पारकास 18 - आठपहरियाबेबिलोन मेगाना रिङ् 1 हिट्नुङ्ना आङा टोनालोग्लाम्मा यो उङ्सागेट्टाना आरको माङ्हाङ् रिङ् काउग्बा निसुङे॥ ना माङ्हाङ् रिङ् काउग्बाङाना माङ्ठेना ओसाक्ति डाना॥ हिट्ना माङ्हाङ् रिङ् काउग्बा ओम्से हिट्नुङ् नारा डोक् व्हाङ् चोगुए॥ 2 हिट्ना माङ्हाङ् रिङ् काउग्बा टुक्लोक् नाड्डे पिक्सा राट्टे, “हिट्ना माङ्ठेना बेबिलोन खालाङ्गा जाखाम् लिसे॥ हिट्ना सोब्बे खाले टोंडेबाचि हिट्नुङ् ओचाफेन्गा रिमेट्चि उयुङ्गा ठोङ् लिसेसे॥ हिट्नुङ् हिट्नि सोब्बे खाले आसुद्दो नुवाचि लोक् जानावारचि उयुङ्युक्॥ 3 पोङ्भोने सोब्बे देसङिगा याप्मिचिङा हिट्नाङाना इम्मेप्माजामा टोॽवाङाना इमालिङ् उठुङुङ् ओटेडुएसुचे, हिट्नुङ् नाराङिगा हाङ्बाचि हिट्नालोक् इम्मेप्माजामा टोॽवा ओचोगुएसुए॥ हिट्नुङ् हिट्नाङा निङ्ग्वा चोगु गाड्डे माहाङ्गो थोक्चि नाराङिगा सोब्बे बेपारिचिङा ओछोङ्सुङ् वागाठागा उलिसेसे॥” 4 हिट्नुङ्ना टाङ्साङ्लाम्मा नाड्डे मुक्टाना आरको ठिक् सोरा आङा खेम्सुङे, “हाउ आयाप्मिचि, हिट्ना खालाङ्गालाम्मा भारा होन्डानि, हिट्ना खालाङ्गाङिगा याप्मिचिङा ओचोगु गाड्डे पाप चोक्नेनुम्, नाभाउँम्टे हिट्नागाँ ओटोगुना साजाए खानिङा चा आटोगुम्टुम्॥ 5 पोङ्भोने हिट्ना खालाङ्गाङिगा याप्मिचिङा ओचोगुना पाप याप्मा लिसाउङ् टाङ्साङ् सोम्मा डोक् टासुएसुए, हिट्नुङ् माङ्हाङ्ङा हिट्नागाँ ओचोगुना ओभेन्ना टोॽवा मुन्डुन्गेट्टुन्ना॥ 6 हिट्नुङ् हिट्ना खालाङ्गाङिगा याप्मिचि हिट्नागाँ आरु याप्मिचि ओमेट्टुचि गाड्डे डोक् मेट्टानुम्चिम्॥ हिट्ना खालाङ्गाङिगा याप्मिचिङा ओचोगुना ख्वाप्पा ओचाफेन्ना टोॽवा लाउङ्सा इप्पोक् खेप् हिट्नागा ओचाफेन्मा मेट्टानुम्चिम्॥ हिट्नागाँ आरु याप्मिचि याङ्छामा ओचाट्टुचि गाड्डे खानिङा हिट्नागा लाउङ्सा इप्पोक् खेप् याङ्छामा पिडानुम्चिम्॥ 7 हिट्नागाँ उन्चि निङ्ग्वाङा ओचोगु गाड्डे सुख चैन् ओचोगुएसुए, हाट्ले हिट्नागा याङ्छामा लोक् दुखे पिडानुम्चिम्॥ पोङ्भोने हिट्नागाँ उन्चि निङ्ग्वाङि नाड्डे ओमाट्टुगा, ‘आङा हाङ्मारानि लिसाउङ् युङेसाङे, हिट्नुङ् आङा लाङ्लेप्मा मेच्छेमा माखाक्, हिट्नुङ् आङा काइले चा सानिङ्ग्वा चोक्मा कोन्निना॥’ 8 हिट्नाडेउङ् हिट्नागा उठुङ्ङि ठिक्ए लेम्बा डोक् बिपोत्ति ओटायुक्॥ हिट्ना खालाङ्गाङिगा याप्मिचि उसियुक्, सानिङ्ग्वा ओलोयुक्, याप्मिचिङा चामा-ठुङ्मा पाक्चा ओटोगुन्ना, हिट्नुङ् हिट्नागाँगा खालाङ्गा मिङा टुनुङ् जाखाम् लियुक्॥ पोङ्भोने हिट्ना खालाङ्गाङिगा याप्मिचि साजाए कापि माङ्हाङ् डाङ्बा साक्तिसालि माङ्हाङ् ए॥” 9 “हिट्नुङ् हिट्ना खालाङ्गा मिङा टुनुङ् मिखुमाङ् होन्डागेट्टाना उनिसुनाँ हिट्ना खालाङ्गाङिगा याप्मिचिलोक् ओचाफेन्ना टोॽवा काचोक् हिट्नुङ् मोज्मोज्जा चोक्मा साहाभागि उलिसागा नाराङिगा हाङ्बाचि ओहाब्युक् हिट्नुङ् सानिङ्ग्वा ओलोयुक्॥ 10 हिट्नागा हाङ्बाचिङा हिट्ना खालाङ्गाङिगा याप्मिचिङा ओटोगुना याङ्छामा उनिसुङ् उन्चि किप्माङा लाप्माङ् ओयेब्युङ् नाड्डे ओमाट्टुटु, ‘एलाह्, एलाह्, साक्तिसालि हिट्नुङ् माङ्ठेना बेबिलोन खालाङ्गा, छोम्मोङ्ङा डोक् खान्ङा साजाए आटोगुए!’ 11 “नाराङिगा बेपारिचिङा हिट्ना खालाङ्गा जाखाम् लिसाना उनिसुङ् ओहाप्युक् हिट्नुङ् सानिङ्ग्वा ओलोयुक्, पोङ्भोने साङा चा उन्चि मालमात्ता काइले चा फेरि हिट्ना खालाङ्गाङि उइनुन्ना॥ 12 खोनाङा चा हिट्नागाँ ओछोङ्सुगा साम्मेङ्, रुपाक्, रात्ना, मोति, हिट्नुङ् ओचेट्नुगा ओचेट्नुगा सुति, बैजानि, रेसामे हिट्नुङ् फाबालेङ् फागा लोट्लिङ्चि, हिट्नुङ् सोब्बे खाले बुङ्बुङ् ओनाम्गा सिङ्, हिट्नुङ् खाले-खाले हात्तिङा ओहामाराक्लाम्मा ओचोगुगा थोक्चि, हिट्नुङ् ख्वाप्पा आसालि सिङ्, काँसाङागा थोक्चि, धाउ हिट्नुङ् सिङ्गमरमरलाम्मा ओचोगुगा सोब्बे खाले थोक्चि उइनुन्गा॥ 13 हिट्नुङ् खोनाँङा चा हिट्नागाँ ओछोङ्सुगा दालचिनि, सोब्बे खाले मासाला, धुपा, मुररा, फुट्ना धुपा, इमालिङ्, जैतुनङाना क्या, मासिनो पिठो, गाहुँ, बोस्तुभाउ, ठुँबाचि, टाङ्राङ्बाचि, राथ, कामाराचि हिट्नुङ् याप्मिचि चा उइनुन्गा॥ 14 हिट्नागा बेपारिचिङा नाड्डे ओमाट्टुटु, ‘हाउ बेबिलोन, खान्ङा कानिङ्ग्वाङा आचोगुना ओचेट्नुना थोक्चि आमासुए, हिट्नुङ् खान्ङाना माक्फेन्सुबेन् हिट्नुङ् मान-मारेयादा सोब्बे जाखाम् उलिसे, हिट्नुङ् हिट्नागा फेरि खान्ङा खोना बेला चा आटोगुन्ना॥’ 15 “हिट्ना खालाङ्गाङि बेपार ओचोगाउङ् माक्फेन्सुबेन् कामाँ ओचोगुगा बेपारिचि लाप्माङ् डोक् ओयेब्युक्, पोङ्भोने हिट्नागा हिट्ना किप्माडुङ् याङ्छामालाम् आड्डिक् डोक् उकिट्युक्॥ हिट्नागा ठेना सोरा ओचोगुङ् ओहाप्युक् हिट्नुङ् सानिङ्ग्वा ओलोयुक्॥ 16 हिट्नागा नाड्डे उपिक्युक्, ‘एलाह्! एलाह्! ना माङ्ठेना खालाङ्गा, हिट्ना ओफाङ्-ओफाङ् सुति, बैजानि हिट्नुङ् सिन्दुरे राङ्गाङाना लोट्लिङ् हिट्नुङ् साम्मेङ्, बाहुमुल्ले रात्ना हिट्नुङ् मोति वाडुना मेन्झेमा गाड्डे डोक् ओचेट्नुना डाना॥ 