पारकास 11 - आठपहरियाइप्पाङ् साँछि कापिबाचि बारे 1 हिट्नुङ्ना कोइङा आङा छिक्माना सिङ् गाड्डे निङ्साना ठिक् लाहुरिक् याङ्पिडे, हिट्नुङ् नाड्डे याङ्लोडे, “कोबाउङ् खाडा, हिट्नुङ् माङ्हाङ्ङाना माङ्ठाना हिट्नुङ् हिट्निना बेदि छिक्टु, हिट्नुङ् हिट्नि माङ्पाङ्ङि माङ्ध्यान् ओचोग्गा याप्मिचि ङेडुचि॥ 2 टरो माङ्ठाना भारा टेल्लाङ्म्बाक् छिक्टुन्, पोङ्भोने हिट्ना डेन् माङ्हाङ्ङा पानिछोङ्बाचि पिडुएसुचे, हिट्नुङ् हिट्नागाँ बायालिस माइना सोम्मा यरुसलेम खालाङ्गा चियोप्-यायोप् ओयेप्टुटु॥ 3 हिट्नुङ् आङाना छेम्बाना खाबोर पारचार चोक्ङा आङाना इप्पाङ् साँचि कापिबाचि पाङ्सुङ्चिङ्चिङ्, हिट्नुङ् हिट्नागाचिङा सानिङ्ग्वा लोसा बोराङाना लोट्लिङ् वाट्चुचु हिट्नुङ् ठिक् हाजार इप्पोक् साए साठि लेम्बा सोम्मा आङाना खाबोर पारचार चोक्चुचु॥” 4 नाराङि सासान् काचोक्बा डाङ्बा माङ्हाङ्ङाना सिङासान् ओटोक्माङि येबाचिगा इप्पाङ् साँचि कापिबाचिम्बाक् इप्पोक् जैतुन उभुङ्मा हिट्नुङ् इप्पोक् कुपिदानिचि नुङ् बुजा चोक्युक्॥ 5 कोइ याप्मिङा हिट्नागाचि साँचि कापिबाचि हान्टि चोक्मा ओकोलुटु भोने, उन्चि यासिलाम्मा होन्डाना मिलाम्मा डोक् उन्चि साट्टुरचि जाखाम् उलियुक्, हिट्नुङ् नाड्डेडोक् जुन्ङा हिट्नागाचि हान्टि चोक्मा ओकोलुटु, हिट्नागा माङ्हाङ्ङा जाखाम् चोगुचिचि॥ 6 हिट्नागाचिङा माङ्हाङ् उरिङ् पारचार चोक्चुएट्चुना बेला व्हेट् ओटानि चा नुङ् टाङ्साङ् छाक्मा हिमाना साक्ति टोगैसाचुए॥ हिट्नागाचिलोक् चुवा हेलिक् चोक्माना साक्ति युङ्ग्वा॥ हिट्नुङ् हिट्नागाचिङा निङ्ग्वा चोक्चु गाड्डे चोक्मा हिट्नागाचिलोक् खाले-खाले बिपोत्ति टाप्माना साक्ति युङ्ग्वा॥ 7 हिट्नुङ् हिट्नागाचि इप्पाङ् साँचि कापिबाचिङा माङ्हाङ् रिङ् माट्मा हिचुङ् हिट्ना घाइरो भाड्खालोलाम्मा होन्ना जिवाट् हिट्नागाचि बिरुद्दाङि चुङ्युक्, हिट्नागाचि सेडुचिचि॥ 8 हिट्नागाचिगा सियाना येम् हिट्ना निङ्ला मुक्टाना खालाङ्गाङाना लाम्बोङि हेन्युयाक्युक्, हिट्ना खालाङ्गाङि डोक् हिट्नागाँगा टाङ्बा खाप्चेङि उछुडुना डाना॥ हिट्ना खालाङ्गा दुस्टा सादोम खालाङ्गा हिट्नुङ् दुस्टा मिस्रा देस गाड्डेना॥ 9 हिट्नुङ् सुम्बोक्उङ् ओफारा सोम्मा हिट्नागाचिगा सियाना उन्चि येम् याप्मिचिङा, छोङ्बाचिङा, खाले-खाले रिङ् ओचेक्गाँ, हिट्नुङ् हारेक् देसङिगा याप्मिचिङा उपुयुटु, हिट्नुङ् खोनाङा चा उन्चि लास हुम्मा उपिडुन्चिन्गा॥ 10 नागाचि इप्पाङ् साँचि कापिचि सियाचिनाँ नाराङिगा याप्मिचिगा उन्चि चाप् टायुक्॥ हिट्नुङ् उन्चिलोक् उलिसागा थोक्चि ओहान्डुजोङ् आनान्दा ओचोक्युक्, पोङ्भोने नागाचि माङ्काटाचिङा नाराङि उलिसागा याप्मिचि जोम् याङ्छामा चाट्टैसुचिगा डागा॥ 