पारकास 15 - आठपहरियासि माङ्हाङ् रिङ् काउग्बाचि हिट्नुङ् सि बिपोत्ति 1 हिट्नुङ्ना आङा टोनालोग्ङि ठिक् ठेना हिट्नुङ् आड्डिक् डोङ् ठोङ्डिना आरको चिन्ना निसुङे॥ सि माङ्हाङ् रिङ् काउग्बाचि ख्वाप्पाङा ठिक्-ठिक् बिपोत्ति ओयाङुएसुगा॥ नागा बिपोत्ति आखेरि ए, पोङ्भोने नागा बिपोत्तिचि ओलाट्ना मे माङ्हाङ्ङाना उकुन्जिरिक्वा चा लाट्युक्॥ 2 हिट्नुङ् आङा मिलोक् मिसाँ लिसाना काँचाङा चोक्बालाक् सामुन्दरा गाड्डेना निसुङ्ङे॥ हिट्नि सामुन्दरा सोरि हिट्ना जिवाट् हिट्नुङ् हिट्नाङाना मुरति साम्माङ् ओचोग्वाट्टुन् नुङ्, हिट्नुङ् हिट्नाङाना उनिङ्ङाना नाम्बारङि छाप् ओवाड्वाट्टुन् नुङ् बिजाए उलिसागा याप्मिचि ओयेबैसागा निसुङ्चिङे॥ हिट्नागाँ माङ्हाङ्ङा पिडुचिगा बिना ओयाङुएसुगा॥ 3 हिट्नागाँ माङ्हाङ् ओसेवाक् मोसाङाना छाम्लोमा हिट्नुङ् थुमाङाना छाम्लोमा ओछाम्लोसेट्टागा, “माङ्हाङ् डाङ्बा, खान् सोब्बे नुङ्ना माङ्बोल्लेउ, हिट्नुङ् खान्ङा आचोगुना टोॽवा माङ्ठेना हिट्नुङ् डोङ् ठोङ्डिना ए॥ खान् सोब्बे छोङ्बाचिगा हाङ्बा ए, खान्ङागा सोब्बे टोॽवा सिधा हिट्नुङ् छेम्बागा ए॥ 4 हाउ माङ्हाङ् डाङ्बा, खान्लोक् सोब्बे उकिट्युक्, सोब्बे याप्मिचिङा खान्ङाना माहिमा ओचोगुटु, पोङ्भोने सेङ्सेङ्ना खान् एना॥ सोब्बे याप्मिचि खान्ङि ओआप्युक् हिट्नुङ् खान् सोरि कानिङ् टो-टो ओचोगुटु, पोङ्भोने सोब्बे याप्मिचि खान्ङाना धारमोति टोॽवा आनिमेट्टुएसुचे॥” 5 हिट्नागा याप्मिचिङा छाम्लोमा उहिडुङ्, आङा टोनालोग्ङि माङ्ध्यान् चोक्माना पाङ् ओङ्साना निसुङे, हिट्नाम्बाक् माङ्हाङ् युङ्ना पाल ओलोडुटु॥ 6 हिट्नुङ् सि माङ्हाङ् रिङ् काउग्बाचि सि ओटा बिपोत्ति लोक्गा माङ्ठानालाम् भारा ओहोन्डे॥ हिट्नागाँ सेङ्सेङ्ना हिट्नुङ् फुटुम्बुरि ओम्साना लोट्लिङ् ओवाडेसुगा, हिट्नुङ् साम्मेङ्ङाना पेटि उन्चि छातिङि ओरेक्टेसुना॥ 7 हिट्नागा टेम्बोक् उहिङ्ग्वाट् जिवाट्चि माड्डे ठिबाङ्ङाम्बाक् सि ओटा साम्याङ्ङाना खोरे हिट्नागा सि जाना माङ्हाङ् रिङ् काउग्बाचि पिडुचे॥ हिट्ना सि खोरे माङ्हाङ्ङाना आड्डिक् टुक्ना साजाएङा इप्टुएसुना॥ उन् सोरोक् लियुयाक्ना उहिङ्ग्वाट् माङ्हाङ् ए॥ 8 हिट्नुङ् माङ्हाङ्ङाना माहिमा हिट्नुङ् ओसाक्तिलाम्मा होन्डाना मिखुमाङ्ङा माङ्ठाना इप्टुए॥ हिट्नागा सि माङ्हाङ् रिङ् काउग्बाचिलोक् लिसाना सि बिपोत्ति पुरो मिलेए सोम्मा साक्चा माङ्ठानाङि लिग्मा उहिनेट्नि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.