फिलिप्पि 3 - आठपहरियाछेम्बाना धारमिक्ता 1 आखेरिङि हाउ आम्भु-आन्झाचि, खानि खुसि लिसानि, पोङ्भोने खिरिस्टलोक् खानिना साङ्गाटि युङ्ग्वा॥ आङा पाइले खानि लोनानिगा रिङ् फेरि छेप्मा आप्ठेरो लोनिङ्ना, हिट्नुङ् ना रिङ्ङा खानि बिस्वास सुरेक्छे चोगुटु॥ 2 हिट्नागा ओभेन्गा टोॽवा ओचोगुएट्टुगा बादमास हिट्नुङ् फुवारि कोछुबा गाड्डेगा याप्मिचिगा उदाहारन आङा पिनाने, हिट्नागालोक् खानि ओछेक्छेक् लिमा कोन्युक्॥ हिट्नागाँ कोइ याप्मिङा खाताना चोगुटु भोने, हिट्ना हिङ्युक् नुङ् जोड उपिडुटु॥ 3 पोङ्भोने छेम्बा डोक् माङ्हाङ् ओयाप्मिचिउम्आनि गोलो टे, आनि हाङ्साङा माङ्हाङ् माङ्ध्यान् चोगुम्टुम् हिट्नुङ् खिरिस्ट येसु उनिङ् चोन्डुम्टुम्॥ आनिम्टे याप्मिचिङा ओचोगुएट्टुना रिति थितिङि भोरोसा युङ्निम्गा॥ 4 टरो चा आङा आप्पेम्बाक् भारागा रिङ्ङि भोरोसा चोक्माना कारान् युङ्ग्वा॥ कोइङा हिट्डेगा भारागा रिङ्ङि भोरोसा चोक्माना रिङ् मिट्टुटु भोने, आङानाम् झान् याप्मा युङ्ग्वा॥ 5 पोङ्भोने आङा साङ् लेम्बा टासुङ्नाँ याहुदि ओठेडोङ्चिङा खाताना याङ्ओचोगाबिडे॥ माप्मा डोक् भोने आङा बेन्यामिन पुङ्लाङिना इस्राइलि याप्मि॥ आङा खाट्टि हिब्रु याप्मि हिट्नुङ् आटुबाठेबाचि चा खाट्टि हिब्रु याप्मिचि, धारमाबिधि पालान् चोक्माना रिङ्ङि आङा फारिसि याप्मि ए॥ 6 हिट्नुङ् आङा आँटि लिसाङाउङ् येसु खिरिस्टङि बिस्वास काचोक् माङ्पाङ्ङिगा आड्डिक् हैरान् मेट्टुङ्चिङे॥ धारमाबिधि पालान् चोक्माना रिङ्ङि आङा आड्डिक् धारमोति, पोङ्भोने आङा हिट्नागा ख्वाप्पा पालान् चोगुङे॥ 7 हिट्ना बेला आङा हिट्नागा रिङ् मिले लिनिना नुङ् मिट्टुङे, टरो हाट्ले आङाना खिरिस्टलोक्ना साम्बान्धाङा हिट्नागा पाक्चा माखाक् नुङ् मिट्टुङ्टुङ्॥ 8 नागा एडोक् माखाक्, खिरिस्ट येसु आटाङ्बा ए नुङ् मिसेन् निमा टोग्माना बाहुमुल्ले रिङ् ए, हिट्ना नुङ्ना आरु ख्वाप्पा थोक् बिथाँङिगा नुङ् मिट्टुङ्टुङ्॥ खिरिस्ट नुलोक् मिसेन् उनिसुङ् नुङ् आङा हिट्नागा सोब्बे थोक् नाडेसुङे, हिट्नुङ् हिट्नागा सोब्बे थोक् आङा भुसुॽवा गाड्डे डोक् मिट्टुङ्टुङ्॥ 9 हिट्नुङ् आङा उन्ङाना लिमा उहिङाक् नुङ् हिड्डे चोगुङ्टुङ्॥ धारमाबिधि पालान् चोगुङ् माङ्हाङ्ङाना ओटोकानाङि आङा धारमि लिमा हिनिङ्ना॥ टरो खिरिस्टङि बिस्वास चोगुङुङ् एडोक् माङ्हाङ्ङा आङा धारमोति नुङ् याङ्लोयुक्॥ 10 आङाना उदेसेम्बाक् खिरिस्ट मिसेन् निमा हिट्नुङ् माङ्हाङ्ङा येसु सियानालाम्मा उहिङ्ग्वाट् चोगुना बोल् ठाहा टोग्मा ए॥ हिट्नुङ् उन्ङा आङ्डुना याङ्छामा आङा चा आङ्डुङ्टुङ् हिट्नुङ् उसिमा सोम्मा उन् गाड्डे डोक् लिमा उहिङा नुङ् मिट्टुङ्टुङ्॥ 11 हिट्नुङ् खोड्डेउङ् लियुक्ना आङा चा सिमालाम्मा उहिङ्ग्वाट् लिमा उहिङा नुङ् आसा युङ्सुङ्टुङ्॥ लाक्छेङि लाम्टिमा कोन्युक् 12 आङा नागा सोब्बे थोक् पाइले डोक् चोक्मा हिडुङे आथाबा आङा सिद्दा लिसेसाङे नुङ् माट्टुङ्ना माखाक्॥ टरो आङा खिरिस्ट गाड्डे लिमा बोल् चोगेट्टुङ्, पोङ्भोने ना रिङ् लाउङ्सा डोक् खिरिस्ट येसुङा आङा याङ्सेगे॥ 13 हाउ आम्भु-आन्झाचि, नागा सोब्बे थोक् आङा पाइले डोक् पुरो चोक्मा हिडेसुङे नुङ् मिट्निङ्ना, टरो आङा ठिक् टोॽवाउम् चोगुङ्टुङ्, हिट्नाम्बाक् पाइलेगा रिङ्चि मुन्डुङुङ् टोकानालेङ् उलिसागा रिङ्चि टोग्माउङसा कोसिस चोगुङ्टुङ्॥ 14 नाड्डेउङ् टोनालोग्ङिना इनाम् टोक्माउङ्सा आङा लाक्छेलेङ् टामा बोल् चोक्ङेट्ङा॥ माङ्हाङ्ङा ना रिङ् लोङ्सा डोक् खिरिस्ट येसुलाम्मा लाट्निना चोला टोक्माउङ्सा आङा याङ्छेम्डाना॥ 15 आनि बिस्वासङि पोसा खाडिगा ख्वाप्पाङा नाड्डेगा रिङ्ङि निङ्ग्वा चोक्मा कोन्युक्, हिट्नुङ् खानि साक् साक्लोक् नागा रिङ् नुङ्ना आरको पाराना निङ्ग्वा युङ्ग्वा भोने चा माङ्हाङ्ङा डोक् पाक् माहामाना हिट्ना बुजा चोक्माउङ्सा खानि घुवार माफाडिटि॥ 16 माङ्हाङ्ङा पाइले जे आनि आनिमेट्टेसे हिट्ना छेम्बाना हिसिक्मा गाड्डे डोक् आनि युङ्मा कोन्युक्॥ 17 हाउ आम्भु-आन्झाचि, खानि आङाना योॽवा काचोक्बा लिसानि॥ आन्याँ खानि लोङ्सा ओचेट्नुना नामुना लिसेसिङे, हिट्नुङ् हिट्ना नामुना गाड्डे काचोक्बाचिलोक् खानि सिकाँ लिसानि॥ 18 पोङ्भोने आङा पाइले डोक् खानि याप्मा खेप् लोनानिगा याप्मिचि बारेङि फेरि चा हाप्सा खानि लोनाँनि, नाहि जोम् याप्मिचि ओवाहेट्, हिट्नागाउम् खिरिस्ट बिस्वास चोगुम्टुम्मा नुङ् उपिग्गा, टरो हिट्नागाउम् खिरिस्टङाना खाप्चेङाना साट्टुरचि गाड्डे चाट्ला ओचोग्गा॥ 19 आन्तेङि माङ्हाङ्ङा हिट्नागा जाखाम् चोगुचिचि॥ उन्चि निङ्ग्वाङि जे चोक्मा उमिट्टे हिट्ना चोक्मा डोक् हिट्नागाँगा लाउङ्सा ठेना ए॥ मोन्डिसिइना रिङ् डोक् हिट्नागा ठेलोक् ओचोग्गा॥ हिट्नुङ् हिट्नागाँ नाराङिगा रिङ्ङि एडोक् उन्चि निङ्ग्वा उपिडुगा॥ 20 टरो आनिम्टे टोनालोग्ङिना नागारिक् ए, हिट्नुङ् हिट्नालाम्मा उङ्ना काहिङ्मेप्बा डाङ्बा आन्याँ टाङ्बा येसु खिरिस्टङाना ओलाम्बो आन्याँ पुयेट्टुम्मा॥ 21 उन्लोक् सोब्बे थोक् सासान् चोक्माना बोल् युङ्ग्वा, हिट्ना ओसाक्तिङा डोक् आनिना ना सिना येम् उन्ङाना गाड्डेना डोक् ओम्ना येम् चोक्मा हिडुटु॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.