रोमि 12 - आठपहरियामाङ्हाङ् खानि चोला पिडानुम् 1 हिट्डेउङ् आम्बु-आन्झाचि हिट्नुङ् आनो-आन्झोचि, माङ्हाङ्ङा आनि आड्डिक् दाया आचोगानाँ खानि आप्पेलाउङ्सा सेङ्सेङ्ना हिट्नुङ् माङ्हाङ्ङाना उनिङ्ग्वा टासुना उहिङ्ग्वाट् भोक् ठाङ्सानुम् नुङ् आङा खानि लोनाँनि॥ पोङ्भोने खानिङा माङ्हाङ् सेवा चोक्मा कोन्ना छेम्बाना पाराम्बाक् ना डोक्॥ 2 खानिङा नाराङिगा याप्मिचिङा ओचोगु गाड्डे चोक्मा निङ्ग्वा चोक्नेनिन्, टरो माङ्हाङ्लाउङ्सा खानि निङ्ग्वाङि ओछोङ्ग्वाट् लिमा पिमा कोन्युक् हिट्नुङ् खानि फेराँ आलिसिटि॥ नाड्डे आचोगुम्मे भोने खानिङा माङ्हाङ्ङाना उनिङ्ग्वा पाइना रैछो नुङ् पात्तो लाहाब् चोक्मा आहिडुम्टुम्, हिट्नुङ् ओचेट्नुना रिङ् पाइना, खोना रिङ्ङा उन्ङाना ओचाप् टायुक्ना हिट्नुङ् खोना रिङ् छेट्छेट्ना हिट्ना सोब्बे पारचिन्दा ठाहा आटोगुम्टुम्॥ 3-5 माङ्हाङ्ङा आङा खिरिस्टङाना मुलिचेला लिमा मायादाया याङ्पिडे, हिट्डेउङ् खानि सोब्बेलाउङ्सा नाड्डे लोनाँनि, खानि जोस्तो आवासेट्टि हिट्ना नुङ्ना याप्मा आप्पेलाउङ्सा मिट्नेनुम्॥ आनि येम्ङि जोम् आङ्गाचि उयुङ्ग्वा हिट्नुङ् सोब्बे आङ्गाङागा फाराक् फाराक् येम्बोक् युङ्ग्वा॥ हिड्डे डोक् आनि फाराक् खाले याप्मिचि लिसि चा खिरिस्टङा ठिक्ए येम्ङि खाले-खाले याप्मिचि आचोगेसे हिट्नुङ् ठिबाङ् आरकोलोक् आटोङ्सेसे॥ हिड्डेउङ् माङ्हाङ्ङा इम्टेप्मा याप्मा बिस्वास मापिडेसेगा हिट्ना गाड्डे खानिङा आप्पेलाउङ्सा न्याए चोक्मा कोन्युक्॥ 6 माङ्हाङ्ङा उन्ङाना ओमायादायाङा आनि सोब्बेलाउङ्सा खाले-खाले पारागा बारदानचि आपिडेसे, हिट्नागा ठिबाङ्ङा आरको घुवार फामा चालाँ चोगुम्॥ कोइ याप्मिङा माङ्हाङ्लाम्माना चेक्माना बारदान टोगुएसुए भोने, माङ्हाङ्ङा पिडुना बिस्वासलाम्मा हिट्नाँ माङ्हाङ्लाम्माना रिङ् ओचेक्याक्॥ 7 कोइलोक् घुवार फामाना बारदान युङ्ग्वा भोने, आरु घुवार ओफाडुचियाक्, हिट्नुङ् हिसिक्माना बारदान युङ्ग्वा भोने उहिसिक्टुचियाक्॥ 8 कोइलोक् याप्मिचि उत्साह पिमाना बारदान युङ्ग्वा भोने उत्साह उपिडुचियाक्, हिट्नुङ् कोइलोक् आभोरङि ओठायागालाउङ्सा हाम्माजामाना बारदान युङ्ग्वा भोने, निङ्ग्वालाम्मा डोक् याप्मिचि ओहान्डुबिडुचियाक्॥ कोइलोक् याप्मिचि आगुवाइ चोक्माना बारदान युङ्ग्वा भोने, हिट्ना जिम्मा नुलोक् डोक् ओचोगुवाक्, हिट्नुङ् कोइलोक् आरु दाया चोक्माना बारदान युङ्ग्वा भोने, हारका लिसा आरु दाया ओचोगुचियाक्॥ माया चोक्माना बारे 9 खानिङा आरु निङ्ग्वालाम्मा डोक् माया चोगानुम्चिम्॥ ओचाफेन्गा रिङ् नाडानुम् हिट्नुङ् खोना रिङ् ओचेट्नुना हिट्ना रिङ्ङि लाहाब् लिसायाक्टानि॥ 10 ठिबाङ्ङा आरको ठिक्ए पाङ्ङिगा भुम्भु-झान्झाचि हिट्नुङ् नाना-झान्झाचि गाड्डे माया चोग्गा चोग् चोगानि॥ आप्पे नुङ्ना याप्मा आरु मान् चोगानुम्चिम्॥ 11 सुबुरुक् मिलिए टोॽवा चोगानुम्, हिट्नुङ् खानि निङ्ग्वालाम्मा डोक् टाङ्बाङाना सेवा चोगानुम्॥ 12 खानिलोक् लिसाना आसाङि हारका लिसानि, हिट्नुङ् याङ्छामा लिना बेला आङ्डानुम् हिट्नुङ् सोरोक् बिन्टि चोगायाक्टानि॥ 13 आभोरङि ओठायागा माङ्हाङ् ओयाप्मिचि घुवार फाडानुम्चिम्, हिट्नुङ् पाङ्ङि ओटागा पाहुनाचि ओचेट्नुलोक् मेट्टानुम्चिम्॥ 14 खानि याङ्छामा माचाट्टिगा याप्मिचि साराप माखाक्, आसिक् पिडानुम्चिम्॥ 15 मोज्जा ओचोग्गालोक् मोज्जा चोगानि, हिट्नुङ् ओहाब्गालोक् हाबानि॥ 16 खानि सोब्बेलोक् टोङानिउङ् युङानि, ठेलोक् चोक्नेनिन्, टरो याप्मिचिङा पाक्चा ठानाँ ओचोगुन्चिन्गा याप्मिचि टाक् चोगानुम्चिम्॥ सोब्बे थोक् निसुङ्गा गाड्डे काइले चा चोक्नेनिन्॥ 17 कोइङा खानि ओचाफेन्ना मामेट्टिए भोने चा खानिङाम्बाक् हिड्डे ओचाफेन्लोक् मेट्नेनुम्चिम्, टरो याप्मिचिङा उपुयुनाँ जे रिङ् नुना हिट्ना रिङ्ङि एडोक् निङ्ग्वा पिडानुम्॥ 18 लिमा हियुक् भोने सोब्बे याप्मिचिलोक् टोङानिउङ् हाङ्हाङ् युङानि॥ 19 आम्बु-आन्झाचि हिट्नुङ् आनो-आन्झोचि, खानि ओचाफेन्लोक् माचोगिगा लाउङ्सा ओचाफेन्नालोक् मेट्नेनुम्चिम्, टरो हिट्नागा साजाए पिमा माङ्हाङ्ङि डोक् नाडानुम्, पोङ्भोने धारमाछाप्लाङि नाड्डे छेप्टाइसे, हिट्नि टाङ्बाङा माट्टुटु, “ओचाफेन्ना टोॽवा ओचोग्गालाउङ्सा साजाए पिमाना आङाना आटोॽवा॥ आङा डोक् बादला लाडुङ्टुङ्॥” 20 फेरि नाड्डे चा छेप्टाइसे, “कासाट्टुरङाना ओसाॽवासाइसे भोने चामा पिडु, ओएप्मा काडाइसे भोने चुवा ठुङ्मा पिडु॥ नाड्डे आचोगुटु भोने खान् ओचाफेन्ना मामेट्टाना कासाट्टुर खान्ङा मोम्मासिमा आमेट्टुटु॥” 21 ओचाफेन्ना रिङ्ङा खान् मेप्मा पिडुन्, टरो याप्मिचिङा ओचोगुना ओभेन्गा टोॽवा ओचेट्नुगा टोॽवा चोगुउङ् मेट्टुचि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.