पारकास 2 - आठपहरियाएफिसास माङ्पाङ् लाउङ्सा खाबोर 1 उन्ङा आङा नाड्डे याङ्लोडे, “एफिसास खालाङ्गाङिगा माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ “ना खाबोरम्बाक् छुप्टाङ् उमुक्ङि सि चोक्चिङ्गेट् याङुना हिट्नुङ् सि टेप्मा साम्मेङ्ङा चोक्बालाक् कुपिदानिचि माझालाम्मा लाम्टियेट्ङाना ए॥ 2 खानिङा आचोगुम्ना सोब्बे थोक् आङा ठाहा टोगुङ्टुङ्॥ खानिङा आचोगुम्ना टुक्लोक् टोॽवा हिट्नुङ् खानिगा आङ्मा हिमाना बोल् आङा निसुङ्टुङ्॥ हिट्नुङ् खानिङा ओभेन्ना रिङ् काचोक्बा याप्मिचि चिम्मा आफुट्टुम्चिगा आङा ठाहा टोगुङ्टुङ्, हिट्नुङ् खानिङा हिट्नागा मुलिचेलाचि नुङ् उपिग्गा याप्मिचिगा बिस्वास जाँच आचोगुम्मे, हिट्नुङ् हिट्नागा माङ्जो उपिग्येट्गा रैछो नुङ् ठाहा आटोगुम्मे॥ 3 हिट्नुङ् खानिङा आङि बिस्वास आचोगुम्नाँ टुक्लोक् याङ्छामा आटोगुमुङ् आङ्डुम्ना हिट्नुङ् खानिङा आङा भोरोस चोक्मा आनाडिन्गेटिन्गा रिङ् आङा ठाहा टोगुङ्टुङ्॥ 4 टरो खानि बिरुद्दाङि ठिक् रिङ् लोमाना रिङ् आङालोक् युङ्ग्वा, खानिङा पाइले गाड्डे माया चोक्मा आनाडुएसुम्मे॥ 5 खानिङा पाइले इम्टेप्मा याप्मा माया आचोगिएगा हिट्ना रिङ् मिट्टानुम्, हिड्डेउङ् हाट्ले खानिङा खानि निङ्ग्वा फेराँ चोक्मा कोन्युक् हिट्नुङ् पाइले आचोगुम् गाड्डे डोक् चोगानि॥ टरो खानि निङ्ग्वा फेराँ आचोक्नेट्निम् भोने, आङा खानि सोरि उङ्ङा हिट्नुङ् खानिङा आचोगुम्ना कुपिदानि हिट्नालाम्मा होट्टुङ्डिसुङ्टुङ्॥ 6 टरो खानिङि ठिक् ओचेट्नुना रिङ् युङ्ग्वा, आङा निकोलाइटास ओलोडुचिगा ओचाफेन्गा रिङ् चिम्मा फुट्टुङ् गाड्डे डोक् खानिङा चा चिम्मा आफुट्टुम्गा॥ 7 “खानि सोब्बेलोक् खेम्माना नुभेक् युङ्ग्वा, हिट्डेउङ् माङ्हाङ् ओहाङ्साङा खानि माङ्पाङ्ङिगा लाउङ्सा पाक् मालोडिटिगा हिट्ना नुलोक् खेम्सानुम्॥ हिट्नुङ् जुन् याप्मिङा दुस्टाङाना ओसाक्ति मेट्टुटु हिट्ना आङा माङ्हाङ्ङाना टोनालोग्ङिना बाकेंचाङि लिसाना चोला आपिना सिङ् उभुङ्माङि केङ्ग्वाना टुल्फुल चामा पिडुङ्टुङ्॥ इस्मुरना माङ्पाङ् लाउङ्सा खाबोर 8 “इस्मुरना खालाङ्गाङिना माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ “ना खाबोरम्बाक् उटुम्ङि डोक् लिसाना हिट्नुङ् आखेरिङि चा लिना, हिट्नुङ् सियाउङ् उहिङ्ग्वाट् लिसानाङाना ए॥ 9 “खानिङा याङ्छामा आङ्डुएट्टुम् हिट्नुङ् खानिलोक् पाक्चा वाइना नुङ् आङा ठाहा टोगुङ्टुङ्, टरो माङ्हाङ् ओनाजारङि खानि वागाठागा याप्मिचि नुङ्म्बाक् छेम्बा डोक् ए॥ आप्पेलाउङ्सा याहुदि नुङ् उपिग्गा याप्मिचिङा खानि बिरुद्दाङि ओचाफेन्गा रिङ् ओचेक्टागा आङा ठाहा टोगुङ्टुङ्, टरो हिट्नागा याहुदिचि माखाक्॥ हिट्नागा सैतानङाना छुम्माङिगा याप्मिचि ए॥ 