मारकुस 10 - आठपहरियाभ्या हिट्नुङ् छुटानाम् बारे ( मात्ति १९:१-१२ ; लुका १६:१८ ) 1 हिट्ना डेन् नाडुङ् येसु यारदान होङ्ङाना याहाँपारा याहुदिया छेट्राङि खाडे॥ हिट्नि चा जोम् याप्मिचि उन् सोरि उछुमे, हिट्नुङ् उन्ङा साडे गाड्डे डोक् हिट्नागा चा हिसिक्मा ठालाँ चोगुचे॥ 2 आम्टेप्मा फारिसि याप्मिचि ओआबाउङ् उन् रिङ्ङि रेक्मा ओकोलुए, हिट्नुङ् हिट्नागाँ नाड्डे पिक्सा उसिलाप्टुए, “आडाङ्बा, पाक् आनि धारमाबिधिङा येम्बेछा याप्मिङा ओटालिमाङ् नामा लियुक् नि लिनिनै?” 3 येसुङा हिट्नागा लोडुचे, “पाक् चोक्मा कोन्युक्ना पिक्सा मोसाङा खानि आग्याँ मापिडेइसिएगा?” 4 हिट्नागाँ ओलोडुए, “मोसाङाउम्टे ‘खान् नाने ए’ पिक्सा ठिक् छुटानाम् कागाता छेप्टुङ् नामा हिडिटु” पिक्सा छेप्टुएसुए॥ 5 टरो येसुङा हिट्नागा लोडुचे, “हिट्नाउम्टे खानि निङ्ग्वा ठेक्टाउङ् हिड्डे खानि आग्याँ मापिडिगा॥ 6 टरो सिरिस्टिङाना उटुम्ङि याप्मि माङ्हाङ्ङा येम्बेछा लोक् मेन्झेमा चोगुचे॥ 7 हिट्डेउङ् येम्बेछाङा उप्पा-उमा नाडुचिउङ् ओटालिमाङ्लोक् टोङ्युक्, 8 हिट्नुङ् हिट्नागाचि इप्पाङ् ठिक्ए येम् लिचिचि॥ हाट्ले हिट्नागाचि फेरि इप्पाङ् माखाक्, टरो ठिक्ए येम् लिचिचि॥ 9 हिट्डेउङ् माङ्हाङ्ङा ठिक्ए चोगुचिगा याप्मिङा ओसाम्डुन्चिन् चा॥” 10 हिट्नुङ् येसु ओचेलाचिलोक् पाङ्ङि वासेट्टाना बेला ओचेलाचिङा फेरि ना रिङ्ङाना उटुप् पाइना पिक्सा उसिलाप्टुए॥ 11 उन्ङा हिट्नागा लोडुचे, “येम्बिछाङा भ्या चोगुना ओटालिमाङ् नाडुङ् आरको मेन्झेमा भ्या चोगुटु भोने हिट्नाँ पाइले भ्या चोगुना ओटालिमाङ् बिरुद्दाङि इम्मेप्माजामा टोॽवा चोगुटु॥ 12 हिट्डेडोक् मेन्झेमाङा चा ओपाङ्डाङ्बा नाडुङ् आरको येम्बिछालोक् भ्या चोगुटु भोने हिट्नाङा चा इम्मेप्माजामा टोॽवा चोगुटु॥” येसुङा पिच्छाचि आसिक्-मुसिक् पिडुचिगा ( मात्ति १९:१३-१५ ; लुका १८:१५-१७ ) 13 ठिक् लेम्बा याप्मिचिङा खाट्टियुगा पिच्छाचि येसुङा उमुक् युङ्सुङ् आसिक्-मुसिक् उपिडुचियाक् नुङ् उन् सोरि ओआप्टुचे, टरो ओचेलाचिङा ना उनिसुङ् हिट्नागा याप्मिचि खेमा ओलाप्टुचे॥ 14 टरो ना रिङ् निसुङ् येसुङाना ओयाग्लेडे, हिट्नुङ् हिट्नागा लोडुचे, “खाट्टिउगा पिच्छाचि आङि आप्मा पिडानुम्चिम्, हिट्नागा छाक्नेनुम्चिम्, पोङ्भोने नागा पिच्छाचि गाड्डे उलिगा याप्मिचिङा माङ्हाङ् उमुलुक्ङि लिग्मा ओटोगुटु॥ 15 छेम्बा डोक्, आङा खानि लोनाँनि, नागा खाटिटियुगा ओओचि गाड्डे उलियुङ् माङ्हाङ् उमुलुक् जुन्ङा लाडुन्ना, हिट्ना खोना बेला चा हिट्नि लिग्मा टोगुन्ना॥” 