रोमि 1 - आठपहरिया1 आङा पावाल खिरिस्ट येसुङाना सेवाक्ङा ना चिट्ठि छेप्टुङ्गेट्टुङ्॥ माङ्हाङ्ङा आङा मुलिचेला लिमा याङ्सेगे, हिट्नुङ् माङ्हाङ्ङाना नुना खाबोर पारचार चोक्मा कोन्ना टोॽवाङि उन्ङा याङ्साम्डे॥ 2 याप्मा बारखा पाइले माङ्काटाचिङा सेङ्सेङ्ना धारमाछाप्लाङि ओछेप्टुना ना नुना खाबोर डोक् माङ्हाङ्ङा पिमाना चामारसिङा चोगुए॥ 3 ना नुना खाबोरउम्टे माङ्हाङ् छाङाना बिसाएङि ए॥ उन् याप्मि लिसाउङ् दाउद हाङ्बाङाना पुङ्लालाम्मा पोङ्से॥ 4 हिट्नुङ् सेङ्सेङ्ना हाङ्सालाम्मा येसु माङ्हाङ्ङाना सोब्बे नुङ्ना माङ्बोल्लेउ छा नुङ् पारकाट् चोगुए, पोङ्भोने उन् माङ्हाङ्ङा सियानालाम्मा उहिङ्ग्वाट् चोगुए॥ उन् आनि टाङ्बा येसु खिरिस्ट ए॥ 5 खिरिस्टलाम्मा माङ्हाङ्ङा सोब्बे आरु छोङ्बाचिलाउङ्सा उन्ङा चोगुना रिङ् लोमा उन्ङा मुलिचेलाचि लिमा आन्याँ मौका याप्मिपिडे, हिड्डेउङ् हिट्नागाँ उन् बिस्वास ओचोगुङ् उन्ङा माट्टुना रिङ् ओखेम्सुटु, हिट्नुङ् सोब्बेङा येसु खिरिस्ट मान् ओचोगुटु॥ 6 हिट्नुङ् खानि रोमङि आलिसिगा चा हिट्नागा आरु छोङ्बाचिलोक् येसु खिरिस्टङाना ओयाप्मिचि लिमा लाउङ्सा माङ्हाङ्ङा माछेम्डिएसे॥ 7 हिट्डेउङ् खानि सोब्बे रोमङि आयुङिगा मायालु याप्मिचि खानिलाउङ्सा माङ्हाङ्ङा माया माचोगिटि हिट्नुङ् ओयाप्मिचि नुङ् माछेम्डिगा खानि लाउङ्सा ना चिट्ठि छेप्टुङ्गेट्टुङ्॥ हिट्नुङ् खानिलाउङ्सा माङ्हाङ् आनि पाबा लोक् आनि डाङ्बा येसु खिरिस्टङा मायादाया लोक् हाङ्हाङ् मापिड्याक् नुङ् आङा बिन्टि चोगुङ्टुङ्॥ रोमङि खाप्मा पावालङा निङ्ग्वा चोगुटु 8 हाट्ले सोब्बे नुङ् पाइले खानि सोब्बे लोङ्सा येसु खिरिस्टङा उनिङ्ङि आङाना माङ्हाङ् पोए-पोए ठाङ्सुङ्टुङ्, पोङ्भोने खानिङा खिरिस्टङि आचोगुम्ना बिस्वासङाना बारेङि सोब्बे ठोङ्ङिगा याप्मिचिङा रिङ्पान् ओचोगुएट्टु॥ 9 आङा आनिङ्ग्वालाम्मा डोक् माङ्हाङ् छाङाना बारेङि नुना खाबोर पारचार चोगुङ् उन्ङाना सेवा चोगुङ्टुङ्, हिट्नुङ् आङा बिन्टि चोगुङ्नाँ खानि सोरोक् मिट्नानिगा रिङ् उन्ङा डोक् निसुटु॥ 10 हिट्नुङ् माङ्हाङ्ङा उनिङ्ग्वा चोगुए भोने आखेरिङि उलि चा खानि टुब्सिङा आप्माना लाम्बो आङा ओटोगुङ् नुङ् उन् बिन्टि ठाङ्सुङ्टुङ्॥ 11 पोङ्भोने बिस्वासङि खानि बोल्लेउ चोक्मा सेङ्सेङ्ना हाङ्साङा आपिना आसिक् खानिलोक् हाम्मा उहिडुङ् नुङ् खानि टुब्सिङा आप्मा औधि आनिङ्ग्वा लोसेसे॥ 12 आङा माप्मा कोलुङ्ना रिङ्उम्बाक् आनि टुबिटि भोने ठिबाङ् आरकोङा आँट् टोग्मा हिडुम्टुम्॥ खानिङा आङाना बिस्वास आनिसुम्टुम् भोने खानिङा आँट् आटोगुम्टुम् हिट्नुङ् आङा खानि बिस्वास निसुङ्टुङ् भोने आङा आँट् टोगुङ्टुङ्॥ 