फिलिप्पि 2 - आठपहरियाखिरिस्ट गाड्डे लिमा 1 पाक् खानि खिरिस्टङि आलिसिनाँ आँट् टोग्माना रिङ् युङ्ग्वा नि? पाक् उन्ङाना मायालाम्मा सान्तोना टोक्माना रिङ् युङ्ग्वा नि? पाक् खानिङा सेङ्सेङ्ना हाङ्सालोक् साङ्गाति आचोगुएट्टुम् नि? पाक् खानिलोक् ठिबाङ्ङा आरको माया हिट्नुङ् दाया चोक्माना निङ्ग्वा युङ्ग्वा नि? 2 हिट्नुङ् खानिङा ठिक्ए निङ्ग्वा चोगानुमुङ्, ठिबाङ्ङा आरको माया चोग्गा चोग् चोगानुमुङ्, हिट्नुङ् ठिक्ए निङ्ग्वा हिट्नुङ् खानि खानि टोङानिउङ् युङानिउङ् आङाना आनान्दा पुरो चोगानुम्॥ 3 आप्पे एडोक् आरु नुङ्ना ठेलोक् लिमा कोन्नेनिन् हिट्नुङ् घामान्डि लिमाना रिङ् चा चोक्नेनिन्॥ टरो मेयोक् लिसानि हिट्नुङ् आरु चा खानि नुङ्ना उनुगा नुङ् मिट्टानुम्चिम्॥ 4 खानि सोब्बेङा आप्पेङाना एडोक् ओचेट्नुना लिमाना रिङ् कोन्नेनुम्, टरो आरुङागा ओचेट्नुना लिमाना रिङ् चा मिट्टानुम्॥ 5 खानि चाट्ला खिरिस्ट येसुङि लिसाना गाड्डेना डोक् लिमा कोन्युक्॥ हिट्नाम्बाक् नाड्डेना– 6 येसु खिरिस्ट माङ्हाङ् लिसा चा, उन्ङा माङ्हाङ्लोक् बोरोबोरि लिमाना रिङ् युङ्मायाक्मा लाउङ्सा कोसिस चोक्मा कोन्युक् नुङ् उन् मिट्निना॥ 7 टरो उन्ङा सोब्बे थोक् नाडुए हिट्नुङ् कामारा गाड्डे लिसे॥ हिट्नुङ् उन् आनि गाड्डे याप्मि लिसाउङ् पोङ्से॥ 8 उन् याप्मिङाना ओसोरुप्ङि लिसानाँ मेयोक् लिसे, हिट्नुङ् उन् सिमा चा, आथाबा खाप्चेङि सिमा चा निङ्ग्वा चोगुङ् माङ्हाङ्ङाना आग्याँ पालान् चोगुए॥ 9 हिड्डेउङ् माङ्हाङ्ङा उन् सोब्बे नुङ्ना टो मान् चोक्माना डेन्ङि फोगुए, हिट्नुङ् सोब्बे नुङ्ना माङ्ठेना निङ् पिडुङ् उन् टो चोन्डुए॥ 10 हिड्डेउङ् टोनालोग्ङि, नाराङि हिट्नुङ् नारा उछिक्ङि उलिसागा ख्वाप्पाङा येसुङाना उनिङ्ङि टुम्बुट् येप्मा कोन्युक्॥ 11 हिट्नुङ् ख्वाप्पा लेक्फाङा माङ्हाङ् पाबाङाना माहिमाङाना लोङ्सा येसु खिरिस्ट डोक् टाङ्बा नुङ् लाड्मा कोन्युक्॥ चोक्चिङ्गेट् गाड्डे डोक् ओम्मा 12 नाड्डेउङ् मायालु आम्भु-आन्झाचि, आङा खानिलोक् लिसाङ्नाँ खानिङा सोरोक् आरिङ् पालान् आचोगुम्मे, हाट्ले आङा खानिलाम्मा लाप्माङ् लिङा चा खानिङा आरिङ् झान् याप्मा टेम्मा कोन्युक्॥ हिट्नुङ् खानिङा आटोगुम्ना मुक्टिङाना रिङ् पारकाट् चोक्मा आड्डिक् मिहिनेत चोगानुम्, हिट्नुङ् आड्डिक् मान् हिट्नुङ् किट्सा माङ्हाङ् पालान् चोगानुमुङ् हिड्डे चोगानि॥ 13 पोङ्भोने माङ्हाङ् आप्पेङा खानिङि टोॽवा चोगेट्टु॥ माङ्हाङ्ङा खानिङि उन्ङा पाक् चोक्माना निङ्ग्वा चोगुटु हिट्ना चोक्माना निङ्ग्वा हिट्नुङ् बोल् चा खानि मापिडिटि॥ 14 सोब्बे टोॽवा गिनिङ्गिनिङ् आथाबा बादबिबाद मिचोक्ङे चोगानुम्॥ 15 हिट्नाड्डेउङ् खानि खोनाङा चा पाक्चा लोमा माहिडिन्गा॥ खानि ओमाक्पा निङ्ग्वा हिट्नुङ् ओचाफेन्लोक् चाट्ला उलिसागा याप्मिचि माझाङि आयुङिना माङ्हाङ्ङाना फाकाट्ना छाचि गाड्डे फाट्टुर मालेना हिट्नुङ् चोखो लिसानिउङ् युङानि॥ डुम्बारिक् डुम्ना टाङ्साङ्ङि चोक्चिङ्गेट् ओम्सि गाड्डे डोक् खानि चा हिट्नागा माझाङि ओम्मा कोन्युक्॥ 16 हिट्नुङ् खानिङा चोला आपिना नुना खाबोर याप्मिचि लोडानुम्चिम्॥ नाड्डे आचोगिए भोने आङा खेडोक् डोक् पिन्नेट्निङ्ना रैछो हिट्नुङ् मेहेनेत चोगुङ्ना खेडोक् खेरो खाट्नेट्निना रैछो नुङ् खिरिस्ट उङ्ना बेला आङा आनाभुक् ठेलोक् चोक्मा टोगुङ्टुङ्॥ 17 आङालोक् खानि ठिक् रिङ् लोमाना रिङ् युङ्ग्वा॥ हाट्ले माङ्हाङ्ङि भोक् ठाङ्माना याप्मिचिलोक् जिवाट् युङ्ग्वा भोने, हिट्नागालोक् आङ्गुर ओमोॽवा चा युङ्ग्वा हिट्नागाँ हिट्ना भोक्ङाना रुपङि ओठाङ्सुटु॥ छेम्बा डोक्, खानि बिस्वास चा माङ्हाङ्ङि आठाङ्सुम्ना हिट्ना भोक् गाड्डेना डोक् ए॥ हिट्नुङ् याप्मिचिङा आङा सेप्मा चा उहिङा, हिट्डेउङ् आचोलाम्बाक् माङ्हाङ्लाउङ्सा ठाङ्बालाक् आङ्गुर ओमोॽवालोक् टोङ्मा हिडुङ्टुङ्॥ हिट्नुङ् आङा खानिलोक् एक्केउ आनान्दा चोक्ङा॥ 18 हिट्नाड्डे डोक् खानि चा आङालोक् चाप्टामा हिट्नुङ् आनान्दा चोक्मा कोन्युक्॥ तिमोथि हिट्नुङ् इपाफोरडिटास 19 टाङ्बा येसुङा निङ्ग्वा चोगुटु भोने, तिमोथिलाउङ्सा खानि टुब्सिङा एला डोक् पाङ्सुङ्टुङ् नुङ् आसा चोगुङ्टुङ्॥ हिट्नुङ् उन्लाम्मा खानि बारेङि नुना खाबोर खेम्मा टोगुङ्नाँ आङाना चा आचाप् टायुक्॥ 20 छेम्बा डोक्, हिट्नि खानिलाउङ्सा नुलोक् यान्दा काचोक्बा आङालोक् लिसाना तिमोथि गाड्डेना आरु साक्चा ओवाइगा॥ 