुटु॥ 5 कोइ याप्मिङा ठिक् लेम्बा आरु लेम्बा नुङ्ना सेङ्सेङ्ना मिट्टुटु, टरो आरको याप्मिङा ख्वाप्पा लेम्बा बोरो बोरना नुङ् मिट्टुटु॥ हिड्डेउङ् सोब्बे याप्मिङा पाक् उमिट्टुटुना हिट्ना रिङ्ङि हिट्नागा पाक्का लिमा कोन्युक्॥ 6 खोना याप्मिङा ठिक् लेम्बा सेङ्सेङ्ना नुङ् मिट्टुटु, हिट्नाङा माङ्हाङ् मान् चोक्मा लाउङ्सा डोक् हिड्डे चोगुटु॥ खोना याप्मिङा सोब्बे थोक् चोटु, हिट्नाङा टाङ्बा मान् चोक्मालाउङ्सा डोक् चोटु, पोङ्भोने हिट्नाङा चामा नुङ्ना पाइले माङ्हाङ् पोए-पोए ठाङ्सुङ् चोटु॥ हिट्नुङ् सागापाटा एडोक् काचाबाङा चा टाङ्बा मान् चोक्मालाउङ्सा डोक् चोगुटु, पोङ्भोने हिट्नाङा चा माङ्हाङ् पोए-पोए ठाङ्सुटु॥ 7 आनि साक्चा आप्पेङाना ओचेट्नु लोङ्सा हिङिन्गा हिट्नुङ् सिइन्गा॥ 8 हिट्नुङ् आनि हिङि चा टाङ्बा लोङ्सा हिङिटि, हिट्नुङ् सिइ चा टाङ्बा लोङ्सा डोक् सिइटि॥ हिड्डेउङ् आनि सिइ चा, हिङि चा टाङ्बाङाना डोक् ए॥ 9 नाड्डे लिसाउङ् खिरिस्ट उसियागा हिट्नुङ् उहिङागा सोब्बे सासान् चोक्मा लाउङ्सा उन् सिए हिट्नुङ् फेरि उहिङ्ग्वाट् लिसाउङ् कोबा काडे॥ 10 हिड्डेउङ् पोङ् खानिङा बिस्वासि भुम्भु-झान्झाचि हिट्नुङ् नाना-झान्झाचि फाट्टुर आलाबुम्चिम्चिम्गा? हिट्नुङ् पोङ् खानिङा हिट्नागा नुङ्ना आन्याँ उनुगा नुङ् आमिट्टुम्टुम्गा? पोङ्भोने आनि सोब्बे माङ्हाङ्ङाना न्याए चोक्माना बैठाक् सोरि येप्मा कोन्युक्॥ 11 पोङ्भोने धारमाछाप्लाङि नाड्डे छेप्टाइसे– “टाङ्बाङा माट्टुटु, ‘आङा उहिङ्ग्वाट् लिसाङ्ना गाड्डे डोक्, सोब्बे याप्मिचि आटोकानाङि गुङ् ओचोक्युक्, हिट्नुङ् सोब्बे याप्मिचिङा आनिङ् ओचोन्डुटु’॥” 12 हिड्डेउङ् आनि ख्वाप्पाङा माङ्हाङ्लाउङ्सा चोगुम्ना टोॽवाङाना हिसाब् आनि पिमा कोन्युक्॥ आरु कायाङ्छाबाचि नुङ् लोनेनुम्चिम् 13 हाट्ले ठिबाङ्ङा आरकोलाउङ्सा फाट्टुर लाब्मा नाडुम्॥ बुरु बिस्वासि भुम्भु-झान्झाचि हिट्नुङ् नाना-झान्झाचिगा निङ्ग्वा टुग्ना रिङ् आथाबा पापङि ठेम्माना रिङ् खोना बेला चा चोक्निम् नुङ् पाक्का चोगुम्॥ 14 टाङ्बा येसुङा खोना चा चामागा थोक्चि आसुद्दो उलिनिगा नुङ् आङा पारचिन्दा याङ्निमेट्टेसाङे॥ टरो कोइ याप्मिङा कोइ-कोइ चामागा थोक् आसुद्दो मिट्टुटु भोने, हिट्ना लोङ्सा डोक् आसुद्दो लियुक्॥ 15 हिट्नुङ् खान्ङा आचोना थोक्ङा आरको बिस्वासिङाना उनिङ्ग्वा आटुक्मेट्टुए भोने, हाट्ले खान्ङा उन् माया आचोगुन्ना नुङ् ठाहा लियुक्॥ खान्ङा जे आचोटु हिट्ना थोक्ङा आरको बिस्वासि जाखाम् उलिनियाक्, पोङ्भोने उन् लाउङ्सा चा खिरिस्ट सिए॥ 16 खान्ङा ओचेट्नुना नुङ् आमिट्टुना रिङ् आरुङा ओचाफेन्ना नुङ् माप्मा पिडुन्चिन्॥ 17 पोङ्भोने माङ्हाङ् उमुलुक् आनि चोलाङि चामाना हिट्नुङ् ठुङ्माना बारेङि माखाक्, टरो माङ्हाङ्ङाना धारमिक्ता, हाङ्हाङ् हिट्नुङ् आनान्दाङाना बारेङि ए, नाम्बाक् सेङ्सेङ्ना हाङ्साङा आनि आपियुक्॥ 18 जुन् याप्मिङा खिरिस्टङाना नाड्डे पारा सेवा चोगुटु, हिट्नाङा माङ्हाङ् उचाप् टामामेट्टुटु, हिट्नुङ् आरुङा चा उन् मान् ओचोगुटु॥ 19 हिड्डेउङ् खोना रिङ्ङा हाङ्हाङ् टाडुटुना, हिट्नुङ् खोना रिङ्ङा आरु बिस्वासिचि उन्चि बिस्वासङि बोल्लेउ चोगुचिचिगा हिट्ना रिङ् चोक्मा लाहाब् लिसियाक्टि॥ 20 माङ्हाङ्ङाना टोॽवा चामागा ठुङ्मागा थोक्ङा जाखाम् चोक्नेनुम्॥ हिट्नुङ् सोब्बे चामागा थोक् चामा नुयुक्, टरो आनि चाम्गा थोक्ङा आरु पाप चोक्मा मेप्माम्बाक् ओचाफेन्ना रिङ् ए॥ 21 खान्ङा चेचे आचोनाँ, इमालिङ् आठुङुनाँ आथाबा आरु थोक् डोक् आचोगुनाँ आरु बिस्वासिचि पापङि ओठायुक् भोने, खान्ङा हिट्डे आचोगुन्नाँ डोक् ओचेट्नु लियुक्॥ 22 हिड्डेउङ् नागा चामा-ठुङ्मा बारेङि खान्ङा जे बिस्वास आचोगुटु, हिट्ना रिङ् खान् लोक् माङ्हाङ्ङि एडोक् युङ्सु॥ याप्मिङा जुन् रिङ् ओचेट्नु लियुक् नुङ् मिट्टुना रिङ्ङि साङ्का चोगुन्ना भोने, माङ्हाङ्ङा हिट्ना आसिक् पिडुटु॥ 23 टरो जुन् याप्मिङा चामागा थोक् बारेङि साङ्का चोगुटु हिट्नुङ् चोटु भोने, हिट्ना लाउङ्सा पाप लियुक्, पोङ्भोने हिट्नाङा ना रिङ् ठिक्का डोक् ए नुङ् बिस्वास चोग्वाट्टुन्॥ बिस्वास माले चोगुम्गा ख्वाप्पा थोक् पाप लियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.