17 टरो छोम्मोङ्ङा डोक् हिट्नाङाना जोम् माक्फेन्सुबेन् जाखाम् लिसे॥’ सोब्बे चुवाखोङ्डाङिगा काप्तानचि, हिट्नि ओवासेट्टागा याट्रिचि, नाबिक्चि, हिट्नुङ् सामुन्दराङिगा बेपारिचि सोब्बे हिट्ना खालाङ्गालाम्मा लाप्माङ् डोक् ओयेबे, 18 हिट्नुङ् हिट्ना खालाङ्गा मिङा टुनाउङ् मिखुमाङ् होन्डाना उनिसुङ् हिट्नागा नाड्डे पिक्सा ओराट्टे, ‘ना माङ्ठेना खालाङ्गा गाड्डेना आरु खोना खालाङ्गा चा वानेट्निना डाना!’ 19 हिट्नुङ् हिट्नागाँ उन्चि टेहेक्ङि खाम् ओठेन्डुङ् नाड्डे पिक्सा हाप्सा सानिङ्ग्वा ओलोसे, ‘एलाह्, एलाह्, ना खालाङ्गाङिना माक्फेन्सुबेन्लाम् चुवाखोङ्डाङ्ङिगा मालिक्चि वागाठागा उलिसाइसागा॥ टरो छोप्मोङ्ङा डोक् हिट्ना खालाङ्गाङिगा सोब्बे थोक् जाखाम् लिसे!’ 20 हाउ टोनालोग्ङि उलिसागा, हिट्ना जाखाम् लिसानाँ हारका लिसानि॥ माङ्हाङ् ओयाप्मिचि, मुलिचेलाचि हिट्नुङ् माङ्काटाचि सोब्बे हारका लिसानि॥ पोङ्भोने हिट्नाङा खानि लाउङ्सा जे चोगुए, हिट्ना लाउङ्सा माङ्हाङ्ङा साजाए पिडुएसुए॥” 21 हिट्नुङ्ना ठिक् साक्तिसालि माङ्हाङ् रिङ् काउग्बाङा ठिक् ठेना झाँटा टेउना लुङ्गेॽवा फोगुङ् नाड्डे पिक्सा सामुन्दराङि लेप्टुए, “ना माङ्ठेना बेबिलोन खालाङ्गा चा नाड्डेउङ् डोक् जोडलोक् लेप्युक्, हिट्नुङ् हिट्ना फेरि काइले ठेट्निना॥ 22 हिट्नुङ् ना खालाङ्गाङि फेरि खोना चा साराङ्गि काटेन्बाचि, छाम्लोमा ओछाम्लोगा, बाँसुरि हिट्नुङ् धुटुरिबा काटेन्बाचि उलिनिगा॥ हिट्नुङ् सोब्बे खाले सिल्पाकारिचि खान्ङि फेरि काइले चा ओटोग्निगा॥ झाँटा उरुट्टुगा चा खान्ङि काइले चा फेरि खेम्मा टोक्निना॥ 23 ना खालाङ्गाङि फेरि खोना बेला चा कुपि हाट्निना, हिट्नुङ् बेउला लोक् बेहुलिङाना उन्चि सोर खोना बेला चा खेम्निना॥ नाराङिगा बेपारिचिङि खान्ङिगा बेपारिचि आड्डिक् ओवागाठागा ओडागा, हिट्नुङ् खान्ङिगा सोब्बे माङ्जोगा चाटाकेचिङा नाराङिगा सोब्बे याप्मिचि उसुबुचे॥ 24 माङ्हाङ्ङा ना बेबिलोन साजाए पिडुएसुए, पोङ्भोने माङ्काटाचि लोक् माङ्हाङ् ओयाप्मिचि ओसेडुचिगा रिङ्ङाना फाट्टुर ना खालाङ्गाङि ठाइसे॥ छेम्बा डोक्, बेबिलोन खालाङ्गा नाराङिगा ख्वाप्पा याप्मिचि सेडुचिगा रिङ्ङाना फाट्टुरङि ठाइसे॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.