मारकुस 6 - आठपहरियानासारातङि याप्मिचिङा येसु बिस्वास ओचोग्वाट्टुन् ( मात्ति १३:५३-५८ ; लुका ४:१६-३० ) 1 हिट्नुङ् हिट्ना डेन् नाडुङ् येसु उन् पोयाना नासारात ओलोडुना खालाङ्गाङि खाडे॥ ओचेलाचि चा उन्लोक् ओखाडे॥ 2 युङ्माना लेम्बा येसु याहुदि छुम्मापाङ्ङि खाडाउङ् सिकाँ चोक्मा ठालाँ चोगुचे॥ हिट्नि जोम् याप्मिचिङा उरिङ् ओखेम्सुङ् डोङ् ओठोङ्डे हिट्नुङ् उन्चि उन्चि नाड्डे उपिगे, “ना याप्मिङा नाड्डेगा रिङ् खोनिलाम्मा सिकाँ लिसेना? खोड्डे पाराना ठोना टोगुएसुएना रैछो? खोड्डेउङ् नाड्डेगा डोङ् ठोङ्डिगा टोॽवाचि चोक्मा हिडुटुगा? 3 पाक् ना सिङ्ङाना टोॽवा काचोक्बा याप्मि माखाइ टे? पाक् नाम्टे मारियामङाना उइछा आथाबा याकुब, योसेफ, याहुदा हिट्नुङ् सिमोनङाना उम्भु माखाइ टे? नाङाना मेन्झेमा उन्झाचि चा नेहि आनि सोरि एक्केउ डोक् ओवाहेट् टे॥” हिड्डेउङ् हिट्नागाँ उरिङ् खेम्मा निङ्ग्वा ओटास्वाट्टुन्॥ 4 टब येसुङा हिट्नागा लोडुचे, “माङ्काटा सोब्बेलेङ् याप्मिचिङा मान् ओचोगुना, टरो आप्पे उयुक्ताम्ङि, ओनातेदारचिङा हिट्नुङ् ओपाङ्ठाङ्ङिगा याप्मिचिङा मान् ओचोगुन्ना॥” 5 हिड्डेउङ् येसुङा हिट्नि कोइ-कोइ उटुग्गा याप्मिचि उठुङ्ङि उमुक् युङ्सुङ् नुमानिङ् चोगुचे, टरो आरु खोना चा साक्तिसालि टोॽवा चोक्मा हिड्वाट्टुन्॥ 6 हिट्नागा याप्मिचिङा बिस्वास ओचोग्वाट्टुन्ना निसुङ् उन् डोङ् ठोङ्डे॥ हिट्नुङ् उन् युक्ताम्-युक्ताम्ङि याप्मिचि सिकाँ चोक्सा खाडे॥ येसुङा चेलाचि पारचार चोक्ङा पाङ्सुचिगा ( मात्ति १०:५-१५ ; लुका ९:१-६ ) 7 उन्ङा बारो जाना ओचेलाचि छेम्डुचे, हिट्नुङ् इप्पाङ्-इप्पाङ् चोगुचिउङ् पाङ्सुचे॥ हिट्नुङ् हिट्नागा ओचाफेन्गा रिमेट्चि होप्माना आधिकार चा पिडुचे॥ 8 येसुङा हिट्नागा नाड्डे लोडुचे, “खानि आखाडिनाँ लाम्बो लोङ्सा चालेपा, जाप्रामा, ओफाबा आथाबा पाक्चा खुनेनुम्, टरो लाहुरिक् एरोक् खुयानुम्॥ 9 लाङ्सुप् वाडानुम्, टरो आरु फेरफारे लोट्लिङ् खुनेनुम्॥” 10 उन्ङा आझै हिट्नागा लोडुचे, “खानि आखाडिना पाङ्ङि ओचेट्नुलोक् मामेट्टिए भोने, हिट्ना युक्टाम्ङि आयुङिलोक् सोम्मा हिट्नि डोक् युङानि॥ 11 टरो खानि आखाडिना डेन्ङि याप्मिचिङा ओचेट्नुलोक् मामेट्टिएट्टिन् आथाबा खानि रिङ् ओखेम्स्वाट्टुन् भोने, हिट्ना डेन् आपोक्टुम्नाँ खानि लाङ्घेप्पाङि नुप्टागा खाम्धारि हिट्नि डोक् ठाम्साढानुम्॥ ना रिङ् हिट्नागा बिरुद्दाङि ओकोबाना रिङ्ङाना साँचि लोङ्सा लियुक्॥” 12 हिट्नुङ् ओचेलाचि ओखाडाउङ् “काएल्-काबु लिसानि” पिक्सा याप्मिचिलोङ्सा पारचार चोक्मा ठालाँ ओचोगुए॥ 13 हिट्नागाँ याप्मिचिलाम्मा जोम् ओचाफेन्गा रिमेट्चि ओहोट्टुचे, हिट्नुङ् जोम् उटुगागा याप्मिचिलोङ्सा क्या ओनेक्टुबिडुचे, हिट्नुङ् हिट्नागा नुमानिङ् ओचोगुचे॥ बाप्टिस कापिबा युहान्ना ओसेडुना ( मात्ति १४:१-१२ ; लुका ९:७-९ ) 14 येसु उनिङ् सोब्बेलेङ् मुक्टानाँ हेरोद हाङ्बाङा चा उन्ङाना बारेङि खेम्सुए॥ आम्टेप्मा याप्मिचिङा “बाप्टिस्मा कापिबा युहान्ना सियानालाम्मा उहिङ्ग्वाट् लिसाउङ् कोबेना रैछो, हिड्डेउङ् नाङा नाड्डेगा डोङ् ठोङ्डिगा साक्तिसालि टोॽवाचि चोगुएट्टु” पिक्सा ओमाट्टुए॥ 15 टरो आरुङाम्बाक् “ना एलिया ओलोडुना माङ्काटा रैछो” ओमाट्टुए॥ आझा आरु याप्मिचिङाम्बाक् “आच्छोगा माङ्काटाचि गाड्डे डोक् ठिबाङ् माङ्काटा होन्डेना रैछो” पिक्सा ओमाट्टुए॥ 16 जब हेरोद हाङ्बाङा नागा रिङ् खेम्सुङ् नाड्डे माट्टुए, “ना बाप्टिस्मा कापिबा युहान्नाङाना ओटेहेक् आङा डोक् चेप्मा मेट्टुङ्चिङे, हाट्ले ना सियानालाम्मा उहिङ्ग्वाट् लिसाउङ् कोबेना रैछो॥” 17 हेरोद हाङ्बाङा आप्पे उन्झा फिलिपङा ओटालिमाङ् हेरोदियास भ्या चोगुएसुना॥ हिट्नुङ् हेरोदङा हेरोदियास खुसि चोक्मा लोङ्सा युहान्ना लाप्मा मेट्टुचे हिट्नुङ् रेक्मा मेट्टुचिउङ् खाम्बाङ्ङि ठेन्डानुम् नुङ् लोडुचे, 18 पोङ्भोने युहान्नाङा “आप्पे कान्झाङाना ओटालिमाङ् युङ्मा ओचेट्नु लिनिना” पिक्सा लोडुएसुना॥ 19 हिड्डेउङ् हेरोदियासङाना युहान्नालोक् ओयाक् लेडे हिट्नुङ् सेप्मा कोलुएट्टुना, टरो सेप्मा हिडुन्गेट्टुन्ना डाना, 20 पोङ्भोने हेरोद हाङ्बाङा युहान्ना ठिबाङ् धारमोति हिट्नुङ् सेङ्सेङ्ना याप्मि नुङ् मिसेन् निसुएसुनाँ उन् मान् चा चोगुना डाना, हिट्नुङ् उन्ङा युहान्ना पाक्चा मिचोक्ङे युङ्सुएसुना॥ युहान्नाङा माट्टुगा रिङ् खेम्सुनाँ उनिङ्ग्वा खोड्डे चोक्मा चोक्मा लोसा चा, उरिङ् निङ्ग्वा पिडुङ् खेम्सुगा डागा॥ 21 हिट्नुङ् हिट्ना बेला नुना बेला टाए, ठिक् लेम्बा हेरोद हाङ्बाङा उन् पोङ्साना लेम्बा हारका मानाँ चोक्मा ठेना भातेर चोगुए॥ हिट्ना भातेरङि ओभारदारचि, काप्तानचि हिट्नुङ् गालिलङिगा आरु मुलि-मुलि याप्मिचि छेम्डुएसुचिगा॥ 22 हिट्ना भातेरङि हेरोदियासङाना उइछा मेन्झेमा भिट्रा आबाउङ् लाॽवासे, हिट्नुङ् हिट्नाँ हेरोद हाङ्बा लोक् हिट्निगा सोब्बे याप्मिचिगा उन्चि निङ्ग्वा लाॽवासाउङ् खुसि मेट्टुचे॥ हिट्नुङ् हेरोद हाङ्बाङा हिट्ना मेच्छा लोडुए, “लु याङ्लोडा, खान् पाक् चाहाब् आलियुक्ना हिट्ना डोक् आङा पिनाँ॥” 23 हिट्नुङ् हाङ्बाङा बाचा चोगुङ् हिट्ना लोडुए, “खान् आमुलुक्ङाना ओफारा खान्डा आनाक्टे भोने चा पिनाँ॥” 24 हिट्नुङ् हिट्ना भारा होन्डाउङ् उमा सिलाप्टुए, “आमा, आङा पाक् नाक्टुङ्नाँ?” उमाङा लोडुए, “बाप्टिस्मा कापिबा युहान्नाङाना ओटेहेक् नाक्टु॥” 25 हिट्ना बेला डोक् हिट्ना मेच्छा हाङ्बा सोरि नोक्टा खाडाउङ् लोडुए, “हाट्ले डोक् बाप्टिस्मा कापिबा युहान्नाङाना ओटेहेक् ठालिङि युङ्सुङ् याङ्पिडा॥” 26 ना रिङ् खेम्सुङ् हेरोद हाङ्ङाना आड्डिक् डोक् उनिङ्ग्वा टुगे, टरो उन्ङा हिट्नागा भातेरङि ओटायागा याप्मिचि टोकानाङि हिट्ना मेच्छालोक् चोगुना चामारसिङा युमाना डोक् निङ्ग्वा चोगुए॥ 27 हिड्डेउङ् हाङ्ङा हिट्ना बेला डोक् ठिबाङ् टिलिङ्गा “युहान्नाङाना ओटेहेक् चेप्टु टाडु” पिक्सा आग्याँ पिडुए॥ हिट्नुङ् हिट्ना खाम्बाङ्ङि खाडाउङ् युहान्नाङाना ओटेहेक् चेप्टुए, 28 हिट्नुङ् ओटेहेक् ठालिङि युङ्सुङ् मेच्छा पिडुए, हिट्नुङ् मेच्छाङा हिट्ना खाट्टुङ् उमा पिडुए॥ 29 ना रिङ् युहान्ना ओचेलाचिङा ओखेम्सुए, हिट्नुङ् हिट्नागा ओआबाउङ् युहान्नाङाना ओलास उहुम्पाङि ओखाट्टुङ् उयुङ्सुए॥ येसुङा लेम्बोक् हाजार याप्मिचि ख्वाबा चोगुचिगा ( मात्ति १४:१३-२१ ; लुका ९:१०-१७ ; युहान्ना ६:१-१४ ) 30 आम्टेप्मा बेला एङ्सुवा मुलिचेलाचि ओनोक्टा ओआबाउङ् येसु सोरि उछुमे, हिट्नुङ् उन्चिङा ओचोगुगा हिट्नुङ् उहिसिक्टुचिगा सोब्बे रिङ्चि ओखेम्मेट्टुए॥ 31 हिट्नुङ् येसुङा “आनि साक्चा उयुङ्निना डेन्ङि खाडिउङ् छोप्मोङ् बिसाँ चोगि” पिक्सा हिट्नागा लोडुचे, पोङ्भोने हिट्नि जोम् याप्मिचि ओटागा ओखाट्गा ओचोगाउङ् उन्चिङा चामा चामाधारि चा ओटोग्वाट्टुन्॥ 32 हिट्नुङ् उन्चि नाउङि ओठाङाउङ् सोगोप् ठिक् खुसुना डेन्ङि ओखाडे॥ 