लुका 7 - आठपहरियारोमि काप्तानङाना बिस्वास ( मात्ति ८:५-१३ ) 1 येसुङा नागा सोब्बे रिङ् याप्मिचि लोमा हिडुचिउङ् उन् काफारनाहुम खालाङ्गालेङ् खाडे॥ 2 हिट्नापाका रोमि काप्तानङा आड्डिक् उनिङ्ग्वाङा चोना ठिबाङ् ओचाकार टुगाउङ् सिया लाबाना डाना॥ 3 हिट्ना काप्तानङा येसुङाना बारेङि खेम्सुए हिट्नुङ् उन् एला ओआप्युङ् ओचाकार नुमानिङ् ओचोगुवाक् नुङ् याहुदिचिगा ओठेडोङ्चि येसुङि बिन्टि चोक्सिङा पाङ्सुचे॥ 4 हिड्डेउङ् हिट्नागा चा येसुङि ओआबाउङ् नाड्डे लोसा बाबा ओचोगुए, “आडाङ्बा, ना काप्तान घुवार फामा निङ्ग्वा चोना खाले याप्मि ए॥ 5 पोङ्भोने हिट्नाङा आनिगा याहुदि छोङ्चि लुक्मा टुक्टुचिगा, हिट्नुङ् उन्ङा डोक् आनिगा याहुदि छुम्मापाङ् चा चोक्माउङ्सा घुवार याप्मिफाडेसे॥” 6 हिट्नुङ् येसु हिट्नागालोक् खाडे॥ टरो उन्चि काप्तानङा ओपाङ् टामा नुङ्ना पाइले डोक् काप्तानङा नाड्डेना खाबोर लोडुचिउङ् ओसाइबाचि पाङ्सुचे, “आडाङ्बा, आपाङ्ङि टामाउङ्सा याङ्छामा फोगुन्, पोङ्भोने खान् आपाङ्ङि स्वागाट् चोक्मा आङा आप्पेलोङ्सा नुना याप्मि ठानाँ चोक्निङ्ना॥ 7 हिड्नाडेडोक् आङा आप्पे चा खान्ङि आप्मा नुना याप्मि नुङ् मिट्निङ्ना॥ टरो खान्ङा ठिक् रिङ् एडोक् आमाट्टुए भोने आचाकार नुयुयेट्युक्॥ 8 पोङ्भोने आङा आप्पे चा आङा नुङ्ना उठुङिगा हाकिमचि उछिक्ङि युङ्ङाउङ् टोॽवा काचोक्बा याप्मि हिट्नुङ् आङा उछिक्ङि चा उपिङ्बाचि उयुङ्ग्वा॥ आङा ठिबाङ् ‘खाडा’ लोडुङ्टुङ्, हिट्ना खाॽयुक्, आरको ‘आबा’ लोडुङ्टुङ् हिट्ना आप्युक्, हिट्नुङ् आचाकार चा ‘नाड्डे चोगु’ लोडुङ्टुङ्, हिट्नुङ् हिड्डे डोक् चोगुटु॥” 9 हिट्ना काप्तानङा उरिङ् खेम्सुङ् येसु आड्डिक् डोङ् डोक् ठोङ्डे हिट्नुङ् ओएङ्-ओएङ् ओआबागा याप्मिचिगा खिमेयाङ्मेलेङ् नोक्टाउङ् लोडुचे, “नाड्डे पाराना ठेना बिस्वास काचोक्बा याप्मिम्टे आङा इस्राएलि याप्मिचिङि चा टुब्निङ्गेट्निङ्ना॥” 10 हिट्नुङ् काप्तानङा पाङ्सुचिगा याप्मिचि ओनोक्टाउङ् पाङ्ङि ओटासुनाँ काप्तानङाना ओचाकार नुयाउङ् युङासाना उटुबुए॥ येसुङा लाङ्मेप्मा उइछा उहिङ्ग्वाट् चोगुटुटु 11 हिट्नुङ् ठिक् इप्पोक् लेम्बा एङ्स्वालेङ् येसु नाइन ओलोडुना खालाङ्गाङि खाडे॥ उन्लोक् ओचेलाचि हिट्नुङ् आरु जोम् याप्मिचि चा ओखाडे॥ 12 हिट्नापाका उन् खालाङ्गाङाना ठेना ढुवारिक्ङि टासुनाँ ठिबाङ् लाङ्मेप्माङाना ठिबाङ् एना उइछा सियाउङ् ओखाट्टुगेट्टुना टुबुचे॥ हिट्ना लाङ्मेप्मालोक् खालाङ्गाङिगा जोम् याप्मिचि चा ओडागा॥ 