पारकास 10 - आठपहरियामाङ्हाङ् रिङ् काउग्बा लोक् खाट्टिउना छाप्ला 1 हिट्नुङ्ना आङा आरको साक्तिसालि माङ्हाङ् रिङ् काउग्बा टोनालोग्लाम्मा उङ्सागेट्टाना निसुङे॥ हिट्नाङाना ओयेम् लोट्लिङ् गाड्डे डोक् खिमेमाङा टेप्टुएसुना डाना, हिट्नुङ् ओटेहेक्ङिम्बाक् फारकान्जा डाना॥ ओनाभाक् नाम् छेमा गाड्डे डोक् ओम्सेसाना, हिट्नुङ् ओलाङ्चि मि हाट्टाना ठोक्ला गाड्डे उनिङ्सागा डागा॥ 2 हिट्नुङ् हिट्नाँ पाइले डोक् ओङ्सुएसुना ठिक् खाट्टिउना छाप्लाङाना मुठा उमुक्ङि याङुएसुना॥ हिट्नाँ छुप्टाङ् ओलाङ् सामुन्दराङि लोक् फेङ्साङ् ओलाङ् स्वाँराङि येप्टुए॥ 3 हिट्नुङ् हिट्ना माङ्हाङ् रिङ् काउग्बा किबा राट्टा गाड्डे डोक् ठेना सोरा चोगुङ् राट्टे, हिट्नुङ् जब हिट्ना राट्टे, टाङ्साङ् घुरुङ्बा मुक्टा गाड्डे डोक् सि खेप् राट्टाना मुक्टे॥ 4 टाङ्साङ्ङि सि खेप् घुरुङ्बा मुक्टाना मे, आङा छेप्टुङ्लाबुङ्ना डाना, टरो टोनालोग्लाम्मा नाड्डे याङ्लोडाना सोरा मुक्टाना आङा खेम्सुङे, “टाङ्साङ्ङि सि खेप् घुरुङ्बाङा माट्टुना रिङ् छेप्टुन्, टरो ना रिङ् कानिङ्ग्वाङि डोक् ठोबुङ्युङ्सु॥” 5 हिट्नुङ् सामुन्दरा लोक् स्वाँराङि उलाङ् येप्टुङ् येबाना माङ्हाङ् रिङ् काउग्बाङा उमुक् टोनालोग्लेङ् फोगुना निसुङे॥ 6 हिट्नुङ् हिट्ना माङ्हाङ् रिङ् काउग्बाङा सोरोक् उहिङ्ग्वाट् लिना, टाङ्साङ्, नारा, सामुन्दरा हिट्नुङ् हिट्नि उलिसागा सोब्बे थोक् सिरिस्टि काचोक्बा माङ्हाङ् उनिङ्ङि बाचा रेक्टुए॥ हिट्नुङ् हिट्नाँ माट्टुए, “हाट्ले आबेला लिनिना॥ 7 टरो हिट्ना बेला सातौँ माङ्हाङ् रिङ् काउग्बाङा उन्लोक् लिसाना धुटुरिबा टेनु डोक् लाबुटु, माङ्हाङ्ङा याप्मा बारखा पाइले ओसेवा काचोक् माङ्काटाचि लोडुचि गाड्डे उन्ङा ठोबुङ् युङ्सुना योजाना युडुएट्टुटु॥” 8 हिट्नुङ् टोनालोग्लाम्मा आङा खेम्सुङ्ना सोराङा आङा फेरि नाड्डे याङ्लोडे, “खाडा, सामुन्दरा लोक् स्वाँराङि उलाङ् येप्टुङ् येबाना माङ्हाङ् रिङ् काउग्बाङाना उमुक्ङि लिसाना पाइले डोक् ओङ्सुएसुना छाप्लाङाना मुठा टाक्टु॥” 9 हिट्नुङ् आङा हिट्ना माङ्हाङ् रिङ् काउग्बा सोरि खाडाङाउङ् हिट्ना खाट्टिउना छाप्लाङाना मुठा नाक्टुङे॥ हिट्नुङ् हिट्नाँ आङा याङ्लोडे, “कोए ना टाक्टु, हिट्नुङ् चो॥ ना खान्ङा आचोनाँ कायासिङि वेसुमा ओवा गाड्डे डोक् लिम्ना लियुक्, टरो कामाभोक्ङिम्बाक् खिक्ना लियुक्॥” 10 आङा हिट्ना खाट्टिउना छाप्लाङाना मुठा माङ्हाङ् रिङ् काउग्बाङा याङ्पिडे, हिट्नुङ् आङा चाङ्ङे॥ आङा चाङ्नाँ आयासिङि वेसुमाङाना ओवा गाड्डे डोक् लिम्डे, टरो चामा हिडुङुङ् आमाभोक्ङि भोनेम्टे खिक्टे॥ 11 हिट्नुङ् आङा कोइङा नाड्डे याङ्लोडे, “खान्ङा फेरि माङ्हाङ्ङाना खाबोर याप्मा याप्मिचि, छोङ्बाचि, खाले-खाले रिङ् ओचेक्गा याप्मिचि, हिट्नुङ् हाङ्बाचि बारेङि लोमाचि कोन्युक्॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.