पारकास 19 - आठपहरियाटोनालोग्ङि याप्मिचिङा माङ्हाङ् उनिङ् ओचोन्डुटु 1 हिट्नुङ्ना टोनालोग्ङि जोम् याप्मिचिगा खिमेयाङ्मे मुक्टाना आङा खेम्सुङे, हिट्नागाँ ठेना सोराङि नाड्डे ओमाट्टुए, “माङ्हाङ् उनिङ् टो-टो उलियाक्, हिट्नुङ् उन्ङा आनि बाचाँ ओचोगेसे॥ उन्ङाना माहिमा उलियाक्, हिट्नुङ् उन् साक्तिसालि माङ्हाङ् ए॥ 2 पोङ्भोने उन्ङा न्याए टो यो मिचोक्ङे हिट्नुङ् माहामा चोगुटु, हिट्नुङ् नाराङिगा याप्मिचि भेन्ना टोॽवा चोक्मा मेट्टुचिगा हिट्ना दुस्टा वालाफेडुमा उन्ङा न्याए चोगुएसुए॥ माङ्हाङ्ङा हिट्ना खालाङ्गा साजाए पिडुए, पोङ्भोने हिट्ना खालाङ्गाङा माङ्हाङ् ओसेवाक्चि सेडुचे॥” 3 हिट्नागाँ फेरि एक्खेप् नाड्डे पिक्सा ठेना सोर ओचोगुङ् ओमाट्टुए, “माङ्हाङ् उनिङ् टो-टो उलियाक्, हिट्ना टुनुना मिङाना उमिखुमाङ् काइले चा लाट्निना॥” 4 हिट्नुङ् हिट्नागा चौबिस जाना ओठेडोङ्चि लोक् हिट्नागा लेम्बोक् उहिङ्ग्वाट् जिवाट्चिङा सिङासान्ङि युङाना माङ्हाङ् गुङ् ओचोगाउङ् जाए-जाए ओचोगुए, हिट्नुङ् नाड्डे ओमाट्टुए, “आमेन्॥ माङ्हाङ् उनिङ् टो-टो उलियाक्॥” थुमाङाना भ्या 5 सिङासान्लाम् नाड्डे मुक्टाना आङा खेम्सुङे, “हाउ माङ्हाङ् ओसेवाक्चि, उन्ङाना उनिङ् चोन्डानुम्॥ हिट्नुङ् माङ्हाङ् मान् काचोक् खानि खाट्टियुगा हिट्नुङ् ओठेगा खानि सोब्बेङा माङ्हाङ् उनिङ् चोन्डानुम्॥” 6 हिट्नुङ्ना आङा जोम् याप्मिचिगा खिमेयाङ्मे मुक्टाना, जोम् चुवा छाँगालाम्मा ठाया गाड्डे मुक्टाना हिट्नुङ् आड्डिक् ठेना घुरुङ्बा लोसाना गाड्डे मुक्टाना आङा खेम्सुङे, हिट्नाँ नाड्डे माट्टुए, “माङ्हाङ् उनिङ् टो-टो उलियाक्, पोङ्भोने आनि टाङ्बा सोब्बे नुङ्ना माङ्बोल्लेउ माङ्हाङ्ङा सासान् चोगुटु॥ 7 हाट्ले आनि आड्डिक् हारका लिसि हिट्नुङ् आनान्दा चोगि, हिट्नुङ् उन्ङाना माङ्ठेना ओबोल् लाउङ्सा उनिङ् चोन्डुम्, पोङ्भोने थुमाङाना भ्या लिमा बेला टाए, हिट्नुङ् उन्ङाना बेहुलि आप्पे डोक् टेयार लिमा हिडेसे॥ 8 हिट्ना बेहुलि ओचेट्नुना ओम्साना हिट्नुङ् सेङ्सेङ्ना लोट्लिङ् वाप्मा माङ्हाङ्ङा पिडुए॥” ओचेट्नुना फुट्ना ओम्साना लोट्लिङ्ङा माङ्हाङ् ओयाप्मिचिङा ओचोगुना ओचेट्नुना टोॽवा बारे बुजा लियुक्॥ 9 हिट्नुङ्ना माङ्हाङ् रिङ् काउग्बाङा आङा याङ्लोडे, “ना रिङ् छेप्टु, थुमाङाना भ्याङाना भातेरङि छेम्बालाक् याप्मिचि माङ्हाङ्ङा जोम् आसिक् पिडुचिचि॥” माङ्हाङ् रिङ् काउग्बाङा फेरि आङा याङ्लोडे, “माङ्हाङ्ङा माट्टुगा छेम्बागा रिङ् नागा डोक्॥” 10 हिट्नुङ् हिट्ना माङ्हाङ् रिङ् काउग्बा माङ्ध्यान् चोक्मा लाउङ्सा ओटोकानाङि गुङ् चोगाङे, टरो हिट्नाङा आङा नाड्डे याङ्लोडे, “नाड्डे चोक्नेन्॥ आङाउम्टे खान् हिट्नुङ् बिस्वासि कासाइबाचि गाड्डे येसुङाना सेवा काचोक्बा एडोक् ए॥ खान्ङा माङ्हाङ् एडोक् माङ्ध्यान् चोक्मा कोन्युक्, पोङ्भोने छेम्बाना माङ्हाङ्लाम्माना रिङ् काचेक्बाङा एडोक् येसुङाना बारे आरु लोडुचिचि॥” फुट्ना टाङ्राङ्बाङि ठाङाना याप्मि 11 आङा टोनालोग् ओङ्साना निसुङे हिट्नुङ् हिट्नि ठिक् फुट्ना टाङ्राङ्बा येबाइसाना निसुङे॥ हिट्ना टाङ्राङ्बा उठुङ्ङि ठाङाउङ् युङेसानाम्बाक् “बिस्वासिलो” हिट्नुङ् “सात्ते” नुङ् ओलोडुए॥ उन्ङा सोब्बे याप्मिचि पाक् माहामाना हिट्ना गाड्डे न्याए चोगुचिचि, हिट्नुङ् हिट्ना गाड्डे डोक् ओसाट्टुरचिलोक् खेमाबुङ्मा चा चोक्युक्॥ 12 हिट्नुङ् उमिक् मिङाना ओलाप्को गाड्डे निङ्साना डाना, ओटेहेक्ङि याप्मा मुकुट् वाडुएसुना॥ हिट्नुङ् ओयेम्ङि ठिक् निङ् ओछेप्टुएसुना डाना, टरो हिट्ना निङ्ङाना उटुप् उन्ङा एडोक् ठाहा टोगुटु, आरु साङा चा ठाहा ओटोगुन्ना॥ 13 हिट्नुङ् उन्ङा हेलिक् नुप्टाना लोट्लिङ् वाडुएसुना, हिट्नुङ् उन्ङाना उनिङ् “माङ्हाङ् रिङ्” नुङ् डाना॥ 14 हिट्नुङ् टोनालोग्ङिगा टिलिङ्गाचि सेङ्सेङ्ना फुट्ना लोट्लिङ् ओवाडुङ् हिट्नाङाना ओएङ्-ओएङ् फुट्ना टाङ्राङ्बाङि ओठाङाउङ् ओखाडे॥ 15 साट्टुरचि मेप्माचि लाउङ्सा ओयासिलाम् यान्ना चेप्सा भारा होन्डाइसाना, हिट्नुङ् उन्ङा नाराङिगा ख्वाप्पा याप्मिचि धाउङाना डान्डिङा टुक्लोक् सासान् चोगुचिचि॥ हिट्नुङ् आङ्गुर पेलाँ चोक्मा ठेना कोल्ङि ठेन्डि गाड्डे डोक् उन्ङा याप्मिचि माङ्बोल्लेउ माङ्हाङ्ङाना उकुन्जिरिक्वाङा साजाए पिडुचिचि॥ 16 हिट्नुङ् उन्ङाना ओलोट्लिङ्ङि हिट्नुङ् ओलाङ्घेपाङि ना निङ् छेप्टेसाना, “हाङ्बाचिगा हाङ्बा हिट्नुङ् टाङ्बाचिगा टाङ्बा॥” 17 हिट्नुङ्ना आङा नाम् छेमा उठुङ्ङि ठिबाङ् माङ्हाङ् रिङ् काउग्बा येबेसाना निसुङे॥ टाङ्साङ्ङि ओपेएट्गा सोब्बे नुवाचि ठेना सोरा चोगुङ् नाड्डे पिक्सा लोडुचे, “माङ्हाङ्ङाना ठेना भातेरङि छुमानिउङ् काडानि, 18 हिट्नुङ् खानिङा हाङ्बाचिगा, काप्तानचिगा, बोल्लेउ याप्मिचिगा, टाङ्राङ्बा हिट्नुङ् टाङ्राङ्बाङि ओठाङागा याप्मिचिगा, कामारा हिट्नुङ् कामारा माखाक्, हिट्नुङ् ओठेगा लोक् ओखाट्टिउगा सोब्बेङागा सा चानुम्॥” 19 हिट्नुङ् हिट्ना जिवाट् हिट्नुङ् नाराङिगा हाङ्बाचि उन्चि आ-आप्पे टिलिङ्गाचिलोक् हिट्ना फुट्टाना टाङ्राङ्बाङि ठाङाना हिट्नुङ् उटिलिङ्गाचि बिरुद्दाङि खेमाबुङ्मा चोक्मा लाउङ्सा उछुमागा आङा निसुङ्चिङे॥ 20 हिट्नुङ् हिट्ना जिवाट् हिट्नुङ् हिट्ना उनिङ्ङि डोङ् ठोङ्डिना टोॽवा काचोक् माङ्जोना माङ्काटा टाङ्राङ्बाङि ठाङानाङा कैद चोगुए॥ हिट्ना माङ्जोना माङ्काटाङा डोङ् ठोङ्डिगा टोॽवा चोगुङ् हिट्ना जिवाट्ङाना छाप् ओलाडुगा लोक् हिट्नाङाना मुरति साम्माङ् काचोक्चि मुसिक्पा चाट्टुएसुचिगा डागा॥ हिट्नुङ् टाङ्राङ्बाङि ठाङानाङा हिट्नागाचि इप्पाङ् उहिङ्ग्वाट् डोक् गान्धकङा हाट्टेट्टाना मिङाना उभुङ्रोङि लेप्टुचे॥ 21 हिट्नुङ् टाङ्राङ्बा उठुङ्ङि ठाङानाङा ओयासिलाम्मा भारा होन्डाना चेप्साङा हिट्नागाँगा आरु उन्चि टिलिङ्गाचि सेडुचे, हिट्नुङ् सोब्बे नुवाचिङा हिट्नागाँगा सा फोक् उइप्टुलोक् ओचोए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.