पारकास 22 - आठपहरियाचोला आपिना चुवा 1 हिट्नुङ्ना माङ्हाङ् रिङ् काउग्बाङा आङा चोला आपिना चुवाङाना होङ् याङ्निमेट्टे॥ हिट्ना चुवा आड्डिक् सेङ्सेङ्ना हिट्नुङ् सिसा गाड्डे डोक् ओम्साना डाना॥ हिट्ना होङ् माङ्हाङ् हिट्नुङ् थुमाङाना सिङासान्लाम् बागाँ लिसेट्टाना॥ 2 हिट्ना होङ् खालाङ्गाङाना मुलि लाम्बो माझालाम् बागाँ लिसाना॥ हिट्ना होङ्ङाना इप्पोक् ओफेरोलेङ् डोक् लाट्निना चोला आपिना टुल्फुल केङुना सिङ् उभुङ्मा डाना॥ हिट्ना सिङ् उभुङ्माङा बारो माइनाङि बारो खाले डोक् टुल्फुल केङुना॥ हिट्ना सिङ् उभुङ्माङाना ओलाभाॽवाम्बाक् नाराङिगा सोब्बे छोङ्बाचि नुमानिङ् चोक्मा सिडापाङ्डा ओचोगुटु॥ 3 हाट्लेउङ् हिट्नि खोना बेला चा साराप लिनिना॥ माङ्हाङ् हिट्नुङ् थुमाङाना सिङासान् हिट्ना खालाङ्गाङि लियुक् हिट्नुङ् हिट्नि माङ्हाङ् ओसेवाक्चिङा उन् माङ्ध्यान् ओचोगुटु॥ 4 हिट्नागाँ माङ्हाङ् ओनाभाक् उनिसुटु, हिट्नुङ् उनिङ् उन्चि नाम्ढाङ्ङि लियुक्॥ 5 हिट्नुङ् हिट्नि फेरि युसा लिनिना, हिट्नि कुपि आथाबा नाम्ङाना व्हाङ् चाहाब् लिनिना, पोङ्भोने माङ्हाङ् टाङ्बालाम्मा डोक् हिट्नागाँ व्हाङ् ओटोगुटु, हिट्नुङ् हिट्नागाँ सोरोक् सासान् ओचोगुटु॥ टाङ्बा येसु एला डोक् उङ्युक् 6 हिट्ना माङ्हाङ् रिङ् काउग्बाङा आङा याङ्लोडे, “खान्ङा आखेम्सुगा नागा ख्वाप्पा रिङ् बिस्वासिलो हिट्नुङ् छेम्बाना ए॥ हिट्नुङ् माङ्काटाचि सेङ्सेङ्ना हाङ्सा कापिबा माङ्हाङ् टाङ्बाङा ओसेवा काचोक्चिलाउङ्सा नागा एला डोक् उलियुगेट्गा घाट्ना निमेट्माचि लाउङ्सा उन्ङाना माङ्हाङ् रिङ् काउग्बाचि पाङ्सुएसुचे॥” 7 येसुङा सोब्बे याप्मिचि लोडुचिचि, “खेम्सानुम्, आङा एला डोक् उङ्ङा॥ ना छाप्लाङि छेप्टागा माङ्हाङ्लाम्माना रिङ् पालान् काचोक्चि सोब्बे लाउङ्सा माङ्हाङ्ङा जोम् आसिक् पिडुचिचि॥” 8 आङा युहान्नाङा नागा सोब्बे रिङ् खेम्सुएसुङे हिट्नुङ् निसुएसुङे॥ हिट्नुङ् आङा नागा रिङ् खेम्सुङुङ् हिट्नुङ् निसुङुङ् नागा ख्वाप्पा रिङ् याङ्निमेट्टाना माङ्हाङ् रिङ् काउग्बा माङ्ध्यान् चोक्मा ओटोकानाङि हाम्बोम्फोप् चोगाङे॥ 9 टरो हिट्नाङा आङा याङ्लोडे, “खान्ङा नाड्डे चोक्मा लिनिना॥ खान्ङा माङ्हाङ् एडोक् माङ्ध्यान् चोक्मा कोन्युक्, पोङ्भोने आङा चा खान् गाड्डे हिट्नुङ् खान्ङाना माङ्काटा काटाक्चि हिट्नुङ् ना छाप्लाङि छेप्टाना रिङ् पालान् काचोक्चि गाड्डेना माङ्हाङ्ङाना सेवा काचोक्बा एडोक् ए॥” 10 हिट्नुङ् हिट्नाङा आङा नाड्डे याङ्लोडे, “ना छाप्लाङि माङ्हाङ्लाम्माना रिङ्चि छाप् मेट्टुन्, पोङ्भोने नागा सोब्बे रिङ् एला डोक् पुरो लियुक्॥ 