रोमि 10 - आठपहरिया1 आम्बु-आन्झाचि हिट्नुङ् आनो-आन्झाचि, इस्राएलि याप्मिचि माङ्हाङ्ङा बाचाँ ओचोगुचियाक् नुङ् आनिङ्ग्वा युङ्ग्वा हिट्नुङ् हिट्नागा लाउङ्सा बिन्टि चोगुङ्टुङ्॥ 2 हिट्नागाँ माङ्हाङ्ङाना सेवा चोक्मा आड्डिक् निङ्ग्वा ओचोगुएट्टु नुङ् आङा ठाहा टोगुङ्टुङ्, टरो खोड्डे पारिक् छेम्बा डोक् उन्ङाना सेवा चोक्माना हिट्ना रिङ् उनिसुन्गा॥ 3 पोङ्भोने माङ्हाङ्ङा ओनाभाक्ङि याप्मिचि खोड्डेउङ् धारमोति चोगुचिगा हिट्ना रिङ् हिट्नागाँ ठाहा ओटोगुन्गा, हिट्नुङ् हिट्नागाँ धारमाबिधि पालान् ओचोगुङ् आप्पे धारमोति लिमा कोसिस ओचोगुएट्टु॥ हिट्डेउङ् माङ्हाङ्ङा याप्मिचि धारमोति चोगुचिगा लाम्बो हिट्नागाँ इन्कार ओचोगुटु॥ 4 पोङ्भोने खिरिस्टङा डोक् धारमाबिधि आन्ते चोगुटु, हिट्डेउङ् हाट्ले खिरिस्टङि बिस्वास काचोक् सोब्बे याप्मिचि धारमोति उलियुक्॥ सोब्बे लाउङ्सा मुक्टि 5 मोसाङा धारमाबिधि पालान् चोगुङ् धारमोति लिसिना बारेङि नाड्डे छेप्टुए, “जुन् याप्मिङा पुरोलोक् धारमाबिधिङिना रिङ् पालान् चोगुटु, हिट्ना हिट्नालाम्मा डोक् हिङ्युक्॥” 6-8 टरो आनि चोगुम्ना बिस्वासङा माङ्हाङ्ङि धारमोति लिसाना बारेङि धारमाछाप्लाङि नाड्डे छेप्टेसे, “माङ्हाङ् रिङ् खानि सोरि डोक् युङ्ग्वा, ना रिङ् डोक् खानि निङ्ग्वाङि युङ्ग्वा, हिट्नुङ् ना रिङ् खानि यासिलाम्मा डोक् आमाट्टुएटुम्॥” ना रिङ्म्बाक् मुक्तिङाना नुना खाबोर ए॥ हिड्नाडेउङ् खानि निङ्ग्वाङि नाड्डे माट्नेनुम्, “साक्उम्बाक् टोनालोग्ङि खिरिस्ट छेम्सिङा खाट्युङ् नाराङि उक्टुटुना?” पोङ्भोने खिरिस्ट पाइले डोक् यो उङ्सेसे॥ हिट्डेडोक् नाड्डे चा पिक्नेनिन्, “साक्उम्बाक् यो पातालङि खाट्युङ् उसियागा याप्मिचिलाम्मा खिरिस्ट काप्मा हिडुटुना?” पोङ्भोने खिरिस्ट पाइले डोक् उहिङ्ग्वाट् लिमा हिडेसे॥ हिट्नुङ् हाट्ले आन्याँ पारचार चोगुएट्टुम्माना बिस्वासङाना खाबोरम्बाक् खिरिस्ट ए॥ 9 हिट्नुङ् खान्ङा येसुलाउङ्सा टाङ्बा ए नुङ् आरु याप्मिचि सोरि सुइकार आचोगुटु हिट्नुङ् माङ्हाङ्ङा उन् सियानालाम्मा उहिङ्ग्वाट् चोगुए नुङ् कानिङ्ग्वाङा बिस्वास आचोगुटु भोने, माङ्हाङ्ङा खान् बाचाँ माचोग्युक्॥ 10 पोङ्भोने कोइ याप्मिङा उनिङ्ग्वाङा डोक् बिस्वास चोगुटु भोने, उन् माङ्हाङ् ओनाजारङि धारमोति लियुक्, हिट्नुङ् हिट्नाँ ओयासिङा डोक् माट्टुङ् सुइकार चोगुटु भोने, माङ्हाङ्ङा हिट्ना बाचाँ चोगुटु॥ 11 हिट्नुङ् धारमाछाप्लाङि नाड्डे छेप्टेसे, “जुन्ङा उन्ङि बिस्वास चोगुटु, हिट्ना खोना बेला चा मोम्मासिमा कोन्निना॥” 