21 पोङ्भोने आरु सोब्बेङा आप्पे लाउङ्सा एडोक् यान्दा ओचोगुगा, टरो येसु खिरिस्टङा निङ्ग्वा चोगुना रिङ्म्बाक् यान्दा ओचोगुन्गा॥ 22 टरो तिमोथि बिस्वासयोग्य याप्मि नुङ् उन्ङा पाइले डोक् पारमान् चोगुना रिङ् खानिलाउङ्सा ठाहा युङ्ग्वा॥ हिट्नुङ् ठिबाङ् छाङा उप्पाङाना सेवा चोगु गाड्डे नुना खाबोर पारचार चोक्माना टोॽवाङि आङालोक् एक्केउ उन्ङा सेवा चोगुए॥ 23 खेम्सानुम्, आङालाउङ्सा नाहि पाक् पाक् लियुक्ना हिट्ना रिङ् ठाहा टोगुङ्नामे तिमोथि पाङ्माना निङ्ग्वा चोगुङ्टुङ्॥ 24 हिट्नुङ् आङा एला डोक् खाम्बाङ्लाम्मा होन्नाँ नुङ् टाङ्बाङि बिस्वास चोगुङ्टुङ्, हिट्नुङ् खानि टुब्माउङ्सा आङा एला डोक् आप्मा हिङा॥ 25 आनि झान्झा इपाफोरडिटास खानि सोरि फेरि पाङ्मा कोन्युक् नुङ् आनिङ्ग्वा लोसेसे॥ उन् खानिना खाबोर कालो हिट्नुङ् आङा आभोरङि लिसाङ्ना बेला घुवार याङ्ओफायाक् नुङ् आपाङ्सुम्ना॥ उन्ङा आङालोक् एक्केउ टोॽवा चोगुए, हिट्नुङ् नुना खाबोर सुरेक्छे चोक्माउङ्सा उन्ङा आङा घुवार याङ्फाडे॥ 26 आङा उन् खानिङि पाङ्सुङ्गेट्टुङ्, पोङ्भोने खानि सोब्बेलाउङ्सा टुब्माना उन्ङा आड्डिक् उनिङ्ग्वा चोगेसुए॥ खानिङा उन् टुगाना रिङ् आखेम्सुम्मुङ् खानि निङ्ग्वा टुगाना रिङ् ठाहा टोगुनाँ खानिलोक् टुब्माना निङ्ग्वा आड्डिक् चोगेसुए॥ 27 छेम्बा डोक्, उन्ङाना आड्डिक् ओयेम् टुगाउङ् झान्डेङा उन् सियाट्टा॥ टरो माङ्हाङ्ङा उन् लुक्मा टुक्टुए, हिट्नुङ् उन् एडोक् माखाक्, टरो आझै आङि निङ्ग्वा सागु उठानि नुङ् उन्ङा आङा लुक्मा याङ्टुक्टे॥ 28 हिट्डेउङ् उन् खानि सोरि पाङ्माउङ्सा आङाना आड्डिक् आनिङ्ग्वा लोसेसे॥ हिड्डेउङ् खानिङा उन् फेरि आनिसुम्नाँ खानि चाप् टायुक्, हिट्नुङ् आनिङ्ग्वाङिना सुरटा चा याङ्-याङ् लियुक्॥ 29 टाङ्बाङि बिस्वासि झान्झा नुङ् खुसि लिसानिउङ् उन् स्वागाट् चोगानुम्॥ उन् गाड्डेगा याप्मिचि मान् चोक्माचि डोक् कोन्युक्॥ 30 पोङ्भोने उन्ङा खिरिस्टङाना टोॽवा चोगुनाँ ओचोला डोक् जाखाम्ङि ठेन्डुए, हिट्नुङ् खानिङा आङा घुवार फामाना साट्टोङि उन्ङा घुवार याङ्फासानाँ आच्चुस्ङा उन् सियाट्टा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.