मात्ति 10 - आठपहरियामुलिचेलाचिगा टोॽवा ( मारकुस ३:१३-१९ ; ६:७-१३ ; लुका ६:१२-१६ ; ९:२-६ ) 1 येसुङा बारो जाना ओचेलाचि छेम्डुचिउङ् ओचाफेन्ना रिमेट्चि होप्माना हिट्नुङ् सोब्बे पारिक्ङागा रोगा लोक् टुखुमाङ्चि नुमानिङ् चोक्माना आधिकार हिट्नागा पिडुचे॥ 2 नागा बारो जाना मुलिचेलाचिगा निङ् नागा डोक् ए– पाइलेनाम्बाक् पाटरुस ओलोडुना सिमोन हिट्नुङ् उन्झा आन्दरियास, हिट्नुङ् जाब्दियाङाना उइछाचि याकुब लोक् उन्झा युहान्ना, 3 फिलिप हिट्नुङ् बारथोलोमाइ, थोमा लोक् तिरो काफोक्बा मात्ति, आल्फायासङाना उइछा याकुब, थेदियास, 4 देस भाक्ता सिमोन हिट्नुङ् याहुदा इस्कारियोत, नाङा हान्डेङ् येसु धोका पिडुए॥ 5 येसुङा हिट्नागा बारो जाना ओचेलाचि नाट्डे आग्याँ पिडुचिउङ् पाङ्सुचे, “खानि पानिछोङ्बाचि माझाङि खाट्नेनिन्, हिट्नुङ् सामारिचिगा खालाङ्गाङि लिक्नेनिन्॥ 6 टरो इस्राएलङिगा याप्मिचिङि खाडानि, हिट्नागा ओमासागा ठुँबाचि गाड्डे डोक् उलिसाइसे॥ 7 हिट्नुङ् याप्मिचिलोङ्सा ‘टोनालोग्ङिना मुलुक् नेहेट्टाङ् टाइसे,’ पिक्सा पारचार चोगानुम्॥ 8 टुखुमाङ्चि नुमेट्टानुम्चिम्, उसियागा उहिङ्ग्वाट् चोगानुम्चिम्, कुस्टा रोगिचि चोख्याँ चोगानुम्चिम्, हिट्नुङ् ओचाफेन्ना रिमेट्चि होट्टानुम्चिम्॥ खानिङा खेडोक् आटोगुम्मे, हिट्नुङ् खेडोक् डोक् पिडानुम्चिम्॥ 9 खानिङा साम्याङ्, रुपा लोक् टाँबोङाना राङ् खानि फोॽइङि खुनेनुम्, 10 पोङ्भोने टोॽवालासि काचोक्बाङा चामासिङ् थोक् टोक्मा डोक् कोन्युक्॥ हिट्नुङ् लाम्बो लोङ्सा जाप्रामा, आरु फेरफारे लोट्लिङ्, लाङ्सुप्, लाहुरिक् खुनेनुम्॥ 11 “खानि युक्टाम्ङि हिट्नुङ् खालाङ्गाङि आलिगिनाँ, हिट्नि स्वागाट् काचोक्बा याप्मि कोलानुम्, हिट्नुङ् हिट्निलाम्मा आसेन्डिन्लोक् सोम्मा हिट्नि डोक् युङानि॥ 12 हिट्ना पाङ्ङि आलिगिनाँ हिट्ना पाङ्ङिगा याप्मिचि स्या मेट्टानुम्चिम्॥ 13 हिट्ना पाङ्ङिगा याप्मिचिङा खानि स्वागाट् माचोगिए भोने, आसिक्ङा हिट्नागा खोना बेला चा नाडुन्चिन्गा॥ टरो हिट्ना पाङ्ङिगा याप्मिचिङा स्वागाट् माचोग्याट्टिन् भोने, आसिक् खानिलेङ् डोक् नोक्युक्॥ 14 खानि साङा चा स्वागाट् माचोग्याट्टिन् आथाबा खानि रिङ् ओखेम्स्वाट्टुन् भोने, हिट्ना पाङ् आथाबा खालाङ्गालाम्मा आहोन्डिनाँ खानि लाङ्ङि नुप्टागा खाम्धारि हिट्नि डोक् ठाम्साढानुम्॥ 15 छेम्बा डोक्, आङा खानि लोनाँनि, न्याएङाना लेम्बा माङ्हाङ्ङा सादोम लोक् गामोरा खालाङ्गाङिगा याप्मिचि साजाए पिडुचिना नुङ्ना जोम् साजाए हिट्ना खालाङ्गाङिगा याप्मिचि पिडुचिचि॥ टायुगेट्ना याङ्छामा बारे ( मारकुस १३:९-१३ ; लुका २१:१२-१७ ) 16 “खेम्सानुम्, आङा खानि ब्वाँसोचिगा माझै ठुँबा गाड्डे डोक् पाङ्नागेट्नानि, हिट्डेउङ् खानि ओप्पु गाड्डे ओचाप्पाङ् हिट्नुङ् ढुकुर गाड्डे सोझो लिसानि॥ 17 याप्मिचिलाम्मा ओछेक्छेक् चोगानि, पोङ्भोने हिट्नागाँ खानि मालाबिउङ् आड्डा आदालातङि माखाट्टिटि, हिट्नुङ् हिट्नागाँगा छुम्मापाङ्ङि माखाट्टिउङ् खानि कोरराङा मालेम्सिटि॥ 18 आङि बिस्वास आचोगुम्नाँ हिट्नागाँ ठेगा हाकिम हिट्नुङ् हाङ्बाचि टोकानाङि खानि माखाट्टिटि॥ हिट्नुङ् खानिङा हिट्नागालोङ्सा हिट्नुङ् पानिछोङ्बाचि लोङ्सा आङाना बारेङि माप्मा कोन्युक्॥ 19 जब हिट्नागाँ खानि मालाबिउङ् माखाट्टिनाँ खोड्डे पारा हिट्नुङ् पाक् माप्माना नुङ् सुरटा चोक्नेनिन्, पोङ्भोने खानिङा पाक् चेक्मा कोन्युक्ना हिट्ना बेला डोक् खानि मालोडिटि॥ 20 पोङ्भोने हिट्ना बेला खानि आप्पे आचेक्टिन्गा, टरो खानि माङ्हाङ् पाबाङाना हाङ्सा खानिलाम्मा लियुङ् चेक्युक्॥ 21 “भुम्भु-झान्झाचिङा आप्पे भुम्भु-झान्झाचि सेप्मालाउङ्सा उपिडुचिचि, हिट्नुङ् पाबाङा उइछाचि हिट्नुङ् उइछाचि पाबा-मामाचि बिरुद्दाङि ओकोब्युक् हिट्नुङ् हिट्नागा सेप्मा ओमेट्टुचिचि॥ 22 आङि बिस्वास आचोगुम्नाँ सोब्बे याप्मिचिङा खानि चिम्मा माफुट्टिटि॥ टरो आन्ते सोम्मा बिस्वास चोगुयाक्टुनाम्बाक् हिङ्युक्॥ 23 जब याप्मिचिङा खानि ठिक् खालाङ्गाङि याङ्छामा माचाट्टिए भोने, हिट्निलाम्मा आरको खालाङ्गाङि पिन्डा खाडानि॥ छेम्बा आङा खानि लोनाँनि, याप्मि छा टामा नुङ्ना पाइले खानिङा इस्राएलङिगा सोब्बे खालाङ्गाङि खानिङा टोॽवा चोक्मा आहिनिम्ना॥ 24 “खोना चेला चा काहिसिक्बा नुङ्ना ठेना लिनिना हिट्नुङ् चाकार ओडाङ्बा नुङ्ना ठेना लिनिना॥ 25 नाड्डेउङ् चेला उन् काहिसिक्बा गाड्डे हिट्नुङ् चाकार ओडाङ्बा गाड्डे लिमा टोक्मा डोक् हारका लिमा कोन्युक्॥ हिट्नुङ् हिट्नागाँ पाङ् ओडाङ्बा डोक् बालजिबुल नुङ् ओलोडुटु भोने, ओपाङ्ङिगा याप्मिचिउङ् झान् आम्टेप्मा जोम् ओचाफेन्लोक् ओलोडुचिचि॥ किप्माना बारे ( लुका १२:२-७ ) 26 “नाड्डेउङ् याप्मिचिलोक् खानि किट्नेनिन्॥ पोङ्भोने टेप्टुङ् ओठेट्निगा रिङ् आम्टेप्मा उयुङ्ग्वा, हिट्नागा सोब्बे ओठेट्युक् हिट्नुङ् ठोबाइसागा रिङ् आम्टेप्मा उयुङ्ग्वा हिट्ना सोब्बेङा ठाहा ओटोगुटु॥ 27 आङा खानि डुम्बारिक् डुम्ङि लोनानिगा रिङ् खानिङा व्हाङ्ङि सोब्बे खेम्मेट्टानुम्चिम्, हिट्नुङ् खानि सोगोप् लोनानिगा रिङ् ख्वाप्पाङा ओखेम्सुलोक् ठेना साब्दाङि पारचार चोगानुम्॥ 28 खानि येम् एडोक् कासेप्बाचिलोक् किट्नेनिन्, टरो हिट्नागाँ खानि हाङ्सा सेप्मा उहिडुन्ना॥ नाड्डेउङ् हाङ्सा लोक् येम् इप्पोक् डोक् योनालोग्ङि जाखाम् चोग्मा हिडुना माङ्हाङ्लोक् किट्टानि॥ 29 पाक् इप्पोक् भाङ्गेरा एक पाइसाङि छुक्निनै टे? हिट्नुङ्चा हिट्नागा माड्डे ठिक्ए भाङ्गेरा चा खानि माङ्हाङ् पाबाङाना उनिङ्ग्वा माले सिनिना॥ 30 हिट्नुङ् माङ्हाङ्ङाम्टे खानि टेहेक्ङिना ठिक्-ठिक् फ्याक् चा नेडेसुए॥ 31 हिट्डेउङ् खानि किट्नेनिन्, खानि जोम् भाङ्गेराचि नुङ्ना चा आड्डिक् बाहुमुल्ले ए॥ 32 “नाड्डेउङ् खोनाङा याप्मिचि सोरि आङा याङ्लाड्युक्, आङा चा हिट्ना टोनालोग्ङि युङ्ना आङाना पाबाङाना ओटोकानाङि लाडुङ्टुङ्॥ 33 टरो खोनाङा आङा याप्मिचि सोरि इन्कार याङ्ओचोक्युक्, आङा चा हिट्ना टोनालोग्ङि युङ्ना आङाना पाबाङाना ओटोकानाङि इन्कार चोगुङ्टुङ्॥ चेला लिमा हुङ्माना मुल्ये ( लुका १२:५१-५३ ; १४:२६-२७ ) 34 “आङा नाराङिगा याप्मिचि हाङ्हाङ् पिमा लोङ्सा टायाङ्ना नुङ् मिट्नेनिन्॥ हाङ्हाङ् पिमा माखाक्, टरो आङाम्टे चेप्सा चालाँ चोक्ङा टायाङ्ना॥ 35 आङाउम्टे उइछा आप्पे उप्पाङाना बिरुद्दाङि, उइछा उमाङाना बिरुद्दाङि, हिट्नुङ् ओपाङ्लुमेट् ओनाम्मा बिरुद्दाङि फोक्माउङ्सा टायाङ्ना॥ 36 याप्मिङाना ओसाट्टुरम्बाक् आप्पे ओपाङ्ङिगा ओजाहान्चि डोक् उलियुक्॥ 37 “साङा आङा नुङ्ना याप्मा आप्पे उप्पा आथाबा उमा माया चोगुटु, हिट्ना आङाना आचेला लिमा नुना लिनिना॥ हिट्नुङ् साङा आङा नुङ्ना याप्मा उइछाचि माया चोगुचिचि भोने, हिट्नालोङ्सा आचेला लिमा नुना लिनिना॥ 38 हिट्नुङ् आप्पे उखाप्चे खुयुङ् आङाना आएङ् आएङ् लाहाब् लिनेट्नि भोने, हिट्ना आचेला लिमा नुना लिनिना॥ 39 जुन्ङा आप्पे ओचोला हिङ्मा कोलुटु, हिट्नाङा हिट्ना मासुटु, हिट्नुङ् आङालोङ्सा ओचोला जाखाम् चोगुटु भोने, हिट्नाँ हिङुटु॥ इनाम् बारे ( मारकुस ९:४१ ; लुका १०:१६ ) 40 “जुन्ङा खानि स्वागाट् माचोगिटि आङा चा स्वागाट् याङ्ओचोक्युक्, हिट्नुङ् आङा स्वागाट् काचोक्बाङा आङा कापाङ्बा चा स्वागाट् चोगुटु॥ 41 जुन्ङा माङ्काटालोङ्सा माङ्हाङ्ङाना खाबोर कामाप्बा नुङ् ओचेट्नुलोक् चोगुटु, हिट्नाङा माङ्काटाङा टोक्माना इनाम् डोक् टोगुटु॥ धारमोति याप्मिलाउङ्सा धारमोति याप्मि डोक् ए नुङ् स्वागाट् काचोक्बाङा धारमोति याप्मिङा टोक्माना इनाम् टोगुटु॥ 42 जुन्ङा खानि नागा खाट्टिउगा आचेलाचि नुङ् मामिट्टिउङ् ठिक् खोरे चिसो चुवा एडोक् ठुङ्मा मापिडिटि, छेम्बा डोक् आङा खानि लोनाँनि, हिट्नाँ उन्ङाना इनाम् खोना बेला चा मासुन्ना॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.