13 येसु डाङ्बाङा हिट्ना लाङ्मेप्मा निसुनाङा उनिङ्ग्वा टुगे, हिट्नुङ् “खान् हाप्नेन्” लोडुए॥ 14 हिट्नुङ् नेट्टाङ् खाडाउङ् येसुङा चेप् खोट्टुए॥ हिट्ना बेला लासा कायाङ्बाचि हिट्नि डोक् ओयेबे॥ हिट्नुङ् येसुङा लोडुए, “हाउ ठाङ्बेन्, कोबा॥” 15 हिट्ना बेला डोक् सियाना पिच्छा कोबाउङ् युङे हिट्नुङ् चेक्टे॥ येसुङा हिट्ना पिच्छा उमा उमुक्ङि पिडुए॥ 16 हिट्नि सोब्बे याप्मिचि उकिट्टे हिट्नुङ् माङ्हाङ्ङाना उनिङ् चोन्सा नाड्डे उपिगे, “आनि माझै चा ठेना ठिबाङ् माङ्काटा टाइसे॥” हिट्नुङ् फेरि चा उपिगे, “माङ्हाङ् आप्पे ओयाप्मिचि घुवार फासिङा टाइसे॥” 17 ख्वाप्पा याहुदिया हिट्नुङ् हिट्ना याम्बा-नायाम्बागा सोब्बे छेट्राङि येसुङाना बारेङि खाबोर छिन्डे॥ येसु हिट्नुङ् बाप्टिस्मा कापि युहान्ना ( मात्ति ११:२-१९ ) 18 बाप्टिस्मा कापि युहान्नाङाना ओचेलाचिङा येसुङा चोगुना हिट्नागा ख्वाप्पा रिङ्चि युहान्ना ओलोडुए॥ हिट्नुङ् युहान्नाङा इप्पाङ् ओचेलाचि छेम्डुचे, 19 हिट्नुङ् उन्ङा येसु डाङ्बाङि नाड्डेना खाबोर लोसिङा पाङ्सुचे, “हाट्ले टायुगेट्ना खिरिस्ट खान् डोक् इ, आरु कोइङाना लाम्बो पुयुम्मानि?” 20 हिट्नुङ् हिट्नागाचि इप्पाङ् येसुङि खाडाचिउङ् लोडाचुए, “आन्च्याँ बाप्टिस्मा कापि युहान्नाङा नाड्डे पिक्सा याप्मि पाङ्सेसे, ‘हाट्ले टाना खिरिस्ट खान् डोक् इ, आन्याँ आरु कोइङाना लाम्बो पुयुम्मानि?’” 21 हिट्ना बेला डोक् येसुङा जोम् रोगि, उटुगागा हिट्नुङ् ओचाफेन्ना रिमेट्ङा लाबुचिगा नुमानिङ् चोगुचे, हिट्नुङ् जोम् याङ्कानिनिबाचि चा उनिसुलोक् चोगुचे॥ 22 येसुङा युहान्ना ओचेलाचि लोडुचे, “खाडानि, हिट्नुङ् खानिङा आनिसुम्गा हिट्नुङ् आखेम्सुम्गा नागा रिङ् युहान्ना लोडानुम्– याङ्कानिनिबाचिङा उनिसुएट्टु, लाङ्गाडाचि ओलाम्टिएट्, कोर रोगिचि उनुएट्, याङ्ओखेम्निगाँ ओखेम्सुएट्टु, उसियागा उहिङ्ग्वाट् उलियुङ् ओकोब्एट् हिट्नुङ् पाक्चा ओवानिगाँ ओचेट्नुना खाबोर खेम्मा ओटोगुएट्टु॥ 23 हिट्नुङ् आङाना कारानङा उन्चि निङ्ग्वा खोनालेङ् चा उरिसुन्गा लोङ्सा माङ्हाङ्ङा आसिक् पिडुचिचि॥” 24 हिट्नुङ् युहान्नाङा पाङ्सुचिगा ओचेलाचि ओनोक्टाउङ्, येसुङा हिट्नि उलिसिगा याप्मिचि युहान्नाङाना बारेङि लोडुचे, “खानि साक्चा उयुङ्निना डेन्ङि पाक् पुसिङा आखाडिएगा टे? पाक् हिॽवाङा वान्डुना पारयाङ् पुसिङा आखाडेइगि? 