मारकुस 12 - आठपहरियाआङ्गुर बारिङाना मुन्डुम् ( मात्ति २१:३३-४६ ; लुका २०:९-१९ ) 1 येसुङा हिट्नागा ठिक् मुन्डुम् लोडुचे, “ठिबाङ् याप्मिङा स्वाँराङि आङ्गुर लेट्टुए, हिट्नुङ् आङ्गुर बारि याम्बा-नायाम्बा सोब्बेलेङ् बारा हाम्डुए॥ हिट्नुङ् आङ्गुर बारि माझाङि खाल्टो टोयुङ् आङ्गुर युमाना ठोङ् चा चोगुए॥ हिट्नुङ् आङ्गुर बारि कोमा लोङ्सा ठिक् याक्सा चा चोगुए, हिट्नुङ् हिट्ना आङ्गुर बारि आधियाङि पिडुचिउङ् उन्बाक् भारा खाडे॥ 2 आङ्गुर सोङ्डाउङ् उन्ङा ठिबाङ् ओचाकार आधिया फोक्सिङा पाङ्सुए॥ 3 टरो हिट्नागाँ हिट्ना ओलाबुङ् ओलेम्सुए, हिट्नुङ् पाक्चा मिपिङे ओपाङ्सुए॥ 4 हिट्नुङ् स्वाँरा डाङ्बाङा फेरि आरको ठिबाङ् ओचाकार पाङ्सुए, टरो हिट्ना चा आधिया कामाँ काचोक्बाचिङा ओटेहेक्ङि ओलेम्सुङ् ओचाफेम्मा ओमेट्टुए॥ 5 स्वाँरा डाङ्बाङा आझै आरको ओचाकार पाङ्सुए, टरो हिट्ना आधिया कामाँ काचोक्बाचिङा हिट्ना चा ओसेढुए॥ नाड्डेउङ् स्वाँरा डाङ्बाङा आरु जोम् ओचाकारचि पाङ्सुचे, टरो आधिया कामाँ काचोक्बाचिङा कोइ ओलेम्सुचे हिट्नुङ् कोइ ओसेडुचे॥ 6 “हाट्ले आङ्गुर डाङ्बाङाना उलुक्माङा चोना ठिक्ए उइछा डाना, ‘हिट्नागाँ आइछाउम् नुलोक् ओमेट्टुटु होला’ नुङ् सोब्बे नुङ्ना एङ्स्वा उन्ङा हिट्ना उइछा डोक् आधिया कामाँ काचोक्बाचिङि पाङ्सुए॥ 7 टरो हिट्नागा आधिया कामाँ काचोक्बाचि उन्चि उन्चि नाड्डे पिक्सा उमुन्डुब्टे, ‘लु, नाउम्टे स्वाँरा डाङ्बा उइछा डोक्॥ लु आबानि, हाट्ले ना सेडुम्, हिट्नुङ् आनिना डोक् आधिकार लियुक्॥’ 8 हिट्नुङ् हिट्नागाँ उन् ओलाबुङ् ओलेम्सुङ् ओसेढुए, हिट्नुङ् आङ्गुर बारिलाम्मा भारा ओलेप्टुए॥ 9 “हाट्ले आङ्गुर बारि डाङ्बाङा हिट्नागा पाक् मेट्टुचिचिगा होला टे? स्वाँरा डाङ्बा आप्पे टायुङ् हिट्नागा आधिया कामाँ काचोक्बाचि सोब्बे सेडुचिचि, हिट्नुङ् आङ्गुर बारि आरु याप्मिचि पिडुचिचि॥ 10 “पाक् खानिङा धारमाछाप्लाङि छेप्बालाक् ना रिङ् पोढाँ आचोक्निम्गेट्निम्गि? ‘लुङ् काछेट्बाचिङा ओलेप्टुना लिङ्गेॽवा डोक् पाङ् ओजाग्ङि छेट्माना उसुरङिना मुलि लिङ्गेॽवा लिसे॥ 11 नाउम्टे टाङ्बा आप्पेङा डोक् चोगुना, हिट्नुङ् ना आनि नाजारङि आड्डिक् डोङ् ठोङ्डिना टोॽवा ए॥’” 12 येसुङा ना मुन्डुम् उन्चि बिरुद्दाङि डोक् माट्टुना नुङ् याहुदि ओठेडोङ्चिङा ठाहा ओटोगुए॥ हिड्डेउङ् हिट्नागाँ येसु लाप्मा ओकोलुए, टरो याप्मिचिगा खिमेयाङ्मेलोक् हिट्नागा उकिट्टानाँ उन् ओपोक्टुढोङ् ओखाडाएट्टे॥ तिरो हुङ्माना बारेङि सिलाप्मा ( मात्ति २२:१५-२२ ; लुका २०:२०-२६ ) 13 हिट्नुङ् याहुदि ओठेडोङ्चिङा येसु उरिङ्ङि वारिक्ङि ठेम्मा नुङ् हिट्नागाँ फारिसि याप्मिचि हिट्नुङ् हेरोदिचि माड्डे इम्टेप्मा ओयाप्मिचि उन् सोरि ओपाङ्सुचे॥ 14 हिट्नागा याप्मिचि येसुङि ओखाडाउङ् ओलोडुए, “हाउ काहिसिक्बा, खान्ङाउम् छेम्बाना रिङ् आमाट्टुगा॥ हिट्नुङ् खान्ङा सोब्बे याप्मिचि ठिक्ए चाट्ला आमेट्टुचिगा खोनालेङ् चा आकेङ्निना, हिट्नुङ् खान्ङा माङ्हाङ्लाम्मा टोगुम्ना चोला बारेङि नुलोक् आहिसिक्टुचिगा नुङ् आन्याँ ठाहा टोगुएसुम्मे॥ हाट्ले आन्याँ याप्मिलोडा, रोमि कैसारलोङ्सा तिरो हुङ्मा कोन्युक् नि कोन्नि नै?” 15 “आन्याँ तिरो हुङ्मानि मिहुङ्मानि” येसुङा हिट्नागाँगा ओमाक्पा निङ्ग्वा ठाहा टोगुङ् हिट्नागा लोडुचे, “पोङ् खानिङा आङा वारिक्ङि ठेम्मा आकोलेट्टिङागा? खोलो ठिक् रुपाक् राङ् आप्टानुमुङ् याङ्निमेट्टानि॥” 16 हिट्नागाँ ठिक् रुपाक् राङ् ओआप्टुङ् उपिडुए॥ हिट्नुङ् उन्ङा हिट्नागा सिलाप्टुचे, “नाहि साङाना निङ् लोक् छाप् केङ्ग्वाना?” हिट्नागाँ “कैसारङाना ओलोडुए॥” 17 हिट्नुङ् येसुङा हिट्नागा लोडुचे, “हिट्डे भोने कैसारङाना टेप्मा कैसार डोक् पिडानुम्, हिट्नुङ् माङ्हाङ्ङाना थोक्चि माङ्हाङ् पिडानुम्॥” येसुङा माट्टुना रिङ् ओखेम्सुङ् हिट्नागा आड्डिक् डोङ् ओठोङ्डे॥ सियाना उहिङ्ग्वाट् लियुङ् कोब्ना बारे ( मात्ति २२:२३-३३ ; लुका २०:२७-४० ) 18 हिट्नुङ् आम्टेप्मा सादुकि याप्मिचि येसु सोरि ओआबे: सादुकिचिङा उसियागा याप्मिचि फेरि उहिङ्ग्वाट् उलियुङ् ओकोब्युक् नुङ् बिस्वास ओचोग्वाट्टुन्गा डागा॥ हिट्नागाँ नाड्डे पिक्सा उसिलाप्टुए, 19 “हाउ काहिसिक्बा, मोसाङा छेप्टुना धारमाबिधिङि नाड्डे छेप्टेसे– ‘खोना चा याप्मिङाना भुम्भु छा मिलिए सिए भोने, हिट्ना उन्झाङा ओमोटेङ्मा भ्या चोगुङ् उम्भुलोङ्सा छालेट् पोङ्माबिमा डोक् कोन्युक्॥’” 20 “आच्छो बेला सि टेप्मा भुम्भु-झान्झाचि ओवासेट्टागा॥ तुम्सामिङा भ्या चोगुए, टरो उइछाचि मिलिए डोक् हिट्ना सिए॥ 21 हिड्डे लिसाउङ् माइला उन्झाङा ओमोटेङ्मा भ्या चोगुए, हिट्नुङ् हिट्ना चा उइछाचि मिलिए सिए॥ हिट्नुङ् छालुम्बा चा ओमोटेङ्मा भ्या चोगुए, हिट्ना चा उइछाचि मिलिए सिए॥ 22 हिट्डेउङ् सि भुम्भु-झान्झाचिङा डोक् हिट्ना मेन्झेमा भ्या ओचोगु चा हिट्नागा छाचि मिलिङे डोक् सोब्बे उसिए॥ हिट्नुङ् आखेरिङि हिट्ना मेन्झेमा चा सिए॥ 23 हिट्नुङ् उसियागा उहिङ्ग्वाट् उलियुङ् ओकोब्यु काट्नाँ हिट्नागा माड्डे हिट्ना मेन्झेमा साङाना ओटालिमाङ् लियुक्ना? पोङ्भोने हिट्नागा सि जानाङा डोक् हिट्ना मेन्झेमा भ्या ओचोगुए॥” 