रोमि 11 - आठपहरियामाङ्हाङ्ङा इस्राएलिचि दाया चोगुचिगा 1 हाट्ले आङा सिलाप्नाँनि, “पाक् माङ्हाङ्ङा इस्राइलि ओयाप्मिचि नाडुएसुचेगि टे?” नाडुन्गेट्टुन्चिन्गा, पोङ्भोने आङा आप्पे चा इस्राएलि याप्मि, हिट्नुङ् आङा आब्राहाम पुङ्लाङि पोङ्साङ्ना बेन्यामिन छोङ्ङिना याप्मि ए॥ 2 माङ्हाङ्ङा पाइले डोक् सेगुचिगा ओयाप्मिचि नाडुन्गेट्टुन्चिन्गा॥ धारमाछाप्लाङि माङ्काटा एलियाङाना ओबारेङि खानिलाउङ्सा ठाहा युङ्ग्वा॥ एलियाङा इस्राएलि याप्मिचि बिरुद्दाङि माङ्हाङ्लोक् नाड्डे बिन्टि ठाङ्सुए, 3 “हाउ आटाङ्बा, हिट्नागाँ कामाङ्काटाचि ओसेडुचे हिट्नुङ् भोक् ठाङ्माना ठानाचि चा ओहोडुचे॥ आङा एडोक् उहिङ्ग्वाट् याङ्ओनाडेसाङे, हिट्नुङ् आङा चा हिट्नागाँ सेट्मा याङ्ओकोन्येट्॥” 4 टरो माङ्हाङ्ङा एलिया लोडुए, “आङा सात हाजार येम्बेछा आयाप्मिचि साम्डुएसुङ्चिङे, हिट्नुङ् हिट्नागाँ बाल ओलोडुना साम्माङ् साम्माङ् ओचोगुन्गेट्टुन्॥” 5 हिट्नाडेडोक् माङ्हाङ्ङा ओमायादायाङा सेगुचिगा उन् बिस्वास काचोक्चि इम्टेप्मा इस्राएलि याप्मिचि हाट्ले चा ओवाहेट्॥ 6 हिट्नुङ् ना रिङ् हिट्नागाँ ओचोगुना टोॽवाङा लिसाना माखाक्, टरो माङ्हाङ्ङाना ओदायामाया लिसाना ए॥ हिट्नागाँ ओचोगुना टोॽवाङा लिसाना बे माङ्हाङ्ङाना मायादाया बिथाँङाना लिसे बे॥ 7 हिट्डेउङ् नाड्डे माट्मा हिडुम्टुम्, इस्राएलि याप्मिचि माङ्हाङ् सोरि धारमोति लिमा ओकोला चा, हिट्नागा उलिनेट्नि, टरो माङ्हाङ्ङा धारमोति चोक्मा सेगुचिगा एडोक् उलिसे॥ हिट्नुङ् माङ्हाङ्ङा आरुङागा उन्चि निङ्ग्वा ठुम्ना चोगुबिडुचे, हिट्नुङ् हिट्नागाँ माङ्हाङ् उरिङ् ओखेम्स्वाट्टुन्॥ 8 धारमाछाप्लाङि नाड्डे चा छेप्टेसे– “माङ्हाङ्ङा हिट्नागा उन्चि चेट् मासागा याप्मिचि गाड्डे डोक् चोगुचे, हिट्नुङ् हाट्ले सोम्मा हिट्नागाँ उनिसुन् नुङ् उन्चि मिक् टेप्टुबिडुचे, हिट्नुङ् हिट्नागाँ ओखेम्सुन् नुङ् उन्चि नुभेक् हुडुबिडुचे॥” 9 हिट्नुङ् हाङ्बा दाउदङा माट्टुटु, “हिट्नागाँ भातेर ओचोगुएट्टुना बेला नुवाचि वारिक्ङि ओठाया गाड्डे डोक् हिट्नागा चा ओठायाक्, हिट्डेउङ् हिट्ना भातेर डोक् हिट्नागा लाउङ्सा साजाए टोक्माना रिङ् लियुक्॥ 10 हिट्नागाँगा उन्चि मिक् डुम् उलियाक्, हिट्डेउङ् हिट्नागाँ निमा उहिडुन्ना, हिट्नुङ् हिट्नागाँगा येक्चुरिक् याङ्छामाङा सोरोक् गुङ् उलियुयाक्याक्॥” 