पारकास 7 - आठपहरिया

इस्‍राएलङिगा ठिक् लाख चौवालिस हाजार याप्‌मिचि

¹ हिट्‌नुङ्‌ना आङा टेम्‍बोक् जाना माङ्‌हाङ् रिङ् काउग्‍बाचि नाराङिना टेम्‍बोक् उसुराइ ओयेबाइसागा निसुङ्‌चिङे॥ हिट्‌नागाँ नाराङि, सामुन्‍दराङि, हिट्‌नुङ् सिङ् उभुङ्‌माङि हिॽवा ओफेन्‌नि नुङ् ओछाक्‍टुएसुना॥

² नागा टेम्‍बोक् जाना माङ्‌हाङ् रिङ् काउग्‍बाचिङा नारा लोक् सामुन्‍दरा जाखाम् चोक्‍माना आधिकार चा ओटोगुएसुना॥ हिट्‌नुङ् आरको ठिबाङ् माङ्‌हाङ् रिङ् काउग्‍बा नाम् होम्‍मा डेन्‌लाम्‍मा आबागेट्‌टाना आङा निसुङे, हिट्‌नाँ उहिङ्‌ग्‍वाट् माङ्‌हाङ्‌ङाना छाप् मेट्‌माना रिङ् याङुएसुना॥ हिट्‌नाँ हिट्‌नागा टेम्‍बोक् माङ्‌हाङ् रिङ् काउग्‍बाचि ठेना ओसोरा चोगुङ् नाड्‌डे लोडुचे,

³ “आन्‍याँ माङ्‌हाङ् ओसेवाक्‌चिगा नाम्‍धाङ्‌ङि छाप् मिमेट्‌ङे सोम्‍मा नारा, सामुन्‍दरा हिट्‌नुङ् सिङ् उभुङ्‌माचि जाखाम् चोक्‍नेनुम्॥”

⁴ हिट्‌नुङ् आङा माङ्‌हाङ् ओयाप्‌मिचि छाप् ओमेट्‌टुचिगा रिङ् खेम्‍सुङे॥ हिट्‌नि ठिक् लाख चौवालिस हाजार याप्‌मिचि ओडागा, हिट्‌नुङ् हिट्‌नागा इस्‍राइलि याप्‌मिचिगा बारो पुङ्‌लालाम्‍मा ओडागा॥

⁵ छाप् ओमेट्‌टुचिगा इस्‍राएलि याप्‌मिचिगा पुङ्‌ला नागा डोक्: माङ्‌हाङ् रिङ् काउग्‍बाचिङा याहुदाङाना उपुङ्‌लालाम्‍मा बारो हाजार, रुबेनङाना उपुङ्‌लालाम्‍मा बारो हाजार, गादङाना उपुङ्‌लालाम्‍मा बारो हाजार,

⁶ आसेरङाना उपुङ्‌लालाम्‍मा बारो हाजार, नाप्‍तालिङाना उपुङ्‌लालाम्‍मा बारो हाजार, मानास्‍सेङाना उपुङ्‌लालाम्‍मा बारो हाजार,

⁷ सिमियोनङाना उपुङ्‌लालाम्‍मा बारो हाजार, लेबिङाना उपुङ्‌लालाम्‍मा बारो हाजार, इस्‍साखारङाना उपुङ्‌लालाम्‍मा बारो हाजार,

⁸ जाबुलुनङाना उपुङ्‌लालाम्‍मा बारो हाजार, योसेफङाना उपुङ्‌लालाम्‍मा बारो हाजार, बेन्‍यामिनङाना उपुङ्‌लालाम्‍मा बारो हाजार याप्‌मिचि छाप् ओमेट्‌टुचे॥

याप्‌मिचिगा खिमेयाङ्‌मेङा माङ्‌हाङ्‌ङाना उनिङ् ओचोन्‍डुटु

⁹ हिट्‌नाउङ्‌ना आङा साङा चा ङेमा डोक् उहिडुन्‍ना माङ्‌जोम् याप्‌मिचिगा खिमेयाङ्‌मे निसुङे॥ हिट्‌नि नारालाम्‍मा, ख्‍वाप्‍पा देसङिगा, ख्‍वाप्‍पा छोङ्‌बाचि, सोब्‍बे याप्‌मिचि हिट्‌नुङ् खाले-खाले रिङ् ओचेक्‍गा ओडागा॥ हिट्‌नागा सोब्‍बे सिङासान् हिट्‌नुङ् थुमा सोरि ओयेबाइसागा॥ हिट्‌नुङ् हिट्‌नागाँ फुट्‌टुम्‍बुरि फुट्‌ना लोट्‌लिङ् ओवाडुङ् सोब्‍बेङा उन्‌चि मुक्‌ङा खाजुर उभुङ्‌माङाना ओडाला ओयाङुएसुना॥

