मारकुस 11 - आठपहरियायरुसलेमङि येसु याप्मिचिङा स्वागाट् ओचोगुना ( मात्ति २१:१-११ ; लुका १९:२८-४० ; युहान्ना १२:१२-१९ ) 1 येसु ओचेलाचिलोक् खाडागेट्टाना बेला उन्चि यरुसलेमङाना नेहेट्टाङ् जैतुन झोन्झोबाङाना छेउङि बेथफागे हिट्नुङ् बेथानिया ओलोडुना डेन्ङि होन्डा टाए, हिट्नुङ् उन्ङा ओचेलाचि माड्डे इप्पाङ् चेलाचि नाड्डे पिक्सा पाङ्सुचे, 2 “या याना युक्ताम्ङि खाडाचि, हिट्नुङ् हिट्नि खान्चि आलिक्चिनामे हाट्ले सोम्मा खोना याप्मि चा ओठाङ्निगेट्निना ठिक् गाधाङा उइछा ओरेक्टुएसुना आटुब्चुचु॥ हिट्ना फेन्डाचुङ् नाहि आप्टाचु॥ 3 हिट्नुङ् कोइ याप्मिङा खान्चिङा ‘पोङ् नाड्डे आचोग्चेट्चिगा?’ पिक्सा मालोडाचे भोने, ‘टाङ्बा लोङ्सा चाहाब् लिसाइसे, उन्ङा एला डोक् मानोक्टिबिडिटि’ पिक्सा लोडाचु॥” 4 हिट्नुङ् हिट्नागाचि खाडा चे, हिट्नुङ् छेम्बा डोक् हिट्ना गाधा उइछा लाम्बोङि ठिक् पाङ्ङाना भारालेङ् ढुवारिक् सोरि ओरेक्टुएसुना निसाचुए, हिट्नुङ् हिट्नागाचिङा हिट्ना फेन्डाचुए॥ 5 हिट्नि सोरि ओयेबागा माड्डे कोइ-कोइ याप्मिचिङा उसिलाप्टुचे, “ना गाधा उइछा आलेडाचुङ् खानिचि पाक् आचोक्चेट्चिगा?” 6 येसुङा लोडुचिगा गाड्डे डोक् हिट्नागाचिङा माट्टाचुए, हिट्नुङ् हिट्निगा याप्मिचिङा गाधा उइछा खाप्मा उपिडुचे॥ 7 हिट्नागाचिङा गाधा उइछा येसु सोरि आप्टाचुए, हिट्नुङ् उन्चि लोट्लिङ् हिट्ना गाधा उठुङ्ङि ठिसाचुए, हिट्नुङ् येसु हिट्ना गाधाङि ठाङे॥ 8 जोम् याप्मिचिङा आ-आप्पे उन्चि लोट्लिङ् लाम्बोङि उठिसुए, हिट्नुङ् कोइङाम्बाक् हिट्नि याम्बा-नायाम्बालाम्मा सिङ् उभुङ्माङिगा स्याउलाचि ओहेगु ओआप्टुङ् लाम्बोङि उठिसुए॥ 9 येसुङाना आगाडि हिट्नुङ् ओएङ्स्वाङि ओलाम्टियागा याप्मिचि राट्सा नाड्डे पिक्सा ओमाट्टुए, “होसान्ना! हिट्नुङ् टाङ्बा उनिङ्ङि टायाना माङ्हाङ्ङा आसिक् पिडुटु॥ 10 आनि टुबाठेबा दाउद हाङ्ङाना टायुगेट्ना मुलुक् आसिसित उलियाक्॥ टोनालोग्ङि युङ्ना माङ्हाङ्ङाना उनिङ् टो-टो उलियाक्॥” 11 हिट्नुङ् येसु यरुसलेमङि होन्डाटायाउङ् माङ्ठाना भिट्रा लिगे॥ हिट्नुङ् उन्ङा माङ्ठाना याम्बा-नायाम्बा सोब्बे थोक् पुयुए, टरो आबेला लिसानाँ बारो जाना ओचेलाचि खाट्टुचिउङ् बेथानिया युक्टाम्ङि खाडे॥ टुल्फुल केङ्नेट्निना वामाखोक्पोङाना उभुङ्मा ( मात्ति २१:१८-१९ ) 12 हान्डेङ्लेङ् उन्चि बेथानियालाम्मा ओनोक्टाना बेला येसुङाना ओसाक् वासे॥ 