11 हिट्नाडेउङ् आङा खानि सिलाप्नाँनि, पाक् याहुदिचि ओटोक्टानाँ फेरि कोप्मा उहिनिलोक् ओटोक्टाउङ् ओकोसेगि टे? हिट्डे माखाक्, हिट्नागा याहुदिचिङा बिस्वास ओचोग्वाट्टुन् नुङ् माङ्हाङ्ङा पानिछोङ्बाचि हिङुचे, हिट्नुङ् हिट्ना रिङ् डोक् हिट्नागा लाउङ्सा रेक् काप्माना रिङ् लियुक्॥ 12 हिट्नुङ् याहुदिचिङा पाप ओचोगुनाँ नाराङिगा ख्वाप्पा याप्मिचिङा आसिक् ओटोगुए, हिट्नुङ् याहुदिचिङा मुक्टि टोक्माना रिङ् ओनाडुनाँ पानिछोङ्बाचिङा जोम् आसिक् ओटोगुए॥ हाट्ले मिट्टानुम् जब याहुदि याप्मिचि काएल्-काबु उलियुङ् माङ्हाङ्लेङ् ओनोक्युक् झेन् जोम् आसिक् टायुक्॥ पानिछोङ्बाचिङा छुट्कारा ओटोगुटु 13 आङा खानि पानिछोङ्बाचि लोङ्सा खिरिस्टङाना मुलिचेला ए॥ हिट्डेउङ् हाट्ले आङा खानि नागा रिङ् लोनेट्नाँनि, पोङ्भोने आङा चोक्मा हिडुङ्ना आटोॽवा नुलोक् चोक्मा कोलुङ्टुङ्॥ 14 आङा चोगुङ्ना ना टोॽवालाम्मा आप्पे आयाहुदि याप्मिचिगा उन्चि रेक् काट्युक्, हिट्नुङ् हिट्नागा इम्टेप्माम्बाक् माङ्हाङ्लेङ् ओनोक्युक् नुङ् आङा आसा चोगुङ्टुङ्॥ 15 पोङ्भोने याहुदिचिङा माङ्हाङ् इन्कार ओचोगुनाँ नाराङिगा इम्टेप्मा याप्मिचि माङ्हाङ्लेङ् ओनोक्टे॥ हिट्डेउङ् जब हिट्नागा माङ्हाङ्लेङ् ओनोक्युक् झान् सियाना याप्मि उहिङ्ग्वाट् लिसाउङ् चोला टोगुना गाड्डे डोक् लियुक्॥ 16 आनि चालेपा उमा चालाँ चोगुम्ना पिठोङाना पाइलेना भागा सेङ्सेङ्ना भोने, माङ्हाङ्लाउङ्सा ठाङ्सुम्ना आरु सोब्बे भागा चा सेङ्सेङ्ना लियुक्॥ हिट्नाडे डोक् सिङ् उभुङ्माङाना ओजारा सेङ्सेङ्ना भोने ख्वाप्पा ओहागेप्पाचि चा सेङ्सेङ्गा उलियुक्॥ 17 याहुदि याप्मिचि माङ्हाङ्ङा लेट्टुना हिट्नुङ् स्यारसुसार चोगुना ओचेट्नुना जैतुन उभुङ्मालोक् टोङ्मा हिडुम्चिम्चिम्, टरो इम्टेप्मा ओहागेप्पाचिम्बाक् ओएगाडे॥ हिट्नुङ् खानि पानिछोङ्बाचि जाङ्गालि जैतुन उभुङ्माङाना ओहागेप्पाचिलोक् टोङ्मा हिडुम्टुम्, खानि हिट्ना ओचेट्नुना सिङ् उभुङ्माङाना ओहागेप्पाचिङि कालामि मारेक्टेसिए॥ हिट्डेउङ् हाट्ले खानिङा हिट्ना ओचेट्नुना जैतुन उभुङ्मालाम्मा बारगाट् हिट्नुङ् चोला आटोगुम्टुम्॥ 18 हिट्नाडेउङ् खानि हिट्नागा ओएगागा ओहागेप्पाचि नुङ्ना उनुगा नुङ् ठेलोक् चोक्नेनिन्, पोङ्भोने खानिङा ओजारा आखुनिम्गेट्निम्, टरो ओजाराङा खानि माखुएसिए॥ 