24 येसुङा हिट्नागा लोडुचे, “खानि आड्डिक् टुक्लोक् आबान्डिसिए, पोङ्भोने खानिङा धारमाछाप्लाङिना रिङ् हिट्नुङ् माङ्हाङ् ओबोल् बारे बुजा डोक् आचोक्निम्गेट्निम्॥ 25 “पोङ्भोने याप्मिचि उसियुङ् उहिङ्ग्वाट् उलि ओकोब्नाँ हिट्नागा भ्या उलिनिगा हिट्नुङ् भ्या चा ओचोगुन्बिडुन्चिन्गा, टरो हिट्नागा टोनालोग्ङि उलिसागा माङ्हाङ् रिङ् काउग्बाचि गाड्डे डोक् उलियुक्॥ 26 “हाट्ले उसियागा फेरि उहिङ्ग्वाट् उलियुङ् ओकोब्ना रिङ् बारेङि पाक् खान्याँ मोसाङा छेप्टुना छाप्ला पोढाँ आचोक्निम्गेट्निम्गि? खोड्डे पारिक् मि हाट्टेएटाना पोथराङाना बारेङि छेप्बालाक् मुन्डुम्ङि माङ्हाङ्ङा मोसा नाड्डे लोडुए, ‘आङा आब्राहाम, इसाहाक, हिट्नुङ् याकुबङाना माङ्हाङ् ए॥’ 27 हिड्डेउङ् उन् उसियागा याप्मिचिगा माङ्हाङ् माखाक्, टरो उहिङ्ग्वाट् याप्मिचिगा माङ्हाङ् ए॥ खानि आड्डिक् डोक् आबान्डेएसिए॥” सोब्बे नुङ्ना ठेना आग्याँ ( मात्ति २२:३४-४० ; लुका १०:२५-२८ ) 28 हिट्नि धारमाबिधि काहिसिक्बाचि माड्डे ठिबाङ् याप्मिङा येसु लोक् सादुकि याप्मिचि बादबिबाद ओचोगेट्टागा रिङ् खेम्सुए॥ येसुङा याप्मिचि निङ्ग्वा टाना रिङ् लोडुचिगा निसुङ् हिट्नाँ उन् सिलाप्टुए, “आडाङ्बा, मोसाङा छेप्टुना धारमाबिधिङि सोब्बे नुङ्ना ठेना आग्याँम्बाक् खोना टे?” 29 येसुङा हिट्ना याप्मि लोडुए, “सोब्बे नुङ्ना ठेना आग्याँम्बाक् ना डोक् ए, ‘हाउ इस्राइलि याप्मिचि खेम्सानुम्, आनि माङ्हाङ् टाङ्बा एरोक् ठिक् एना टाङ्बा युङ्ग्वा॥ 30 खान्ङा कामाङ्हाङ् डाङ्बा लोङ्सा ख्वाप्पा कानिङ्ग्वालाम्मा, ख्वाप्पा कासोक्मालाम्मा, ख्वाप्पा काठोनालाम्मा, हिट्नुङ् ख्वाप्पा काबोल्लाम्मा डोक् माया चोगु॥’ 31 हिट्नुङ् आरको आग्याँम्बाक् ना ए, ‘खान्ङा आप्पे गाड्डे डोक् काटाक्लुङ्चि चा माया चोगुचि॥’ ना नुङ्ना ठेना आग्याँ आरु पाक्चा वाइना॥” 32 हिट्ना धारमाबिधि काहिसिक्बाङा येसु लोडुए, “आडाङ्बा, खान्ङा छेम्बाना रिङ् डोक् आमाट्टुए, माङ्हाङ् ठिक् एना, उन् माले आरको माङ्हाङ् वाइना॥ 33 हिट्नुङ् आङा ठाहा टोगुएसुङे, माङ्हाङ् ख्वाप्पा निङ्ग्वालाम्मा, ठोनालाम्मा, बोल्लाम्मा डोक् माया चोक्मा, हिट्नुङ् टाक्लुङ्चि आप्पे गाड्डे डोक् माया चोग्माउम्टे सोब्बे पारिक्ङागा भोक् हिट्नुङ् मिङि उडुमुङ् ठाङ्बालाक् भोक् नुङ्ना चा ना इप्पोक् आग्याँ टेम्माउम्बाक् ठेना रिङ् ए॥” 