पारकास 13 - आठपहरियासामुन्दरालाम्मा होन्डाना जिवाट् 1 हिट्नुङ्ना आङा सामुन्दरालाम् ठिक् जिवाट् भारा होन्डा काडाना निसुङे, हिट्नाङाना ठिमेक् ओटाङ्, हिट्नुङ् साङ् ओटा ओटेहेक् डाना॥ हिट्नाङाना ख्वाप्पा ओटाङ्ङि ठिक्-ठिक् मुकुट् डाना, हिट्नुङ् हिट्नाङाना ख्वाप्पा ओटेहेक्ङि माङ्हाङ् लोमाजामाना निङ् ओछेप्टुएसुना॥ 2 हिट्नुङ् आङा हिट्ना जिवाट् चितुवा गाड्डे निङ्साना निसुङे॥ हिट्ना चितुवाङाना ओलाङ् माक्सा ओलाङ् गाड्डेना डाना, हिट्नुङ् हिट्नाङाना ओयासिम्बाक् युबा ओयासि गाड्डेना डाना॥ हिट्ना ठेना ओप्पुङा आप्पे ओसाक्ति, हिट्नाङाना सिङासान्, हिट्नुङ् ओआधिकार हाङ्बा गाड्डे डोक् सासान् चोक्मा हिट्ना जिवाट् पिडुए॥ 3 हिट्नुङ् हिट्ना जिवाट्ङाना ठिक् ओटेहेक् खेसिक् लिसाउङ् सिया गाड्डे डोक् निङ्साना, टरो हान्डेङ् हिट्ना खेसिक् नुमानिङ् लिसे॥ हिट्नुङ् नाराङिगा सोब्बे याप्मिचिङा नाड्डेना रिङ् उनिसुङ् डोङ् ओठोङ्डे, हिट्नुङ् हिट्ना जिवाट्ङाना ओएङ्-ओएङ् ओखाडे॥ 4 हिट्नुङ् याप्मिचिङा हिट्ना ठेना ओप्पु साम्माङ् ओचोगुना डाना, पोङ्भोने हिट्नाँ उन्ङाना आधिकार हिट्ना जिवाट् पिडुएसुना॥ हिट्नागा याप्मिचिङा चा नाड्डे पिक्सा हिट्ना जिवाट्ङाना उनिङ् ओचोन्डुए, “ना जिवाट् गाड्डे बोल्लेउ आरु खोना युङ्ग्वाना? ना जिवाट्ङाना बिरुद्दाङि खोना चुङ्मा हियुक्ना?” 5 हिट्नुङ् हिट्ना जिवाट्ङा घामान्डि लिमाना हिट्नुङ् माङ्हाङ् लोमाजामाना हाक् टोगुए॥ हिट्नाङा बायालिस माइना सोम्मा सासान् चोक्माना आधिकार टोगुए॥ 6 हिट्नुङ् हिट्नाङा माङ्हाङ् उबिरुद्दाङि ओचाफेम्मा रिङ् चेक्टाउङ् माङ्हाङ् उनिङ् लोक् उन् युङ्ना ठोङ्, हिट्नुङ् टोनालोग्ङि उयुङ्गा सोब्बे ओचाफेन्लोक् चोगुचे॥ 7 हिट्नुङ् हिट्ना जिवाट्ङा माङ्हाङ्ङाना ओयाप्मिचि बिरुद्दाङि चुङ्माना हिट्नुङ् हिट्नागा मेट्माना आधिकार टोगुए॥ फेरि हिट्ना जिवाट्ङा नाराङिगा सोब्बे छोङ्बाचि, खाले-खाले रिङ् ओचेग्गा, सोब्बे याप्मिचि हिट्नुङ् सोब्बे देसङि सासान् चोक्माना आधिकार टोगुए॥ 8 हिट्नुङ् नाराङिगा सोब्बे याप्मिचिङा हिट्ना जिवाट् साम्माङ् ओचोगुटु, हिट्नागा याप्मिचि माले जुन्ङाना उन्चि निङ् माङ्हाङ्ङा नारा सिरिस्टि चोक्मा पाइले डोक् काइले चा लाट्निना चोलाङाना छाप्लाङि छेप्टुबिडुएसुचे॥ हिट्ना छाप्लाम्बाक् याप्मिचिङा ओसेडुना थुमाङाना ए॥ 9 “खानि सोब्बेलोक् खेम्माना नुभेक् युङ्ग्वा, हिट्नागाँ नुलोक् खेम्सानुम्॥ 