19 टरो खानि नाड्डे पिग्मा आहिडिटि, “आन्याँ कालामि रेक्मा उहिडि नुङ् हिट्नागा ओहागेप्पाचि ओएगाडे॥” 20 ना रिङ् छेम्बा डोक्, याहुदिचिङा खिरिस्टङि बिस्वास ओचोग्वाट्टुन्, हिट्नुङ् हिट्नागा ओएगाडे॥ हिट्नुङ् खानिङा बिस्वास ओचोगुम्नाँ खानि हिट्नागाँगा ठोङ्ङि आवासेट्टि॥ हिट्नाडेउङ् खानिङा खानि नाबुक् ठेलोक् चोक्नेनुम्, टरो माङ्हाङ्लोक् किट्टानिउङ् युङानि॥ 21 पोङ्भोने माङ्हाङ्ङा हिट्नागा छेम्बागा ओहागेप्पाचिउम् एगुङ् लेप्टुचे भोने, खानि चा बाँकि मायुङ्सिन्गा॥ 22 हिट्नाड्डेउङ् माङ्हाङ् इम्टेप्मा माया काचोक्बा हिट्नुङ् उन्ङा साजाए चा आपियुक् नुङ् मिट्टानुम्॥ बिस्वास ओचोगुन्गा याप्मिचि उन्ङा साजाए पिडुचिचि, टरो खानिङा उन्ङाना मायादायाङि बिस्वास आचोगुम्याक्टुम्मे भोने, उन्ङा खानि दाया माचोगिटि॥ हिट्डे आचोक्नेट्निम् भोने खानि चा माचेप्टिउङ् मालेप्टिटि॥ 23 हिट्नाडेउङ् इस्राएलि याप्मिचि काएल्-काबु उलियुङ् बिस्वास ओचोगुटु भोने, माङ्हाङ्ङा हिट्नागा फेरि पाइले लिसाना सिङ् उभुङ्माङि डोक् रेक्टुचिचि, पोङ्भोने माङ्हाङ्लोक् हिट्नागा फेरि रेक्मा हिमाना बोल् युङ्ग्वा॥ 24 हिट्नुङ् पाइले बाकेंचाङि लेट्बालाक् साद्दे सिङ् उभुङ्माङि जाङ्गालाङिना सिङ् उभुङ्मा ओहागेप्पा कालामि रेक्मा साजिलो लिनिना॥ टरो माङ्हाङ्ङा खानि पानिछोङ्बाचि माचेप्टिडेसिए हिट्नुङ् खानि जाङ्गालि उभुङ्मा ओहागेप्पा गाड्डेगा आलिसि चा हिट्ना ओचेट्नुना जैतुन उभुङ्माङि उन्ङा खानि मारेक्टेसिए॥ हिट्नुङ् हिट्नागा याहुदिचि ओचेट्नुना जैतुन सिङ् उभुङ्मा ओहागेप्पा गाड्डेगा, हिट्डेउङ् माङ्हाङ् लाउङ्सा हिट्नागा आप्पे उभुङ्माङि फेरि कालामि रेक्मा साजिलो लियुक्॥ ख्वाप्पा लाउङ्सा माङ्हाङ्ङाना मायादाया 25 आम्भु-आन्झाचि हिट्नुङ् आनो-आन्झाचि, ना ठोबाना रिङ् बारेङि बुजा चोगानुम् नुङ् आङा खानि लोनाँनि, हिट्डेउङ् खानि आप्पे लाउङ्सा ठेलोक् काचोक् लिनेनिन्॥ ना ठोबाना रिङ् बारेङि आङा खानि लोनाँनि, खिरिस्टङि टामा ओकोन्गा टेप्मा पानिछोङ्बाचिङा बिस्वास ओचोगुन्लोक् सोम्मा इस्राइलिचिङा उन्चि निङ्ग्वा ठुम्लोक् ओचोगुटु॥ 26 हिट्नुङ्ना ख्वाप्पा इस्राएलि याप्मिचि माङ्हाङ्ङा बाचाँ चोगुचिचि॥ धारमाछाप्लाङि नाड्डे छेप्टेसे– “काहिङ्मेप्बा डाङ्बा सियोनलाम्मा टायुक्, हिट्नुङ् उन्ङा याकुब उपुङ्लाङिगा ख्वाप्पा पाप टुगुडेसुटु॥” 