पारकास 8 - आठपहरियासातौँ छाप् हिट्नुङ् साम्याङ्ङाना धुपाउरो 1 थुमाङा सि छाप् ओङ्सुनाँ टोनालोग्ङि आधा घान्टा टेप्मा पाक्चा मुक्नेट्नि॥ 2 हिट्नुङ् आङा माङ्हाङ् ओटोकानाङि सि जाना माङ्हाङ् रिङ् काउग्बाचि ओयेबेसागा निसुङ्चिङे॥ हिट्नागा लाउङ्सा सि ओटा धुटुरिबा उपिडुचे॥ 3 हिट्नुङ् साम्याङ्ङाना धुपाउरो खुयुना आरको ठिबाङ् माङ्हाङ् रिङ् काउग्बा आबाउङ् बेदि सोरि येबे॥ हिट्नुङ् माङ्हाङ् ओयाप्मिचिगा बिन्टि चा ठाङ्मा लाउङ्सा सिङासान् सोरि लिसाना साम्याङ्ङाना बेदिङि धुपा हाट्मा जोम् धुपा उपिडुए॥ 4 हिट्नुङ् माङ्हाङ् रिङ् काउग्बाङाना उमुक्ङि हाट्टाना धुपाङाना उमिखुमा माङ्हाङ् ओयाप्मिचिगा बिन्टिलोक् एक्के टो माङ्हाङ्लेङ् खाडे॥ 5 हिट्नुङ्ना हिट्ना माङ्हाङ् रिङ् काउग्बाङा धुपाउरो याङुङ् बेदिङिना मि हिट्नि ठेन्डुए, हिट्नुङ् नाराङि लेप्टुए॥ हिट्ना बेला डोक् घुरुङ्बा लोसे, झालाक् झिलिक् लिसाउङ् बिजुलि ओम्से, हिट्नुङ् लुक्लेमा काडे॥ सि धुटुरिबा 6 हिट्नुङ् हिट्नागा सि जाना माङ्हाङ् रिङ् काउग्बाचि उन्चिलोक् लिसाना धुटुरिबा टेन्मा टेयार उलिसे॥ 7 पाइलेना माङ्हाङ् रिङ् काउग्बाङा उन्ङाना उधुटुरिबा टेनुए, हिट्नुङ् हेलिक्लोक् मिसाङा उलिसागा फोम् हिट्नुङ् मि नाराङि ओठाए॥ हिट्नुङ् नाराङाना एक तिहाइ ओभागाम्बाक् टुनाडे, हिट्डेडोक् सिङ् उभुङ्माचि हिट्नुङ् सोब्बे उपिङ्गा घाँसाङाना एक तिहाइ ओभागा टुनाडे॥ 8 दोस्रो माङ्हाङ् रिङ् काउग्बाङा उन्लोक्ना उधुटुरिबा टेनुए, हिट्नुङ् मिङा हाट्टेटाना ठिक् ठेना झोन्झोन्बो गाड्डेना पाक्लोक् पाक् सामुन्दराङि ठाए, हिट्नुङ् सामुन्दराङाना एक तिहाइ ओखान्डाम्बाक् हेलिक् लिसे॥ 9 हिट्नुङ् सामुन्दराङि उलिसागा जिवाट्चिगा एक तिहाइ ओभागा उसिए, हिट्नुङ् हिट्नि उलिसागा ठेना चुवाखोङ्डाङ्चिना एक तिहाइ ओभागा जाखाम् लिसे॥ 10 हिट्नुङ्ना तेस्रो माङ्हाङ् रिङ् काउग्बाङा उन्लोक् लिसाना धुटुरिबा टेनुए, हिट्नुङ् टाङ्साङ्लाम्मा हाट्टेट्टाना मिङाना राँको गाड्डेना ठिक् ठेना चोक्चिङ्गेट् ठाए, हिट्नुङ् हिट्ना चोक्चिङ्गेट्ङाना एक तिहाइ ओखान्डाम्बाक् होङ्चिङि हिट्नुङ् चुवा उपुन्ङि ठाए॥ 11 हिट्नुङ् हिट्ना चोक्चिङ्गेट् उनिङ्म्बाक् “खिक्टाना” डाना॥ हिट्नाङा सोब्बे चुवा डोक् खिक्ना हिट्नुङ् बिखालु चोगुए॥ हिट्ना खिक्टाना चुवा उठुङुङ् याप्मा याप्मिचि उसिए॥ 12 हिट्नुङ्ना चौंथो माङ्हाङ् रिङ् काउग्बाङा उन्लोक् लिसाना धुटुरिबा टेनुए, हिट्ना बेला डोक् नाम्, लालिप्माङ्, हिट्नुङ् चोक्चिङ्गेट्चिगा एक तिहाइ ओखान्डाम्बाक् डुम्बारिक् डुम् लिसे॥ हिट्नुङ् नाम्ङा टेम्बोक् घान्टा टेप्मा लेम्बा व्हाङ् पिडुवाट्टुन्, हिट्नुङ् लालिप्माङ् लोक् चोक्चिङ्गेट्चिङा चा युसा चार घान्टा टेप्मा व्हाङ् उपिडुवाट्टुन्॥ 13 हिट्नुङ् आङा पुयुङ्नाँ टो टाङ्साङ्ङि पेयेट्टाना ठिक् गारुड नाड्डे पिक्सा ठेना सोरा चोगुङ् राट्टाना खेम्सुङे, “एलाह्, आड्डिक् किप्माडुङ् रिङ् गोलो, नाराङि उलिसागा याप्मिचिङि आड्डिक् किप्माडुङ् याङ्छामा लियुक्॥ पोङ्भोने आरु सुम्बाङ् माङ्हाङ् रिङ् काउग्बाचिङा उन्चिलोक् लिसाना धुटुरिबा टेम्माना बेला लिसा लाबे॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.