13 मायालु आम्भु-आन्झाचि हिट्नुङ् आनो-आन्झाचि, आङा याप्मा खेप् खानि टुब्सिङा आप्मा कोलाङ्ना रिङ् खानिङा ठाहा टोगानुम्, टरो हाट्ले सोम्मा खानिङि आप्मा खोलो पाक्लोक् पाक्ङा याङ्छाक्टैसे॥ आङा आरु ठोङ्ङि पानिछोङ्बाचि खिरिस्टङि टाडुङ्चिङ् गाड्डे डोक् खानि ठोङ्ङि चा याप्मिचि खिरिस्टङि टाप्माचिगा आनिङ्ग्वा युङ्ग्वा॥ 14 पोङ्भोने आङालाउङ्सा खालाङ्गाङि उलिसागा याप्मिचि हिट्नुङ् युक्टाम्ङिगा याप्मिचि, पोढाँ उलिसागा हिट्नुङ् पोढाँ उलिनिगेट्निगा सोब्बे खाले याप्मिचिलाउङ्सा नुना खाबोर खेम्मेट्मा कार लाहाब् लिसेसाङे॥ 15 हिट्नाडेउङ् खानि रोमङि आलिसिगा याप्मिचिलाउङ्सा चा ना नुना खाबोर पारचार चोक्मा आड्डिक् आनिङ्ग्वा युङ्ग्वा॥ 16 आङा खिरिस्टङाना बारेङि ना नुना खाबोर खेम्मेट्मा मोन्निङ्सिनिङ्ना, पोङ्भोने ना नुना खाबोर बिस्वास काचोक् सोब्बे याप्मिचि माङ्हाङ् ओबोल्ङा हिङुचिचि॥ ना नुना खाबोर पाइले आन्याँ याहुदि छोङ्बाचिङा खेम्सुम्मे, हिट्नुङ् हाट्ले खानि पानिछोङ्बाचिङा चा आखेम्सुम्मे॥ 17 पोङ्भोने ना नुना खाबोरङा माङ्हाङ्ङा ओटोकानाङि आनि खोड्डेउङ् माहामाना आचोगेना नुङ् आनिमेट्युक्, हिट्नुङ् ना रिङ् बिस्वासलाम्मा उटुम् लियुङ् बिस्वासलाम्मा डोक् पुरो लियुक्॥ धारमाछाप्लाङि नाड्डे छेप्टेसे, “धारमोति याप्मिम्बाक् माङ्हाङ्ङि बिस्वास चोगुङ् डोक् हिङ्युक्॥” दुस्टा टोॽवा ओचोग्गा बिरुद्दाङि माङ्हाङ्ङाना उकुन्जुरिक्वा 18 टोनालोग्ङिना माङ्हाङ्ङा उनिङ्ग्वा गाड्डे ओचोक्निगा हिट्नुङ् ओभेन्गा टोॽवा काचोक् सोब्बे याप्मिचि बिरुद्दाङि उकुन्जिरिॽवा पारकाट् चोगुएसुए॥ हिट्नागाँ ओचोगुना ओचाफेन्ना टोॽवाङा आरु याप्मिचिङा माङ्हाङ्ङाना बारेङि छेम्बाना रिङ् लाड्मा हिट्नागाँ ओछाक्टुएसुचे॥ 19 सोब्बे याप्मिचिङा माङ्हाङ् खोड्डेना नुङ् पारचिन्दा ठाहा ओटोगुटु, पोङ्भोने माङ्हाङ् आप्पेङा उन् खोड्डेना नुङ् सोब्बेलाउङ्सा पारकाट् चोगुएसुए॥ 20 ना रिङ् छेम्बा डोक्, माङ्हाङ्ङाना लाट्निना ओबोल् हिट्नुङ् उन् खोड्डेना नुङ् आनि मिक्ङा निमा हिनिम्ना॥ टरो नाराङिना उटुम् लिसालाम्मा डोक् उन्ङा सिरिस्टि चोगुगा थोक्लाम्मा याप्मिचिङा माङ्हाङ् पारचिन्दा बुजा चोक्मा उहिडुटु॥ हिट्नाडेउङ् हिट्नागा लाउङ्सा माङ्हाङ् बुजा चोक्निम्ना नुङ् माप्माना रिङ् डोक् वाइना॥ 21 हिट्नागा याप्मिचिङा माङ्हाङ् मिसेन् उनिसु चा उन् चोक्मा कोन्ना मान् ओचोग्वाट्टुन्, हिट्नुङ् उन् पोए-पोए चा ओठाङ्स्वाट्टुन्॥ हिट्ना ओसाट्टो हिट्नागाँ उन्चि मिप्माना निङ्ग्वाङि बेकाम्मे उलिसे, हिट्नुङ् उन्चि निङ्ग्वाङि पाक् माहामाना हिट्ना बुजा चोक्मा डोक् उहिडुवाट्टुन्॥ 22 हिट्नागा आन्याँ ठोना लिसिङागा उपिक्चा हिट्नागा ठोनाबा उलिसे॥ 