पारकास 17 - आठपहरियामेन्झेमा लोक् जिवाट् 1 हिट्ना सि खोरे ओयाङुगा सि माङ्हाङ् रिङ् काउग्बाचि माड्डे ठिबाङ् आङा सोरि आबाउङ् आङा याङ्लोडे, “नेहि आबा, हिट्ना वालाफेडुमा मेन्झेमा माङ्हाङ्ङा खोड्डेउङ् साजाए पिडुटुना हिट्ना रिङ् खान् निमेट्नाँ॥ हिट्ना वालाफेडुमाम्बाक् याप्मा होङ् सोरि ओचोगुना ठेना खालाङ्गा ए॥ 2 हिट्ना वालाफेडुमा मेन्झेमालोक् नाराङिगा सोब्बे हाङ्बाचिङा इम्मेप्माजामा टोॽवा ओचोगुएसुए, हिट्नुङ् नाराङिगा सोब्बे याप्मिचि इमालिङ्ङा ओटेडुचिगा याप्मिचि गाड्डे डोक् हिट्नाङाना ओचाफेन्ना टोॽवाङा ओटेडुएसुचे॥” 3 हिट्नुङ् आङा सेङ्सेङ्ना हाङ्साङा याङ्इप्टे हिट्नुङ् माङ्हाङ् रिङ् काउग्बाङा आङा साक्चा उयुङ्निना डेन्ङि याङ्खाट्टे॥ हिट्नि आङा ठिबाङ् मेन्झेमा फाबालेङ्ना जिवाट् उठुङ्ङि युङाना निसुङे॥ हिट्ना जिवाट्ङाना सि ओटा ओटेहेक् हिट्नुङ् ठिमेक् ओटा ओटाङ् डाना, हिट्नुङ् हिट्ना जिवाट् ओयेम् टेप् माङ्हाङ्ङाना बिरुद्दाङि लोमाजामाना रिङ्चि छेप्टेसाना॥ 4 हिट्ना मेन्झेमाङा बैजानि राङ्गाङाना ओम्साना लोट्लिङ् वाडुएसुना, हिट्नुङ् साम्मेङ्, हिरा हिट्नुङ् मोतिङाना गारगाहाना ओयेम् टेप् वाडेसुना डाना॥ हिट्नाङा उमुक्ङि चिम्मा फुट्टुम्ना रिङ्, आसुद्दो हिट्नुङ् ओचाफेन्ना टोॽवाङा इप्टुना साम्याङ्ङाना ठिक् खोरे याङेसुना॥ 5 हिट्ना मेन्झेमाङाना ओनाम्धाङ्ङि ठिक् ठोबाना उटुप् लिना निङ् छेप्टेसाना॥ हिट्नि नाड्डे छेप्टेसाना, “माङ्ठेना बेबिलोन खालाङ्गा, नाराङिगा वालाफेडुमाचिगा मामा गाड्डे डोक् चोक्ना, हिट्नुङ् नाराङिगा सोब्बे ओचाफेन्ना टोॽवाङाना उपुन् हिट्ना डोक् ए॥” 6 हिट्नुङ् येसुङाना बारे साँचि उपिडुनाँ याप्मिचिङा ओसेडुचिगा माङ्हाङ् ओयाप्मिचिगा उन्चि हेलिक् ठुङुङ् टेडेएसुना मेन्झेमा आङा निसुङे॥ हिट्ना निसुङुङ् आङा आड्डिक् डोङ् ठोङ्डाङे॥ 7 हिट्नुङ् माङ्हाङ् रिङ् काउग्बाङा आङा याङ्लोडे, “खान् पोङ् डोङ् आठोङ्युक्ना? हिट्ना मेन्झेमा लोक् हिट्ना मेन्झेमा खुयुना सि ओटा ओटेहेक् हिट्नुङ् ठिमेक् ओटा ओटाङ् लिसाना जिवाट्ङाना राहास्ये बारेङि आङा खान् लोनाँ॥ 8 खान्ङा आनिसुना हिट्ना जिवाट् पाइले उहिङ्ग्वाट् डाना, टरो हाट्ले हिट्ना जिवाट् उहिङ्ग्वाट् वाइना॥ हिट्ना जिवाट् उहिङ्ग्वाट् लियुक् हिट्नुङ् घाइरो भाड्खालोलाम्मा भारा होन्युङ् जाखाम् लिङा खाट्युक्॥ जब नाराङिगा याप्मिचिङा हिट्ना जिवाट् उनिसुटु हिट्नागा डोङ् ओठोङ्युक्, पोङ्भोने ठिक् बेला हिट्ना जिवाट् उहिङ्ग्वाट् डाना, हाट्ले हिट्ना जिवाट् उहिङ्ग्वाट् वाइना, टरो हिट्ना जिवाट् फेरि टायुक्॥ नागा याप्मिचि डोक् हिट्नागाँगा उन्चि निङ् नारा सिरिस्टि लिसानालाम्मा जिबानङाना छाप्लाङि छेप्निगेट्निना॥ 9 “नागा रिङ् बुजा चोक्मा ठोना चाहाब् लियुक्॥ हिट्ना जिवाट्ङाना सि ओटा ओटेहेक्उम्बाक् सि ओटा झोन्झोबा उलियुक्, हिट्नि डोक् हिट्ना मेन्झेमा युङेसे॥ हिट्नागा ओटेहेक्ङा सि जाना हाङ्बाचि बारेङि चा माट्टुटु॥ 10 लेम्बोक् जाना हाङ्बाचि ओमेगाडे, ठिबाङ् हाङ्बाङा सासान् चोगुएट्टु, हिट्नुङ् आरको हाङ्बा आझै टानिगेट्निना॥ जब हिट्ना टायुक्, हिट्नाँ छोप्मोङ् बेला एडोक् सासान् चोगुटु॥ 11 हिट्नुङ् पाइले हिट्ना जिवाट् उहिङ्ग्वाट् डाना हिट्नुङ् हाट्ले हिट्ना उहिङ्ग्वाट् वाइना, हिट्नाम्बाक् आठौँ हाङ्बा ए॥ हिट्ना सि हाङ्बाचि गाड्डेना ए, हिट्नुङ् हिट्ना हाङ्बा चा जाखाम् लियुक्॥ 12 “खान्ङा आनिसुगा ठिमेक् गोटा ओटाङ् ठिमेक् जाना हाङ्बाचि ए, हिट्नागाँ आझै सासान् चोक्मा उटुम् ओचोगुन्गेट्टुन्ना॥ टरो हिट्नागाँ हिट्ना जिवाट्लोक् होप्मो बेला सोम्मा एक्केउ सासान् चोक्माना आधिकार ओटोगुटु॥ 13 हिट्नागा सोब्बे हाङ्बाचिङा ठिक्ए रिङ् चोक्मा निङ्ग्वा ओचोगुटु॥ हिट्नागाँ उन्चि साक्ति लोक् आधिकार याप्मिचि सासान् चोक्मा हिट्ना जिवाट् उपिडुटु॥ 14 हिट्ना जिवाट् हिट्नुङ् ठिमेक् हाङ्बाचि माङ्हाङ्ङाना थुमा बिरुद्दाङि उचुङ्युक्, टरो थुमा लोक् उन् बिस्वास काचोक्चिङा हिट्नागा ओमेट्टुचिचि, पोङ्भोने उन् डाङ्बाचिगा टाङ्बा हिट्नुङ् हाङ्बाचिगा हाङ्बा ए॥ थुमालोक् उलिसागा बिस्वासिचिम्बाक् माङ्हाङ्ङा छेम्डुचिगा, सेगुचिगा हिट्नुङ् बिस्वासिलो उलिसाउङ् उन्ङाना सेवा काचोक् याप्मिचि ए॥” 15 हिट्नुङ् माङ्हाङ् रिङ् काउग्बाङा आङा नाड्डे याङ्लोडे, “खान्ङा हिट्ना वालाफेडुमा मेन्झेमा युङाना जोम् होङ् आनिसुए, हिट्ना होङ्ङा नाराङिना सोब्बे देसङिगा याप्मिचि हिट्नुङ् सोब्बे खाले रिङ्चि नुङ् बुजा लियुक्॥ 16 खान्ङा आनिसुना हिट्ना जिवाट् लोक् ठिमेक् उन्चि टाङ् उलिसागाँ हिट्ना वालाफेडुमा चिम्मा उफुट्टुटु॥ हिट्नुङ् हिट्नालोक् उलिसागा सोब्बे थोक् ओनाप्टुङ् एकेलिपोट् ओचोगुटु, हिट्नाङाना ओसा ओचोटु हिट्नुङ् हिट्ना मिङा उटुनुटु॥ 17 हिट्नागा ठिमेक् हाङ्बाचिङा हिट्डे ओचोगुटु, पोङ्भोने माङ्हाङ्ङा उन्ङा निङ्ग्वा चोगु गाड्डे चोक्मा हिट्नागा मेट्टुचिचि॥ हिट्नुङ् हिट्नागाँ उन्चि साक्ति हिट्ना जिवाट् पिमा राजि उलियुक्॥ माङ्हाङ्ङा माट्टुगा रिङ् पुरो मिले सोम्मा हिट्नागाँ हिट्ना जिवाट्ङाना रिङ् ओखेम्सुटु॥ 18 हिट्नुङ् खान्ङा आनिसुना हिट्ना वालाफेडुमा मेच्छेमाउम्बाक् नाराङिगा हाङ्बाचि सासान् काचोक् हिट्ना ठेना खालाङ्गा ए॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.