10 कोइ याप्मि खाम्बाङ्ङि ठामा कोन्युक् भोने, हिट्ना खाम्बाङ्ङि ठामा डोक् कोन्युक्, हिट्नुङ् कोइ याप्मि चेप्सालाम्मा सेट्मा कोन्युक् भोने, हिट्ना चेप्सालाम्मा सेट्मा डोक् कोन्युक्॥ हिट्डेउङ् माङ्हाङ्ङाना ओयाप्मिचिङा याङ्छामा आङ्मा कोन्युक् हिट्नुङ् बिस्वासङि बोल्लेउ लिमा डोक् कोन्युक्॥” नारालाम्मा होन्डाना जिवाट् 11 हिट्नुङ् नारालाम् आरको जिवाट् होन्डा काडाना आङा निसुङे॥ हिट्नाङाना ठुँबाङाना गाड्डे इप्पोक् ओटाङ् डाना, टरो हिट्ना ठेना ओप्पु गाड्डे राट्टाना॥ 12 हिट्नुङ् ना जिवाट्ङा पाइलेना जिवाट् लाउङ्सा टोॽवा चोगुए हिट्नुङ् पाइलेना जिवाट्ङाना आधिकार डोक् चालाँ चोगुए॥ हिट्नुङ् ना जिवाट्ङा खेसिक् लिसाउङ् सिया गाड्डे निङ्साना नुमानिङ् लिसाना पाइलेना जिवाट् लाउङ्सा नाराङिगा सोब्बे याप्मिचि साम्माङ् चोक्मा मेट्टुचे॥ 13 हिट्नुङ् ना जिवाट्ङा डोङ् ठोङ्डिगा टोॽवा चोगुए॥ नाराङिगा सोब्बे याप्मिचिङा उनिसुलोक् हिट्नाङा टाङ्साङ्लाम् नाराङि मि ठेन्डुए॥ 14 हिट्नुङ् पाइलेना जिवाट्ङा ओसाट्टोङि डोङ् ठोङ्डिना टोॽवा चोक्मा ना जिवाट् आधिकार पिडुए॥ नाड्डेगा टोॽवा चोगुङ् ना जिवाट्ङा नाराङिगा याप्मिचिगा निङ्ग्वा बान्डुबिडुचे॥ हिट्नुङ् हिट्ना चेप्साङा खेसिक् लिसाउङ् नुमानिङ् लिसाना पाइलेना जिवाट् मान् चोक्मा हिट्नाङा मुरति चोक्मा हिट्नागा मेट्टुचे॥ 15 हिट्नुङ् पाइलेना जिवाट्ङाना मुरति चेक्मा काहिबा उलियाक् हिट्नुङ् हिट्ना मुरति साम्माङ् चोक्मा ओटेन्निगा ओसेडुचियाक् नुङ् हिट्ना मुरतिङि सोक्मा ठेम्माना साक्ति ना जिवाट्ङा टोगुए॥ 16 हिट्ना जिवाट्ङा चिजिग्गा हिट्नुङ् ओठेगा याप्मिचि, ओवागाठागा याप्मिचि हिट्नुङ् पाक्चा मालेगा याप्मिचि, कामारा हिट्नुङ् कामारा माखाक् सोब्बेलाउङ्सा उन्चि छुप्टाङ् मुक्ङि आथाबा उन्चि नाम्धाङ्ङि छाप् मेट्मा चा मेट्टुचे॥ 17 ना छाप् माले साङा चा इम्मा हिट्नुङ् छोङ्मा ओटोग्वाट्टुन्॥ ना छाप्उम् हिट्ना पाइलेना जिवाट्ङाना उनिङ् आथाबा हिट्ना जिवाट्ङाना उनिङ्ङाना नाम्बार ए॥ 18 ना लाम्बारङाना उटुप् ठाहा टोक्मा साजिलो वाइना, टरो जुन्ङा नुलोक् उनिङ्ग्वा पिडुङ् मिट्टुटु, हिट्नाँ हिट्ना जिवाट्ङाना लाम्बारङाना उटुप् ठाहा टोगुटु॥ पोङ्भोने हिट्ना याप्मिङाना उनिङ् ए, हिट्नुङ् हिट्ना लाम्बारम्बाक् छ साए छाइसाठि ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.