16 हिट्नुङ् येसुङा हिट्नागा पिच्छाचि ओकाखाङि युङ्सुचिउङ् हिट्नागा उठुङ्ङि उमुक् युङ्सुङ् आसिक्-मुसिक् पिडुचे॥ वागाठागा याप्मिङाना मुन्डुम् ( मात्ति १९:१६-३० ; लुका १८:१८-३० ) 17 येसु लाम्बोङि खाडागेट्टाना बेला ठिबाङ् याप्मि पिन्सा आबाउङ् येसु ओटोकानाङि गुङ् चोगाउङ् उन् सिलाप्टुए, “हाउ काहिसिक्बा, खान् नुना याप्मि, आङा पाक् चोगुङ्ना लाट्निना चोला टुबुङ्टुङ्ना टे?” 18 येसुङा हिट्ना लोडुए, “खान्ङा पोङ् आङा नुना याप्मि याङ्आलोङाना? माङ्हाङ् माले साक्चा नुना वाइना॥ 19 खान्ङा नागा आग्याँचिउम् ठाहा आटोगुएसुएनि– ‘इम्मेप्माजामा टोॽवा चोक्मा लिनिना, याप्मिचि सेप्मा लिनिना, याङ्खुट्मा लिनिना, माङ्जो चेक्मा लिनिना, कासुप्बा टोॽवा चोक्मा लिनिना, हिट्नुङ् पाबा-मामा मान् चोगुचि॥’” 20 हिट्ना याप्मिङा माट्टुए, “काहिसिक्बा, नागा सोब्बे आग्याँचिउम् टे आङा ठाङ्बेन् लिसाउङ् डोक् टेन्सा चोगुएट्टुङ्॥” 21 हिट्डेना रिङ् खेम्सुङ् येसुङा हिट्ना पुयुए हिट्नुङ् माया चोगुङ् लोडुए, “खान्ङा आझै ठिक् टोॽवा चोक्माना युङ्ग्वा॥ खाडा, हिट्नुङ् खान्लोक् युङ्ग्वागा ख्वाप्पा माक्फेन्सुबेन् छोङ्सुङ् पाक्चा ओवानिगालोङ्सा हान्डुबिडुचि, हिट्नुङ् खान्ङा टोनालोग्ङि माक्फेन्सुबेन् आटोगुटु हिट्नुङ् आबा, आएङ् आएङ् लाम्टिए॥” 22 टरो ना रिङ् खेम्सुङ् हिट्नाङा ओनाभाक् खोयोप् चोगुए, हिट्नुङ् आड्डिक् उनिङ्ग्वा टुक्सा खाडे, पोङ्भोने हिट्ना जोम् माक्फेन्सुबेन् लिसाना याप्मि डाना॥ 23 हिट्नुङ् येसुङा सोब्बेलेङ् पुयुङ् ओचेलाचि लोडुचे, “वागाठागा याप्मि लोङ्सा माङ्हाङ् उमुलुक्ङि लिग्मा आड्डिक् टुक्ना॥” 24 येसुङाना रिङ् ओखेम्सुङ् चेलाचि डोङ् आठोङ्डे॥ हिट्नुङ् येसुङा फेरि हिट्नागा लोडुचे, “हाउ पिच्छाचि, माङ्हाङ् उमुलुक्ङि लिक्मा आड्डिक् टुक्ना॥ 25 छेम्बा डोक्, वागाठागा याप्मि माङ्हाङ् उमुलुक्ङि लिक्मा नुङ्ना उँटा छोमेट् उनाभुक्लाम्मा लिग्मा टुक्निना॥” 26 ना रिङ् ओखेम्सुङ् चेलाचि माङ्डोङ् ओठोङ्डे हिट्नुङ् उन्चि उन्चि उपिगे, “हिट्डे भोने साक्ङाम्बाक् मुक्टि टोगुटुना टे?” 27 उन्ङा हिट्नागा पुयुचिउङ् लोडुचे, “याप्मिचिङा चोक्मा उहिडुन्चा माङ्हाङ्ङा चोक्मा हिडिटु, पोङ्भोने माङ्हाङ्ङा सोब्बे रिङ् चोक्मा हिडुटु॥” 28 हिट्नुङ् पाटरुसङा लोडुए, “खेम्सु टे, आन्याँलोक् युङागा ख्वाप्पा रिङ्चि नाडुमुङ् आन्याँ काचेला लिसेसिङे॥” 