पारकास 5 - आठपहरियाछाप्लाङाना मुठा हिट्नुङ् थुमा 1 आङा सिङासान्ङि युङाउङ् सासान् काचोक्ङाना उछुप्टाङ् उमुक्लेङ् छाप्लाङाना मुठा निसुङे॥ हिट्ना छाप्लाङाना मुठा इप्पोक् ओपाटालेङ् डोक् छेप्टेसाना, हिट्नुङ् हिट्ना सि ठोङ्ङि छाप् ओमेट्टुङ् उछुप्टुएसुना॥ 2 हिट्नुङ् हिट्नि माङ्बोल्लेउ ठिबाङ् माङ्हाङ् रिङ् काउग्बा ठेना ओसोरा चोगुङ् नाड्डे पिक्सा राट्टाना आङा निसुङे, “नागा छाप् लाहाब् चोक्बालाक् हेडुङ् छाप्लाङाना मुठा ओङ्मा योग्ए साक् वाहेट्ना?” 3 टरो हिट्नि टो टोनालोग्ङि, ना नाराङि हिट्नुङ् यो नारा उछिक्ङि छाप्लाङाना मुठा ओङ्सुङ् हिट्ना भिट्रा पाक् छेप्टेसेना हिट्ना पोढाँ चोक्मा काहिबा साक्चा टुब्नेट्नि॥ 4 हिट्नुङ् आङा आड्डिक् टुक्लोक् हाबाङे, पोङ्भोने हिट्ना छाप्लाङाना मुठा ओङ्सुङ् हिट्ना भिट्रा पाक् छेप्टेसेना हिट्ना पोढाँ चोक्मा योग्ए साक्चा टुब्नेट्नि॥ 5 चौबिस जाना ओठेडोङ्चि माड्डेङि ठिबाङ्ङा आङा याङ्लोडे, “हाब्नेन्, पुयुटे, ठिबाङ् किबा ओलोडुना, उन् याहुदा छोङ्ङिना, उन् दाउद पुङ्लाङिना हाङ्बा ए, उन्ङा पाइला डोक् ओसाट्टुरचि मेप्माहिडुएसुचे॥ हिड्डेउङ् उन् डोक् सि गोटा छाप्चि हेप्मा हिट्नुङ् छाप्लाङाना मुठा ओङ्मा योग्ए वाहेट्॥” 6 हिट्नुङ् टेम्बोक् उहिङ्ग्वाट् जिवाट्चि हिट्नुङ् ओठेडोङ्चिङा याम्बा-नायाम्बालाम्मा उपुप्टुना हिट्ना सिङासान्ङिना माझाङि ठिक् थुमा येबाइसाना आङा निसुङे॥ हिट्ना थुमाम्बाक् कोइङा भोक् उपिडुना गाड्डे निङ्साना॥ हिट्नाङाना सि गोटा ओटाङ् हिट्नुङ् सि गोटा उमिक्चि डागा॥ हिट्नागाम्बाक् माङ्हाङ्ङा ख्वाप्पा नाराङि पाङ्सुचिगा सि गोटा ओहाङ्साचि ए॥ 7 हिट्नुङ् थुमा आगाडि खाडाउङ् सिङासान्ङि युङेसाना उछुप्टाङ् उमुक्लाम्मा हिट्ना छाप्लाङाना मुठा कोबुए॥ 8 हिट्ना बेला डोक् हिट्नागा टेम्बोक् उहिङ्ग्वाट् जिवाट्चि हिट्नुङ् चौबिस जाना ओठेडोङ्चि थुमा ओटोकानाङि ओखाडाउङ् स्या ओमेट्टुए॥ हिट्नागा ख्वाप्पालोक् उन्चि मुक्ङि ठिक् टेम्माना बिना हिट्नुङ् बुङ्बुङ् नाम्ना धुपाङा इप्टाना साम्याङ्ङाना खोरे डाना॥ हिट्ना धुपाम्बाक् माङ्हाङ् ओयाप्मिचिङा ओठाङ्सुना बिन्टिङाना चिन्ना ए॥ 9 हिट्नागाँ नाड्डे पिक्सा ठिक् ओछोङ्ग्वाट् छाम्लो ओठाक्टुए, “ना छाप्लाङाना मुठा खान्ङा एडोक् काप्मा आहिडुटु हिट्नुङ् हिट्नागा छाप्चि ओङ्मा योग्ए खान् एडोक् ए, पोङ्भोने याप्मिचिङा खान् मासेडे, हिट्नुङ् खान्ङा काहेलिक् आवेडुङ् ख्वाप्पा छोङ्बाचि, खाले-खाले रिङ् काचेक्, सोब्बे याप्मिचि हिट्नुङ् ख्वाप्पा देसङिगा माङ्हाङ् लाउङ्सा छुट्कारा आपिडुचे॥ 10 हिट्नुङ् खान्ङा हिट्नागा आनि माङ्हाङ्ङा सासान् चोग्माचिगा याप्मिचि ओचोगुएसुचे हिट्नुङ् पुजारिचि गाड्डे डोक् माङ्हाङ्ङाना सेवा चोक्मा आपिडुचिचि, हिट्नुङ् हिट्नागाँ नाराङि सासान् ओचोगुटु॥” 11 हिट्नुङ्ना आङा फेरि पुयुङ्नाँ, हिट्नि जोम् याप्मा नेमा डोक् हिनिम्चिम्लोक् माङ्हाङ् रिङ् काउग्बाचिगा सोरा आङा खेम्सुङे॥ हिट्नागा सिङासान्, टेम्बोक् उहिङ्ग्वाट् जिवाट्चि हिट्नुङ् ओठेडोङ्चिगा याम्बा-नायाम्बा ओवासेट्टागा॥ 12 हिट्नागा ठेना सोरा ओचोगुङ् नाड्डे पिक्सा छाम्लोमा ओठाक्टुए, “सियाना थुमाम्बाक् आधिकार, माक्फेन्सुबेन्, ठोना, साक्ति, मान् हिट्नुङ् जाए-जाए टोक्मा योग्ए ए॥” 13 हिट्नुङ् टोनालोग्ङि, नाराङि, यो नारा उछिक्ङि हिट्नुङ् सामुन्दराङि उलिसागा ख्वाप्पा जिवाट्चिङा नाड्डे पिक्सा छाम्लोमा ओठाक्टुना आङा खेम्सुङे, “सिङासान्ङि युङ्ना हिट्नुङ् थुमालाउङ्सा उन्चि निङ् आनि चोन्डुम्, मान् पिडुम्, उन्चि निङ् ठेलोक् चोगुम् हिट्नुङ् उन्चि बोल् बारेङि सोरोक् माट्टुम्॥” 14 हिट्नुङ् हिट्निगा टेम्बोक् उहिङ्ग्वाट् जिवाट्चिङा ओमाट्टुए, “छेम्बा डोक्, नाड्डे डोक् लिमा कोन्युक्॥” हिट्नुङ् ओठेडोङ्चिङा गुङ् ओचोगाउङ् माङ्हाङ् लोक् थुमाङाना माङ्ध्यान् ओचोगुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.