33 टरो जोम् याप्मिचिङा उन्चि ओखाडागेट्टागा उनिसुचिउङ् मिसेन् उनिसुचे, हिट्नुङ् याप्मिचि हिट्ना डेन्ङिगा सोब्बे खालाङ्गालाम्मा पिन्सा ओखाडाउङ् उन्चि ओखाट्ना डेन्ङि उन्चि नुङ्ना पाइले डोक् ओटासुए॥ 34 हिट्नुङ् येसु नाउलाम्मा भारा होन्डानाँ उन्ङा जोम् याप्मिचिगा खिमेयाङ्मे निसुए, हिट्नुङ् उन्ङा हिट्नागा लुक्मा टुक्टुचे, पोङ्भोने हिट्नागा गोठाले मालेगा ठुँबाचि गाड्डे डोक् उलिसाइसागा॥ हिट्नुङ् उन्ङा हिट्नागा याप्मा रिङ् हिसिक्टुचे॥ 35 नाम् ठायाना बेला ओचेलाचि उन् सोरि ओआबाउङ् ओलोडुए, “हाट्ले नाम् कुडे, हिट्नुङ् आनि ना खुसुना डेन्ङि वासेट्टि॥ 36 नागा याप्मिचि नाहिलाम्मा पाङ्सुचि, हिट्नुङ् नागा योम्बो-टोम्बो युक्टाम्ङि ओखाट्युङ् आप्पेलोङ्सा चामा-ठुङ्मागा थोक्चि उइनुजो॥” 37 हिट्नुङ् येसुङा हिट्नागा लोडुचे, “खानिङा डोक् नागा याप्मिचि पालोवालो चामा पिडानुम्चिम्॥” टरो हिट्नागाँ ओलोडुए, “डाङ्बा, इप्पोक् साए रुपाक् राङ्ङा इनुम्ना चालेपाङा चा हिट्नागा युडुन्चिन्गा, हिट्डेउङ् खोड्डे पारिक् हिट्नागा ख्वाबा चोक्माचिगा? खान्उम्बाक् ख्वाबा चोगानुम्चिम् आपिग्ना॥” 38 येसुङा हिट्नागा सिलाप्टुचे, “खानिलोक् आम्टेप्मा चालेपा युङ्ग्वाना? खाडानिउङ् पुयानुम् टे॥” हिट्नुङ् हिट्नागा ओखाडाउङ् उपुयुए हिट्नुङ् ओलोडुए, “लेम्बोक् चालेपा लोक् इप्पोक् ङासा एरोक् युङ्ग्वा॥” 39 हिट्नुङ् येसुङा याप्मिचि सामुहङि टिरिम् टिरिम् चोगानुम्चिम्उङ् पिङ्गिलिङ्ना चाउरिङि युङ्सानुम्चिम् पिक्सा ओचेलाचि लोडुचे॥ 40 हिट्नुङ् याप्मिचि साए-साए जाना हिट्नुङ् पाचास पाचास जाना उलिसाउङ् टिरिम् उयुङे॥ 41 येसुङा लेम्बोक् गोटा चालेपा लोक् इप्पोक् ङासा याङुए हिट्नुङ् टोनालोग्लेङ् पुयुङ् माङ्हाङ्ङि आसिक् नाक्टुए, हिट्नुङ् हिट्ना चालेपा एगुङ् याप्मिचिलोङ्सा हान्डाबिडानुम्चि पिक्सा ओचेलाचि पिडुचे, हिट्नुङ् इप्पोक् ङासा चा सोब्बेलोङ्सा हान्डानुम् पिक्सा पिडुचे॥ 42 सोब्बेङा उन्चि फोक् उइप्टुलोक् ओचोए॥ 43 हिट्नुङ् ओचेलाचिङा चालेपा हिट्नुङ् ङासा मोन्डागा खोजेमोजे बारो डालिटेप् उछुम्सुए॥ 44 हिट्नि ओचोगा येम्बेछा याप्मिचि एरोक् लेम्बोक् हाजार ओवासेट्टागा॥ येसु चुवा उठुङ्ङि लाम्टियाना ( मात्ति १४:२२-३६ ; युहान्ना ६:१५-२१ ) 45 हिट्नुङ् येसुङा हिट्ना बेला डोक् ओचेलाचि नाउङि ठाङ्सुचिउङ् तालङाना याहाँपारा बेथसेदा ओलोडुना युक्टाम्ङि पाङ्सुचे॥ हिट्नुङ् उन्बाक् याप्मिचि पाङ्ङि पाङ्माचि लोङ्सा हिट्नि युङे॥ 46 हिट्नागा याप्मिचिलोक् सेन्डाउङ् उन् हिट्निलाम्मा बिन्टि चोक्सिङा झोन्झोबालेङ् ठाङे॥ 47 हिट्नुङ् नाम् कुडे, नाउ तालङाना माझाङि डाना, हिट्नुङ् उन्बाक् ओएकेले तालङाना ओफेरोङि वासेट्टाना॥ 48 हुन्डारि नाउङाना ओटोकानालाम्मा फेन्डानाँ ओचेलाचिङा तालङि नाउ ख्याबा चोक्मा टुक्लोक् लिसाना उन्ङा निसुए॥ भ्यानिक् सुम्बोक् मुक्टाना फेरा येसु चुवा उठुङ्ङि लाम्टिसा ओचेलाचि सोरि आबे, हिट्नुङ् ओचेलाचि काक्टुचिउङ् खाडा लाबाना डाना॥ 49 उन् चुवा उठुङ्ङि लाम्टियाना चेलाचिङा उनिसुङ् “नाउम् टोन्डेबा गो रैछो” उमिट्टाउङ् हिट्नागा उकिट्टाउङ् ओराट्टे॥ 50 पोङ्भोने हिट्नागा सोब्बेङा उन् उनिसुङ् उकिट्टाइसागा॥ हिट्ना बेला डोक् येसुङा हिट्नागा लोडुचे, “किट्नेनिन्, आङा डोक्, आँट् चोगानि॥” 51 हिट्नुङ् उन् हिट्नागा सोरि नाउङि ठाङे, हिट्नुङ् हुन्डारि चा सिप्टे॥ ना उनिसुङ् हिट्नागा आड्डिक् डोक् डोङ् ओठोङ्डे॥ 52 पोङ्भोने हिट्नागाँ चालेप्पाङाना बारेङि लिसाना रिङ्ङाना उटुप् बुजा चोक्मा उहिडुन्गेट्टुन्ना डाना, टरो उन्चि निङ्ग्वा आड्डिक् डोक् डोम्-डोम् लिसाइसाना॥ 53 हिट्नुङ् येसु ओचेलाचिलोक् ताल ओकाक्टुङ् याहाँपारा गानेसारेत छेट्राङि ओटासुङ् हिट्नागाँ नाउ तालङाना ओफेरोङि ओरेक्टुङ् उयुङ्सुए॥ 54 हिट्नागा नाउलाम्मा भारा ओहोन्डानामे डोक् याप्मिचिङा येसु मिसेन् उनिसुएट्टुए॥ 55 हिट्नुङ् याप्मिचि हिट्ना छेट्राङाना याम्बा-नायाम्बा सोब्बेलेङ् पिन्सा ओखाडे, हिट्नुङ् खोनि खोनि येसु वासे नुङ् ओखेम्सुए हिट्नि डोक् याप्मिचिङा उटुगागा उन्चि डोलेन्चालोक् उखुयुचिउङ् ओखाट्टुचे॥ 56 हिट्नुङ् युक्टाम्-युक्टाम्ङि, खालाङ्गा-खालाङ्गाङि हिट्नुङ् आरु डेन्ङि उन् खाडे, याप्मिचिङा उटुगागा याप्मिचि उखुयु ओआप्टुचिउङ् बाजार-बाजारङि उयुङ्सुचे॥ हिट्नुङ् ओलोट्लिङ् ओफेरो एडोक् चा खोप्मा ओटोगुम् नुङ् याप्मिचिङा बिन्टि ओठाङ्सुए, हिट्नुङ् ओलोट्लिङ् ओखोट्टुगा टेप्मा सोब्बे याप्मिचि उनुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.