पारकास 9 - आठपहरिया1 पाँचौँ माङ्हाङ् रिङ् काउग्बाङा उन्लोक् लिसाना धुटुरिबा टेनुए, हिट्नुङ् आङा ठिक् चोक्चिङ्गेट् टोनालोग्लाम्मा नाराङि ठायाना निसुङे॥ हिट्ना चोक्चिङ्गेट् लाउङ्सा घाइरो भाड्खालो ओङ्मा लाउङ्सा साँचो उपिडुए॥ 2 हिट्ना चोक्चिङ्गेट्ङा हिट्ना घाइरो भाड्खालो ओङ्सुए, हिट्नुङ् हिट्नालाम्मा मिङाना ठेना मि भुङ्रोलाम्मा मिखुमाङ् होन्डा गाड्डे डोक् मिखुमाङ् होन्डे, हिट्नुङ् हिट्ना मिखुमाङ्ङा नाम् छेमा हिट्नुङ् टाङ्साङ् चा डुम्बारि डुम् चोगुए॥ 3 हिट्ना मिखुमाङ्लाम्मा माङ्घिरिक्चि ओहोन्डे हिट्नुङ् नाराङि ओठाए, हिट्नुङ् हिट्नागा माङ्हाङ्ङा बिच्छिङा याप्मिचि ओआक्टुचि गाड्डे डोक् याप्मिचि याङ्छामा पिमाना बोल् पिडुचे॥ 4 माङ्हाङ्ङा हिट्नागा नाराङिगा खोना चा राक्वा, झोरा आथाबा सिङ् उभुङ्माचि जाखाम् चोक्नेनुम्चिम्, टरो उन्चि नाम्ढाङ्ङि माङ्हाङ्ङाना छाप् मालेगा याप्मिचि एडोक् हान्ति चोगानुम्चिम् पिक्सा लोडुचे॥ 5 हिट्नागा माङ्घिरिक्चिङा याप्मिचि सेप्माना आधिकारम्बाक् ओटोग्वाट्टुन्, टरो लेम्बोक् माइना सोम्मा याङ्छामा पिमाना आधिकार ओटोगुए॥ माङ्घिरिक्चिङा याप्मिचि उपिडुचिगा याङ्छामाम्बाक् बिच्छिङा याप्मिचि ओआक्टुचिनाँ लिना याङ्छामा गाड्डेना डोक् डाना॥ 6 हिट्नुङ् हिट्ना बेला याप्मिचिङा सिमा लाउङ्सा ओकोलुटु, टरो हिट्नागाँ ओटोगुन्ना॥ याप्मिचिङा आड्डिक् सिमा निङ्ग्वा ओचोगुटु, टरो हिट्नागा उसिनिगा॥ 7 हिट्नागा माङ्घिरिक्चि चुङ्मा टेयार उलिसागा टाङ्राङ्बाचि गाड्डे उनिङ्सागा॥ हिट्नागाँ उन्चि टेहेक्ङि साम्मेङ्ङाना मुकुट् गाड्डे उनिङ्सागा ओवाडुएसुगा, हिट्नुङ् उन्चि नाभाक् याप्मिचिगा गाड्डे उनिङ्सागा डागा॥ 8 हिट्नुङ् हिट्नागाँगा फ्याक् चा मेच्छेमाचिङागा गाड्डे केना डाना, हिट्नुङ् उन्चि केङ् चा किबाङाना गाड्डेगा ओडागा॥ 9 हिट्नुङ् हिट्नागाँ उन्चि छातिङि धाउङाना पाता ओवाडुएसुगा, हिट्नुङ् हिट्नागाँगा उन्चि लाप्टाङ्लाम्मा होन्डाना सोराम्बाक् चुङ्मा ओखाडागेट्टागा जोम् टाङ्राङ्बाचिङा ओसाडुगोन्डुना राथचि गाड्डे मुक्टाना डाना॥ 10 हिट्नागा माङ्गिरिक्चिगा उन्चि मेलाक् बिच्छिङा ओमेलाक् गाड्डेगा ओडागा॥ हिट्नागाँगा मेलाक्ङि लेम्बोक् माइना सोम्मा याप्मिचि याङ्छामा पिमाना साक्ति डाना॥ 11 हिट्नागा माङ्घिरिक्चिगा हाङ्बाम्बाक् घाइरो भाड्खालोङिना दुस्टा दुत डाना॥ हिब्रु रिङ्ङि हिट्नाङाना उनिङ् एबाड्डोन हिट्नुङ् गिरिक् रिङ्ङि हिट्नाङाना उनिङ् आपोल्लियान ए॥ 12 पाइलेना खेप्ङाना बिपोत्ति लाट्टाडेए, टरो हाट्ले चा आरको इप्पोक् बिपोत्ति टामा डोक् युङ्ग्वा॥ 