पारकास 6 - आठपहरियाथुमाङा ङा छाप्चि ओङ्सुटु 1 हिट्नुङ्ना थुमाङा सि ओटा छाप्चि माड्डे ठिक् ओङ्सुना आङा निसुङे॥ हिट्नुङ् हिट्नागा टेम्बोक् उहिङ्ग्वाट् जिवाट्चि माड्डे ठिक्ङा घुरुङ्बा गाड्डेना सोराङा “हाट्ले आबा” पिक्सा माट्टुना रिङ् आङा खेम्सुङे॥ 2 हिट्नुङ् हिट्नि आटोकाना सोरि ठिक् फुट्ना टाङ्राङ्बा निसुङे॥ हिट्ना टाङ्राङ्बाङि ठाङाना याप्मिङिना उमुक्ङि ठिक् सारकुबाङ् याङुएसुना, हिट्नुङ् हिट्नालाउङ्सा माङ्हाङ्ङा ठिक् वासाङ् मेट्टुए॥ हिट्नुङ् ठिबाङ् खेमाटोमा बिजाए काचोक्बा गाड्डे डोक् सोब्बे याप्मिचि मेप्माउङ्सा उन् खाडे॥ 3 जब थुमाङा दोस्रो छाप् ओङ्सुए॥ टब हिट्ना दोस्रो उहिङ्ग्वाट् जिवाट्ङा “आबा” माट्टुना आङा खेम्सुङे॥ 4 हिट्नि आरको ठिक् आड्डिक् फाबालेङ् फाना टाङ्राङ्बा होन्डे, हिट्नुङ् हिट्ना फाना टाङ्राङ्बाङि ठाङानाँ याप्मिलाउङ्सा ना नाराङि सान्ति जाखाम् ओचोगुवाक् नुङ् माङ्हाङ्ङा आधिकार पिडुए, हिट्डेउङ् ख्वाप्पा नाराङिगा याप्मिचि ठिबाङ्ङा आरको सेट्गा-सेट् ओचोक्युक्॥ हिट्नुङ् ठिक् ठेना चेप्सा चा हिट्ना उपिडुए॥ 5 हिट्नुङ्ना थुमाङा तेस्रो छाप् ओङ्सुए, हिट्नुङ् हिट्ना तेस्रो उहिङ्ग्वाट् जिवाट्ङा “आबा” माट्टुना आङा खेम्सुङे॥ हिट्नुङ् आङा पुयुङ्नाँ हिट्नि ठिक् माक्ना टाङ्राङ्बा निसुङे, हिट्ना टाङ्राङ्बाङि ठाङाना उमुक्ङि ठिक् टुलो याङुएसुना॥ 6 आङा हिट्नि टेम्बोक् उहिङ्ग्वाट् जिवाट्चिगा माझालाम्मा नाड्डे उमाट्टुना ठिक् सोरा खेम्सुङे, “ठिक् लेन्ङाना निम्याक्ङा ठिक् किलो गाहुँ आथाबा सुम्बोक् किलो जौउ इम्मा हियुक्॥ टरो जैतुनङाना क्या हिट्नुङ् आङ्गुरङाना इमालिङ् जाखाम् चोक्नेनुम्॥” 7 जब थुमाङा चौंथो छाप् ओङ्सुए, टब चौंथो उहिङ्ग्वाट् जिवाट्ङा “आबा” माट्टुना आङा खेम्सुङे॥ 8 आङा पुयुङ्नाँ हिट्नि हारडे ठिक् टाङ्राङ्बा निसुङे, हिट्ना टाङ्राङ्बाङि ठाङानाङाना उनिङ्म्बाक् “कासेट्” डाना, हिट्नुङ् पातालङाम्बाक् हिट्ना रोक् रिक्टेट्टुना॥ हिट्नुङ् नाराङिना एक चौथाइ खान्डाङिगा याप्मिचि खेमाबुङ्माङि, आनिकाललाम्, हैजा हिट्नुङ् जाङ्गालाङिगा जिवाट्चिलाम्मा सेप्मालाउङ्सा माङ्हाङ्ङा हिट्नागा आधिकार पिडुचे॥ 