पारकास 12 - आठपहरियामेन्झेमा लोक् माङ्ठेना ओप्पु 1 हिट्नुङ् टोनालोग्ङि आङा ठिक् डोङ् ठोङ्डिना ठेना चिन्ना निसुङे॥ हिट्नि नाम्छेडाना गाड्डे डोक् ओम्साना लोट्लिङ् वाडुना मेन्झेमा आङा निसुङे, लालिप्माङ् येप्टुङ् हिट्ना येबैसाना॥ हिट्नुङ् ओटेहेक्ङि बारो ओटा चोक्चिङ्गेट्ङाना मुकुट् वाडेसुना॥ 2 हिट्ना मेच्छेमाङा छा खुयुएसुना, हिट्नुङ् छाडाङ्मा बेथा लाहाब् लिसाउङ् औधि राट्टेट्टाना॥ 3 हिट्नुङ् टोनालोग्ङि आरको डोङ् ठोङ्डिना ठिक् चिन्ना आङा निसुङे॥ हिट्नि माङ्ठेना फाना ओप्पु आङा निसुङे॥ हिट्नाङाना सि ओटा ओटेहेक् लोक् ठिमेक् गोटा ओटाङ् डाना, हिट्नुङ् सि ओटा ओटेहेक्ङि डोक् मुकुट् डाना॥ 4 हिट्ना ओप्पुङाना ओमेलाक्ङा टाङ्साङ्ङिगा एक तिहाइ खान्डा चोक्चिङ्गेट्चि साडुचिउङ् नाराङि ठेन्डुचे॥ हिट्नुङ् हिट्ना ओप्पु मेन्झेमाङा उइछा पोङ्सुनामे चामा लाउङ्सा हिट्ना मेन्झेमा सोरि येबे॥ 5 हिट्ना मेन्झेमाङा ठिबाङ् येम्बेछा छा पोङ्सुए, टरो हिट्ना ओओ ओप्पुङा च्वाट्टुन्, पोङ्भोने हिट्ना बेला डोक् माङ्हाङ्ङा उन् सोरि टोनालोग्ङि फोगुङ् खाट्टुए हिट्नुङ् उन्ङाना सिङासान्ङि युङ्सुए॥ हान्डेङ्म्बाक् हिट्ना ओओङा ना नाराङिगा सोब्बे याप्मिचि पुरो आधिकारलोक् सासान् चोगुचिचि॥ 6 हिट्नुङ् हिट्ना मेच्छेमा पिन्डाउङ् पाक्चा लिनिना डेन्ङि खाडे, हिट्नि ठिक् हाजार इप्पोक् साए साठि लेम्बा सोम्मा हिट्ना पुमा लाउङ्सा माङ्हाङ्ङा हिट्ना ठोङ् टेयार चोगुएसुना डाना॥ 7 हिट्नुङ्ना टोनालोग्ङि खेमाटोमा लिसे॥ माङ्हाङ् रिङ् काउग्बा मिखाएल लोक् आरु माङ्हाङ् रिङ् काउग्बाचि हिट्ना ठेना ओप्पु हिट्नुङ् उदुतचिलोक् उचुङे॥ 8 टरो हिट्ना ठेना ओप्पु लोक् उदुतचिङा मिखाएल हिट्नुङ् आरु माङ्हाङ् उरिङ् काउग्बाचि मेप्मा उहिडुवाट्टुन्चिन्, हिट्नुङ् माङ्हाङ्ङा हिट्नागा हिट्नाउङ्ना खोना बेला चा टोनालोग्ङि युङ्मा पिडुवाट्टुन्चिन्॥ 9 हिट्ना ठेना ओप्पु आच्छो बेलाना ओप्पु ए, हिट्ना दियाबालास हिट्नुङ् सैतान चा ओलोडुए, हिट्नाँ डोक् सोब्बे नाराङिगा याप्मिचि बान्डुचिगा॥ हिट्ना उदुतचिलोक् एक्केउ नाराङि ओलेप्टुए॥ 