13 छैटौँ माङ्हाङ् रिङ् काउग्बाङा उन्लोक् लिसाना धुटुरिबा टेनुए, हिट्नुङ् माङ्हाङ् ओटोकानाङि लिसाना साम्मेङ्ङाना बेदिङाना टेम्बोक् उसुरालाम्मा ठिक् सोरा मुक्टाना आङा खेम्सुङे॥ 14 हिट्ना धुटुरिबा काप्टुना छैटौँ माङ्हाङ् रिङ् काउग्बा हिट्ना सोराङा नाड्डे लोडोए, “युफेरटिस ओलोडुना ठेना होङ्ङिना ओधारङि माङ्हाङ्ङा रेक्टुचिगा टेम्बोक् जाना माङ्हाङ् रिङ् काउग्बाचि लेडानुम्चिम्॥” 15 हिट्नुङ् छैटौँ माङ्हाङ् रिङ् काउग्बाङा हिट्नागा टेम्बोक् जाना माङ्हाङ् रिङ् काउग्बाचि लाउङ्सा एक तिहाइ खान्डा नाराङिगा याप्मिचि सेप्मा लेडुचे॥ माङ्हाङ्ङा हिट्नागा माङ्हाङ् रिङ् काउग्बाचि ना टोॽवा लाउङ्सा डोक् ठिक्का बेला, माइना, लेम्बा हिट्नुङ् घान्टा लाउङ्सा टेयार चोगुङ् युङ्सुएसुचिगा डागा॥ 16 हिट्नि बिस कारोड टाङ्राङ्बाङि ओठाङागा टिलिङ्गाचि ओवाहेट् नुङ् खेम्सुङे॥ 17 हिट्नुङ् आङा निमापुमाङि टाङ्राङ्बाचि लोक् हिट्ना उठुङ्ङि ओठाङागा निसुङ्चिङे॥ हिट्नागा टाङ्राङ्बाङि ओठाङागाँ उन्चि छातिङि धाउङाना पाता मि गाड्डे डोक् फासाना, निलमानि गाड्डे पिङ्गिलिङ्ना, हिट्नुङ् गान्धाक् गाड्डे हारिन्टेट् निङ्ना ओवाडुएसुना॥ हिट्नुङ् टाङ्राङ्बाचिगा उन्चि टेहेक् किबाङाना ओटेहेक् गाड्डेगा डोक् उनिङ्सागा, हिट्नुङ् उन्चि यासिलाम्मा मि, मिखुमाङ् लोक् गान्धाक् होन्डाना डाना॥ 18 नाराङि उलिसागा एक तिहाइ खान्डाङिगा याप्मिचि नागा टाङ्राङ्बाचिगा यासिलाम्मा होन्डाना मि, मिखुमाङ् हिट्नुङ् गान्धाक्ङाना नागा सुम्बोक् बिपोत्तिलाम्मा उसिए॥ 19 पोङ्भोने हिट्नागा टाङ्राङ्बाचिगा बोल् उन्चि यासि लोक् उन्चि मेलाक्ङि डाना॥ हिट्नुङ् हिट्नागाँगा उन्चि मेलाक् ओप्पुङा ओटेहेक् गाड्डेगा ओडागा॥ हिट्ना मेलाक्लाम्मा डोक् याप्मिचि हिट्नागाँ याङ्छामा ओचाट्टुचे॥ 20 नागा बिपोत्तिचिलाम्मा उसिनेट्निगा आरु याप्मिचिङा उन्चि निङ्ग्वा माङ्हाङ्लेङ् ओनोक्टुवाट्टुन् हिट्नुङ् हिट्नागाँ आप्पे उन्चि मुक्ङा साम्माङ् चोक्मा ओनाडुवाट्टुन्॥ हिट्नागाँ टोंडेबाचि हिट्नुङ् साम्मेङ्, रुपाक्, काँसा, लुङ्गेॽवा लोक् सिङ्ङा ओचोगुगा मुरतिचि साम्माङ् चोक्मा ओनाडुवाट्टुन्॥ नागा मुरतिचिङा निमा उनिसुन्गा, खेम्मा ओखेम्सुन्गा, हिट्नुङ् लाम्टिमा चा उहिनिगा॥ 21 हिट्नुङ् हिट्नागाँ याप्मिचि सेप्मा, टुनामुना चोक्मा, आरुलोक् इम्मेप्माजामा टोॽवा चोक्मा, हिट्नुङ् याङ्खुट्माना टोॽवा चोक्मा ओनाडुवाट्टुन्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.