फिलिप्पि 4 - आठपहरिया1 हिट्डेउङ् आमायालु आम्भु-आन्झाचि हिट्नुङ् आनो-आन्झाचि, आङा खानि माया चोक्नाँनि, हिट्नुङ् खानि टुब्माना निङ्ग्वा चोगुङ्टुङ्॥ हिट्नुङ् खानिङा आचाप् टालोक् याङ्आचोगेसिङे, हिट्नुङ् खानि डोक् आङा चोगुङ्ना टोॽवाङाना इनाम ए॥ आमायालु आसाइबाचि, नाड्डे डोक् खानि टाङ्बाङिना बिस्वासङि बोल्लेउ लिसानि॥ आरतिङाना रिङ् 2 खान्चि इयोदिया हिट्नुङ् सुन्तुखेलाउङ्सा आङा बिन्टि चोक्नाबिनाँचि, खान्चि टोङाचिउङ् युङाचि, पोङ्भोने खान्चिलोक् टाङ्बा येसुङाना साम्बान्धा युङ्ग्वा॥ 3 हाउ बिस्वासिलो आसाइबा, खान्ङा नागाचि इप्पाङ् मेन्झेमाचि ओटोङ्चिउङ् उयुङ्चि नुङ् घुवार फाडुचि नुङ् लोनाँ, पोङ्भोने हिट्नागाचिङा आङालोक् एक्केउ नुना खाबोर पारचार चोक्मा घुवार याङ्फासाचे, हिट्नुङ् आङालोक् एडोक् माखाक्, हिट्नागाचिङा क्लेमेस हिट्नुङ् आङालोक् एक्केउ टोॽवा काचोक् आरु आसाइबाचिलोक् चा टोॽवा चोगाचुए, हिट्नागा सोब्बेङागा उन्चि निङ् चोला आपिना छाप्लाङि माङ्हाङ्ङा छेप्टुबिडुएसुचे॥ 4 टाङ्बालोक् खानिना साम्बान्धा लिसानाँ सोरोक् आनान्दा चोगानि॥ आङा फेरि चा खानि लोनाँनि, आनान्दा चोगानि॥ 5 सोब्बे याप्मिचिङा खानि धैइरे आलिसिगा रिङ् निमेट्टानुम्चिम्, पोङ्भोने टाङ्बा उङ्ना रिङ् नेहेटाङ्ना ए॥ 6 पाक् रिङ्ङि चा सुरटा चोक्नेनिन्, टरो सोब्बे रिङ् लाउङ्सा बिन्टि चोगानुम्॥ खानिलाउङ्सा आभोर आलिसिगा थोक् बिन्टि चोगानुमुङ् माङ्हाङ् लोडानुम् हिट्नुङ् उन्ङा चोगुना ख्वाप्पा थोक् लाउङ्सा पोए-पोए ठाङ्सानुम्॥ 7 खानिङा हिड्डे आचोगुमे भोने माङ्हाङ् खानिलोक् लियुक् हिट्नुङ् खानि निङ्ग्वाङि हाङ्हाङ् मापिडिटि, हिट्ना हाङ्हाङ् आड्डिक् ठेना खोनाङा चा बुझा चोक्मा डोक् उहिडुन्ना॥ ना हाङ्हाङ्ङा डोक् खानिगा खेक् हिट्नुङ् निङ्ग्वा खिरिस्ट येसुङि जोगाँ चोगुङ् युङ्सुटु॥ 8 हाट्ले आम्भु-आन्झाचि हिट्नुङ् आनो-आन्झाचि, जे रिङ् छेम्बाना हिट्नुङ् जे रिङ् मान् चोक्मा नुना, जे माहामाना हिट्नुङ् चोखो युङ्ग्वा, जे रिङ् ओचेट्नुना हिट्नुङ् जे रिङ् टो चोक्मा नुना, जे रिङ् आड्डिक् नुना हिट्नुङ् याप्मिङा नुलोक्ना नुङ् माट्टुटु, हिट्नागा थोक्ङि डोक् खानि निङ्ग्वा पिडानुम्॥ 9 हिट्नुङ् आङालाम्मा जे रिङ् खानिङा सिकाँ आलिसिए हिट्नुङ् आलाडुम्मे हिट्ना रिङ् चोगायाक्टानुम्, हिट्नुङ् आङा माट्टुङ्ना जे रिङ् खानिङा आखेम्सुम्मे हिट्नुङ् आङा चोगुङ्ना जे रिङ् आनिसुम्मे हिट्ना रिङ् चोगानुम्॥ हिट्नुङ् खानि हिड्डे आचोगिटि भोने, हाङ्हाङ् कापिबा माङ्हाङ् खानिलोक् लियुक्॥ ओफाबा लोङ्सा पोए-पोए 10 टाङ्बालोक् आङाना साङ्गाटि लिसानाँ आङा आड्डिक् खुसि लिङा, पोङ्भोने याप्मा बेला एङ्स्वा फेरि खानिङा आङा माया चोक्मा ठालाँ आचोगिङे॥ खानिङा आङा यान्दा आचोगिङागा रिङ् आङा लाउङ्सा ठाहा युङ्ग्वा, टरो खानिङा हिट्डे चोक्मा ओचेट्नुना मौका आटोक्निम्गेट्निम्ना डाना॥ 11 आङा आभोर लिसाङे नुङ् खानिलोक् नाड्डे माट्टुङ्ना माखाक्, पोङ्भोने आङालोक् लिचा लिनिचा सोन्टोक् लिमा आङा सिकाँ लिसेसाङे॥ 12 हिट्नुङ् आङा आभोर लिङा चा हिट्नुङ् आड्डिक् जोम् लिनाँ चा सोन्टोक् लिमा ठाहा टोगेसुङे॥ आङा फोक् लिङाना बेला चा, आसाॽवानाँ चा, जोम्ङि चा, खाट्टिप्मा लिचा, सोब्बे बेला सोन्टोक् लिमा सिकाँ लिसेसाङे॥ 13 खिरिस्टङा याङ्पिडाना साक्तिङा डोक् आङा नागा सोब्बे रिङ् चोक्मा हिडुङ्टुङ्॥ 14 टरोचा आङा याङ्छामाङि ठायाङ्ना बेला खानिङा घुवार याङ्आफाडिङाउङ् औधि ओचेट्नु आचोगुम्मे॥ 15 खानि फिलिप्पिङिगा आसाइबाचि, उटुम्ङि आङा खानि सोरि नुना खाबोर पारचार चोगुङुङ् माकेडोनिया पोक्टुङ् खाडाङ्नाँ आङा घुवार काफाबाचि खानि एडोक् नुङ् खानि आप्पेलाउङ्सा ठाहा युङ्ग्वा॥ खानिङा एडोक् आङा ओफाबा याङ्हाक्टिङाउङ् घुवार याङ्आफाडिङे॥ 16 आङा थेसालोनिकेङि वासाङ्ना बेला आभोर लिसाङ्नाँ चा खानिङा डोक् ठिक् इप्पोक् खेप् घुवार याङ्आफाडिङे॥ 17 आङा खानिलाम्मा भेटि एडोक् टोक्माउङ्सा माट्टुङ्ना माखाक्, टरो खानिङा घुवार याङ्आफाडिनाँ माङ्हाङ्ङा आसिक् मापिडेयाक् नुङ् आङा निङ्ग्वा चोगुङ्टुङ्॥ 18 नाबाजि आङा टोग्मा कोन्ना नुङ्ना याप्मा डोक् टोगेसुङे॥ खानिङा इपाफोरडिटासङाना उमुक्लाम्मा आहाङ्सुम्ना भेटि टोगुङुङ् सोन्टोक् लिसेसाङे॥ माङ्हाङ्ङा ना खानिना भेटि आड्डिक् निङ्ग्वा टासुना नुङ् उन्ङा लाडुटु, हिट्नुङ् उन्ङाना आड्डिक् ओचाप् टाइसे॥ 19 हाट्ले आङा सेवा चोगुङ्ना माङ्हाङ्ङा खानिगा ख्वाप्पा आभोर मायुडिबिडिटि॥ उन्लोक् छिक्मा हिनिम्ना आड्डिक् याप्मा माक्फेन्सुबेन् युङ्ग्वा, हिट्ना खिरिस्ट येसुङि उलिसागालाउङ्सा पिडुचिचि॥ 20 हाट्ले आनि माङ्हाङ् पाबाङाना सोरोक् माहिमा उलियाक्॥ आमेन्॥ पावालङाना आखेरि बाबा 21 हिट्नि खिरिस्ट येसुङि उलिसागा सोब्बे माङ्हाङ् ओयाप्मिचि लाउङ्सा आङाना बाबा लोडानुम्चिम्॥ हिट्नुङ् नाहि आङालोक् ओवाहेट्गा भुम्भु-झान्झाचिङा चा खानिलाउङ्सा बाबा माहाक्टेसिए॥ 22 सोब्बे माङ्हाङ् ओयाप्मिचिङा खानि बाबा मालोडिएसे॥ हिट्नुङ् हिट्नागाङि चा मुलिगारि रोमि सारकारङाना हाङ्पाङ्ङि उलिसागाँ बाबा माहाक्टेसे॥ 23 हाट्ले टाङ्बा येसु खिरिस्टङाना मायादाया खानि सोब्बेलोक् उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.