मारकुस 16 - आठपहरियायेसु सियानालाम्मा उहिङ्ग्वाट् लिसाना ( मात्ति २८:१-८ ; लुका २४:१-१२ ; युहान्ना २०:१-१० ) 1 युङ्माना लेम्बा लाट्टाउङ् मारियाम माग्दालिनि हिट्नुङ् याकुबङा उमा मारियाम हिट्नुङ् सालोमिङा येसुङाना ओयेम्ङि नेक्मा लोङ्सा बुङ्बुङ् नाम्ना आट्टार हिट्नुङ् क्या उइनुए॥ 2 हिट्नुङ् हान्डेङ् आइताबार एका भ्यानिक् नाम् छेडाउङ् हिट्नागा मेन्झेमाचि उहुम्पाङि ओखाडे॥ 3 हिट्नुङ् हिट्नागा नाड्डे पिक्सा उन्चि उन्चि रिङ्पान् ओचोगे, “आनि लोङ्सा उहुम्पा ओयासि टेप्बालाक् लिङ्गेॽवा साङा आसोन्युबियुक्ना टे?” 4 हिट्नुङ् हिट्नागाँ टोम्बो उपुयुनाँ उहुम्पाङिना हिट्ना ठेना लिङ्गेॽवा ओसोन्डुडिसुना उनिसुए॥ 5 हिट्नुङ् हिट्नागा उहुम्पा भिट्रा उलिगानाँ हिट्नि फुट्ना लोट्लिङ् वाडुना ठिबाङ् ठाङ्बेन् याप्मि उहुम्पाङाना उछुप्टाङ्लेङ् युङासाना उनिसुए, ना उनिसुङ् हिट्नागा डोङ् ओठोङ्डे॥ 6 हिट्नुङ् हिट्ना याप्मिङा हिट्नागा लोडुचे, “खानि डोङ् ठोङ्नेनिन्, खानिङा खाप्चेङि उछुडु ओसेडेनु नासारातङिना येसु आकोलुएट्टुम्॥ टरो उन् उहिङ्ग्वाट् लिसाउङ् कोबैसे, उन् नेहि वाइना, हिट्डे भोने उन् उयुङ्सुना डेन् पुयानुम् टे॥ 7 टरो हाट्ले खानि खाडानि, हिट्नुङ् ओचेलाचि लोक् पाटरुस लोडानुम्चिम्, ‘उन् खानि नुङ्ना पाइले गालिलङि खाट्युगेट्, हिट्नुङ् उन्ङा खानि मालोडि गाड्डे खानिङा हिट्नि आनिसुम्टुम्॥’” 8 हिट्नागा उहुम्पालाम्मा भारा ओहोन्डाउङ् उपिन्डे, पोङ्भोने हिट्नागा आड्डिक् डोङ् ओठोङ्डाउङ् ओयोक्टेट्टागा॥ हिट्नुङ् हिट्नागाँ साक्चा पाक् ओलोडुवाट्टुन्चिन्, पोङ्भोने हिट्नागा उकिट्टाइसागा॥ येसु चेलाचि सोरि ठेट्टाना ( मात्ति २८:९-२० ; लुका २४:१३-५३ ; युहान्ना २०:११-२३ ; मुलिचेला टोॽवा १:४-११ ) 9 [आइताबार एका भ्यानिक्, सियानालाम्मा उहिङ्ग्वाट् लिसा कोबाउङ् येसु सोब्बे नुङ्ना पाइले मारियाम माग्दालिनि सोरि ठेट्टे॥ ना मेन्झेमालाम्मा डोक् येसुङा साङ् ओटा ओचाफेन्गा रिमेट्चि होट्टुएसुचिगा डागा॥ 10 हिट्नुङ् हिट्ना मारियाम माग्दालिनि खाडाउङ् ना खाबोर लोडुचे॥ हिट्नागा सानिङ्ग्वा लोसा ओहाबेट्टागा॥ 