12 हिट्नुङ् नाहि याहुदि आथाबा पानिछोङ्बाङि खोना चा ठेना खाट्टिउना लिनिना॥ पोङ्भोने उन् ठिक्ए टाङ्बा, सोब्बे याप्मिचिगा टाङ्बा ए॥ हिट्नुङ् उनिङ् ओलाडुगा याप्मिचि ख्वाप्पालाउङ्सा उन्ङा जोम् आसिक् पिडुचिचि॥ 13 पोङ्भोने धारमाछाप्लाङि नाड्डे छेप्टेसे, “टाङ्बा उनिङ् ओलाडुगा सोब्बे उहिङ्युक्॥” 14 टरो याप्मिचिङा बिस्वास डोक् ओचोगुन्गेट्टुन्गा भोने खोड्डेउङ् हिट्नागाँ उनिङ् ओलाडुटुना टे? हिट्नुङ् याप्मिचिङा उन्ङाना बारेङि ओखेम्सुन्गेट्टुन्ना भोने खोड्डेउङ् उन् बिस्वास ओचोगुटुना टे? उन्ङाना बारेङि साङा चा पारचार ओचोगुन्गेट्टुन् भोने, याप्मिचिङा खोड्डेउङ् उन्ङाना बारेङि ओखेम्सुटुना टे? 15 हिट्नुङ् कोइङा पारचार चोक्मा मिपाङ्ङे खोड्डेउङ् हिट्नागा ओखाट्युङ् पारचार ओचोगुटुना टे? धारमाछाप्लाङि नाड्डे छेप्टेसे, “नुना खाबोर पारचार काचोक् याप्मिचि ओटानाँ औधि ओचेट्नुना लियुक्॥” 16 टरो हिट्नागा सोब्बेङा नुना खाबोर पालान् ओचोगुन्गेट्टुन्ना, पोङ्भोने यासैयाङा माट्टुटु, “हाउ टाङ्बा, आन्याँ माट्टुम्माना खाबोर साङा बिस्वास ओचोगुएना टे?” 17 हिट्डेउङ् बिस्वासम्बाक् खाबोर खेम्सुम्मुङ् टायुक्, हिट्नुङ् खाबोरम्बाक् खिरिस्टङाना रिङ्लाम्मा खेम्सुम्टुम्॥ 18 टरो आङा सिलाप्नाँनि, “पाक् इस्राएलि याप्मिचिङा नुना खाबोर ओखेम्सुन्गेट्टुन्गि टे?” छेम्बा डोक् हिट्नागाँ ओखेम्सुएसुए, पोङ्भोने धारमाबिधिङि छेप्टेसे– “ना नुना खाबोर पारचार काचोक्बाचिगा खाबोर नाराङिना ख्वाप्पा डेन्लेङ् छिन्डेसे॥ हिट्नुङ् हिट्नागाँ ओमाट्टुगा रिङ् सोब्बे याप्मिचिलाउङ्सा पारचार चोगेसे॥” 19 फेरि आरको रिङ्, “छेम्बा डोक्, पाक् इस्राएलि याप्मिचिङा नुना खाबोर बुझाँ ओचोग्वाट्टुन्नि टे?” हिट्नागाँ बुजा ओचोगुए॥ माङ्हाङ्ङा पाइले मोसालाम्मा हिट्नागा नाड्डे लोडुचिगा डागा, “पानिछोङ्बाचि आङा आसिक् पिडुङ्चिङ्गा रिङ् आनिसुमुङ् खानि रेम्सुबा काहिक्बा आलिसिटि, हिट्नुङ् मुरखा याप्मिचि आङा माया चोगुङ्चिगा रिङ् आनिसुमुङ् खानि याक्लेड्युक्॥” 20 हिट्नुङ् यासैया माङ्काटाङा माङ्हाङ् रिङ् मिकिट्ङे नाड्डे माट्टुटु, “आङा कोम्मा डोक् याङ्ओकोनेट्निगा याप्मिचिङा आङा याङ्उटुबे, हिट्नुङ् आङाना बारेङि सिलाप्मा डोक् याङ्उसिलाप्नेट्निगा याप्मिचि सोरि आङा आप्पेलाउङ्सा पारकाट् चोगुङे॥” 21 टरो इस्राएलि याप्मिचि बारेङि माङ्हाङ्ङा नाड्डे माट्टुटु, “लेन्सेन् हिट्नागा याप्मिचि आङा हाङ्सुङ्चिङे, टरो हिट्नागाँ आरिङ् ओखेम्स्वाट्टुन् हिट्नुङ् बिरोधि उलिसे॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.