13 हिट्नुङ् येसुङा चिपा याम्बा ठिक् बुङ्ना लिसाना वामाखोक्पोङाना उभुङ्मा निसुए, हिट्नुङ् हिट्नि टुल्फुल गोलो केङ्ग्वानि नुङ् उन् हिट्नि खाडे, हिट्नुङ् हिट्नि टासुङ् पुयुनाँ टुल्फुल वानेट्निना, टरो उभुङ्माङि ओलाभाॽवा एरोक् लिसाना निसुए॥ पोङ्भोने हिट्ना बेला वामाखोक्पो केङ्माना बेला लिनिगेट्निना डाना॥ 14 हिट्नुङ् येसुङा हिट्ना वामाखोक्पो उभुङ्मा लोडुए, “हाट्लेलाम्मा ना उभुङ्मालाम्मा साङा चा टुल्फुल चामा ओटोगुन्चा॥” नाड्डे माट्टुना रिङ् ओचेलाचिङा ओखेम्सुए॥ येसु माङ्ठानाङि खाडाना ( मात्ति २१:१२-१७ ; लुका १९:४५-४८ ; युहान्ना २:१३-२२ ) 15 येसु ओचेलाचिलोक् यरुसलेमङि खाडे, हिट्नुङ् माङ्ठानाङि लिगे॥ हिट्नुङ् येसुङा माङ्ठानाङि बेपार काचोक्बाचि रिक्टुचिउङ् भारा होट्टुचे, हिट्नुङ् ओफाबा कालेक्बाचिगा टेबुल हिट्नुङ् लाप्टाङ्गेॽवा काछोङ्बाचिगा युङ्माना ठोङ् लेङ्सुबिडुचे॥ 16 येसुङा माङ्ठानाङाना लाम्बो उलियुङ् साक्चा पाक्चा थोक्चि खाप्मा हिट्नुङ् आप्मा पिडुवाट्टुन्चिन्॥ 17 हिट्नुङ् उन्ङा याप्मिचि सिकाँ चोक्सा नाड्डे लोडुचे, “धारमाछाप्लाङि नाड्डे छेप्टेसे, ‘आपाङ्उम्टे सोब्बे छोङ्बाचिगा बिन्टि चोक्माना पाङ् लिमा कोन्युक्,’ टरो खानिङाम्टे याङ्काखुट्चिगा लुम्भुक् गोलो आचोगुएसुम्मे॥” 18 हिट्नुङ् ना रिङ् गाडुवाडाङ्बाचि लोक् धारमाबिधि काहिसिक्बाचिङा ओखेम्सुए, हिट्नुङ् हिट्नागाँ येसु खोड्डेउङ् सेप्माना नुङ् निङ्ग्वा चोक्मा ठालाँ ओचोगुए॥ टरो हिट्नागा उन्लोक् उकिट्टागा डागा, पोङ्भोने ख्वाप्पा याप्मिचिगा खिमेयाङ्मे उन्ङा हिसिक्टुचिगा रिङ्ङि डोङ् ओठोङ्डैसागा॥ 19 हिट्नुङ् नाम् कुडाउङ् येसु खालाङ्गालाम्मा भारा होन्डाउङ् खाडे॥ वामाखोक्पोङाना उभुङ्मालाम्मा हिसिक्मा ( मात्ति २१:२०-२२ ) 20 हिट्नुङ् भेनिक् हिट्निलाम्मा येसु लोक् ओचेलाचि पाइलेना लाम्बो लिसा ओखाडानाँ उन्चिङा हिट्ना वामाखोक्पोङाना उभुङ्मा ओजारालाम्मा डोक् चोबाना उनिसुए॥ 21 येसुङा माट्टुएसुना रिङ् पाटरुसङा उनिङ्ग्वाङि मिट्टुउङ् उन् लोडुए, “काहिसिक्बा पुयुटे, खान्ङा साराप आपिडुना वामाखोक्पो उभुङ्मा चोबाउङ् सिएना रैछो॥” 22 येसुङा हिट्नागा लोडुचे, “माङ्हाङ्ङि बिस्वास चोगानुम्॥ 