34 हिट्नुङ् हिट्नाङा नुना ओठोनालाम्मा माट्टुना खेम्सुङ् येसुङा हिट्ना लोडुए, “खान् माङ्हाङ् उमुलुक्लाम्मा लाप्माङ् आवाइना॥” हिट्ना बेलालाम्मा साङा चा आरु रिङ् येसु सिलाप्माना निङ्ग्वा चोक्मा उहिडुवाट्टुन्॥ खिरिस्टङाना रिङ् ( मात्ति २२:४१-४६ ; २३:१-३६ ; लुका २०:४१-४७ ) 35 येसुङा माङ्ठानाङि याप्मिचि हिसिक्टुएट्टुचिना बेला हिट्नागा सिलाप्टुचे, “धारमाबिधि काहिसिक्बाचिङा खिरिस्ट खोड्डेउङ् दाउद हाङ्बाङाना उइछा नुङ् ओमाट्टुटुगा? 36 पोङ्भोने दाउद हाङ्बा सेङ्सेङ्ना हाङ्साङाना बोल्ङा नाड्डे पारिक् लोमा मेट्टुए– ‘माङ्हाङ् डाङ्बाङा आटाङ्बा लोङ्सा नाड्डे लोडुए, आङा कासाट्टुरचि कालाङ्घेप्पा उछिक्ङि मिचोक्ए सोम्मा खान् आछुप्टाङ्लेङ् युङा॥’ 37 “दाउदङा खिरिस्ट ‘टाङ्बा’ लोडुना भोने खोड्डेउङ् खिरिस्ट दाउदङाना उइछा लिसेना टे?” हिट्नुङ् हिट्नि जोम् याप्मिचिगा खिमेयाङ्मेङा उन्ङा हिसिक्टुचिगा रिङ् मोज्जालोसा ओखेम्सुए॥ येसुङा ओछेक्छेक् चोगुचिगा ( मात्ति २३:१-३६ ; लुका २०:४५-४७ ) 38 हिट्नुङ् ख्वाप्पा याप्मिचिङा येसु ओखेम्सुएट्टुना बेला ओचेलाचि लोडुचे, “धारमाबिधि काहिसिक्बाचिगा हिसिक्मालाम्मा ओछेक्छेक् चोगानि, नागा धारमोति ओठेट्लोक् लोट्लिङ्चि ओवाडुङ् योम्बो-टोम्बो ओवागा, हिट्नुङ् खालाङ्गाङि सोब्बेङा बाबा ओमेट्टुचियाक् नुङ् निङ्ग्वा ओचोगुगा, 39 हिट्नुङ् याहुदि छुम्मापाङ्ङिगा मुलि ठोङ्ङि हिट्नुङ् भोज भातेरङि मान् उपिडुना ठोङ्ङि युङ्मा ओकोन्गा॥ 40 नागाँ लाङ्मेप्माचिगा माक्फेन्सुबेन् ओनाप्टुचिगा, हिट्नुङ् याप्मिचिङा धारमोति ओलोडुचि नुङ् होप्मो बेला सोम्मा केलोक् बिन्टि ओचोगुगा॥ नाड्डेगा याप्मिचिङा आड्डिक् टुक्लोक् ठेना साजाए ओटोगुटु॥” लाङ्मेप्माङाना भेटि ( लुका २१:१-४ ) 41 येसु माङ्ठानाङि भेटि ठेम्माना ठोङ् सोरि युङाउङ् याप्मिचिङा भेटि याङ्ढाङ्ङि भेटि ओठेन्डुएट्टुना पुयुएट्टुना॥ हिट्नुङ् हिट्नि जोम् वागाठागा याप्मिचिङा ओआबाउङ् जोम् ओफाबा ओठेन्डुए, 42 टरो हिट्नि पाक्चा वानेट्निना ठिबाङ् लाङ्मेप्मा आबाउङ् ताँबोङाना इप्पोक् राङ् एरोक् ठेन्डुए॥ 43 हिट्नुङ् येसुङा ओचेलाचि छेम्डुचिउङ् लोडुचे, “छेम्बा डोक् आङा खानि लोनाँनि, ना पाक्चा वाइना लाङ्मेप्माङा भेटि याङ्ढाङ्ङि आरु सोब्बे नुङ्ना जोम् भेटि ठेन्डुए, 44 पोङ्भोने आरु नागा वागाठागा याप्मिचिङा उन्चिगा जोम् माक्फेन्सुबेन्लाम्मा मोन्डाउङ् ओठेन्डुए, टरो ना पाक्चा वाइना लाङ्मेप्माङा उन्ङाना ओकामाइङाना सोब्बे चामा-ठुङ्मागालाम्मा डोक् ठेन्डुएसुए॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.