मात्ति 18 - आठपहरियासोब्बे नुङ्ना ठेना साइना? ( मारकुस ९:३३-३७ ; लुका ९:४६-४८ ) 1 हिट्ना बेला चेलाचि ओआबाउङ् येसु उसिलाप्टुए, “टोनालोग्ङिना मुलुक्ङि सोब्बे नुङ्ना ठेना साइना?” 2 उन्ङा ठिबाङ् खाट्टियुना पिच्छा छेम्डुङ् उन्चि माझाङि येप्मेट्टुए, 3 हिट्नुङ् लोडुचे, “छेम्बा आङा खानि लोनाँनि, खानिङा निङ्ग्वा आनोक्टुमुङ् नागा पिच्छाचि गाड्डे खानि आलिसिएट्टिन् भोने, खानि काइले चा टोनालोग्ङिना मुलुक्ङि लिक्मा आटोग्निम्ना॥ 4 हिट्डेउङ् साक्ङा आप्पेलाउङ्सा ना खाट्टिउना पिच्छा गाड्डे मेयोक् चोगुटु, हिट्ना याप्मि एरोक् टोनालोग्ङिना मुलुक्ङि सोब्बे नुङ्ना ठेना लियुक्॥ 5 हिट्नुङ् जुन्ङा आनिङ्ङि नाड्डेगा ओओचि स्वागाट् चोगुचिचि, हिट्नाङा आङा डोक् स्वागाट् याङ्चोक्युक्॥ पापङाना बारे हिसिक्मा ( मारकुस ९:४२-४८ ; लुका १७:१-२ ) 6 “टरो जुन्ङा आङि बिस्वास काचोक्चि नागा खाट्टियुगा माड्डे ठिबाङ् पाप चोक्मा मेट्टुटु भोने, हिट्नाङा ओठोॽवारिक्ङि ठेना लुङ्गेॽवाङाना झाँटा छुडुमुङ् गाइरो सामुन्दराङि लुम्माडिमा हिट्ना लोङ्सा ओचेट्नुना लियुक्॥ 7 इनाबा, ना नारालोङ्सा! पोङ्भोने ना नाराङि याप्मिचि पापङाना वारिक्ङि ठेम्माना रिङ्चि उयुङ्ग्वा॥ पापङाना वारिक्ङि ठेम्माना रिङ्चिउम् टायुक्, टरो इनाबा, हिट्ना याप्मिलाउङ्सा जुन्लाम्मा पाप चोक्मा मेप्माना वारिक् टायुक्॥ 8 “कामुक् आथाबा कालाङ्ङा पाप चोक्मा खान् मामेट्युक् भोने, हिट्ना खोक्टुङ् लेप्टुडिसु॥ इप्पोक् डोक् कामुक् आथाबा इप्पोक् डोक् कालाङ् खोना बेला चा सिनिना मिङि ठामा नुङ्ना ठिक् मुक् माले हिट्नुङ् खोट्लेङ्बा लिमाउङ् लाट्निना चोलाङि लिग्मा खान् लाउङ्सा नुलोक् लियुक्॥ 9 हिट्नुङ् कामिक्ङा पाप चोक्मा मामेट्युक् भोने हिट्ना चा होट्टुङ् लेप्टुडिसु॥ इप्पोक् कामिक् डोक् योनालोग्ङिना मिङि ठामा नुङ्ना ठिक् मिक् माले लाट्निना चोलाङि लिग्मा खान् लाउङ्सा नुना लियुक्॥ मासाना ठुँबा ( लुका १५:३-७ ) 10 “ओछेक्छेक् युङानि, खानिङा नागा खाट्टिउगा पिच्छाचि माड्डेङि ठिबाङ् चा आङ्छाप्मा मेट्नेनुम्चिम्॥ पोङ्भोने आङा खानि लोनाँनि, टोनालोग्ङि हिट्नागाँगा माङ्हाङ् रिङ् काउग्बाचि सोरोक् टोनालोक्ङि युङ्ना आङाना पाबा ओटोकानाङि डोक् ओवाएट्॥ 11 [पोङ्भोने याप्मि छा ओमासागा हिङ्मेप्मा लाउङ्सा टायाना ए॥] 