29 येसुङा ओचेलाचि लोडुचे, “छेम्बा डोक्, आङा खानि लोनाँनि, आङालोङ्सा हिट्नुङ् नुना खाबोर लोङ्सा जुन्ङा ओपाङ्ठाङ्, उप्पा-उमा, उम्भु-उन्झा, उना-उन्झा, उइछाचि, हिट्नुङ् स्वाँरा नाडुटु, 30 हिट्नाँ याङ्छामा चा हिट्नुङ् ना बेला डोक् साए गुना नुङ्ना चा जोम् पाङ्ठाङ्, पाबा-मामा, भुम्भु-झान्झा, नाना-झान्झा, छाचि हिट्नुङ् स्वाँरा टोगुटु, हिट्नुङ् टाना जुगङि लाट्निना चोला टोगुटु॥ 31 टरो हाट्ले याप्मा पाइले उलिसागा एङ्स्वा उलियुक्, हिट्नुङ् एङ्स्वा उलिगाउम्बाक् पाइले उलियुक्॥” येसुङा उन् सिना बारेङि माट्टुना ( मात्ति २०:१७-१९ ; लुका १८:३१-३४ ) 32 येसु हिट्नुङ् ओचेलाचि यरुसलेमलेङ् ओखाडागेट्टागा, हिट्नुङ् येसुम्बाक् उन्चि टोकाना टोकाना लाम्टियेट्टाना॥ ओचेलाचिम्बाक् डोङ् ओठोङ्डाइसागा, हिट्नुङ् ओएङ्सुवा एङ्सुवा ओआबागेट्टागा याप्मिचिउम्बाक् उकिट्टाइसागा॥ हिट्नुङ् येसुङा बारो जाना ओचेलाचि आरकोलेङ् खाट्टुचिउङ् उन्ङा दुखे आङ्माना रिङ् बारेङि नाड्डे लोडुचे, 33 “खेम्सानुम्, आनि यरुसलेम खाडिगेट्टि॥ हिट्नि याप्मि छा याप्मिचिङा गाडुवाडाङ्बाचि हिट्नुङ् धारमाबिधि काहिसिक्बाचि मुक्ङि उपिडुटु, हिट्नुङ् हिट्नागाँ ओसेडुटु, हिट्नुङ् पानिछोङ्बाचि मुक्ङि जिम्मा उपिडुटु॥ 34 हिट्नुङ् हिट्नागाँ खिजेक्पा ओचाट्टुटु, ठ्या ओठोक्टुटु, कोररा लाहाब् ओचोगुटु हिट्नुङ् ओसेडुटु॥ टरो सुम्बोक् लेम्बा याप्मि छा फेरि उहिङ्ग्वाट् लियुङ् कोब्युक्॥” याकुब हिट्नुङ् युहान्नाङाना बिन्टि ( मात्ति २०:२०-२८ ) 35 हिट्नुङ्ना जाब्दियाङाना इप्पाङ् उइछाचि याकुब लोक् युहान्ना येसु सोरि आबाचिउङ् लोडाचुए, “काहिसिक्बा, आन्च्याँ निङ्ग्वाङिना रिङ् याप्मि युडाबिडा पिक्सा हिट्ना रिङ् खान्ङि बिन्टि ठाङ्सिङा आबाइसाचिङे॥” 36 येसुङा सिलाप्टुचे, “पाक् रिङ् खान्चि लोङ्सा आङा चोगुङ्ना नुङ् खान्चि निङ्ग्वाङि युङ्ग्वाना?” 37 हिट्नागाचिङा लोडाचुए, “खान् माहिमित सिङासान्ङि आयुङ्ना बेला आन्च्याँ माड्डे ठिबाङ् खान्ङाना छुप्टाङ्लेङ् हिट्नुङ् आरको फेन्साङ्लेङ् युङ्मा याप्मिपिडा॥” 38 टरो येसुङा हिट्नागाचि लोडुचे, “खान्चि पाक् आनाक्चेट्चिगा हिट्ना बुजा डोक् आचोक्चुन्गेट्चुन्गा॥ पाक् आङा ठुङुङ्ना याङ्छामाङाना खोरे खान्चिङा ठुङ्मा आहिचुचुगि? आथाबा पाक् आङा चोगुङ्ना बाप्टिस्मा खान्चिङा चोक्मा आहिचुचुनि?” 39 हिट्नागाचिङा माट्टाचुए, “आए, आन्च्याँ चोक्मा हिचुचुङा॥” हिट्नुङ् येसुङा हिट्नागाचि लोडुचे, “छेम्बा डोक्, आङा ठुङुङ्ना खोरे खान्चिङा चा आठुङ्चुचु, हिट्नुङ् आङा लाडुङ्ना बाप्टिस्मा खान्चिङा चा आलाट्चुचु॥ 