10 आङा टोनालोग्ङि नाड्डे मुक्टाना ठेना सोरा खेम्सुङे, “हाट्ले आनि माङ्हाङ्ङा ओयाप्मिचि बाचाँ चोगुचिचि, उन्ङा सासान् चोक्माना उन्ङाना आधिकार पारकाट् चोगुएसुए, हिट्नुङ् मुक्टि कापिबा खिरिस्टङा चा उन्ङा सासान् चोक्माना आधिकार पारकाट् चोगुएसुए॥ हाट्ले आनि भुम्भु-झान्झाचि हिट्नुङ् नाना-झान्झाचि जाइले टाइले फाट्टुर कालाब्बा सैतान टोनालोग्लाम् लेप्टैसे॥ हिट्नाँ लेन्सेन् हिट्नागा माङ्हाङ् ओटोकानाङि फाट्टुर लाब्मा नाडुन्गेट्टुन्ना॥ 11 आनि भुम्बु-झान्झाचि हिट्नुङ् नाना-झान्झाचिङा थुमाङाना ओहेलिक् हिट्नुङ् हिट्नागाँ पारचार ओचोगुना छेम्बाना रिङ्ङा हिट्ना सैतान ओमेट्टुएसुए॥ हिट्नुङ् हिट्नागाँ येसु लाउङ्सा उन्चि चोला सिमा लाउङ्सा पिमा चा उकिट्नेट्नि॥ 12 हिट्नाडेउङ् टोनालोग् लोक् हिट्नि कायुङ्बाचि, हारका लिसानि॥ टरो नारा लोक् सामुन्दराङि कायुङ्बाचि, इनामा खानिलाउङ्सा, सैतान खानि सोरि टाइसे॥ हिट्नुङ् हिट्नाङाना आड्डिक् ओयाग्लेडैसे, पोङ्भोने हिट्नाङा ओबेला खाट्टिप्मा एडोक् युङ्ग्वा नुङ् ठाहा टोगुएसुए॥” 13 जब हिट्ना ठेना ओप्पुङा उन् नाराङि ओलेप्टुना रिङ् ठाहा टोगुए, हिट्नाँ येम्बेछा छा पोङ्सुना हिट्ना मेच्छेमा रिक्मा ठालाँ चोगुए॥ 14 टरो हिट्ना मेच्छेमा हिट्ना ठेना ओप्पुङा पाक्चा चोक्मा उहिडुन् नुङ् साक्चा उयुङ्निना डेन्ङि पेयुङ् खाट्मा ठेना माङ्ग्वाङाना इप्पोक् लाप्टाङ् माङ्हाङ्ङा पिडुए॥ हिट्ना डेन् सुम्बोक्उङ् ओफारा बारखा सोम्मा हिट्ना मेन्झेमा पालान् पोसान चोक्मा टेयार चोक्बालाक् डाना॥ 15 हिट्नुङ् हिट्ना मेच्छेमा चुवाङा बागाँ ओचोगुवाक् नुङ् हिट्ना ठेना ओप्पुङा ओयासिलाम्मा चुवा होट्टुए॥ 16 टरो नाराङा हिट्ना ठेना ओप्पुङाना ओयासिलाम्मा होन्डाना चुवा मिलुजोउङ् हिट्ना मेन्झेमा घुवार फाडुए॥ 17 हिट्नुङ् हिट्ना मेच्छेमालोक् हिट्ना ठेना ओप्पुङाना आड्डिक् ओयाक् लेडे, हिट्नुङ् हिट्ना मेन्झेमाङाना आरु ओछालेट्चि बिरुद्दाङि हिट्ना चुङ्सिङा खाडे॥ हिट्नागाम्बाक् माङ्हाङ्ङाना आग्याँ पालान् काचोक्चि हिट्नुङ् येसुङाना हिसिक्मा बिस्वास काचोक्चि ओडागा॥ 18 हिट्नुङ् हिट्ना ठेना ओप्पु सामुन्दरा ओफेरोङि येबे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.