12 “खानि पाक् आमिट्टिटिगा? ठिबाङ् याप्मिङाना साए गोटा ठुँबाचिङि ठिक् ठुँबा मासे भोने, हिट्ना पाक् चोक्युक्ना होला? हिट्नाङा उनान्साए गोटा ठुँबाचि हिट्नि पाखाङि डोक् पोक्टुढोचिउङ् मासाना ठुँबा कोन्सिङा खाट्निनै टे? 13 छेम्बा डोक्, आङा खानि लोनाँनि, हिट्नाँ मासाना ठुँबा टुबुए भोने हिट्नागा उनान्साए गोटा ठुँबाचि नुङ्ना चा हिट्ना टुबुना ठिक् ठुँबा लाउङ्सा उन्ङाना आड्डिक् उचाप् टायुक्॥ 14 हिड्नाड्डे डोक् टोनालोग्ङि युङ्ना आङाना पाबाङाना नागा ओखाट्टिउगा माड्डेङि ठिबाङ् चा जाखाम् उलिनि नुङ् उनिङ्ग्वा युङ्ग्वा॥ एकेलेङ् काचोक् झान्झा ( लुका १७:३ ) 15 “कोइ बिस्वासिङा खान्ङाना बिरुद्दाङि पाप चोगुए भोने, खाडाउङ् खान्चि एरोक् आलिचिना बेला हिट्नाँ चोगुना एकेलेङ्ना रिङ् निमेट्टु॥ हिट्नाँ कारिङ् खेम्सुए भोने उन् खान्लेङ् आनोक्टुटु॥ 16 टरो हिट्नाङा कारिङ् खेम्स्वाट्टुन् भोने, खान्लोक् आरु ठिबाङ् आथाबा इप्पाङ् खाट्टुचिउङ् खाडा, हिट्नुङ् हिट्ना रिङ् इप्पाङ् आथाबा सुम्बाङ् जाना साँचिलाम्मा टोङ्सानुम्॥ 17 हिट्नाङा उन्चिगा रिङ् चा खेम्स्वाट्टुन् भोने माङ्पाङ्ङि खाडाउङ् लोडुचि॥ हिट्नुङ् माङ्पाङ्ङिगा याप्मिचिगा रिङ् चा हिट्नाङा खेम्स्वाट्टुन् भोने, आबिस्वासि याप्मि हिट्नुङ् तिरो काफोक्बा याप्मि गाड्डे डोक् चाट्ला मेट्टु॥ 18 “छेम्बा डोक्, आङा खानि लोनाँनि, जे खानिङा नाराङि आरेक्टुम्टुम् हिट्ना रिङ् डोक् टोनालोग्ङि चा रेक्युक्॥ हिट्नुङ् जे खानिङा नाराङि आसेन्डुम्टुम् हिट्ना रिङ् टोनालोग्ङि चा सेन्युक्॥ 19 हिट्नुङ् आङा खानि फेरि लोनाँनि, ना नाराङि खानि माड्डे इप्पाङ् आटोङाचिउङ् पालोवालो आनाक्टाचुए भोने, टोनालोग्ङिना आङाना पाबाङा हिट्ना मापिचिचि॥ 20 पोङ्भोने खोनि इप्पाङ् आथाबा सुम्बाङ् आनिङ्ङि उछुम्युक्, आङा हिट्नागा माझाङि लिङा॥” दुस्टा चाकारङाना मुन्डुम् ( लुका १७:४ ) 21 पाटरुसङा येसु सिलाप्टुए, “आडाङ्बा, कोइङा आङाना बिरुद्दाङि पाप चोगुयाक्टुए भोने, आम्टेप्मा खेप् सोम्मा माफ पिमाना? पाक् सि खेप् सोम्मा इ?” 22 येसुङा हिट्ना लोडुए, “आङा खान् लोनाँ, सि खेप् एडोक् माखाक्, टरो सात्तारि गुना सि खेप् सोम्मा॥ 