27 हिट्नुङ् माङ्हाङ्ङा माट्टुटु, “जब हिट्ना बेला लियुक्, हिट्नागाँगा ख्वाप्पा पाप टुगुङुङ् हिट्नागालोक् चोगुङ्ना माङ्हुप् आङा पुरो चोगुङ्टुङ्॥” 28 याहुदि याप्मिचि हाट्ले माङ्हाङ् ओसाट्टुरचि ए, पोङ्भोने हिट्नागाँ नुना खाबोर बिस्वास ओचोगुन्गा, टरो खानि लाउङ्सा ओचेट्नुना डोक् लिसे॥ टरो उटुम्लाम्मा डोक् याहुदिचि माङ्हाङ्ङा सेगुचिगा ओयाप्मिचि ए, हिट्नुङ् उन्ङा हिट्नागाँगा टुबाठेबाचिलोक् चामारसिङा चोगुनाँ हिट्नागा हाट्ले चा आड्डिक् माया चोगुचिगा ए॥ 29 पोङ्भोने माङ्हाङ्ङा आनि आपिडाना बारदान नोक्टुखाट्टुन्ना हिट्नुङ् उन्ङा सेगुचिगा याप्मिचि बारेङि उनिङ्ग्वा फेराँ चोगुन्ना॥ 30 एक बेला खानि पानिछोङ्बाचिङा माङ्हाङ् उरिङ् आखेम्नेट्निम्॥ टरो हाट्ले इस्राएलि याप्मिचिङा माङ्हाङ् उरिङ् ओखेम्स्वाट्टुन् नुङ् खानिङा उन्ङाना ओदाया आटोगुएसुम्मे॥ 31 हिट्नाड्डे डोक् हाट्ले याहुदिचि माङ्हाङ् उरिङ् ओखेम्सुन्गा उलिसेसे॥ हिट्डेउङ् माङ्हाङ्ङा खानि दाया माचोगि गाड्डे डोक् हिट्नागा चा फेरि दाया चोगुचिचि॥ 32 माङ्हाङ्ङा सोब्बे याप्मिचि खाम्बाङ्ङि ओठायागा गाड्डे डोक् चोगुचे, पोङ्भोने हिट्नागाँ उन्ङाना आग्याँ पालान् ओचोग्वाट्टुन्॥ हिट्नुङ् हिट्नागा ख्वाप्पालाउङ्सा उन्ङाना दाया निमेट्मा उन्ङा हिट्डे चोगुए॥ माङ्हाङ् उनिङ् चोम्माना रिङ् 33 छेम्बा डोक्, माङ्हाङ्ङाना ओदाया आड्डिक् ठेना, उन्ङा सोब्बे थोक् ठाहा टोगुटु हिट्नुङ् बुजा चोगुटु॥ उन्ङाना उनिङ्ग्वाङि पाक् रिङ् युङ्ग्वाना साङा चा सोब्बे बुजा चोक्मा उहिडुन्ना॥ उन्ङाना टोॽवा चोक्माना पारा साङा चा माप्मा उहिडुन्ना॥ 34 धारमाछाप्लाङि नाड्डे छेप्टेसे– “साङा चा टाङ्बाङाना उनिङ्ग्वाङिना रिङ् ठाहा टोग्मा उहिडुन्ना, हिट्नुङ् उन् साङा चा हिसिक्मा उहिडुन्ना॥” 35 “माङ्हाङ् साङा चा पाक्चा उपिडुन्गेट्टुन्ना हिट्डेउङ् उन्ङा खोना चा पाक्चा नोक्माबिमाचि कोन्निना॥” 36 छेम्बा, माङ्हाङ्ङा डोक् सोब्बे थोक् सिरिस्टि चोगुए, हिट्नुङ् सोब्बे थोक् उन्ङाना ओबोल्लाम्मा उलिसेसे, उन्ङाना मान् उलियाक् नुङ् सोब्बे थोक् उन्ङा सिरिस्टि चोगुए॥ हिट्नुङ् माङ्हाङ्ङाना उनिङ् सोरोक् टो-टो चोन्डुम्॥ आमेन्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.