पारकास 14 - आठपहरियाथुमा हिट्नुङ् एक लाख चावालिस हाजार याप्मिचि 1 हिट्नुङ् आङा थुमा गाड्डे डोक् निङ्साना सियोन झोन्झोन्बाङि येबैसाना निसुङे॥ उन्लोक् एक लाख चावालिस हाजार याप्मिचि ओडागा॥ कोइङा हिट्नागाँगा उन्चि नाम्धाङ्ङि थुमाङाना उनिङ् हिट्नुङ् माङ्हाङ् पाबाङाना उनिङ् ओछेप्टुबिडुचे॥ 2 हिट्नुङ् आङा टोनालोग्ङि ठेना चुवा ठायाना गाड्डे मुक्टाना हिट्नुङ् ठेना घुरुङ्बा गाड्डे मुक्टाना सोरा खेम्सुङे॥ आङा खेम्सुङ्ना हिट्ना सोरा जोम् याप्मिचिङा ओटेनुयाक्टुना बिना बाजा गाड्डे मुक्टाना खेम्सुङे॥ 3 हिट्नागा एक लाख चावालिस हाजार याप्मिचिङा माङ्हाङ्ङाना सिङासान् सोरि, टेम्बोक् उहिङ्ग्वाट् जिवाट्चि टोकानाङि हिट्नुङ् ओठेडोङ्चि टोकानाङि ठिक् ओछोङ्ग्वाट् छाम्लोमा ओठाक्टुएट्टुगा॥ नाराङिगा याप्मिचि माड्डे छुट्कारा ओटोगुगा एक लाख चावालिस हाजार याप्मिचिङा एडोक् हिट्ना ओछोङ्ग्वाट् छाम्लोमा खोड्डे पारिक् छाम्लोमाना नुङ् उनिसुगा डागा, आरु खोनाँ चा उनिसुन्गा डागा॥ 4 हिट्नागा खोना चा मेच्छेमाचिलोक् ओचाफेन्ना टोॽवा ओचोक्नेट्निगा हिट्नुङ् उन्चि आप्पेलाउङ्सा चोखो उयुङ्सुएसुए॥ हिट्नागाँ थुमा खोनालेङ् खाट्चा उन् रोक् उरिक्टुना डाना॥ हिट्नुङ् नाराङिगा याप्मिचिलाम्मा छुट्कारा ओटोगुगा याप्मिचि हिट्नागा डोक् ए, हिट्नुङ् माङ्हाङ् लोक् थुमा लोङ्सा ओसाम्डुचिगा पाइलेगा याप्मिचि हिट्नागा डोक् ए॥ 5 हिट्नागा याप्मिचि खोना बेला चा माङ्जो ओचेक्नेट्नि, हिट्नुङ् हिट्नागा फाट्टुर मालेगा ए॥ सुम्बाङ् माङ्हाङ् रिङ् काउग्बाचि 6 हिट्नुङ् आङा टो टाङ्साङ्ङि आरको ठिक् माङ्हाङ् रिङ् काउग्बा पेयेट्टाना निसुङे॥ हिट्नुङ् हिट्नालोक् नाराङि उयुङ्गा सोब्बे देस, सोब्बे छोङ्बाचि, खाले-खाले रिङ् ओचेक्गा, हिट्नुङ् सोब्बे याप्मिचि लाउङ्सा पारचार चोक्माना खोना बेला चा लाट्निना नुना खाबोर डाना॥ 7 हिट्नाङा चारको सोर चोगुङ् माट्टुए, “माङ्हाङ्लोक् किट्टानि हिट्नुङ् उन् मान् चोगानुम्, पोङ्भोने हाट्ले उन्ङा याप्मिचि न्याए चोक्मा बेला टाइसे॥ हिट्नुङ् टाङ्साङ्, नारा, सामुन्दरा हिट्नुङ् चुवा उपुन् सिरिस्टि काचोक्बा माङ्हाङ् माङ्ध्यान् चोगानुम्॥” 8 हिट्नुङ् दोस्रो माङ्हाङ् रिङ् काउग्बा नाड्डे पिक्सा पाइलेना माङ्हाङ् रिङ् काउग्बा ओएङ्-ओएङ् खाडे, “जाखाम् लिसे, ठेना बेबिलोन खालाङ्गा जाखाम् लिसे॥ हिट्ना खालाङ्गाङिगा याप्मिचिङा नाराङिगा सोब्बे छोङ्बाचि इमालिङ्ङा टेडुचि गाड्डे डोक् इम्मेप्माजामा टोॽवा चोक्मा ओमेट्टुएसुचे॥” 9 हिट्नागाचि इप्पाङ् माङ्हाङ् रिङ् काउग्बाचि ओएङ्-ओएङ् फेरि तेस्रो माङ्हाङ् रिङ् काउग्बा ठेना ओसोरा चोगुङ् नाड्डे पिक्सा राट्टे, “कोइ याप्मिचिङा हिट्ना जिवाट् हिट्नुङ् हिट्नाङाना मुरति साम्माङ् ओचोगुटु, हिट्नुङ् उन्चि नाम्धाङ्ङि आथाबा उन्चि मुक्ङि हिट्ना जिवाट्ङाना छाप् ओवाडुटु भोने, 10 हिट्नागा उठुङ्ङि माङ्हाङ्ङाना ठेना उकुन्जिरिक्वा ठायुक्, हिट्नुङ् उन्ङा दाया डोक् मालेना ठेना साजाए हिट्नागा पिडुचिचि॥ हिट्नुङ् माङ्हाङ्ङा हिट्ना सेङ्सेङ्गा माङ्हाङ् रिङ् काउग्बाचिगा टोकानाङि लोक् थुमाङाना ओटोकानाङि मि लोक् गान्धाक्ङि लेप्टुचिचि॥ 11 हिट्नुङ् हिट्नागा उडुचिगा मिङाना मिखुमाङ् सोरोक् टो टाङ्साङ्लेङ् खाट्युक्॥ हिट्नुङ् हिट्ना जिवाट् साम्माङ् काचोक्, हिट्नाङाना मुरति साम्माङ् काचोक्, हिट्नुङ् हिट्नाङाना उनिङ्ङाना छाप् ओवाडुगाँगा याङ्छामा लेन्सेन् खोना बेला चा लाट्निना॥” 12 हिट्डेउङ् माङ्हाङ्ङा लोडुचिगा रिङ् ओटेन्गा हिट्नुङ् येसुङि बिस्वास काचोक् माङ्हाङ् ओयाप्मिचिङा धैइरे लिमाउङ् युङ्मा कोन्युक्॥ 13 हिट्नुङ् टोनालोग्लाम् नाड्डे मुक्टाना ठिक् सोरा आङा खेम्सुङे, “ना रिङ् छेप्टु, हाट्ले नुङ् टाङ्बा बिस्वास ओचोगुङ् उसियागा याप्मिचि माङ्हाङ्ङा आसिक् पिडुचिचि॥” सेङ्सेङ्ना हाङ्साङा नाड्डे माट्टुए, “छेम्बा ए, हाट्ले नुङ् हिट्नागाँ टुक्ना टोॽवा चोक्मा कोन्निना॥ हिट्ना ओसाट्टोङि माङ्हाङ्ङा हिट्नागा आराम पिडुचिचि, हिट्नुङ् हिट्नागाँ ओचोगुना टोॽवाङाना इनाम् हिट्नागा पिडुचिचि॥” नाराङिना चासोङ् हेग्माना बेला 14 हिट्नुङ् आङा हिट्नि “याप्मि छा” गाड्डे फुट्ना खिमेमाङि युङेसाना निसुङे॥ उन्ङा ओटेहेक्ङि साम्मेङ्ङाना मुकुट् वाडुएसुना हिट्नुङ् आड्डिक् यान्ना ठिक् काच्चे उमुक्ङि याङुएसुना॥ 15 आरको ठिक् माङ्हाङ् रिङ् काउग्बा टोनालोग्ङिना माङ्ठानालाम् भारा होन्डे, हिट्नुङ् खिमेमाङि युङेसाना नाड्डे पिक्सा चारको सोर चोगुङ् लोडुए, “नाराङि चासोङ् हेग्मा बेला लिसे, हिड्डेउङ् खान्लोक् लिसाना काच्चेङा चासोङ् हेगु, पोङ्भोने नाराङि चासोङ् सोङ्माइडे॥” 16 हिट्नुङ् हिट्ना खिमेमाङि युङानाँ याप्मिङा ओकाच्चे याङुङ् नाराङिना चासोङ् हेगुए॥ 17 हिट्नुङ्ना आङा टोनालोग्ङि माङ्हाङ्ङाना माङ्ठानालाम्मा आरको माङ्हाङ् रिङ् काउग्बा होन्डाना निसुङे॥ उन्लोक् चा ठिक् यान्ना काच्चे डाना॥ 18 हिट्नुङ् मि उठुङ्ङि आधिकार लिसाना आरको माङ्हाङ् रिङ् काउग्बा बेदिलाम्मा होन्डे॥ उन्ङा यान्ना काच्चे याङुना माङ्हाङ् रिङ् काउग्बा चारको सोर चोगुङ् नाड्डे पिक्सा लोडुए, “हिट्ना यान्ना काच्चे याङुङ् नाराङिना आङ्गुर घारिलाम्मा आङ्गुर उबुङ् हेगुङ् छुम्सु, पोङ्भोने नाराङिना आङ्गुरङाना टुल्फुल सोब्बे ओसोङ्माहिडे॥” 19 हिट्डेउङ् हिट्ना माङ्हाङ् रिङ् काउग्बाङा ओकाच्चे याङुङ् नाराङिना आङ्गुर उबुङ् हेगुङ् छुम्सुए, हिट्नुङ् आङ्गुर पेलाँ चोक्माना ठेना कोल्ङि ठेन्डुए, हिट्नाम्बाक् याप्मिचि माङ्हाङ्ङाना किम्माडुङ् साजाए पिमाना ठोङ् नुङ् बुजा चोक्युक्॥ 20 हिट्नुङ् हिट्नागा आङ्गुर खालाङ्गा भारा कोल्ङि पेलाँ उलिसे, हिट्नुङ् हिट्ना कोललाम्मा हेलिक् होन्डाउङ् टाङ्राङ्बाङाना ओसाङ्मारिक् टेप्मा घाइरो लिसाउङ् सुम्बोक् साए किलो मिटर लाप्माङ् बागाँ लिसाउङ् खाडे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.