40 टरो साक् आङाना आछुप्टाङ्लेङ् हिट्नुङ् फेन्साङ्लेङ् युङ्मा पिमाउम्बाक् आङाना माखाक्, टरो नाउम् साक् साक् लोङ्सा टेयार लिसाइसे, हिट्नागा लोङ्सा एरोक् लियुक्॥” 41 ना रिङ् आरु ठिमेक् जाना चेलाचिङा ओखेम्सुङ् याकुब हिट्नुङ् युहान्नालोक् उन्चि याग्लेडे॥ 42 हिट्नुङ् येसुङा हिट्नागा सोब्बे उन्ङि छेम्डुचिउङ् लोडुचे, “नाराङिगा सासाक्चिङा उन्चि याप्मिचि उठुङ्ङि सासान् ओचोगुगा हिट्नुङ् ठेगा ठालुचिङा उन्चि उछिक्ङि उलिसागा याप्मिचि माइधा उनिप्टुचिगा रिङ् खानिङा आनिसुएसुम्मे॥ 43 टरो खानिङिउम्बाक् हिट्डे लिनिना॥ खानि माड्डे ओठेडोङ् लिमा निङ्ग्वा काचोक्बाङा सोब्बेङाना सेवा चोक्मा कोन्युक्॥ 44 हिट्नुङ् खानिङि पाइले लिमा निङ्ग्वा काचोक्बा सोब्बेङाना चाकार लिमा कोन्युक्॥ 45 पोङ्भोने याप्मि छा आरुलाम्मा सेवा टोक्मालोङ्सा माखाक्, टरो आरु सेवा चोक्मा हिट्नुङ् जोम् याप्मिचि छुट्कारा पिमा आप्पे ओसोक्मा लेट्मा लोङ्सा टायाना॥” याङ्कानिनिबा बारतिमै याप्मि ( मात्ति २०:२९-३४ ; लुका १८:३५-४३ ) 46 येसु ओचेलाचिलोक् यारिहो ओलोडुना खालाङ्गा होन्डा टाए॥ जोम् याप्मिचिगा खिमेयाङ्मे यारिहो खालाङ्गालाम्मा खाडागेट्टाना बेला हिट्नि तिमै ओलोडुना याप्मिङाना उइछा याङ्कानिनिबा बारतिमै ओलोडुना याङ्कानाक् याप्मि लाम्बो सोरि युङासाना॥ 47 जब हिट्ना याप्मिङा नासारात खालाङ्गाङिना येसु टायाना रिङ् खेम्सुए हिट्नुङ् राट्सा पिगे, “हाउ दाउद पुङ्लाङिना येसु, आङा लुक्मा याङ्टुक्टा!” 48 जोम् याप्मिचिङा हिट्ना स्वाग् युङा पिक्सा खेमा ओलाप्टुए॥ टरो हिट्ना झान् टुक्लोक् राट्टाउङ् पिगे, “हाउ दाउद पुङ्लाङिना येसु, लुक्मा याङ्टुक्टा!” 49 हिट्नुङ् येसु लाम्टियागेट्टाना बेला उन् येबे हिट्नुङ् लोडुचे, “हिट्ना नाहि छेम्डानुम्॥” हिट्नुङ् याप्मिचिङा हिट्ना ओछेम्डुङ् ओलोडुए, “खान् हारका लिसा, येसुङा खान् माछेम्येट्, कोबाउङ् एला आबा॥” 50 हिट्नुङ् हिट्नाङा ओखास्टो लेप्टुङ् मुच्चोक् वाच्चोक् कोबे हिट्नुङ् येसु सोरि खाडे॥ 51 येसुङा हिट्ना सिलाप्टुए, “खान् लोङ्सा आङा पाक् चोगुङ्ना नुङ् आमिट्युक्ना?” हिट्ना याङ्कानिनिबाङा उन् लोडुए, “काहिसिक्बा, आङा याङ्उनिसुङ्॥” 52 येसुङा लोडुए, “कालाम्बो खाडा, खान्ङा बिस्वास आचोगुनाँ खान् आनुए॥” हिट्ना बेला डोक् हिट्नाँ याङ्निसुए, हिट्नुङ् येसुङा ओएङ्-ओएङ् खाडे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.