9 हिट्नुङ्ना थुमाङा लेम्बोक् छाप् ओङ्सुए, हिट्नुङ् बेदि उछिक्ङि माङ्हाङ्ङाना रिङ् लोङ्सा साँचि उपिडुचिगा हिट्नुङ् हिट्नागाँ उन्चि बिस्वास बोलियो उयुङ्सुनाँ याप्मिचिङा ओसेडुचिगा याप्मिचिगा हाङ्सा आङा निसुङे॥ 10 हिट्नुङ् हिट्नागा नाड्डे पिक्सा ठेना सोरा ओचोगुङ् ओराट्टे, “हाउ सोब्बे नुङ्ना माङ्बोल्लेउ माङ्डाङ्बा, खान् सेङ्सेङ्ना हिट्नुङ् सात्ते ए, आन्याँ याप्मि कासेट् नाराङिगा याप्मिचि खोना बेला खान्ङा न्याए आचोगुचिचिगा हिट्नुङ् साजाए आपिडुचिचिगा टे?” 11 माङ्हाङ्ङा हिट्नागा ख्वाप्पालाउङ्सा फुट्ना लोट्लिङ् वाप्मा पिडुचे, हिट्नुङ् हिट्नागा नाड्डे लोडुचे, “होप्मो बेला सोम्मा खानि आराम चोगानि, पोङ्भोने आझै खानिलोक् टोॽवा काचोक् खानि साइबाचि हिट्नुङ् टाङ्बाङाना सेवा काचोक् बिस्वासिचि खानि गाड्डे डोक् याप्मिचिङा ओसेडुचिचि॥ जब हिट्ना ओसेडुचिगा साङ्ख्या युयुक्, हिट्नुङ् एरोक् आङा साजाए पिडुङ्चिङ्चिङ्॥” 12 हाट्ले थुमाङा छैटोँ छाप् ओङ्सुना आङा निसुङे, हिट्नुङ् हिट्नि ठेना लुक्लेमा खाडे॥ नाम् माक्ठुङ् माक्ना लिसाउङ् डुम्बारिक् डुम् लिसे, हिट्नुङ् लालिप्माङ् चा हेलिक् गाॽवा फाबालेङ् फाना लिसे॥ 13 हिट्नुङ् हिॽवाङा वान्डुङ् ओसोङ्निगेट्निगा वामाखोक्पोङागा टुल्फुल ओठाया गाड्डे टाङ्साङ्ङिगा जोम् चोक्चिङ्गेट्चि नाराङि ओठाए॥ 14 हिट्नुङ् कोइङा कागाता रिगु गाॽवा डोक् टाङ्साङ् मासाडे, हिट्नुङ् ख्वाप्पा चोङ्साङ्माचि हिट्नुङ् टापुचि उन्चि डेन्लाम् ओसोन्डाडे॥ 15 हिट्नाउङ्ना नाराङिगा हाङ्चि, सासान् काचोक् सासाक्चि, सेनापतिचि, वागाठागा याप्मिचि, बोल्लेउ उलिसागा याप्मिचि, चाकारचि हिट्नुङ् डाङ्बाचि हिट्नागा ख्वाप्पा याप्मिचि लुम्भुक् हिट्नुङ् याक्ठेरेक्लेङ् ओखाडाउङ् ओठोबे॥ 16 हिट्नागाँ चोङ्साङ्मा हिट्नुङ् लुङ्गेॽवा नाड्डे ओलोडुए, “आन्याँ उठुङ्ङि ठायाउङ् याप्मिटेप्टा, हिड्डेउङ् सिङासान्ङि युङ्नाङा आन्याँ याप्मिनिनिना हिट्नुङ् थुमाङा उकुन्जिरिक्माङाना साजाए आन्याँ पिमा याप्मिहिनिना॥ 17 पोङ्भोने माङ्हाङ् लोक् थुमाङा सोब्बे याप्मिचि साजाए पिमाना बेला टाइसे॥ साक्चा उन्चि कुन्जिरिॽवाङाना साजाएलाम्मा हिङ्मा उहिनिगा॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.