10 हाट्ले खानिङा आङ्डुम्लाबुम्ना याङ्छामालोक् किट्नेनिन्॥ खानि बिस्वास जाँचा चोक्माउङ्सा खानि माड्डे कोइ-कोइ सैतानङा खाम्बाङ्ङि माठेन्डिटि॥ हिट्नुङ् खानिङा ठिमेक् लेम्बा टेप्मा याङ्छामा आआङ्डुम्टुम्॥ टरो सिमा डोक् कोन्ना लिचा आङि बिस्वास चोक्मा नानेनुम्, हिट्नुङ् आङा खानि खोना बेला चा लाट्निना चोलाङाना इनाम् पिनाँनि॥ 11 “खानि सोब्बेलोक् खेम्माना नुभेक् युङ्ग्वा, हिट्डेउङ् माङ्हाङ् ओहाङ्साङा खानि माङ्पाङ्ङिगा लाउङ्सा पाक् मालोडिटिगा हिट्ना नुलोक् खेम्सानुम्॥ जुन् याप्मिङा सैतान मेट्टुटु, हिट्ना आरको खेप् सिमा कोन्निना॥ पारगामाम माङ्पाङ् लाउङ्सा खाबोर 12 “पारगामाम खालाङ्गाङिना माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ “ना खाबोरम्बाक् इप्पोक्लेङ् डोक् यान्ना ओधार लिसाना चेप्सा लोक्ङाना ए॥ 13 खानि सैतानङा सासान् चोगुना डेन्ङि आयुङिगा नुङ् आङा ठाहा टोगुङ्टुङ्॥ टरोचा खानिङा आङा आझै बिस्वास आचोगियाक्टिङे॥ हिट्नुङ् आङाना बारेङि पारचार काचोक् बिस्वासिलो एन्टिपासलाउङ्सा पाक् लिसेना हिट्ना रिङ् आङा ठाहा टोगुङ्टुङ्॥ एन्टिपासलाउङ्सा याप्मिचिङा सैतानङा सासान् चोगुना खानि खालाङ्गाङि ओसेडुचा खानिङा आङि बिस्वास चोक्मा आनानेट्निम्॥ 14 टरो खानि बिरुद्दाङि लोमाना इम्टेप्मा रिङ् आङालोक् युङ्ग्वा, खानिलोक् उलिसागा इम्टेप्मा बालामङाना हिसिक्मा काखेम्बा याप्मिचि ओवाहेट्॥ हिट्ना दुस्टा बालामङा इस्राएलि याप्मिचिङा पाप ओचोगुवाक् नुङ् साम्माङ् ठानाङि ठाङ्बालाक् थोक् चामा हिट्नुङ् इम्मेप्माजामा टोॽवा चोक्मा लियुक् नुङ् बालाक हाङ्बा हिसिक्टुए॥ 15 हिड्डे डोक् खानिङि कोइ-कोइउम् निकोलाइटास ओलोडुचिगा याप्मिचिगा हिसिक्मा काखेम्बा याप्मिचि चा ओवाहेट्॥ 16 हिट्डेउङ् पापलाम्मा खानि काएल्-काबु लिसानि॥ हिड्डे आचोगेट्टिन् भोने, आङा खानि सोरि एला डोक् उङ्ङा॥ हिट्नुङ् आयासिलाम्मा होन्ना रिङ्ङा चेप्साङा चेप्टु गाड्डे डोक् हिट्नागा जाखाम् चोगुङ्चिङ्चिङ्॥ 17 “खेम्माना नुभेक् लोक्गाङा सेङ्सेङ्ना हाङ्साङ्ङा खानि माङ्पाङ्ङिगा लाउङ्सा पाक् मालोडिटिगा नुलोक् खेम्सानुम्॥ जुन्ङा दुस्टा मेट्टुटु, हिट्ना आङा टोनालोग्ङि ठोप्बालाक् मोन्ना पिडुङ्टुङ्॥ हिट्नुङ् आङा हिट्ना ओछोङ्ग्वाट् निङ् छेप्टाना ठिक् फुट्ना लुङ्गेॽवा चा पिडुङ्टुङ्॥ जुन्ङा हिट्ना लुङ्गेॽवा टोगुटु हिट्नाँ एडोक् हिट्ना निङ् निसुटु॥” थिआटिरा माङ्पाङ् लाउङ्सा खाबोर 18 “थिआटिरा खालाङ्गाङिना माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ “ना खाबोरम्बाक् माङ्हाङ् छाङाना ए, उन्ङाना उमिक्उम्बाक् मिङा ओलाप्को गाड्डेगा, हिट्नुङ् ओलाङ्उम्बाक् झारके ओम्सा गाड्डे उनिङ्गा॥ 19 “खानि खोड्डे पारिक् आचोगेट्टिगा हिट्ना आङा ठाहा टोगुङ्टुङ्॥ खानिङा ठिबाङ्ङा आरको माया आचोगुम्चिम्गा हिट्नुङ् खानिङा आङा बिस्वास आचोगुम्ना रिङ् चा आङा ठाहा टोगुङ्टुङ्॥ खानिङा ठिबाङ्ङा आरको घुवार आफाडुम्चिम्गा, हिट्नुङ् धैइरे आलिसिगा रिङ् चा आङा ठाहा टोगुङ्टुङ्॥ खानिङा आङा पाइले बिस्वास आचोगुम्ना बेला नुङ्ना चा हाट्ले याप्मा रिङ् आचोगुएट्टुम्ना आङा ठाहा टोगुङ्टुङ्॥ 20 टरो आङालोक् खानि बिरुद्दाङि माट्माना ठिक् रिङ् युङ्ग्वा, खानिङा हिट्ना इजेबेल ओलोडुना मेच्छेमा उन्ङा निङ्ग्वा चोगुना रिङ् चोक्मा आपिडुम्मे॥ हिट्ना मेच्छेमाङा आप्पेलाउङ्सा माङ्काटा नुङ् माट्टुना, टरो हिट्नाङा आङाना सेवा काचोक्चि इम्मेट्माजामा टोॽवा चोक्मा हिट्नुङ् साम्माङ् ठानाङि ठाङ्बालाक् थोक् चामा हिसिक्टुचिउङ् ढाँट फोक्टुएसुचे॥ 21 आङा हिट्ना पापलाम्मा काएल्-काबु लिसा हिट्नुङ् इम्मेप्माजामा टोॽवा चोक्मा नाडु नुङ् मौका पिडुङे, टरो हिट्नाँ हिड्डे चोक्मा नाडुव्ट्टुन्॥ 22 खेम्सानुम्, हिट्ना आङा ओडोलेन्चालाम्मा कोप्मा हिनिलोक् बिरामि चोगुङ्टुङ्, हिट्नुङ् हिट्नालोक् इम्मेप्माजामा टोॽवा काचोक्बाचि हिट्ना टोॽवालाम्मा काएल्-काबु उलिनेएट्नि भोने हिट्नागा चा आड्डिक् टुक्लोक् साजाए पिडुङ्चिङ्चिङ्॥ 23 हिट्नुङ् हिट्ना रोक् कारिक्बाचि ख्वाप्पालाउङ्सा आङा रुढिङा जाखाम् चोगुङ्चिङ्चि॥ हिट्नाडेउङ् सोब्बे याप्मिचिगा निङ्ग्वा हिट्नुङ् पाक् हिट्नागा चोक्मा निङ्ग्वा ओचोगुटुगा हिट्ना रिङ् ठाहा काटोक् आङा नुङ् सोब्बे बिस्वासिचिङा ठाहा ओटोगुटु॥ हिट्नुङ् आङा खानिङा आचोगुम्ना टोॽवा आनुसार खानि सोब्बेलाउङ्सा पिनाँनि॥ 24 “टरो खानि माड्डे इम्टेप्मा हिट्नि थिआटिराङि आलिसिगाँ हिट्ना ओचाफेन्ना हिसिक्मा आखेम्निम्गेट्निम्गा, हिट्नुङ् खानिङा हिट्ना सैतानङाना ठोबाना हिसिक्मा चा सिकाँ आलिसिन्गेट्टिन्गा॥ हिट्डेउङ् खानिलाउङ्सा आरु याप्मा रिङ् पालान चोगानुम् नुङ् आङा लोनेनिन्गा॥ 25 टरो आङा फेरि उङ्निङ्लोक् सोम्मा खानि बिस्वास आङि बोल्लेउ चोगानुम्॥ 26 जुन् याप्मिङा दुस्टा मेट्टुटु हिट्नुङ् उसिमा सोम्मा आनिङ्ग्वा गाड्डे चोगुयाक्टुटु, हिट्ना नाराङिगा सोब्बे छोङ्बाचि सासान् चोक्माना आधिकार पिडुङ्टुङ्॥ 27 हिट्नुङ् आङा माङ्हाङ् पाबालाम्मा आधिकार टोगुङ् गाड्डे डोक् हिट्ना चा आधिकार पिडुङ्टुङ्॥ हिट्नाङा धाउङाना डान्डिङा खाम्ङाना भाँडा हेडु गाड्डे डोक् हिट्नागा टुक्लोक् सासान् चोगुचिचि॥ 28 हिट्नुङ् हिट्नाङा एका भ्यानिक् चोक्चिङ्गेट् गाड्डे ओम्ना आधिकार टोगुटु॥ 29 “खानि सोब्बेलोक् खेम्माना नुभेक् युङ्ग्वा, हिट्डेउङ् माङ्हाङ् ओहाङ्साङा खानि माङ्पाङ्ङिगा लाउङ्सा पाक् मालोडिटिगा हिट्ना नुलोक् खेम्सानुम्॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.