11 हिट्नुङ् हिट्नाँ येसु सियानालाम्मा उहिङ्ग्वाट् लिसाउङ् कोबाना रिङ् हिट्नुङ् उन्ङि ठेट्टाना रिङ् हिट्नागा लोडुचे, टरो हिट्नागाँ बिस्वास डोक् ओचोग्वाट्टुन्॥ 12 हिट्नुङ् हिट्नागा माड्डेङि इप्पाङ् ओचेलाचि यरुसलेमलाम्मा युक्तामलेङ् खाडा गेट्टाचिना बेला मिसेन् डोक् निमा हिनिलोक् लिसाउङ् येसु हिट्नागाचि सोरि ठेट्टे॥ 13 हिट्नुङ् हिट्नागाचि चा नोक्टा खाडाचिउङ् उन्चिङा निसाचुगा रिङ् आरु लोडाचुए, टरो हिट्नागाँ बिस्वास डोक् ओचोग्वाट्टुन्॥ 14 हिट्नुङ्ना एघार ओचेलाचिङा चामा-ठुङ्मा चोक्मा उयुङैसागा बेला येसु हिट्नागा सोरि ठेट्टे॥ हिट्नुङ् येसुङा हिट्नागाँगा आबिस्वास हिट्नुङ् उन्चि निङ्ग्वा उटुम्सुना निसुङ् हिट्नागा खेमा लाप्टुचे, पोङ्भोने हिट्नागाँ उन् उहिङ्ग्वाट् लिसाउङ् कोबाना उनिसुगा याप्मिचिगा रिङ् बिस्वास ओचोग्वाट्टुन्॥ 15 हिट्नुङ् येसुङा हिट्नागा लोडुचे, “हाट्ले खानि ख्वाप्पा नाराङि खाडानिउङ् सोब्बे याप्मिचि लोङ्सा ना नुना खाबोर पारचार चोगानुम्॥ 16 हिट्नुङ् जुन्ङा बिस्वास चोगुटु हिट्नुङ् बाप्टिस्मा लाडुटु हिट्नागा लोङ्सा माङ्हाङ्ङा हिङुचिचि॥ टरो बिस्वास ओचोगुन्गा लाउङ्सा माङ्हाङ्ङा साजाए पिडुचिचि॥ 17 हिट्नुङ् बिस्वास काचोक्बाचिङा नाड्डेगा टोॽवा चोक्मा उहिडुटु, आनिङ्ङि हिट्नागाँ ओचाफेन्गा रिमेट्चि ओहोट्टुडिसुचिचि, हिट्नागा आरु रिङ्ङि चा ओचेक्युक्, 18 हिट्नागाँ बिखालु ओप्पुचि ओलाबुचिचि हिट्नुङ् हिट्नागाँ बिख ठेन्बालाक् थोक्चि उठुङुए भोने चा हिट्नागा पाक्चा उलिनिगा॥ हिट्नागाँ उटुगागा याप्मिचि उठुङ्ङि उन्चि मुक् उयुङ्सुनाँ उटुगागा याप्मिचि उनुयुक्॥” येसु टोनालोग् खाडाना 19 येसु ओचेलाचिलोक् चेक्मा हिडाउङ् टाङ्बा येसु टोनालोग्लेङ् फोगाडे, हिट्नुङ् माङ्हाङ्ङाना उछुप्टाङ्लेङ् युङे॥ 20 हिट्नुङ् हिट्नागा चेलाचि सोब्बेलेङ् ओखाडाउङ् नुना खाबोर पारचार ओचोगुए॥ हिट्नुङ् टाङ्बाङा हिट्नागा घुवार फाडुचे, हिट्नुङ् हिट्नागाँ पारचार ओचोगुना नुना खाबोर छेम्बाना नुङ् डोङ् ठोङ्डिना टोॽवाचि चोगुङ् उन्ङा पारमान् चोगुए॥] |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.