23 हिट्नुङ् हिट्नागाँ सोरोक् उहिङ्ग्वाट् लिना माङ्हाङ्ङाना माङ्ध्यान् चोक्मा ओनाडुङ्, हिट्नागाँ जाखाम् लिना याप्मि गाड्डे निङ्ना साम्माङ् ओचोगुङ् माङ्ध्यान् ओचोगुए॥ हिट्नुङ् हिट्नागाँ नुवाचि, जिवाट्चि, हिट्नुङ् सोट्सा ओलाम्टिगा जिवाट्चि गाड्डे उनिङ्गा मुरति ओचोगुङ् साम्माङ् ओचोगुए॥ 24 हिट्नाडेउङ् माङ्हाङ्ङा हिट्नागा उन्चि निङ्ग्वाङा उमिट्टु गाड्डे डोक् आसुद्दो थोक् चोक्मा लेडुचे, हिट्नुङ् हिट्नागाँ उन्चि उन्चिङि मोम्मासिमाना टोॽवा ओचोगुए॥ 25 हिट्नागाँ माङ्हाङ्ङाना बारेङि छेम्बाना रिङ् बिस्वास चोक्मा ओनाडुङ् माङ्जोना रिङ्ङि बिस्वास ओचोगुए॥ हिट्नागाँ सोब्बे थोक् काचोक् माङ्हाङ् माङ्ध्यान् चोक्मा ओनाडुङ् उन्ङा चोगुगा थोक्चि साम्माङ् हिट्नुङ् सेवा ओचोगुए॥ माङ्हाङ् उनिङ् सोरोक् टो-टो चोगुम्॥ आमेन्॥ 26 हिट्नुङ् हिट्नागाँ माङ्हाङ् माङ्ध्यान् ओचोग्वाट्टुन् नुङ् माङ्हाङ्ङा हिट्नागा आप्पे उन्चि निङ्ग्वा गाड्डे मोन्डिसिइना टोॽवा चोक्मा लेडुचे॥ हिट्नागाँगा उन्चि पाङ्ढाङ्मा आप्पे उन्चि पाङ्ढाङ्बालोक् इम्माजामा खाप्मा ओनाडुए, टरो उन्चि पाङ्ढाङ्मा पाङ्ढाङ्मा डोक् उइम्साजायाउङ् ओचाफेम्मा टोॽवा ओचोगुए॥ 27 हिट्नाड्डे डोक् पाङ्ढाङ्बाचि चा उन्चि पाङ्ढाङ्माचिलोक् इम्माजामा खाप्मा ओनाडुए, टरो उन्चि उन्चिङि छोम्बोक् छोम्बोक् उलिसाउङ् येम्बेछा येम्बेछाङि मोन्डिसिइना टोॽवा ओचोगुए, हिट्नुङ् हिट्नागाँ ओचोगुना ओचाफेन्ना टोॽवाङाना साजाए ओटोगुए॥ 28 हिट्नुङ् हिट्नागाँ माङ्हाङ् पिमा कोन्ना मान् पिमा चा ओनाडुए॥ हिट्डेउङ् माङ्हाङ्ङा हिट्नागा चोक्मा लिनिना टोॽवा ओचोगुवाक् नुङ् उन्चि ओचाफेन्ना निङ्ग्वाङि डोक् लेडुचे॥ 29 हिट्नागाँ सोब्बे पारिक्गा ओचाफेन्गा रिङ् एडोक् उमिट्टुगा, हिट्नुङ् ओभेन्गा रिङ्ङा इप्टुचिगा उलिगा॥ हिट्नागा लोभि हिट्नुङ् चिम्मा काफुट्चि, रेम्सुबा काहिक्बा, हिट्नुङ् याप्मि कासेट्, खेमाबुङ्मा ओचोग्गा, रिङ् काटेप् उलिगा॥ हिट्नागाँ आरुङागा निङ्ग्वा चोसेक् ओमेट्टुचिगा, आरुङागा रिङ् ओमाट्टुगा, 30 हिट्नुङ् याप्मिचि ओचाफेन्लोक् ओमेट्टुचिगा, माङ्हाङ् चिम्मा काफुट्चि, साक्चा मान् ओचोगुन्चिन्गा, आप्पे ठेलोक् ओचोग्गा, ठेना ठेना रिङ् ओचेक्गा उलियुक्॥ हिट्नुङ् ओभेन्गा रिङ् ओकोलुङ् ओहोट्टुगा, पाबा-मामाङाना रिङ् ओखेम्सुन्गा, 31 हिट्नागा ठोनाबा, हिट्नुङ् काबुल ओचोगुगा रिङ् ओचोगुन्गा, हिट्नुङ् हिट्नागाँ आरु माया हिट्नुङ् दाया चा ओचोगुन्चिन्गा॥ 32 हिट्नुङ् हिड्डेगा टोॽवा काचोक्चि माङ्हाङ्ङा साजाए पिडुचिचि नुङ् हिट्नागाँ ठाहा ओटोगु चा, आझै हिट्नागाँ हिड्डेगा टोॽवा डोक् ओचोगुयाक्टुगा॥ हिट्टेप्मा एडोक् माखाक्, झान् हिट्डेगा टोॽवा चोक्मा आरु चा ओचाम्सुचिचि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.