पारकास 1 - आठपहरिया1 ना छाप्लाङा येसु खिरिस्ट माङ्हाङ्ङा पारकाट् चोगुना खाबोर बारेङि माट्टुटु॥ हिट्नुङ् ना खाबोर हाट्ले एला डोक् लिसालाबाना रिङ् माङ्हाङ्ङा ओसेवाक्चिङा ठाहा ओटोगुवाक् नुङ् उन्ङा येसु खिरिस्ट पिडुए॥ येसु खिरिस्टङा नागा रिङ् लोमा ओसेवाक् युहान्ना सोरि उन्ङाना माङ्हाङ् रिङ् काउग्बा पाङ्सुए॥ 2 आङा युहान्नाङा निसुङ्गा हिट्नुङ् खेम्सुङ्गा सोब्बे रिङ् छेप्टुएसुङे, हिट्नुङ् येसु खिरिस्टङा याङ्निमेट्टाना माङ्हाङ्ङाना छेम्बाना रिङ् नागा डोक् ए॥ 3 जुन् याप्मिङा ना छाप्लाङि आङा छेप्टुएट्टुङ्ना माङ्हाङ्लाम्माना रिङ् उरिङ् ठेना चोगुङ् पोढाँ चोगुटु, हिट्नुङ् हिट्नागा रिङ् खेम्सुटु हिट्नुङ् बिस्वास चोगुटु, हिट्ना माङ्हाङ्ङा आसिक् पिडुटु, पोङ्भोने नागा रिङ् एला डोक् लियुक्॥ सि ओटा माङ्पाङ्लाउङ्सा युहान्नाङाना बाबा 4-5 आङा युहान्नाङा ना खाबोर एसिया छेट्राङि उलिसागा सि ओटा माङ्पाङ्ङिगा लाउङ्सा छेप्टुएट्टुङ्॥ माङ्हाङ् पाबा, सि ओटा हाङ्सा हिट्नुङ् येसु खिरिस्टङाना मायादाया हिट्नुङ् हाङ्हाङ् खानिलोक् उलियाक्॥ माङ्हाङ् हाट्ले चा उन् युङ्ग्वा, पाइले चा डाना, हिट्नुङ् हान्डेङ् चा लियुक्॥ सि ओटा हाङ्सा माङ्हाङ् युङ्ना सिङासान् ओटाकानाङि युङ्ग्वा॥ येसु खिरिस्ट माङ्हाङ्ङा लोडुना रिङ्ङि बिस्वासिलो ए, उन् सियानालाम्मा उहिङ्ग्वाट् कोबाना पाइलेना याप्मि हिट्नुङ् उन् नाराङिगा हाङ्बाचि सासान् काचोक्बा ए॥ येसुङा आनि माया आचोक्युक् हिट्नुङ् उन्ङा आप्पेलाउङ्सा खाप्चेङि भोक् पिडुङ् आनि पापलाम्मा छुट्कारा आनि आपिडैसे॥ 6 हिट्नुङ् उन्ङाना माङ्हाङ् लोक् पाबाङाना उमुलुक्ङि सेवा चोक्मा उन्ङा आनि पुजारि आचोगेसे॥ येसु खिरिस्टङा सोरोक् मान् ओटोगुवाक् हिट्नुङ् उन्ङा सोरोक् सासान् ओचोगुवाक्॥ आमेन्॥ 7 ओछेक्छेक् लिसानिउङ् पुयानुम्, येसु खिमेमाङि उङ्युगेट्, हिट्नुङ् सोब्बे याप्मिचिङा उन् उनिसुटु॥ उन् ओरोक्टुना याप्मिचिङा चा उनिसुटु॥ हिट्नुङ् नाराङिगा ख्वाप्पा याप्मिचि उन् उनिसुङ् निङ्ग्वाङि दुखेसो ओचोक्युक्॥ छेम्बा नाड्डे लियुक्॥ आमेन्॥ 8 आनि माङ्हाङ् टाङ्बा सोब्बे नुङ्ना माङ्बोल्लेउ, उन् पाइले चा डाना, हाट्ले चा वाहेट्, हिट्नुङ् हान्डेङ् चा सोरोक् लियुयाक्युक्॥ उन्ङा माट्टुए, “आल्फा हिट्नुङ् ओमेगा आङा डोक्॥” याप्मि छाङा आप्पेलाउङ्सा युहान्नाङि पारकाट् चोगुटु 9 आङा युहान्ना, खानि बिस्वासि साइबा॥ खानि गाड्डे डोक् आङा चा याङ्छामा आङ्डुएट्टुङ्, पोङ्भोने येसु आनि हाङ्बा ए, हिट्नुङ् उन्ङा आङ्मा हिमाना बोल् आनि आपियुक्॥ आङा माङ्हाङ् रिङ् पारचार चोगुङ्नाँ हिट्नुङ् येसुङाना बारेङि याप्मिचि लोडुङ्चिङ्नाँ आङा याप्मिचिङा पोत्मोस ओलोडुना टापुङि उयुङ्सेसाङे॥ 10 ठिक् लेम्बा, टाङ्बाङाना माङ्ध्यान् चोक्माना लेम्बा, सेङ्सेङ्ना हाङ्सा आङि लिसे॥ हिट्नुङ् आएङ्स्वालेङ् धुटुरिबा उमुट्टुना गाड्डे डोक् माङ्ठेना सोरा मुक्टाना आङा खेम्सुङे॥ 11 हिट्नाँ नाड्डे याङ्लोडे, “खान्ङा आनिसुगा रिङ् ठिक् छाप्लाङि छेप्टु, हिट्नुङ् एफिसास, इस्मुरना, पारगामाम, थिआटिरा, सारडिस, फिलाडेल्फिया हिट्नुङ् लाउडिकिया खालाङ्गाङि उलिसागा नागा सि माङ्पाङ् लाउङ्सा ना छाप्ला हाक्टुचि॥” 12 हिट्नुङ् आङालोक् चेक्टाना साइना रैछो नुङ् नोक्टाउङ् पुयुङ्नाँ हिट्नि आङा सि ओटा साम्मेङ्ङा चोक्बालाक् कुपिदानि निसुङे॥ 13 हिट्नुङ् हिट्ना कुपिदानि माझाङि ठिबाङ् याप्मि छा गाड्डे निङ्ना आङा याप्मि निसुङे॥ उन्ङा केना लोट्लिङ् वाडुना हिट्नुङ् ओछाति याम्बा-नायाम्बा साम्मेङ्ङाना पेटिङा रेक्टुएसुना॥ 14 हिट्नुङ् ओटेहेक्ङिना ओफ्याक् रुवा हिट्नुङ् हिँउ गाड्डे डोक् फुटुम्बुरि निङ्साइसाना॥ हिट्नुङ् उमिक्चि मिङाना ओलाप्को गाड्डे निङ्साइसाना॥ 15 हिट्नुङ् ओलाङ् मि भुङ्रोङि खाराँ चोक्बालाक् काँसा गाड्डे औधि ओम्साना डाना, हिट्नुङ् ओसोराम्बाक् ठेना होङ्ङाना चुवा ओभोल गाड्डे मुक्टाना डाना॥ 16 उन्ङा उछुप्टाङ् उमुक्ङा सि ओटा चोक्चिङ्गेट्चि लाबुएसुचिगा, हिट्नुङ् ओयासिलाम्मा यान्ना इप्पोक्लेङ् ओधार लिसाना चेप्सा होन्डाइसाना॥ ओनाभाक्बाक् माध्धे लेम्बा चेरेप् नाम् छेडा गाड्डे डोक् ओम्साइसाना॥ 17 आङा उन् निसुङ्नामे आचेट्बिचेट् लिसि गाड्डे ओटोकानाङि कोसाङे॥ हिट्नुङ् छुप्टाङ् उमुक् आङि युङ्सुङ् उन्ङा नाड्डे याङ्लोडे, “किट्नेन्, उटुम् हिट्नुङ् आन्ते आङा डोक्॥ 18 उहिङ्ग्वाट्म्बाक् आङा डोक् ए॥ आङा सियाङ् चा, आङा सोरोक् उहिङ्ग्वाट् ए॥ आङालोक् मिरतु हिट्नुङ् पातालङिना साँचो युङ्ग्वा॥ 19 हिट्नाडेउङ् खान्ङा जे आनिसुएसुए, हिट्नुङ् हाट्ले उलियेट्गा रिङ्, हिट्नुङ् हान्डेङ् उलिगा सोब्बे रिङ् छेप्टु॥ 20 खान्ङा आछुप्टाङ् आमुक्ङि आनिसुगा सि ओटा चोक्चिङ्गेट्चि हिट्नुङ् सि ओटा साम्मेङ्ङा चोक्बालाक् कुपिदानिचि ठोबाना रिङ्ङाना उटुप्बाक् नाड्डे लियुक्, सि ओटा चोक्चिङ्गेट्उम्बाक् सि ओटा माङ्पाङ्ङाना माङ्हाङ् रिङ् काउग्बाचिगा बारेङि माट्टुटु, हिट्नुङ् सि ओटा साम्मेङ्ङा चोक्बालाक् कुपिदानिचिङाम्बाक् सि ओटा माङ्पाङ्ङाना बारेङि माट्टुटु॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.