23 हिट्डेउङ् टोनालोग्ङिना मुलुक् ठिबाङ् हाङ्बालोक् टोङ्मा हिडिम्टुम्, हिट्ना हाङ्बाङा ओचाकारचिङा उन्लाम्मा खाट्टुना नाॽवाङाना हिसाबकिताब हिट्नालाम्मा नाक्माना निङ्ग्वा चोगुटु॥ 24 हिट्ना हाङ्बाङा हारहिसाब् लाडुना बेला ठिमेक् हाजार साम्मेङ्ङाना राङ् नाॽवा खाट्टुना ठिबाङ् चाकार उन् सोरि ओआप्टुए॥ 25 टरो हिट्ना याप्मिङा ओनाॽवा हुङ्मा हिडुवाट्टुन्, हिट्नुङ् ओडाङ्बाङा खान् आप्पे हिट्नुङ् ओपाङ्ढाङ्मा हिट्नुङ् ओछालेट्चि हिट्नुङ् हिट्नाङाना सोब्बे थोक्चि छोङ्सानुमुङ् नाॽवा हुङानुम् पिक्सा लोडुचे॥ 26 हिट्डेउङ् हिट्ना चाकार हाङ्बा ओटोकानाङि आबाउङ् नाड्डे पिक्सा बिन्टि ठाङ्सुए, ‘आडाङ्बा, होप्मो लेम्बा सोम्मा याङ्हाङ्सा, आङा सोब्बे कानाॽवा हुङुङ्टुङ्॥’ 27 हिट्नुङ् ओडाङ्बाङा हिट्ना लुक्मा टुक्टुङ् हिट्नाङा हुङ्माना सोब्बे नाॽवा छेमा चोगुबिडुए हिट्नुङ् हिट्ना लेडुडिसुए॥ 28 “टब हिट्ना चाकार खाडे, हिट्नुङ् उन्लोक् एकेउ टोॽवा काचोक् चाकारचि माड्डे ठिबाङ् टुबुए, हिट्ना ओसाइबाङा उन्लाम्मा ठिक् साए रुपा राङ् नाॽवा लोगुएसुना डाना॥ हिट्नुङ् हिट्नाङा ओसाङ्मारि लाबुङ् लोडुए, ‘आङालाम्मा आखाट्टुना आनाॽवा हुङुलेट्टु॥’ 29 हिट्ना चाकारङा ओसाइबा ओटोकानाङि खाडाउङ् गुङ् चोगाउङ् नाड्डे पिक्सा बिन्टि चोगुए, ‘होप्मो बेला सोम्मा याङ्हाङ्सा, आङा सोब्बे कानाॽवा हुङुङ्टुङ्॥’ 30 टरो हिट्नाङा उरिङ् खेम्स्वाट्टुन्, हिट्नुङ् खाडाउङ् नाॽवा मिहुङ्ङे सोम्मा हिट्ना खाम्बाङ्ङि ठेन्डुए॥ 31 “आरु ओसाइबाचिङा उन्ङा चोगुना रिङ् उनिसुए, हिट्नुङ् उन्चि निङ्ग्वा आड्डिक् टुगे॥ हिट्नुङ् हिट्नागा ओखाडाउङ् नागा सोब्बे रिङ्चि उन्चि डाङ्बा ओखेम्मेट्टुए॥ 32 हिट्नुङ् डाङ्बाङा हिट्ना चाकार छेम्डुङ् लोडुए, ‘हाउ भेन्ना चाकार, खान्ङा आङि बिन्टि आठाङ्सुनाँ आङा ख्वाप्पा कानाॽवा छेमा चोग्नाबिने॥ 33 आङा खान् लुक्मा टुक्ना गाड्डे डोक् खान्ङा चा कासाइबा चाकार लुक्माटुक्मा कोन्नि नै टे?’ 34 हिट्नुङ् हिट्ना डाङ्बाङाना आड्डिक् ओयाक् लेडाउङ् हिट्ना चाकार साजाए पिमा नाॽवा मिहुङ्ङे सोम्मा खाम्बाङ्ङि ठेन्डानुम् पिक्सा लोडुचे॥” 35 हिट्नुङ्ना येसुङा नाड्डे माट्टुए, “खानिङा कोइ याप्मि खानि निङ्ग्वालाम्मा डोक् माफ आपिनेएटनिम्चिम् भोने, टोनालोग्ङिना आङाना पाबाङा चा खानि हिड्डे डोक् माचोगिटि॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.