¹⁰ हिट्‌नागाँ उन्‌चि ठेना सोरा ओचोगुङ् नाड्‌डे पिक्‍सा उमाट्‌टुए, “सिङासान्‌ङि युङ्‌ना आनि माङ्‌हाङ् हिट्‌नुङ् थुमाङा आनि बाचाँ आचोगेसेए॥”

¹¹ हिट्‌नुङ् हिट्‌नि सोब्‍बे माङ्‌हाङ् रिङ् काउग्‍बाचि टेम्‍बोक् उहिङ्‌ग्‍वाट् जिवाट्‌चि, ओठेडोङ्‌चि हिट्‌नुङ् सिङासान् याम्‍बा-नायाम्‍बा ओयेबैसागा॥ हिट्‌नुङ् हिट्‌नागा सिङासान् सोरि गुङ् ओचोगाउङ् माङ्‌हाङ्‌ङाना माङ्‌ध्‍यान् ओचोगुए॥

¹² हिट्‌नुङ् हिट्‌नागाँ ओमाट्‌टुए, “नाड्‌डे डोक् उलियाक्॥ आनि माङ्‌हाङ् उनिङ् टो-टो उलियाक्, उन्‍ङाना माहिमा, ठोना, पोए-पोए, हिट्‌नुङ् मान्, आधिकार लोक् बोल् सोरोक् उलियुयाक्‌याक्॥ आमेन्॥”

¹³ ठिबाङ् ओठेडोङ्‌ङा आङा याङ्‌सिलाप्‍टे, “नागा फुट्‌टुम्‍बुरि फुट्‌का लोट्‌लिङ् ओवाडुगा याप्‌मिचि साक्‌चि हिट्‌नुङ् खोनालाम्‍मा ओटायागा?”

¹⁴ हिट्‌नुङ् आङा लोडुङे, “आडाङ्‌बा, आङा ठाहा टोक्‌निङ्‌ना, हिट्‌नागा साक्‌चि नुङ् खान्‍ङा डोक् ठाहा आटोगुटु॥” हिट्‌नुङ् उन्‍ङा आङा याङ्‌लोडे, “नागाउम् माङ्‌ठेना याङ्‌छामा ओआङ्‌डुङ् ओटायागा याप्‌मिचि ए॥ हिट्‌नागाँ आ-आप्‍पे उन्‌चि लोट्‌लिङ् थुमाङाना ओहेलिक्‌ङा ओवासिडुङ् फुट्‌टुम्‍बुरि ओचोगुएसुए॥

¹⁵ नाड्‌डेउङ् हिट्‌नागा माङ्‌हाङ्‌ङाना सिङासान् सोरि ओवाहेट्, हिट्‌नुङ् लेन्‍सेन् टोनालोग्‌ङिना माङ्‌ठानाङि माङ्‌हाङ्‌ङाना सेवा ओचोगुटु॥ हिट्‌नुङ् सिङासान्‌ङि युङ्‌ना हिट्‌नागालोक् लियुक् हिट्‌नुङ् हिट्‌नागा यान्‍दा चोगुचिचि॥

¹⁶ हिट्‌नुङ् हिट्‌नागाँगा खोना बेला चा उन्‌चि साॽवानिगा हिट्‌नुङ् वेप्‍मा काड्‌निना॥ हिट्‌नुङ् हिट्‌नागा चारेक्‍ना नाम्‍छेमाङाना हुटुॽवामाङा उडुन्‌चिन्‍गा॥

¹⁷ पोङ्‌भोने सिङासान्‌ङिना माझाङि युङ्‌ना थुमाङा गोठाले गाड्‌डे डोक् हिट्‌नागा यान्‍दा चोगुचिचि॥ हिट्‌नुङ् उन्‍ङा याप्‌मिचि चोला पिडुना चुवाडाम्‌लेङ् खाट्‌टुचिचि, हिट्‌नुङ् माङ्‌हाङ्‌ङा डोक् उन्‌चि मिक्‌लाम्‍मा उन्‌चि मिॽवा टुगुबिडुचिचि हिट्‌नुङ् हिट्‌नागा काइले चा ओहाप्‌निगा॥”