25 खानि पाक् पुसिङा आहोन्डिएगा टे? पाक् ओचेट्नुना लोट्लिङ् वाडुना याप्मि पुसिङा इ? हिट्डेगा ओफाङ्-ओफाङ् लोट्लिङ् ओवाड्गा हिट्नुङ् लिम्गा लिम्गा चासा युङ्सा ओचोग्गा याप्मिचि हाङ्पाङ्ङि एडोक् उलियुक्॥ 26 हिड्डे भोने खानि पाक् पुसिङा आहोन्डिएगा टे? माङ्काटा पुसिङा इ? आए, छेम्बा डोक्, आङा खानि लोनाँनि, खानिङा माङ्काटा नुङ्ना चा ठेना ठिबाङ् याप्मि आनिसुएसुम्मे॥ 27 पोङ्भोने धारमाछाप्लाङि युहान्ना बाप्टिसङाना बारेङि नाड्डे छेप्टेसे– ‘आङा आङाना खाबोर कालो खान् नुङ् आघि-आघि पाङ्सुङ्टुङ्, उन्ङा डोक् कालाम्बो टेयार माचोक्युबियुक्॥’ 28 “हिट्नुङ् आङा खानि लोनाँनि, बाप्टिस्मा कापि युहान्ना नुङ्ना माङ्ठेना आरु साक्चा ओपोङ्निगेट्निगा, हिड्डेलिचा माङ्हाङ् उमुलुक्ङि सोब्बे नुङ्ना खाट्टिउनाम्बाक् युहान्ना नुङ्ना चा ठेना लियुक्॥” 29 हिट्नुङ् ख्वाप्पा याप्मिचि, तिरो काफोक्बाचिङा चा येसुङाना रिङ् ओखेम्सुए, हिट्नुङ् माङ्हाङ्ङाना लाम्बो ओचेट्नुना डोक् पिक्सा उन्चि निङ्ग्वाङि उयुङ्सुए, पोङ्भोने हिट्नागाँ युहान्नालाम्मा बाप्टिस्मा ओलाडुएसुना॥ 30 टरो फारिसि याप्मिचि हिट्नुङ् धारमाबिधि काहिसिग्बाचिङा युहान्नालाम्मा बाप्टिस्मा ओचोग्वाट्टुन्, हिड्डेउङ् माङ्हाङ्ङा उन्चि लोङ्सा चोगुना योजाना इन्कार ओचोगुए॥ 31 येसुङा माट्टुए, “ना टालाङिगा याप्मिचि आङा पाक्लोक् टोङ्सुङ्चिङ्गा? हिट्नागा खोड्डेगा? 32 हिट्नागाम्टे बाजारङि ओपाङ्ग्वागा पिच्छाचि गाड्डेगा, हिट्नागा आप्पे-आप्पे नाड्डे उमाट्टुगा– ‘आन्याँ खानि लोङ्सा मुरालि टेनुम्मे, टरो खानि आलाॽवास्याट्टिन्, आन्याँ सानिङ्ग्वा लोसिङे, टरो खानि आहाबेट्टिन्॥’ 33 “पोङ्भोने बाप्टिस्मा कापि युहान्ना चालेपा मिचाए हिट्नुङ् आङ्गुरङाना इमालिङ् चा मिठुङ्ङे टाए, हिट्नुङ् खानिङा उन् टोन्डेबाङा लिन्डोएसुए आलोडुम्मे॥ 34 याप्मि छा चासा लोक् ठुङ्सा टाए, हिट्नुङ् खानिङा ‘पुयानुम्, हिट्ना राक्पा, टेडुबा, तिरो काफोक्बाचिगा हिट्नुङ् पापिचिगा टाक्’ नुङ् आलोडेट्टुम्॥ 35 टरो ठोना माहामाना नुङ् हिट्ना ठोना गाड्डे काचोक्बाचिङा एडोक् माप्मा उहिडुटु॥” येसुङा पापिनि मेन्झेमा छेमा पिडुना 36 ठिबाङ् फारिसि याप्मिङा येसु युसा पाकाना चामा चासिङा छेम्डुए॥ हिट्नुङ् उन् हिट्ना फारिसि याप्मि ओपाङ्ङि खाडाउङ् चामा चासिङा युङे॥ 37 हिट्ना खालाङ्गाङि ठिबाङ् पापिनि मेन्झेमा डाना॥ हिट्ना मेन्झेमाङा फारिसि याप्मि ओपाङ्ङि येसु चामा चासिङा टायाना रिङ् खेम्सुए, हिट्नुङ् हिट्नाँ लुङ्गेॽवाङा चोक्बालाक् सिङ्गामरमर ओलोडुना सिसाङाना बोटालटेप् माहाङ्गो आट्टार आप्टुङ् आबे, 38 हिट्नुङ् येसु ओएङ्स्वालेङ् आबाउङ् हाप्सा येसु ओलाङ् उमिॽवाङा वेक्टुए, हिट्नुङ् ओफ्याक्ङा टुक्सा उन् चुम्पा चोक्सा स्या मेट्टुङ् हिट्ना आट्टार नेक्टुबिडुए॥ 39 हिट्नुङ् येसु छेम्डुना फारिसि याप्मिङा हिट्नाडेना निसुङ् उनिङ्ग्वाङि मिट्टे, “ना याप्मि छेम्बा डोक् माङ्काटानाम्बे उन् काखोट्बा खोड्डे पाराना मेन्झेमानुङ्बे मिसेन् निसुए, पोङ्भोने ना मेन्झेमा पापिनि डाना॥” 40 हिट्ना बेला येसुङा हिट्ना फारिसि याप्मि लोडुए, “हाउ सिमोन, आङालोक् खान्लोङ्सा ठिक् रिङ् लोमाना युङ्ग्वा॥” हिट्नाङा लोडुए, “काहिसिक्बा, याङ्लोडा॥” 41 हिट्नुङ् येसुङा हिट्ना ना मुन्डुम् लोडुए, “इप्पाङ् याप्मिचिङा माहाजानलाम्मा नाॽवा लोगाचुङ् ठिबाङ्ङा लेम्बोक् साए रुपा राङ् हिट्नुङ् आरकोङा पाँच साए रुपाक् राङ् खाट्टाइसाचुगा॥ 42 टरो हिट्नागाचि इप्पाङ् डोक् नाॽवा हुङ्मा हिचुवाट्चुन् नुङ् माहाजानङा इप्पाङ् डोक् माफ पिडुचे॥ हाट्ले माट्टुटे, नागाचि इप्पाङ् माड्डे माहाजान खोनाम्बाक्ङा याप्मा माया चोगुटुना होला?” 43 सिमोनङा माट्टुए, “आनिङ्ग्वाङि हिट्ना जोम् नाॽवा छेमा टोगुनाङाम्बाक् याप्मा माया चोगुटु॥” येसुङा लोडुए, “खान्ना ठिक्का डोक् आमाट्टुए॥” 44 हिट्नुङ् येसु हिट्ना मेन्झेमालेङ् नोक्टाउङ् सिमोन लोडुए, “ना मेन्झेमा पुयुटे, आङा कापाङ्ङि आबाङे, टरो खान्ङा आलाङ् वासिमा चुवाधारि आपिनेट्निङ्॥ टरो ना मेन्झेमाङाउम्टे उमिॽवाङा आलाङ् याङ्वासिडाबिडे हिट्नुङ् ओफ्याक्ङा याङ्टुगाबिडे॥ 45 खान्ङा आङा चुप्पा मेट्सा स्या चा याङ्आमेट्नेट्निङ्, टरो ना मेन्झेमाङा आङा टायाङ्नाउङ् आलाङ् चुप्पा चोक्मा नाडुन्गेट्टुन्ना॥ 46 हिट्नुङ् खान्ङा आटेहेक्ङि क्या चा आनेक्निबिनेट्निङ् टरो ना मेन्झेमाङा आलाङ्ङि बुङ्बुङ् नाम्ना आट्टार याङ्नेक्टाबिडे॥ 47 “हिड्डेउङ् आङा खान् लोनाँ, नाङा जोम् पापलाम्मा छेमा टोगुनाँ, ना मेन्झेमाङा आङा जोम् माया याङ्चोगाना रिङ् याङ्निमेट्टे॥ हिड्डे डोक् कोइ याप्मिङा नाट्टिप्मा पाप छेमा टोगुटु भोने, खाट्टिप्मा डोक् माया चोगुना रिङ् पारकाट् चोगुटु॥” 48 हिट्नुङ् येसुङा हिट्ना मेन्झेमा लोडुए, “कापापचि छेमा लिमा हिडे॥” 49 हिट्नि उन्लोक् चामा ओचोगा उन्चि उन्चि उपिगे, “पाप छेमा काचोक्बा ना साइना टे?” 50 हिट्नुङ् येसुङा हिट्ना मेन्झेमा लोडुए, “काबिस्वासङा खान्ङा मुक्टि आटोगुए, हाट्ले हाङ्हाङ्लोक् खाडा॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.