11 हिट्नुङ् ओचाफेम्मा टोॽवा काचोक्बा याप्मिचिङा ओचाफेम्मा टोॽवा डोक् ओचोगुयाक्टुवाक्, हिट्नुङ् फोहोरि निङ्ग्वा उलिसागा याप्मिचि फोहोरि डोक् उलियाक्, हिट्नुङ् धारमोति याप्मिङा धारमोति टोॽवा डोक् ओचोगुवाक्, हिट्नुङ् सेङ्सेङ्ना याप्मि सेङ्सेङ्ना डोक् उलियाक्॥” 12 येसुङा माट्टुटु, “खेम्सानुम्, आङा एला डोक् उङ्ङागेट्ङा॥ हिट्नुङ् सोब्बे याप्मिचि उन्चिङा ओचोगुना टोॽवाङाना इनाम् लोक् साजाए आङा पिडुङ्चिङ्चिङ्॥ 13 आल्फा हिट्नुङ् ओमेगा, पाइलेना हिट्नुङ् एङ्स्वाना, उटुम् हिट्नुङ् आन्ते आङा डोक्॥” 14 हिट्नुङ् जुन् याप्मिचिङा उन्चि लोट्लिङ् सेङ्सेङ् ओहोप्टुटु, हिट्नागालोक् माङ्हाङ् आड्डिक् हारका लियुक्, हिट्नुङ् हिट्नागाँ चोला आपिना टुल्फुल चामाना हाक ओटोगुटु हिट्नुङ् खालाङ्गाङिना ढुवारिक्लाम्मा लिक्माना आधिकार ओटोगुटु॥ 15 टरो हिट्ना खालाङ्गा भाराम्बाक् कोछुबाचि गाड्डे चाट्ला उलिसागा याप्मिचि, टुनामुना ओचोग्गा, इम्मेप्माजामा टोॽवा काचोक् याप्मिचि, याप्मि कासेट्चि, मुरति साम्माङ् काचोक्चि, हिट्नुङ् माङ्जो रिङ् लोमा मोज्जा ओलोगा हिट्नुङ् माङ्जो रिङ् काचेक् याप्मिचि उलियुक्॥ 16 “आङा येसुङा खानि सोरि माङ्पाङ्ङि उलिसागा सोब्बेलाउङ्सा नागा रिङ् लोमा आङाना माङ्हाङ् रिङ् काउग्बा खानिङि पाङ्सुएसुङे॥ आङा दाउद हाङ्बाङाना पुङ्लाङिना छालेट् ए, हिट्नुङ् भ्यानिक् ओम्ना चोक्चिङ्गेट् आङा डोक्॥” 17 सेङ्सेङ्ना हाङ्सा हिट्नुङ् खिरिस्टङाना बेहुलिङा नाड्डे माट्टुटु, “आबानि॥” जुन्ङा नागा रिङ् खेम्सुटु हिट्नाँ चा ओमाट्टुवाक्, “आबानि॥” खोना लाउङ्सा ओवेप्मा काडेसेना हिट्ना ना चोला आपिना चुवा ठुङ्ङा ओआब्याक्॥ 18 ना छाप्लाङिना माङ्हाङ्लाम्माना रिङ् काखेम्बा सोब्बे याप्मिचि लाउङ्सा आङा युहान्नाङा ओछेक्छेक् चोक्नाँनि, कोइङा ना खाबोर नुङ्ना आरु याप्मा थापाँ चोगुटु भोने, माङ्हाङ्ङा ना छाप्लाङि छेप्बालाक् बिपोत्तिचि हिट्ना याप्मिङि थापाँ चोगुटु॥ 19 कोइङा ना छाप्लाङि छेप्टागा माङ्हाङ्लाम्माना रिङ् इम्टेप्मा होट्टुटु भोने, ना छाप्लाङि छेप्टागा चोला आपिना सिङ् उभुङ्माङिना टुल्फुल चामाना ओभागा हिट्नुङ् सेङ्सेङ्ना खालाङ्गालाम्मा माङ्हाङ्ङा होट्टुडिसुटु॥ 20 नागा सोब्बे रिङ्ङाना साँचि कापिबाङा नाड्डे माट्टुटु, “छेम्बा आङा एला डोक् उङ्ङा॥” आमेन्॥ छेम्बा डोक्, आन्याँ येसु डाङ्बा, एला डोक् उङ्सा॥ 21 टाङ्बा येसुङाना मायादाया सोब्बे याप्मिचिलोक् उलियाक्॥ आमेन्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.