23 छेम्बा आङा खानि लोनाँनि, जुन्ङा उनिङ्ग्वाङि साङ्का मिचोक्ङे, टरो आप्पे उन्ङा माट्टुना रिङ् युयुक् नुङ् बिस्वास चोगुङ् ना झोन्झोन्बा ‘नाहिलाम्मा आङ्साडाउङ् सामुन्दराङि ठाया’ पिक्सा माट्टुए भोने, हिट्ना रिङ् उन्लोङ्सा हिट्डेडोक् लियुक्॥ 24 हिड्डेउङ् आङा खानि लोनाँनि, खानिङा बिन्टि आचोगिउङ् जेसुकै आनाक्टि चा हिट्ना टोगुम्मे नुङ् बिस्वास चोगानुम्, हिट्नुङ् हिट्ना खानिङाना लियुक्॥ 25 खानि बिन्टि चोक्मा बेला कोइ याप्मिलोक् ओचाफेन्ना लिसाइसे भोने हिट्ना याप्मि माफ पिडानुम्, हिट्डेउङ् टोनालोग्ङि युङ्ना माङ्हाङ् पाबाङा चा खानि पाप छेमा माचोगिबिडिटि॥ 26 [टरो खानिङा आरु माफ आपिनेट्निम्चिम् भोने, टोनालोग्ङि युङ्ना माङ्हाङ् पाबाङा चा खानिगा पाप छेमा माचोगिबिडिन्गा॥]” येसुङाना आधिकार बारे ( मात्ति २१:२३-२७ ; लुका २०:१-८ ) 27 येसु ओचेलाचिलोक् फेरि यरुसलेमङि आबे॥ हिट्नुङ् उन् माङ्ठानाङि याम्बा-नायाम्बा लाम्टियागोन्डाना बेला हिट्नि गाडुवाडाङ्बाचि, धारमाबिधि काहिसिक्बाचि, हिट्नुङ् याहुदि ओठेडोङ्चि उन् सोरि ओटाए॥ 28 हिट्नागाँ नाड्डे पिक्सा उसिलाप्टुए, “खान्ङा खोनालाम्मा आधिकार आटोगुङ् नागा टोॽवा आचोगुएट्टुना? नागा टोॽवा चोक्माना आधिकार खान् साङा मापिडेना?” 29 येसुङा हिट्नागा लोडुचे, “आङा चा खानि ठिक् रिङ् सिलाप्नाँनि, हिट्ना रिङ् आलोडिङे भोने, आङा खोना आधिकारङा नागा टोॽवा चोगुएट्टुङ्ना हिट्ना रिङ् खानि लोनाँनि॥ 30 लु माट्टानुम्, बाप्टिस्मा कापि युहान्नाङा बाप्टिस्मा पिमाना आधिकार खोनालाम्मा टोगुएना, टोनालोग्लाम्मा इ याप्मिचिलाम्मा इ?” 31 ना रिङ् ओखेम्सुङ् हिट्नागा उन्चि उन्चि नाड्डे रिङ्पान् ओचोगे, “हाट्ले आनि पाक् लोमाना? ‘टोनालोग्लाम्मा’ लोडुम् भोने, ‘पोङ् बाप्टिस्मा कापि युहान्ना बिस्वास आचोक्नेट्निम्ना टे?’ पिक्सा आसिलाप्युक्॥ 32 ‘याप्मिलाम्मा’ लोडुम् उपिगे, टरो नाड्डे लोमा हिट्नागा याप्मिचिलोक् उकिट्टे, पोङ्भोने सोब्बे याप्मिचिङा युहान्ना छेम्बाना माङ्काटा नुङ् ओमाट्टुए॥” 33 हिड्डेउङ् हिट्नागाँ येसु ओलोडुए, “खोलो आन्याँउम् ठाहा वाइना॥” हिट्नुङ् येसुङा हिट्नागा लोडुचे, “हिड्डे भोने आङा खोनालाम्मा आधिकार टोगुङुङ् नागा टोॽवा चोगुएट्टुङ्, हिट्ना आङा चा खानि लोनेनिन्गा॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.