पारकास 16 - आठपहरियामाङ्हाङ्ङाना उकुन्जिरिक्वाङाना सि खोरे 1 हिट्नुङ्ना आङा माङ्ठानालाम्मा हिट्नागा सि माङ्हाङ् रिङ् काउग्बाचि चारको सोराङि नाड्डे ओलोडुचिगा खेम्सुङे, “खाडानि हिट्नुङ् हिट्ना सि खोरेङिना माङ्हाङ्ङाना उकुन्जिरिक्वा नाराङि हुङ्सानुम्॥” 2 हिट्नुङ् पाइलेना माङ्हाङ् रिङ् काउग्बा खाडाउङ् ओखोरे नाराङि हुङ्सुए, हिट्नुङ् हिट्नाङा चोगुनाँ हिट्ना जिवाट्ङाना चिन्ना लिसागा लोक् हिट्ना साम्माङ् काचोक् याप्मिचिगा ख्वाप्पा उन्चि येम्ङि चिम्मा फुट्टुम्ना हिट्नुङ् आड्डिक् टुक्ना खेसिक् लिसे॥ 3 दोस्रो माङ्हाङ् रिङ् काउग्बाङा ओखोरे सामुन्दराङि हुङ्सुए, हिट्नुङ् सामुन्दराङिना चुवा उसियागा याप्मिङाना ओहेलिक् गाड्डे डोक् लिसे॥ हिट्नुङ् सामुन्दराङि उलिसागा सोब्बे उहिङ्ग्वाट् पारानिचि उसिए॥ 4 हिट्नुङ् तेस्रो माङ्हाङ् रिङ् काउग्बाङा ओखोरे ठेना होङ् लोक् चुवा उपुन्ङि हुङ्सुए, हिट्नुङ् सोब्बे हेलिक् डोक् लिसाडे॥ 5 हिट्नुङ् चुवा उठुङ्ङि आधिकार लिसाना माङ्हाङ् रिङ् काउग्बाङा माङ्हाङ् नाड्डे लोडुना रिङ् आङा खेम्सुङे, “हाउ सेङ्सेङ्ना माङ्हाङ्, खान् आच्छो बेला चा आवासेट्टाना हिट्नुङ् हाट्ले चा आवाहेट् डोक् ए, खान्ङा नाड्डेगा बिपोत्तिचि आपाङ्सुङ् न्याए आचोगुए, खान्ङा आचोगुना न्याए माहामाना ए॥ 6 हिट्नागाँ खान्ङाना सेङ्सेङ्गा कायाप्मिचि हिट्नुङ् माङ्काटाचि ओसेडुचे॥ हिट्डेउङ् हाट्ले हिट्नागा खान्ङा हेलिक् ठुङ्मा आपिडुचिउङ् साजाए आपिडुचे॥ हिट्ना हिट्नागाँ टोक्मा डोक् कोन्ना रिङ् ए॥” 7 हिट्नुङ्ना आङा बेदिलाम् नाड्डेना माट्टुना रिङ् खेम्सुङे, “हाउ सोब्बे नुङ्ना माङ्बोल्लेउ माङ्हाङ् डाङ्बा, छेम्बा डोक्, खान्ङा याप्मिचि सात्ते हिट्नुङ् धारमिक्लोक् न्याए आचोगुचिचि॥” 8 हिट्नुङ् चौथो माङ्हाङ् रिङ् काउग्बाङा ओखोरे नाम्छेमाङि ठेन्डुए, हिट्नुङ् नाम्छेमाङा याप्मिचि मिङा टुम्माना साक्ति टोगुए॥ 9 हिट्नुङ् नाम् छेमा औधि छेडाउङ् याप्मिचि उटुने, हिट्नुङ् हिट्नागाँ नाड्डेगा बिपोत्तिचिङा सेप्माना आधिकार लिसाना माङ्हाङ् फाट्टुर ओलाबुए हिट्नुङ् सारापें ओचोगुए॥ टरो हिट्नागाँ काएल्-काबु लिमा हिट्नुङ् माङ्हाङ् मान् पिमा इन्कार ओचोगुए॥ 10 हिट्नुङ् पाँचौँ माङ्हाङ् रिङ् काउग्बाङा ओखोरे हिट्ना जिवाट्ङाना सिङासान्ङि हुङ्सुए, हिट्नुङ् हिट्नाङाना उमुलुक् डुम्बारिक् डुम् लिसे, हिट्नुङ् हिट्ना याङ्छामा आड्डिक् टुक्ना लिसानाँ याप्मिचि आड्डिक् ओहाबे॥ 11 हिट्नुङ् हिट्नागाँ टोनालोग्ङि युङ्ना माङ्हाङ् बारेङि ओचाफेन्लोक् ओमाट्टुए, पोङ्भोने हिट्नागाँ ओटोगुना याङ्छामा आड्डिक् टुक्ना डाना॥ टरो हिट्नागाँ ओभेन्गा टोॽवा चोक्माम्बाक् ओनाडुवाट्टुन्॥ 12 आरको छैंटौँ माङ्हाङ् रिङ् काउग्बाङा उन्ङाना ओखोरे हिट्ना ठेना युफेरटिस होङ्ङि हुङ्सुए, हिट्नुङ् पुरबालाम्मा हाङ्बाचि आप्माना लाम्बो उलियाक् नुङ् हिट्ना ठेना होङ्ङिना चुवा चोबाडे॥ 13 टब ठेना ओप्पुङाना ओयासिलाम्मा, हिट्ना जिवाट्ङाना ओयासिलाम्मा हिट्नुङ् माङ्जोना माङ्काटाङाना ओयासिलाम् फोरोक् गाड्डे उनिङ्सागा सुम्बोक् ओचाफेन्गा रिमेट्चि ओहोन्डागा आङा निसुङे॥ 14 नागा ओभेन्गा रिमेट्चिलोक् डोङ् ठोङ्डिना टोॽवा चोक्माना साक्ति डाना॥ हिट्नागा नाराङिगा ख्वाप्पा हाङ्बाचिङि ओखाट्युक् हिट्नागाँगा उन्चि टिलिङ्गाचि चुङ्मा लाउङ्सा उछुम्सुचिचि, हिट्नुङ् सोब्बे नुङ्ना माङ्बोल्लेउ माङ्हाङ्ङा ओसाट्टुरचि साजाए पिडुचिना लेम्बा हिट्नागा माङ्हाङ्लोक् उचुङ्युक्॥ 15 “खेम्सानुम्, खानिङा ठाहा डोक् मिटोक्ङे याङ्काखुट् गाड्डे डोक् आङा उङ्ङा॥ जुन् याप्मि ओछेक्छेक् चोक्युङ् ओलोट्लिङ् जोगाँ चोगुङ् युङ्ना याप्मि गाड्डे युङ्युक्, हिट्ना आसिक् टोगुना याप्मि लियुक्, पोङ्भोने हिट्ना एकेलिपोट् लाम्टिमा कोन्निना हिट्नुङ् याप्मिचि सोरि मोम्मासिमा कोन्निना॥” 16 हिट्नुङ् हिट्नागा ओचाफेम्मा रिमेट्चिङा हिब्रु रिङ्ङि आर-मागेडोन ओलोडुना डेन्ङि हिट्नागा हाङ्बाचि एक्केउ उछुम्सुचे॥ 17 सातौँ माङ्हाङ् रिङ् काउग्बाङा ओखोरे हिॽवाङि हुङ्सुए॥ हिट्नुङ् माङ्ठानाङिना सिङासान्लाम्मा ठिक् ठेना सोरा मुक्टे॥ हिट्ना सोराङा माट्टुए, “हाट्ले लाट्टे॥” 18 हिट्ना बेला डोक् बिजुलि ओम्से, टाङ्साङि घुरुङ्बा लोसे, हिट्नुङ् आड्डिक् ठेना लुट्लेमा खाडे॥ नाराङि याप्मिचि सिरिस्टि उलिसागा बेला नुङ् नाड्डेना आड्डिक् किप्माडुङ् ठेना लुट्लेमा याप्मिचिङा काइले चा उनिसुन्गेट्टुन्ना डाना॥ 19 हिट्नुङ् हिट्ना ठेना बेबिलोन खालाङ्गा सुम्बोक् टुक्रा लिसे, हिट्नुङ् आरु देसङिगा खालाङ्गाचि चा ओहोडाउङ् जाखाम् उलिसे॥ हिट्नुङ् माङ्हाङ्ङा हिट्ना ठेना बेबिलोन खालाङ्गाङिगा याप्मिचिगा पाप मिट्टुङ् उन्ङाना आड्डिक् ठेना उकुन्जिरिक्वाङा इप्टुना खोरेलाम्मा हिट्नागा ठुङ्मा पिडुचे॥ 20 लुट्लेमा खाडानाँ ख्वाप्पा टापु हिट्नुङ् झोन्झोबाचि ओमासाडे॥ 21 हिट्नुङ् टाङ्साङ्लाम्मा याप्मिचि उठुङ्ङि चालिस किलो टेप्मा उलिसागा ठे-ठेगा फोम् ओठाए॥ हिट्डेउङ् याप्मिचिङा फोम्ङाना बिपोत्ति लिसानाँ माङ्हाङ् सारापें ओचोगुए, पोङ्भोने हिट्ना बिपोत्ति आड्डिक् टुक्ना किप्माडुङ् डाना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.