रोमि 13 - आठपहरियासासाक्चि लोङ्सा आनिना जिम्मेवारि 1 सोब्बे याप्मिचि सासाक्चिगा आधिकारङि युङ्मा कोन्युक्, पोङ्भोने माङ्हाङ्ङा सासाक्चि सासान् चोक्माना आधिकार पिडुचिचि॥ सासान् चोक्मा सासाक्चि माङ्हाङ् आप्पेङा डोक् युङ्सुचिगा ए॥ 2 हिट्डेउङ् जुन्ङा सासाक्चिगा बिरोध चोगुटु हिट्नाङा माङ्हाङ्ङाना आग्याँ बिरोध चोगुटु॥ हिट्नुङ् नाड्डे काचोक् याप्मिङा साजाएँ टोगुटु॥ 3 कोइङा नुना टोॽवा चोगुटु भोने हिट्नाँ सासाक्चि किट्मा कोन्निना, टरो हिट्नाँ ओचाफेन्ना टोॽवा चोगुटु भोने हिट्ना सासाक्चिलोक् किट्मा कोन्युक्॥ हिड्डेउङ् खानि सासाक्चिलोक् मिकिट्ङे युङ्मा आकोलिटि भोने, नुना टोॽवा चोगानुम् हिट्नुङ् हिट्नागाँ खानि होहोबास् मालोडिटि॥ 4 पोङ्भोने सासाक्चि माङ्हाङ् ओचाकारचि ए, हिट्नागा खानिगा नुलोक् लोङ्सा डोक् उन्ङा युङ्सुचिगा ए॥ टरो खानिङा ओचाफेन्गा टोॽवा आचोगुम्टुम् भोने सासाक्चिलोक् खानि किट्टानि, पोङ्भोने हिट्नागाँ खानि साजाएँ पिमाना आधिकार माङ्हाङ्लाम्मा ओटोगुएसुए॥ हिट्नुङ् ओचाफेन्गा टोॽवा काचोक् सोब्बे साजाए पिमा माङ्हाङ्ङा हिट्नागा युङ्सुचिगा ए॥ 5 हिट्डेउङ् हिट्नागाँ खानि साजाएँ मापिडिन्गा नुङ् एडोक् सासाक्चिगा आधिन्ङि युङ्माना माखाक्, टरो खानि निङ्ग्वाङि नाड्डे चोक्मा चा माहामा डोक् ए नुङ् खानिलाउङ्सा ठाहा युङ्ग्वा॥ 6 हिड्डेउङ् डोक् खानिङा तिरो हुङ्माम्बाक् ठिक्का डोक् ए, पोङ्भोने नागा सासाक्चि माङ्हाङ्ङा ओचाकारचि ए, हिट्नुङ् हिट्नागाँ उन्चि टोॽवा पुरो चोक्मा माङ्हाङ्ङाना सेवा ओचोगुएट्टु॥ 7 खानिङा हुङ्मा कोन्ना रिङ् युङ्ग्वा भोने सोब्बेलाउङ्सा हुङानुम्॥ तिरो हुङ्मा कोन्ना युङ्ग्वा भोने सोब्बे तिरो हुङानुम्, खानिङा मान् चोक्मा कोन्ना याप्मिलाउङ्सा मान् चोगानुम्, हिट्नुङ् इज्जात चोक्मा कोन्नालाउङ्सा इज्जात चोगानुम्॥ ठिबाङ् आरकोङाना जिम्मेवारि युमा कोन्युक् 8 ठिबाङ्ङा आरको सोरोक् माया चोक्माना रिङ् माले आरु खोना चा रिङ्ङाना नाॽवाङि खानि ठानेनिन्, पोङ्भोने कोइ याप्मिङा आरु याप्मिचि माया चोगुचिचि भोने माङ्हाङ्ङाना धारमाबिधि पुरो चोगुएसुए॥ 9 धारमाबिधिङि नाड्डेना आग्याँ छेप्टाइसे, “खान्ङा इम्मेप्माजामा टोॽवा चोक्मा लिनिना, खान्ङा याप्मि सेप्मा लिनिना, याङ्खुट्मा लिनिना हिट्नुङ् लोभि लिमा लिनिना॥” नागा आग्याँचि लोक् आरु आग्याँचि “खान्ङा काटाक्लुङ्चि आप्पे गाड्डे डोक् माया चोगुचि” नुङ् ना ठिक् आग्याँङि डोक् युयुक्॥ 10 माया काचोक्बाङा साङा चा आरुङाना ओचाफेन्ना मिट्टुन्ना॥ हिड्डेउङ् आरु माया काचोक्बाङा धारमाबिधिङिना ख्वाप्पा रिङ् युडुटु॥ 11 आङा खानि लोनानिगा रिङ् चोगानुम्, पोङ्भोने हाट्ले आनि हिङेट्टिना बेला खोड्डेना नुङ् खानिलाउङ्सा ठाहा युङ्ग्वा॥ हाट्ले मिॽयुमालाम्मा चेम्मा बेला लिसे, पोङ्भोने पाइले आनि बिस्वास चोगुम्ना बेला नुङ्ना हाट्ले आनिना मुक्टि आझै नेहेट्टाङ् टामैडे॥ 12 आझै डुम्बारिक् डुम् लिसाना रिङ् छेम्बा डोक् ए, टरो व्हाङ् लिसा लाबे॥ हिट्डेउङ् डुम्बारिक् डुम्ङि चोगुम्गा ओचाफेन्गा टोॽवा चोक्मा नाडुम्, हिट्नुङ् व्हाङ्ङि ओचेट्नुना रिङ् चोक्ङा टिलिङ्गाचि गाड्डे टेयार लिसि॥ 13 आनि लेम्बा व्हाङ्ङि वासि गाड्डे डोक् सोब्बे लाउङ्सा ओचेट्नुना चोलाङि वामा कोन्युक्॥ आनि बेस्सारि मोज्मोज्जा चोक्माना पाटिङि साहाभागि लिसिन्चा हिट्नुङ् इमालिङ् ठुङुमुङ् टेडुबा लिमा लिनिना, आनि खोना खाले चा इम्मेप्माजामा टोॽवा चोक्मा लिनिना, आनि खेमाबुङ्मा चोक्मा लिनिना, हिट्नुङ् मिक् टुक्ना रिङ् चोक्मा लिनिना॥ 14 टरो टाङ्बा येसु खिरिस्टङाना ओचाट्ला आनि चोलाङि लाडुम्, हिट्नुङ् आनि पापि निङ्ग्वालाम्मा होन्ना ओचाफेन्ना रिङ् युमालेङ् निङ्ग्वा टिनिम्चा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.