11 टरो सुम्बोक्उङ् ओफारा लेम्बा लाट्टाउङ् माङ्हाङ्ङा ओसोक्मा हिट्नागाचिङि ठेन्डुबिडुचे, हिट्नुङ् हिट्नागाचि उहिङ्ग्वाट् लिसाचिउङ् उन्चि लाङ्ङि येबाचे॥ हिट्डेना रिङ् लिसाना उनिसुङ् याप्मिचि आड्डिक् टुक्लोक् उकिट्टे॥ 12 हिट्नुङ् हिट्नागाचिङा टोनालोग्लाम्मा नाड्डेना ठेना सोरा मुक्टाना खेम्साचुए, “नेहि टो काडाचि॥” हिट्नागाचि उन्चि साट्टुरचिङा उपुयुगेट्टुचिलोक् खिमेमाङि फोगाखाडाचिउङ् टोनालोग्लेङ् खाडा चे॥ 13 हिट्ना बेला डोक् ठेना लुक्लेमा खाडे हिट्नुङ् हिट्ना ठेना खालाङ्गाङाना दोसौँ ओभागा जाखाम् लिसे॥ ना लुक्लेमाङि सि हाजार याप्मिचि उसिए, हिट्नुङ् आरु उसिनिएट्निगा याप्मिचि आड्डिक् उकिट्टाउङ् हिट्नागाँ टोनालोग्ङिना माङ्हाङ्ङाना उनिङ् ओचोन्डुए॥ 14 दोस्रो बिपोत्ति लाट्टाडेए, हाट्ले तेस्रो बिपोत्ति टामा डोक् युङ्ग्वा॥ सातौँ धुटुरिबा 15 हिट्नुङ्ना सातौँ माङ्हाङ् रिङ् काउग्बाङा उन्लोक् लिसाना उधुटुरिबा टेनुए, हिट्नुङ् टोनालोग्ङि माङ्ठेना सोरा याप्मिचि ओचेक्युएट्गा गाड्डे मुक्टानाँ नाड्डे याङ्लोडे, “आनि डाङ्बा माङ्हाङ् हिट्नुङ् उन्ङा सेगुना खिरिस्टङा हाट्ले सोब्बे नाराङि सासान् चोक्माना आधिकार युङ्ग्वा, हिट्नुङ् उन्ङा डोक् सोरोक् सासान् चोगुटु॥” 16 हिट्नुङ् माङ्हाङ् ओटोकाना सोरि उन्चि आ-आप्पे सिङासान्ङि उयुङागा चौबिस जाना ओठेडोङ्चिङा गुङ् ओचोगाउङ् माङ्हाङ् माङ्ध्यान् ओचोगुए, 17 हिट्नुङ् ओमाट्टुए, “हाउ माङ्हाङ्, आन्याँ टाङ्बा, खान् सोब्बे नुङ्ना माङ्बोल्लेउ॥ खान् उटुम् नुङ्ना हाट्ले चा आवाहेट्॥ आन्याँ खान् पोए-पोए लोनाँ, पोङ्भोने हाट्ले खान्ङा खान्ङाना माङ्ठेना बोल् याप्मि आनिमेट्टेसे, हिट्नुङ् नाराङि सासान् चोक्मा उटुम् ओचोगुएसुए॥ 18 खान् माङ्ध्यान् माचोक्निना याप्मिचिगा उन्चि सिरिरिबा काडैसे, टरो हाट्ले हिट्नागा उठुङ्ङि खान्ङाना कारेक् पारकाट् लिमाना बेला लिसेसे, हिट्नुङ् खान्ङा उसियागा याप्मिचि न्याए चोक्माना बेला लिसाइसे॥ हिट्नुङ् खान्ङाना सेवा काचोक् माङ्काटाचि, सोब्बे कायाप्मिचि हिट्नुङ् खान् मान् काचोक् ठेगा खाट्टिउगा सोब्बे लाउङ्सा इनाम पिमाचिगा बेला टाइसे॥ हिट्नुङ् नारा जाखाम् काचोक् सोब्बे याप्मिचि खान्ङा जाखाम् चोक्माचिगा बेला टाइसे॥” 19 हिट्नुङ्ना टोनालोग्ङिना माङ्हाङ्ङाना माङ्ठाना ओङ्से, हिट्नुङ् हिट्ना भिट्रा सेङ्सेङ्ना बाकास आङा निसुङे, हिट्नि माङ्हाङ्ङाना माङ्हुप् युङासाना हिट्ना लुङ्गेॽवाङि आच्छो बेला छेप्बालाक् डाना॥ हिट्नुङ् बिजुलि ओम्से, टाङ्साङ्ङि घुरुङ्बा लोसे, लुक्लेमा खाडे, हिट्नुङ् ठेगा-ठेगा फोम् ओठाए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.